中環在線：仰融搵巴曙松入局 李華華
2008-09-12 AppleDaily
曾 喺01年《福布斯》中國富豪榜排第三位、華晨汽車（1114）創辦人兼前主席仰融，家陣遙控揸fit嘅遠東金源（1188）噚日宣佈，委任巴曙松做非執行 董事。巴曙松唔係等閒之輩，佢係中國（海南）改革發展研究院金融研究中心主任，同時亦係國務院發展研究中心金融研究所副所長，可以講係中央政府嘅金融智 囊。搵到個咁有份量嘅人做非執董，華華當然有聯想，唔通同仰融有關？話說身家一度高達近70億銀嘅仰融，04年同內地政府因華晨股權出現爭拗，搞到要出走 花旗，仲俾遼寧省發通緝令緝捕。
仰融為咗證明自己清白之軀，同遼寧省政府打官司，結果仰融以「水落石不出」總結，仲話成件事就好似阿媽教仔，唔理乜嘢事， 打咗個仔先，但做仔嘅又唔可以同阿媽劃清界線，又好難要阿媽認錯，惟有仍然留喺花旗。家陣巴曙松肯做市值只有9億銀嘅遠東金源非執董，唔知係咪暗示內地唔 再追究仰融，唔使再滯留花旗，有機會返番祖國呢呵。根據通告，巴曙松唔收董事酬金，只會攞酌情花紅。