周顯﹕買樓自住要揀抵買盤
1 :
GS(14)@2017-08-18 07:38:41【明報專訊】上星期，我向讀者介紹了一些心水地區和屋苑，包括了跑馬地、大坑道、康樂園、碧瑤灣、雍景台、瓏璽等等，一位讀者心水清，直指：「揀嘅全部跑輸大市都算係經典。」
對此，我的回答是：「當然是跑輸大市，先至抵買啦，唔通炒到飛天，先叫做抵咩！」
記得2010至2011年，「白旋風」陳清白買了十幾間大潭道100號山翠苑，百一萬至百二萬一間，朋友鍾仔見獵心喜，也夾埋一份，沒一兩年後，遇上細價樓狂熱，至今已經升了兩三倍。其理由無他，就是因為當時細價樓跑輸大市囉。
買股如買樓 當炒的不抵買
買樓呢家嘢，自用就要買抵買的，炒樓就要買當炒的，同買股票一樣，唔通你諗住買股票長期收息，會去買騰訊（0700）咩。
昨天說到，有人被我寫了，喊話要打我，我其實一點都不怕，一來我住在警署隔籬，二來家陣通街都係天眼，唔通走得甩咩，你睇林子健事件就知啦。
三來，你有錢找人揼我，我雖然窮，但三幾百萬都使得起吖，懸紅幾百萬元，如果警察捉到幕後元兇，就捐給警察的基金，我又唔信捉唔到呀。其實好多人都知道，我份人又茅又小氣，又熟法律又識得多黑X會，我都唔知又唔信居然有人敢得罪我。
像我這樣的人，當然夠膽隨便得罪人啦，但是我發現好多非常怕死的人，只要躲在網絡後面，用假名，就好大膽，有時候，真係死咗都唔知乜嘢事，因為在這個世界上，有一種人是「雖遠必誅」，如果冒犯了他，真的是多多都唔夠死。皆因在法律上和在茅招上，要揪出一個網民，實在是易如反掌！
[周顯 投資二三事]
來源:
http://www.mpfinance.com/fin/dai ... 9156&issue=20170818