十月十七日，中大頒發榮譽博士學位予五位知名人士，分別係李國寶爵士（榮譽社會科學博士），Barry James Marshall（榮譽理學博士），杜葉錫恩（榮譽社會科學博士），黃仁龍（榮譽法學博士）與鍾南山（榮譽理學博士）。李國寶、黃仁龍、杜葉錫恩、鍾南山四位名人之生平，香港人大都熟悉，Marshall呢位2005年諾貝爾醫學獎得獎人之故事，我地所知不多。讀讚詞，方知呢位馬素教授之故事十分有趣，幼時頑皮，大個仔之後可能係在科學上有所突破嘅根源。
馬素生於1951年，畢業於西澳洲大學醫學院，年幼時就充滿探索新奇事物嘅好奇心，一次叫細佬爬上樹，由樹上跳下來，看看有乜後果，結果係細佬跌斷手臂；一次佢將空置牛奶樽注滿火水放在餐枱上，細妹不知就裏，將牛奶飲下，佢打緊急電話求助，救番細妹；又有一次修理爸爸嘅電鑽，但將地線與中線調轉咗，爸爸企喺濕地上用電鑽，幾乎彈咗上太空。
如此大膽頑童做咗醫生之後，與另一位科學家發現「幽門螺旋桿菌」（一九八一至八四年間）係導致胃癌原因之一，但醫學界抱懷疑態度，質疑其真實性，指並無臨床實證，馬素不服氣，發揮幼時頑皮嘅本色，索性以自己身體做實驗，飲下細菌，自行在胃內培養幽門螺旋菌，果然生病，情況嚴重，然後佢用自己嘅方法治療自己，顯示佢嘅假設有實證支持。因有大膽奇異舉動，傳媒不斷追訪報導，吸引到維珍尼亞大學實驗室支持，研究基金手到拿來，卒之在1994年，美國國家衞生研究所發表公告：「治療十二指腸和胃部潰瘍的關鍵在於檢測和根除幽門螺旋菌」，之後，世衞組織接受幽門螺旋菌是引致胃癌原因之一。
中大校長沈祖堯係腸胃病專家，對馬素之學說所知甚詳，彼此互相欣賞。沈校長學生陳家亮（中大醫學院院長）在十月十七日就任中大卓敏內科及藥物治療學講座教授，亦是腸胃科專家，美國胃腸疾病協會曾經頒予David Y. Graham Lecture銜，成為第一位非美國本土學者得此榮譽。馬素教授後來在中大醫學院發表學術演講，吸引近千名學生及公眾聽講。 