蔡東豪劈炮 老闆：佢多才多藝 知名專欄作家、精電（710）執行董事兼行政總裁蔡東豪，月初突然辭任CEO一職，明年三月底離任。佢老闆高振順，一向都好欣賞蔡東豪，又話佢有見地，文章又寫得好，人又精明能幹，讚到佢只應天上有！猛將離任，小宗梗係即刻搵高振順問吓，高振順話：「蔡東豪佢多才多藝囉。你睇佢都踏入五十歲，可能有其他諗法。佢喺廠都做咗十年，唔容易喇，當時入間廠得佢一個人。」他又指蔡的辭職，是出於有私事要處理，「我諗你睇番通告啦，全部講清楚，我哋之間嘅關係冇任何問題，佢嘅離開係佢自己辭職。」 精電總裁之位，就由高振順的千金高穎欣在明年繼任。今年三十五歲的高穎欣，在倫敦帝國學院取得金融碩士學位資格，然後在銀行界打滾七年，先後在摩根士丹利、摩根大通和滙豐這些外資大行浸淫，現時兼任父親旗下的中國風電（182）和瑞東（376）董事。高穎欣每月係收取十三萬的酬金，遠低於蔡東豪作為董事時，平均每月收取的四十三萬元。 計番蔡東豪喺過去十年間，跟住高振順一個老闆，最少袋咗七千八百多萬元酬金，算得上「光榮離任」。傳聞蔡東豪會喺明年，同《主場新聞》嘅舊部再搞網上新聞。不過咁喎，仲記得今年七月《主場》宣布執笠時，剛剛係開業兩周年嘅前兩日，所以唔使支付員工遣散費。而家「佔中」一過，轉個名又重新開業，點解咁似啲執咗又開番嘅酒樓嘅？爽自己慳人哋噃。 踢竇試房委會家常小菜 房委會蝕錢蝕到阿媽都唔認得，計○五年賣商場、停車場俾領匯，最近財爺又話要將近三百億投資收益，俾埋房委會攞去起公屋。不過，小宗肯定房委會有樣嘢係唔會蝕錢嘅，就係佢哋逼到爆嘅職員餐廳！一般職員餐廳都係由大型連鎖食肆營運，再由公司補貼或者免租，所以價錢特別平，但大部分講唔上好食，有啲甚至好難食，連食評家都忍唔住寫文去鬧。不過，有老友最近就帶小宗去房委會，見識吓咩叫好食嘅職員餐廳喎！呢個神秘嘅職員餐廳，位於房委會何文田總部第四座三樓，中午只接待職員，但一到晚市就接街客。老友話呢度只有大枱可以訂，兩三個人食飯就要趁早去，因為晚市多人到插針都插唔落。果然，小宗七點鐘上到去，已經全部爆滿，有幾圍更要坐喺升降機口開餐。聽職員講，呢間餐廳以前都由連鎖食肆營運，十年前轉手俾人小本經營，就開始好好生意。呢度環境同一間酒樓無咩分別，菜式唔搞花臣，都係梅菜扣肉、蒸肉餅、咕嚕肉呢啲家常小菜，分量又唔係特別多，但勝在每樣都好入味，而且價錢平，五十九蚊一碟蒜香骨有成十幾件，都算足料。唔怪得王菀之、胡楓都專程入去幫襯。 保利協鑫老細明搶 主打硅片及多晶硅嘅保利協鑫（3800），07年喺香港上市，跟住一路都係散戶當炒愛股，主席朱共山仲有個朵，叫「光伏大佬」。公司股價曾最高炒到上5.56元，不過近年就係咁碌，跌到而家一元幾毫。早個月朱共山仲明目張膽，要賣走公司最值錢嘅嘢。話說該公司喺11月中，突然出通告，話要將旗下佔公司六成盈利嘅硅片業務，以101億港元出售。小宗發現，呢宗交易話就話純粹出售廠房，但魔鬼在細節，交易原來會一併出售一啲附屬公司，而呢啲附屬公司，其實內藏94億現金！嘩，即係交易實質出資，只係７億元；市場相信，朱主席跟手會再將呢批資產，注入由佢經營，但負債纍纍、正垂死掙扎嘅A股上海超日（002506）。喂，咁即係攞保利最值錢嘅資產，去救朱主席嘅公司啫！小股東仲肯過你？上週五佢哋終於宣布取消交易。當初賣資產，公司解釋係要減低沉重負債；咁而家唔賣，又點降低債務呢？朱生，同小股東講兩句好喎！ | ||||