| ||||||
| 上期曾志偉，今期黃百鳴，《七十二家租客》對《花田囍事》，鬥到七彩。 據說，無綫偏幫《七十二》，打擊《花田》，老闆兼導演兼演員的黃百鳴憤而怒抽廣告。 這天他笑嘻嘻說：「只是無再落廣告，訂了的照去，我不會發火。」 他永遠笑嘻嘻的。 「都是好事，香港賀歲片好多年未試過咁熱鬧，打晒對台，代表觀眾有得選擇。 最好你睇完《花田》，再睇《七十二》。 排名絕對要分先後。一天廿五小時 今次拍《花田囍事》，好趕好趕，演員個個都僅有十幾日期，而且這個來那個走，十一名演員，可以湊齊的只有一日，最後一場群戲，結果我們一日拍廿五個鐘，總算趕到。 我喜歡快，證明到這世界無話唔得，肯做就得。你問我相不相信慢工出細貨？我都慢過，拍《葉問》便是，我也想慢工，但出來效果快未必差，就不一定要慢慢玩。 ○九年我拍《家有囍事》時，香港已許久沒賀歲片——我說的賀歲片是一家大細啱睇，吉吉利利笑住大團圓，觀眾買飛不是畫一個兩個位，是一畫一兩行，因為帶埋爺爺嫲嫲合家觀，你話幾好呢。 這種賀歲片已多年沒有了，有一年甚至拿《門徒》來賀歲。我上年開了個頭，今年引來很多同業來分一份蛋糕，港產式賀歲喜劇正式回歸了。不要怕競爭，最怕無人落場。 喜劇一向攞唔到獎，不要說賀歲喜劇，是所有喜劇都攞唔到獎，連我偶象差利卓別靈有生之年都未得過奧斯卡。 預咗攞票房，便不要預攞獎。票房不只代表市儈，是代表更多觀眾得到娛樂，好慶幸，我兒子也有此理念，他也認為寫劇本應該寫給普羅大眾睇。 我兒 我兒子黃子桓，今年三十歲了，編寫過《葉問》，今次第一次寫喜劇，是我可以信賴的工作伙伴。 我沒有刻意栽培他，他中學畢業，話要來拍電影，我立刻送他到加拿大讀經濟，希望他做金融地產銀行都好。 我不想他入我這行，電影我做了咁多年，有起有跌，有黃金機會有黑暗時代，幾多電影人被淘汰，幾多人轉了行，成功的不多。 到他大學畢業，我無得再阻止，就准他來公司，他也好慘，身份尷尬，公司邊個叫得郁佢？人家不敢叫你做，你就主動做吧。我叫他拍幕後花絮，不會影響到人，於是他跟我們去橫店拍《龍虎門》。 在橫店，演員導演與工作人員住不同級數酒店，他便主動提出與工作人員同住，因為這次他真的是工作人員。 我不知他何時開始愛上電影，他小時候正值我在新藝城的搏殺期，我連仔女讀邊間學校讀幾年班都唔知，無時間陪他們，可能兒子就是看我的影帶長大。 他寫《葉問》寫了一年，改了九稿；到今次寫《花田囍事》，只寫了一個月，已經拍得。他是我首選，我自己寫番唔係唔得，辛苦啲囉。最好都是年輕人寫，我在新藝城寫的劇本受歡迎，因為當時我也只三十幾歲嘛。 人家問我去年最大收穫是什麼，我拍了兩部戲，一套《葉問》攞咗獎，一套《家有囍事09》做了票房冠軍，但我最開心是兒子真正成為了一個好編劇，這才是長久。 兒子成了材，也改變了我的想法，點解要開間天馬電影公司？因為他屬馬，而編劇就是天馬行空，名是為他而改的。作為創業作的《花田囍事》我落手落腳，拍埋演埋，就是希望幫他打響頭炮，其實這間公司是他的，出品人我都落了「黃子桓」個名。 女兒黃漪鈞就主要做宣傳推廣發行工作。 我開過三間電影公司，第一間是新藝城，第二間是東方，第三間天馬，並非為自己，是為了兒女。 黃金十年 九七年拍完《97家有囍事》，我老婆生癌，我停了所有工作陪她打這場仗，到她成功康復，我也想轉轉工作模式，想將公司企業化，搞上市，結果東方在二○○一年九月十二日，大冧市日上市，之後又非典，那幾年好辛苦，電影交給人拍，水準不好，其實應該轉行，但我有信念，因為我都食電影飯長大，便投資些低成本的，像《九個女仔一隻鬼》和《陰陽路》系列等等。 終於等到CEPA出現，容許港產片在內地發行，拍我這種題材要獲批文並不難。香港電影的低潮期我相信已過去，未來是黃金十年，甚至比新藝城的黃金十年更旺盛，當年我們有的是六百萬觀眾，現在講緊十三億。 我幾enjoy做演員，最舒服，九百幾人服侍；導演最權威；編劇最有滿足感，由無到有；做老闆最辛苦，使完錢仲要望天打卦，這些身份甜酸苦辣我都做過了。 我不會做第二行生意，一來唔識，二來無興趣，替報紙寫專欄，我起了個欄名叫《電影我要嫁給你》。 我相信事在人為。我是打擂台跌落地數到第九下，一息尚存，我仍會爬起身。 裝飾 談了半天攞不攞獎，訪問的現場 —— 天馬公司的會議室，安放一尊雕塑，美國金像獎加香港金像獎 —— 誰說黃百鳴不在意？ 「裝飾而已，裝飾而已……」黃百鳴竟有點忸怩起來。 | ||||||