| ||||||
地產大好友、瑞銀環球資產管理董事總經理林奮強,一向對樓市前景甚為樂觀,自從06年初轉做瑞銀基金經理,同樣活躍於地產市場,不過,今年就見佢陸續出貨。 通街平貨計劃換馬 佢 啱啱以1768萬元沽咗件大埔聚豪天下單號屋,件貨喺04年底用1600萬元買番嚟,一直收租,揸咗4年,今次賣出賬面只升咗一成,賺168萬;扣埋佣金 同釐印費等支出,淨袋80幾萬。同佢今年初賣出嘅另一件聚豪天下單號屋,同樣揸4年,但一鋪勁賺1017萬,升值近七成相比,相差好遠,唔夠一年賺少好多 喎,咁都肯賣,唔通睇淡後市?林奮強同華華講,佢喺地產市場向來有買有賣,今次出貨亦唔係睇淡後市,只係覺得金融海嘯爆發後,全球有唔少抵買嘅資產,好似 外國公司嘅債券、亞洲股票同埋香港物業,所以換吓貨。不過,唔係咁多港人具有世界投資眼光,投資者要因應自己承受風險能力出擊。 奧運站綁住八千萬 雖 然話o依家個市同年初有天淵之別,但佢認為香港樓宇供應始終少,息口又低,唔使太過悲觀喎。聽講,大好友今年初夥拍瑞銀同事王震宇,喺奧運站掃咗唔少貨, 主要係維港灣同帝柏海灣複式,用咗超過8000萬,好似話帝柏海灣嘅1座複式成功踢契,o依家總共揸住4件複式,部份放租。至於吸引唔少金融巨擘入市嘅九 龍站豪宅,聽聞大好友都有7至8件喺手。李華華[email protected] |
| ||||||
港 股成交持續疲弱,大福證券(665)董事總經理Peter黃紹開對08年全年盤數大嗌失望,佢估計公司業務今年第四季至復蘇。危機未除,惟有加強控制成 本,家陣已推出咗全盤計劃嘅一部份……咁即係仲有撒手鐧啦!華華即刻追問,究竟大福舊年至今炒咗幾多人,嚟緊又會炒幾多先?Peter就大耍太極,堅持係 表現遜色嘅員工「自然流失」,佢話大福現有逾900員工,較高峯期少咗一成,舊年下半年有幾十人離職,今年上半年預計會有20人流失,仍然留低嘅無論人工 定佣金都唔會減。公司又會暫時凍結招聘,包括大學生見習經理(MT)在內,而大福喺香港嘅門市亦唔會擴張,部份分行會搬去較平租嘅舖位,總之希望整體保住 有盈利,繼續經營落去咁話。 |
| ||||||
已 故台灣首富王永慶大仔王文洋爭贏家產後,隨即展開佢嘅事業大計,其中一瓣就係好多富豪都鍾意玩、但好似個個都玩唔掂嘅電視台。寶島行家噚日爆料,話一直諗 住做傳媒大亨嘅王文洋,密謀掟10億台幣(約2.4億港元),買起寶島第一間民間無線電視台民視,但另一邊廂,民視班高層為咗「捍衞主權」,亦都郁手搵新 金主,其中一個就係香江首富李嘉誠。 寶島同業仲講到,話李超人有意入主買民視,其實喺舊年年底已經傳得好「行」,早排「劇情」仲發展到話民 視總經理陳剛信嚟咗香港,同超人簽備忘錄,一鋪買起22%股權咁話。點解超人咁想買民視?佢哋分析係李生已經喺當地買起咗城邦出版、《商業周刊》等,對台 灣媒體有濃厚興趣。之不過,超人旗下長實(001)已經即時代老闆否認咗呢啲傳聞。 |
| ||||||
