古惑女美國治乳癌皮膚癌崩潰陳秀茹病後重生
1 :
GS(14)@2016-09-17 16:15:45【積極抗癌】■證實患上乳癌及皮膚癌的陳秀茹，現正於美國西雅圖接受治療，她表示會積極面對。互聯網圖片
現年38歲、曾演出電影《古惑仔之人在江湖》的陳秀茹（Suki），淡出娛樂圈近十年，現移居美國，去年底返港透露左胸有良性水瘤。以為避過一劫，怎料今年7月，Suki再發現乳房有異常硬塊，經化驗後證實患上乳癌，並同時發現下巴位置有皮膚癌，Suki在電話中嘆謂：「最辛苦真係食藥，嘔嘅程度簡直令人崩潰！」不過Suki仍懂苦中作樂，裝義乳時向醫生謂「大啲啲都唔介意。」
據悉陳秀茹現正身在美國西雅圖一間醫院接受治療，上月中已切除胸部癌細胞組織，並裝上義乳。Suki日前接受本報電話訪問，坦言最初發現時好驚，她說：「絕對係好驚啦！有成三、四粒好似一個波咁嘅癌細胞腫瘤。但人生都要面對，希望努力啲啦，做人最緊要開心。其實上年發現時只係水瘤，當時話已經冇事，但好不幸我再有，而且已經變咗癌細胞，呢啲冇得改變……我仲要唔止有乳癌，仲有skin cancer（皮膚癌），下巴底有異常，遲啲會用laser刮咗佢，醫生話應該冇疤痕。」
【亞姐出身】■17歲參選95年亞姐的陳秀茹，出道時有「翻版鍾楚紅」之稱。資料圖片
■面對龐大的醫藥費，陳秀茹幸得已分居的外籍丈夫Andy幫忙。資料圖片
前夫幫補醫療費
問到醫藥費能否負擔？Suki說：「醫藥費好貴，好彩我都有啲積蓄，好幸運囉。」她還自爆與建築師老公Andy已經分居一段時間，幸對方仍有幫忙負擔部份醫療費用：「我哋分咗居，佢係我人生裏面遇到嘅好男人，雖然已經唔係夫婦，但多謝佢一直扶持我。」Suki還感激一班好朋友的鼓勵和照顧，她說：「喺外國冇親人，呢班朋友真係好難得。講真，我直情係崩潰，冇可能自己撐，佢哋日日輪流嚟照顧我，帶湯飯、沖涼、洗面、氹我啦，冇佢哋真係過唔到呢一關，我係好好彩。」問到此刻最大心願？她說：「之前出嗰本食譜《Crazy& Passionate Healthy Cooking》喺美國賣咗過萬本，嚟緊會再推出一本愛情小說《Last Call》同第二本烹飪書，希望都會成功。」採訪：嵐山
【山雞女友】■陳秀茹96年拍電影《古惑仔之人在江湖》，飾演陳小春女友。
■陳秀茹感激眾好友在她患病時，經常鼓勵及在生活上照顧她。
來源:
http://hk.apple.nextmedia.com/entertainment/art/20160915/19771103
裝義乳揀Szie陳秀茹苦中作樂：唔介意整大啲
1 :
GS(14)@2016-09-17 16:15:45【服藥狂嘔】■陳秀茹因服用藥物的副作用大，以致狂嘔，十分辛苦。
Suki透露現在身體很虛弱，一個月已瘦了14磅。雖然乳癌初期不需要做化療，但藥物副作用好大，Suki因嘔得太厲害，所以要加吃十日藥，令她苦不堪言，她哽咽說：「最辛苦真係食藥，嘔嘅程度係我人生裏面冇諗過，簡直令人崩潰！根本食嘢唔係為食嘢，而係為咗畀佢嘔。」
嘔得勁加十日藥
雖然很辛苦，但Suki仍懂得苦中作樂，笑說：「可以講個笑話，原來隆胸真係好搞笑，我唔係成個胸切晒，只係切咗有問題部份，但醫生都有好多size畀我揀，話通常女人鍾意越大越好，咁我第一時間梗係話要番之前嗰個size就OK，不過大啲啲我唔介意嘅，醫生聽完都笑。」
來源:
http://hk.apple.nextmedia.com/entertainment/art/20160915/19771091
【馮仁昭四圍超】陳秀茹刮走下巴皮膚癌
1 :
GS(14)@2016-10-14 06:52:19■Suki（左）早前專登返診所送花畀家庭醫生，感謝對方。
陳秀茹（Suki）早前證實患上乳癌及皮膚癌，8月已切除胸部癌細胞組織，並裝上義乳；而上星期Suki再做下巴位置嘅皮膚癌切除手術。正喺美國休養嘅Suki，噚日喺電話中透露手術好成功，佢話：「之前背脊亦發現有紅疹，最初都擔心皮膚癌擴散到其他地方，好彩嗰個位只係普通細菌感染，cancer位置喺下巴，醫生已經幫我刮走咗，而家有一處白色，好近先睇到，醫生建議每晚按摩10分鐘，應該唔會留疤。」
■Suki喺上星期接受下巴位置嘅皮膚癌切除手術。
■Suki搵風水師睇屋，將傢俬大執位。
割乳癌後虛弱
由於Suki身體仍然好虛弱，暫時未能進食，體重降至104磅，佢解釋：「都係食乜嘔乜，暫時只係飲湯，但都OK嘅，其他嘢都逐漸好，胸冇咁痛、冇咁腫，睇落好自然，我盡量日頭唔食止痛藥，六個月後會再覆驗一次，就正式知道係咪安全。」Suki日前仲專誠送咗束花畀家庭醫生，佢話：「多得佢幫我及早發現，如果唔係後果仲嚴重。」
Suki冇宗教信仰，但去過鬼門關，最近搵風水師幫佢睇過間屋，佢話：「風水師係我朋友，佢叫我髹過間房顏色，轉過傢俬位置，仲安裝咗六盞風水燈，真係希望唔好嘅嘢走晒，新嘅好運齊來。」撰文：馮仁昭
來源:
http://hk.apple.nextmedia.com/entertainment/art/20161014/19799926