2010-06-02 AD
| ||||||
| 美國國務卿希拉 莉．克林頓，財政部長蓋特納到北京出席中美戰略與經濟對話，帶咗二百名美國官員及商界要人參加，連聯儲局主席伯南克都要做茄喱啡，影大合照時企在後排，可 見美方高度重視中國。有咁啱得咁蹺，會議期間或之後，歐洲美國股市大跌，南北韓雙方磨拳擦掌，朝鮮半島局勢緊張，於是蓋特納立即自北京飛歐洲見德國、英國 領袖，希望安撫歐洲市場，而溫家寶亦在五月廿八日飛往首爾見李明博，美國好希望中國能出手化解朝鮮半島新危機。呢呢，以前中國否認有G2之說或之實，但當 世界局勢緊張之時，美中要同時出手，說明咗世界上雖無G2之名，已有G2之實，甚麼G7與G20，係開會做騷開派對而已。 美國咁睇起中國， 平時猛咁話中國賺取大量貿易逆差，逼人民幣升值，但富士康跳樓事件讓人們清楚看到，中國表面上取得大量貿易盈餘，實質上只為美國公司服務。例如富士康製造 iPhone、「蘋果」賺到笑，股價不斷上升，已達市值二百二十一億美元（按五月廿六日市價每股二百四十四點一美元計），成為世界第一大科技公司，力壓微 軟。但富士康賺到幾多呢？好睇唔好食，毛利率只有6%。中國政府假如認為富士康員工跳樓有損中國形象嘅話，正好趁此時機發圍，宣傳富士康賺得少，「蘋果」 賺得多嘅實情，搶回國際輿論同情，反擊美國在中美貿易吃大虧之說。 回到上世紀八十年代，美國人亦高度重視日本，認為日本人夠勤力、有創意、 有高科技，猛咁捧日本，最出名嘅一本代表作就係哈佛著名學者傅高義（Ezra Vogel）之Japan as Number One（1979），曾經暢銷一時，傅高義紅極一時。跟住美國不斷要求日圓升值，日本人感到驕傲，飄飄然，到紐約買洛克菲勒中心，到洛杉磯買Arco Tower，到夏威夷狂掃豪宅，曾引起美國人恐慌、反感；只有佛利民講，美國土地搬唔走嘅，最好賣晒畀日本人。今年2010年，「日本第一」冇人提咯，有 人寫書講「中國第一」，日經指數在5月28日係9762.98點，比1989年12月29日之38915.87點還要低咗七成五，跌低咗就爬唔起身，日本 始終冇法子超越美國成為冧巴溫！美國人冧完日本，o依家冧中國，結果會係點？ | ||||||