證券商協會今年適逢30周年「牛 一」,兼夾係新一屆理事會換班,噚晚就喺會展筵開咗53席大搞,就連久未露面、有「校長」之稱嘅聯交所前主席李福兆亦俾面出席。「校長」當年有份出錢出力 創立協會,可以話係協會嘅「老竇」,就算佢老人家近年喺泰國加拿大兩邊走,又四圍去旅行,安享退休生活,噚日都不忘返港道賀,據有份出席晚會嘅幾位朋友向 華華透露,校長喺晚會上同一眾證券界好友,大談過去、現在、未來,仲上台同金牌莊家詹培忠大玩「棟篤笑」,對答認真幽默! 談過去身經百戰 87股災最難忘 校長雖然已經年逾八十歲,但全無老態,仍然可以談笑風生,風采不減當年。校長縱橫股壇咁多年,身經百戰,回想呢幾十年,對佢 嚟講,印象最深嘅唔係咩08金融海嘯,亦唔係03年沙士搞到股樓大冧,佢最難忘嘅,原來係23年前發生嘅87股災。 外資沽貨拖兩周交收 佢 回憶當年,話當時個市成交係咁增加,主要都係啲外資沽貨,但佢哋無遵守到T+1嘅交收規定,甚至拖成一、兩個星期先交收,搞到本地經紀出現好大壓力。佢仲 解釋話,當年決定停市,並唔係想令個股市唔好再繼續跌,其實佢嘅目的只係疏導交收咁話。 阿媽賭馬贏輸都俾佢 詹培忠問佢:「人 哋話李福兆六歲識炒股,不如教吓人?」校長就抵死咁話:「自己唔係炒股,而係『燉』股票,最多只係乾水,咁先唔會燶,初期我就燉吓公用股、地產股咁,呢啲 可以長揸收息……」 校長講完股仲講埋馬,不過唔關佢事,係關佢阿媽事:「阿媽每次賭完馬,無論贏輸,啲錢都會俾咗我,就係咁,我就儲埋啲錢 買股票囉。」 看現在香港上海應該互相合作 o依家嘅香港,話就話仲係我哋祖國嘅國際金融中心,不過上海「雙城記」嘅出現,令好 多香港人感到無比威脅。提到上海呢位「敵人」,校長都發表咗己見,佢覺得雙方應該互相合作,就好似美國咁,一個國家可以有幾個金融中心。 講 未來詩贈後輩勉勵明天更好 華華唔知香港第時會變成點,仲係咪金融中心,但校長就似乎對未來好有信心,仲勉勵有志投身金融界嘅後生仔,要專業 盡責,不斷學習同保持謙虛態度,最後仲贈咗一首詩畀後輩:「天上本無常照月,人間應有再來春。」就係想話俾大家知,就算今日幾咁艱苦,都會有好明天。 佢 仲教後輩「做人道理」,最緊要唔好挖苦人,佢話同協會另一個創辦人王脗銘做咗幾十年老友,咁多年都互相尊重,大聲講句說話都冇o架! 李華華 |
| ||||||
《志雲飯局》喺香港曾經叱咤一時,喺英國,《金融時報》都有個文字版嘅《名人飯局》,專係訪問啲名人然後同讀者分享當中對話。啱啱過咗嘅星期六,佢哋就登咗同俄羅斯首富、俄鋁(486)大股東兼CEO歐柏嘉(圖)食飯嘅文章,其中一段仲提到金融海嘯呢個話題。 話 說09年6月,普京叫歐柏嘉去俄羅斯一個小鎮簽份保障本土工廠嘅文件,點知普京當住好多人面前叫佢做「蟑螂」!嘩,堂堂首富喎,俾人叫曱甴,真係冇晒 face!勢估唔到……歐柏嘉可以處之泰然咁回應,話「蟑螂」並唔係針對佢而講,只係針對一啲想趁機逃離行業嘅人啫。歐柏嘉似乎冇介意過總理咁鬧佢,因為 佢根本唔覺得係講緊佢,真係唔知佢係詐唔知費事尷尬,定係豁達睇得開嘞。 | ||||||
|
||||||
