| ||||||
| 踏入12月，一年一度嘅乜乜競選又嚟料。Google搜尋器每年都將嗰年網友搜尋嘅字眼，嚟一個排名，華華噚日攞到第一手香港熱門關鍵字排行榜名單。 有關方面今年首次run咗張「年度富豪搜尋排行榜」，排第一嘅呼之欲出，就係7月中風兼跌親撼到頭嘅賭王何鴻燊。自從賭王入院，何家各房姨太兼仔女，日日去醫院探病，勤力過返工；傳媒仲賣力，24小時守候。相信大家都祝願賭王快啲出院，咁大家先可以安安樂樂過聖誕。 至於排名榜第二位，就係小小超李澤楷。佢今年一索得男，4月時梁洛施為李家添咗「長治」呢個男丁，令一眾港女「震驚」，華華唔少女性朋友喺新聞見報當日，即刻search吓，究竟小小超幾時娶梁小姐入門。好彩港女原來仲有希望！ 以 為跟住第三位係澤楷老竇──超人李嘉誠？但佢只係排梗頸四，稍稍高過已故小甜甜龔如心！香港人一向國際化，搜尋嘅富豪唔單止香港人。今年勁hit嘅科技產 品，首推iPhone，好自然蘋果公司「大腦」──行政總裁喬布斯（Steve Jobs）嘅病情，亦成為網友有興趣嘅搜尋對象。 股票榜金隅最多人搜尋 奇怪嘅係排行榜十大，唔見自稱「冒牌股神」嘅四叔李兆基，反而今年喺《福布斯》中國富豪榜「降呢」嘅碧桂園（2007）太子女楊惠妍都入到十大。不過上榜富豪，佔最多嘅唔係有病，就係「揩咗嘢」，唔上榜可能係好事。 除咗人氣富豪，華華仲收到28個搜尋排行榜名單，同樣係今年新增嘅仲有股票搜尋排行榜。最多人search嘅股票係金隅（2009），緊隨其後係國藥（1099），兩隻分別係今年「凍資王」亞軍同冠軍，難怪多人搵。 李華華 [email protected] Google 09年香港熱門關鍵字排行榜 富豪搜尋排行榜 排名：1富豪：何鴻燊 排名：2富豪：李澤楷 排名：3富豪：喬布斯 排名：4富豪：李嘉誠 排名：5富豪：龔如心 排名：6富豪：榮智健 排名：7富豪：黃光裕 排名：8富豪：索羅斯 排名：9富豪：蔡衍明 排名：10富豪：楊惠妍 股票搜尋排行榜 排名：1股票：金隅（2009） 排名：2股票：國藥（1099） 排名：3股票：滙控（005） 排名：4股票：中冶（1618） 排名：5股票：華南城（1668） 排名：6股票：霸王（1338） 排名：7股票：中國全通（633） 排名：8股票：華潤水泥（1313） 排名：9股票：承達國際（2288） 排名：10股票：利郎（1234） | ||||||