萬南 二五中環 新煮意陷 息魔陷阱
1 :
GS(14)@2016-01-24 22:56:33http://www.metrohk.com.hk/index.php?cmd=detail&id=300839&search=1
有睇開本欄，都知萬南頻頻「關注」新煮意(8179)呢間公司，在下唔係同佢哋有仇，相反更不時幫襯旗下酒樓季季紅(圖)食有米豬，記住係去藍地總店，比其他分店好食多多聲。新煮意舊年股價勁插水，依家公司市值跌剩只得兩億，證明股東用腳投票，唔妥佢哋兩單收購同業發記及十八座狗仔粉嘅刁。
新煮意上個月底配股，伸手籌咗2,700萬，以為會用嚟擴展生意啦，點知一個屈尾十，竟然花咗大半呢筆錢炒股，上月底開始密密掃建行(939)，點知一買即跌，愈跌又愈買，最終累積用咗超過1,500萬掃咗3球建行，平均買入價每股$5.02，暫時帳面已經輸咗百零萬，唔知要賣出幾多萬隻有米豬，先賺得番呢筆數。
又或者你會話買建行係大藍籌，現價又有8厘息咁高，相當吸引喎。但萬南依然認為新煮意不務正業，尤其係啱啱先問股東攞錢，要買建行，散戶唔識自己買咩？再講，8厘息係假設今年派息會維持不變，不過舊年內銀生意難撈，盈利能力肯定大不如前，萬南夠膽人頭博芋頭，今年內銀肯定會削減派息，結果買內銀就好似跌入息魔陷阱，最終愈買愈多中伏。