為咗鼓勵啲學生哥喺數學科方面多多努力,恒隆地產(101)搞咗個數學獎鼓勵吓佢哋。到底點解香港人咁少喺數學界發展呢? 創辦人陳啟宗(圖)噚日出席數學獎頒獎禮之後話:「我哋呢一代人嘅role model係科學家,我哋下一代嘅role model就係李嘉誠(華華絕對係佢下一代o架!),o依家呢一代就係劉德華,其實都係時候畀返科學家一啲尊重……」 Well,超人同劉華都係好多人嘅偶像,而且仲係永恒o架,話口未完,宗哥繼續話:「真正叻嘅人全部都係搞科學,好似我細佬咁,我呢啲中等嘅只係從商……」 宗哥一啲都唔認叻,而且仲咁睇o依家嘅商人,果然係豪情壯語呀! 李華華 |
|
||||||
高鐵元朗段去年動工,工程進行得如火如荼,但連綿不斷的隧道鑽挖和爆破,為附近居民帶來極大困擾。本刊近日收到八鄉上村的村民投訴,指港鐵的爆破工程令他們屋內牆身滿布裂縫、水管漏水,但港鐵拖足大半年,至今仍拒絕承擔責任。 「港鐵成日都係夜晚先進行爆破,瞓覺時都會感受到啲門、窗喺度震,差啲以為係地震,試過凌晨六點幾俾佢震醒咗!」陳先生一家搬入八鄉上村四年,三層高的村 屋極其新淨,但自半年前港鐵在離村約一公里的範圍展開爆破工程後,屋內牆身就不斷出現裂縫。「由四月開始,間屋突然出現好多裂縫,愈嚟愈多,愈嚟愈大條, 由地下裂到上天花!」記者檢查陳先生的單位,發現三層樓合共有逾四十條裂縫,最長的更超過一米,不少更裂至電掣旁,隨時引發漏電危機。陳先生屋內的水管亦 爆裂,「早排打風落雨成間屋都冇事,淨係廁所不斷滲水,之後就發現廁所牆身濕晒,浴缸一笪笪霉漬,先知道原來連牆身入面嘅水管都震到爆埋。」另一於村內住 了逾廿年的黎小姐,亦遇到同樣問題,自四月開始,全屋被爆至滿布裂縫,最嚴重的裂縫甚至大得可攝入整條鎖匙,「二十年嚟都冇事,係呢半年先搞到咁。」就連 露台外的紙皮石亦被震至碎裂,出現一大條裂縫,「露台不斷有碎石跌落嚟,惟有自己請師傅維修。」 港鐵報告拖足半年 眼見損毀嚴重,陳先生和黎小姐於六月向港鐵投訴,惟港鐵派出公證行調查兩次後,便無回音,拖足大半年,至今仍拒負任何責任,「間屋舊啲就話可能係自然損 耗,新啲就話可能係牆身收水而引致裂縫,總之拖到今日都話仲未有報告。」他們又指港鐵一直未有按時通知爆破時間,「佢哋六月打後就冇再貼告示,但係我哋八 月都仲感受到震動。港鐵一味話個工程搬遠咗,冇可能感覺到震動,逃避責任。」記者在村口的馬路邊發現告示牌,但該告示牌早被黑色膠袋密封,拆開膠袋後,發 現告示牌上寫着的爆破時間為六月二十日,港鐵明顯未有再為村民更新爆破時間。 專家話爆破如五級地震 土木及結構工程師蘇耀坤指出,港鐵的爆破工程,威力最強可相等於五級地震,「震盪力咁強,絕對會令屋內出現裂縫,影響樓宇結構。」他更指出,爆破工程有機 會引致水土流失,令樓宇出現沉降,故港鐵應盡快正視問題。他又提醒村民,應把所有損毀情況拍照記錄,「最緊要有相片為證,方便日後向港鐵追討。」 回應逃避責任 本刊將村民的投訴轉介至港鐵,其發言人指公證行報告仍未審核完畢,又表示由於「現時鑽爆工程範圍已深入地底」,故無需作出告示。港鐵又指,所有工程「已進 行了審慎而全面的評估,確定走線及施工方法不會影響沿線附近的樓宇及建築物結構安全」,但卻拒絕提供任何工程數據作證明。 (馬梓皓) 壹判官 港鐵爆爛民居,但拖足半年仍未肯負責,良心何在?評分:劣劣劣劣(五個劣為最嚴重) |