「老闆對我唔好！」90後與初入職場者的通病大多相同，覺得工作不適合自己、公司不為自己着想、講求工作與生活平衡，而作為老闆的60及70後，則會覺得現時的年輕人不可靠，如此的狀況，又怎會有良好的晉升機會呢？ 「金寶湯之父」何炳佑(Adolf)希望盡早令踏入職場的生力軍好好裝備自己，除了撰寫《初入職場的越級挑戰》及《專門行業職場的越級挑戰》外，這次還給予各準大學生建議，希望他們在讀大學期間先鞏固自己各方面的能力，才能盡早適應職場生活，發揮最佳的潛能。 「初初將外國人認為係廚餘嘅雞湯，重新包裝為史雲生清雞湯，我希望將佢做到成為『開門第八件事』。所以一開始我同飲食專家研究季節性食譜，再到每日食譜，將其擴闊到變為日常需要。其實品牌發展同做人一樣，做人都要建立個人品牌形象，人際關係對日後工作同升職都好有幫助。」聽前金寶湯大中華董事總經理何炳佑(Adolf)的一番話，記者尤如上了一堂實用課一樣，發現在職場上有很多需注意的事項。 Adolf有30年從商經驗，但年介五十時才轉行，「當時我喺科大教MBA school同埋做career director，跟進學生嘅個案多咗，發現學校着重技巧培訓，雖然學生的學術能力問題不大，但軟技巧，如人際關係同團隊合作方面就做得唔夠。」希望幫助新一代，成為Adolf出書的動力，故他訪問了6位學生及10位不同在職人士，了解他們的心態、思想及缺乏的因素，與大家分享。 要有awareness 從校園走到職場，很多學生都未能間適應，「懶、自我、冇team work、遲到、冇手尾，係一般90後通病，雖然佢哋嘅idea創新，但呢啲陋習會阻礙晉升。肯改變自己，就嬴左第一步，要有awareness，提醒自己唔係學生，要兼顧同事同公司嘅需要。」 做事要圓滑 Adolf表示在商業社會中，很着重個人成熟表現與圓滑對答，於遇到客人投訴或工作應酬上都需要交際技巧。「試過有學生分享事例，老闆叫埋佢同客人一齊食飯，點知學生以為自己係客人之一，唔識同人打招呼之餘，仲唔講嘢。」 斟茶藝術 Adolf認為要學懂「斟茶藝術」，但這是90後比較弱的一環，因他們都被家人寵慣，不屑服待別人，但斟茶可打開與客人的話題匣子，更可把握機會推銷公司，藉此表現自己，有時與競爭者比較，高下立見就在於這些微小細節。 敢於嘗試 Adolf指做好本分故然重要，但想升職的話，便得脫穎而出，目光不可以只集中於當前，需出謀獻策，分擔老闆的憂慮才有機會突圍而出，他以個人經驗為例，「做食品成日都面對好多危機，試過有產品存貨過多，要諗方案刺激消費，呢個時候創新能力好重要。我諗到將罐頭放喺油站賣，客人可以成箱買，然後放喺車尾箱拎走。面對唔同嘅方法，唔怕失敗，敢於嘗試先會成功。」 暑期工試行情 DSE同學放榜在即，必先好好計劃未來的大學生活怎樣裝備自己，Adolf多次提到香港學生的問題比較嚴峻，所以要在大學這關鍵的3至4年，好好了解自己興趣而選擇日後工作，「暑期工係好好嘅機會嘗你想做嘅行業，然後又可以搵師兄師姐問下行情，分享心得。咁樣可以慳番好多時間，唔使做咗3年先知自己而又轉工，頭3年應該學識該行業技巧，然後開始爭取晉升機會。」 列出10間公司 當訂立了目標及了解自己的理想工作後，Adolf鼓勵學生列出喜歡的行業內最想加入的10間公司，再主動致電予高層約見了解更多，「其實職位愈高級，就愈想新一代，大家不妨試吓，了解多啲行業內資訊。」 後記：自我檢討 Adolf還提到，新一代只重視工作有多少日大假、用不用加班，每做3個月便想去旅行，說到這時，記者頓時有點慚愧，因為正想着下次旅行去甚麼地方好呢！聽過Adolf的分享，不禁稍作自我檢討，好像浪費了人生不少時間，應該是時候認真想想自己日後想走的路了。 撰文：霍芷晴攝影：劉宇軒（部分圖片由被訪者提供） | ||