📖 ZKIZ Archives

上期本刊替千億股壇玩家肖建華起底，金魚缸內消息可謂滿天飛，甚至有人主動「補料」。篇文出街，曾被封殺嘅肖建華又返唔到大陸矣！皆因阿爺最棹忌者，係有關同太子黨嘅關係。據有心人報料，肖建華除咗同前國家副主席曾慶紅之子曾偉係朋友，仲同現任國家主席習近平嘅細佬習遠平交過手。

一近一遠，但兩兄弟同家人與香港都甚有淵源，有傳現年五十七歲、一向低調嘅習遠平，原來九七年前曾移居香港，後轉往澳洲。網上消息一直話佢係國際節能環保協會會長，但翻查呢個協會嘅網站，根本無會長一職，成員名單亦不見習遠平。而習總胞姐齊橋橋（小時候因避嫌而改姓），早於八七年已化名齊蓮馨，並已取得香港身份證，在香港成立多間公司，更購買物業。但公司通通於○三至○六年間解散，現只持有一個在九一年購入的北角寶馬山花園單位。反而齊橋橋的女兒張燕南，現時仍揸住半山御花園、淺水灣麗景道及五個灣仔會景閣單位等，但○九年後未見入市動作。說回肖建華，每次大刁，其大名一曝光，總會搞到一鑊粥 ，有傳原肯借錢俾泰國首富謝國民買平保的國家開發銀行，都不想與他沾上關係而縮沙，足見阿爺之敏感。近日網上一名「肖建華」仲刪埋微博，取消對「北大未名BBS」、「北大校友會」及「劉汝軍」（即明天系要員）的關注，似乎要撇清關係。不過佢刪咗後，粉絲人數反而由昔日的二千多急增至一萬七千人，人氣仲旺，唔知肖建華仲點樣保住「最神秘的金融巨鱷」呢個朵呢，又？

壹計就明CSL商譽太高後遺浮現

香港電訊（6823）公布收購CSL，市場反應正面。截至上週，股價累計上升13％；同期，母公司電訊盈科（8）股價也上升8％，恒生指數則微跌0.3％。收購通函上週公布，藉此分析一些大家可能忽略了的地方。在會計上，這項收購將以企業合併（Business Combinations）入賬，總收購價194億港元（下同），扣除CSL淨資產公允值的62億，餘數以商譽入賬，即為132億，佔收購價68％。在CSL的 62億淨資產中，通訊牌照、客戶基礎和商標等無形資產為53億，連同商譽共185億，佔了收購價超過95％！商譽代表什麼？理論上，商譽代表購買「未來經濟收益」的現值，大家普遍認為是協同效應帶來的回報。但倒轉來說，商譽就只是金錢付出（交易價）減去有形資產後的餘額！不管代表什麼，商譽仍要入賬，以非流動資產形式單獨列報在資產負債表上，儘管不用攤銷，但每年必須接受嚴謹的減值測試。當有市場價格下跌、科技改進、或利息上升等跡象，管理層不情願也是要根據會計準則，衡量資產減值需要。如有任何減值，減值全數要計入損益表。CSL每年溢利少於10億，還要扣減收購借貸利息，哪還可以承受多少商譽減值？大家要注意這減值的可能性和可能數額，有些減值跡象可能已浮現，任何減值也會對溢利和資產有沉重影響。猶記得電訊盈科2000年的財務報表，收購香港電訊的商譽也佔收購價約75％，最終在會計準則要求下，要與儲備抵銷，並在其後進行減值，資產由前一年114億變成2000年負資產141億。今天，一切歷史會否以一樣的軌跡，在不知不覺間重演？（林智遠）

本欄找來有二十多年經驗的資深會計師林智遠及鄔碩晉，每期踢爆一間上市公司的會計陷阱，股民入市前睇清睇楚，一計就明。

土豪手機龍虎榜

小宗以為，艾瘋都算得上係高階手機。原來喺強國嚟講，高處未算高。近日中電信同三星（Samsung）合作，推出商務手機「心繫天下W2014」，仲搵埋成龍做代言人。重金禮聘大哥做代言，擺明想講俾強國人知，係「大哥」嘅，就要用「心繫天下」。呢部機開賣後，又真係引來大批強國大哥搶購，而家已搶到成兩萬蚊（人民幣，下同）一部。以為兩萬蚊好貴？去年四月，珠寶設計師Stuart Hughes收到一個強國商人「柯打」，託佢用黃金同黑鑽石，整部獨一無二嘅艾瘋5出嚟。Stuart Hughes花咗九個星期完成，估值一億人仔，呢部手機都堪稱「代表作」啦！而專走奢華路線嘅Vertu，為迎合內地人口味，去年頭推出第一部Android機TI，開價六萬六千！去年底推出第二部叫Constellation，索價亦要四萬一千。林寶堅尼去年尾推出由不銹鋼材料製成嘅The Antares，又話用晒意大利皮，仲要人手製作，售價二萬四千七，一樣搶購一空。而家網上強國人都猛求貨，iPhone 5s？睇怕只有香港人嫌貴咯！