📖 ZKIZ Archives

香港上市公司現代傳播集團（72）主席邵忠與內地藝術界名媛王凱麗（Kelly），雙雙穿上浴袍的照片在網上瘋傳，疑為女方丈夫的「捉姦」照；別以為男方軍佬髮型是典型「大陸佬」，邵忠早喺九十年代發跡，本是廣州市鄉鎮企業管理局企業管理處處長，後來下海搞家電貿易，又與鄭經翰拍檔，在廣州創辦第一份彩色畫報《現代畫報》，敝刊九四年專訪過當時呢位大陸新發彩的「青年才俊」，他劈頭第一句話：「我揀老婆，一要是家中大女兒，二要有自己的專業，三要有文化水平，因為做大女兒的慣於照顧人，有自己專業的女人不會依賴丈夫，有文化水平則能與我溝通。」

應用此理念，邵忠與呢位藝術名媛「行得埋」都啱數噃，觀乎其上市公司，不單只是媒體生意，一五年年報顯示公司以近三千萬人民幣將手頭藝術品、油畫、照片及雕塑賣予邵忠本人，令公司有額外收益，呢位名媛活躍於藝術界，未知有否提供吓專業意見予邵忠呢？王凱麗肯定有專業、有文化水平，同邵忠呢位文化人溝通到，只不過係人哋老婆咁囉！

中環寸嘴：飛機梗係坐大架喇

工廈大王楊耀松長子，游走高級酒店、銀行，及知名食肆，與各路人士打交道，自認有jet set生活方式，透過美酒佳餚，察看人生百態，把「生平絕學」不吐不快與粉絲分享。

出得嚟行走江湖嘅人，最怕「車就愈坐愈大」——即係坐巴士，「屋就愈住愈細」，不過飛機都係坐部大架嘅好，出門我梗係揀A380空中巴士嘅頭等艙啦，近排天氣，好似個市咁，風大雨大，唔通坐架細機拋吓拋吓咩。星航嘅A380頭等艙有十二個位，我梗係轉去中間個情侶座寬敞啲，坐側邊望風景望唔夠咩，都好，有兩個廁所。上次坐Air France，十幾個頭等座位，得嗰一個化妝室，一個廁所，嘩，滿座起上嚟都要隊去廁所。香港星航個lounge，嗰碗雲吞麵都唔錯，鮮蝦包嘅，同麥奀記嗰箸麵差唔多，不過國泰個lounge有杯麵攞，擸番兩杯上機，呢啲唔係貪小便宜呀，返到屋企，jet lag醒咗整碗食吓，江湖救急嘛，我喺lounge都見到信和老細黃志祥，都擸番兩嚿三文治先上機，佢醒呀，上咗飛機有時唔係即刻開餐有好嘢食，有時有氣流等個幾兩個鐘，而且lounge唔係咁好坐，不如坐喺頭等艙搵件三文治頂住先。見佢同服務員傾得幾開心，又問吓人哋做咗幾耐，香港人定新加坡人，形象親切，呢啲友真係出嚟碌o架。

李光耀是非故居

李光耀過身時，其子李顯龍和李顯揚堂而皇之公開說，把相等於大屋市值的數額捐予八個慈善機構，又按父親的遺囑，大屋讓仍是單身的妹妹李瑋玲居住，如她遷出，就會把大屋拆除。小宗到大宅一看，已空空如也，但仍未有聲氣動工拆卸，早前女兒因不滿兄長李顯龍搞悼念父親活動而撰文發炮，反對多項英雄膜拜式紀念活動，寸兄長李顯龍欲掌權建立王朝；大宅會否拆卸或保留作紀念館，相信仍爭論不休。

陳智思低調送母

陳智思母親沈時芬過身，上週在跑馬地教堂舉行追思彌撒，陳家低調處理白事，連訃聞也不發，沈時芬一九五二年與陳有慶在泰國結婚，婚後相父教子，但與藝術結下不解之緣，對瓷畫、插花藝術、黏土藝術有研究，其作品被美國多間大學、泰國及馬來西亞皇室成員收藏，唔好以為陳智思在商界打滾一身銅臭，佢亦遺傳了母親的藝術細胞，對藝術充滿興趣，在加州Pomona College藝術系畢業。