ZKIZ Archives

中環在線：炒歐舒丹要『目及』實Yen走勢 李華華

2011-1-31  AD

上個禮拜 Prada都宣佈會落戶香江，華華真係萬二分咁期待！今次Prada情傾香港，華華覺得同舊年法國護膚品品牌歐舒丹（L'Occitane，973）上市 成功，不無關係。香港本身就缺乏呢一類環球消費品品牌公司，所謂物以罕為貴，歐舒丹上咗市無幾耐，已經成為基金寵兒，估值梗係比歐洲好得多啦！ 不 過，睇環球消費股嘅走勢，同睇本地零售股好唔同。華華平日都會行吓I.T（999）同莎莎（178）啲舖，睇吓佢哋生意好唔好，再評估佢哋嘅股票抵唔抵 買。但係睇歐舒丹，與其行舖頭睇生意，不如『目及』實日圓點走仲實際！皆因華華發現，歐舒丹股價同Yen嘅走勢之間關連極大（見圖），Yen強，歐舒丹就 升，上上落落啲位完全對稱，可以話係睇住Yen嚟炒咁滯。事關日本係歐舒丹嘅最大單一市場，佔公司收入兩、三成。

Money Walker：跟貴YEN去旅行

1 : GS(14)@2016-05-08 01:42:20

鍾意去旅行嘅讀者，睇住歐元同日圓呢排貴咗應該會幾傷心。其實滙率嘅嘢相當複雜，一隻貨幣短期趨勢可以係跌，但中期趨勢可以係橫行，而長期趨勢又可以係跌，美元就係例子。喺滙率走勢反反覆覆之下，要下下用最抵滙率去旅行，同喺股票最低位入市一樣超高難度，所以大家都唔好太執着自己兌嘅滙率同最抵嗰陣差幾遠，否則只會揼爛心口。由於港元同美元掛鈎，美元走勢會影響到大家揸港紙可以兌到幾多外滙，故美元走勢值得愛外遊嘅讀者深究。技術走勢顯示，美元中期而言已於去年底見頂，亦即港元兌主要外幣都見頂，所以大家都係唔好期望咁快可以重返約6港元兌到100YEN嘅黃金時期。不過由於市場對於儲局加息嘅預期並未完全消退，筆者估計美元需時多一年左右，待今輪加息周期步向尾聲，先會正式轉勢向下。換言之，歐元同日圓雖然會轉強，但未來一年應該唔會升得太厲害，有意喺未來一兩年內去歐洲同日本旅行嘅話，暫時唔需要太擔心滙率問題。講多樣嘢你知，美元一個升跌周期要成15、16年，而美元好大機會已喺去年底見咗呢輪牛市嘅頂，亦即外幣最抵時間或已喺去年出現。而要等下一次外幣最抵時間，就要等到下一波美元牛市見頂之時，亦即15、16年後。更無奈嘅係，美國不斷印銀紙下，美元超長期走勢明顯是一浪低於一浪，所以就算畀你等到203X年嘅下一個美元見頂時間，先再去旅行，外幣滙率都唔會抵得過2015年嘅低位。
El.
http://www.facebook.com/moneywalkerhk/本欄逢周二、五刊出





來源: http://hk.apple.nextmedia.com/financeestate/art/20160506/19599446

---

Money Walker：100Yen的糾纏

1 : GS(14)@2016-09-28 05:00:18

作為一個年年去日本嘅廢青，筆者同大家一樣好關心Yen嘅去向。美元兌Yen分別喺7月初、8月下旬同9月下旬，三次下試100關遇阻，而家繼續喺100水平徘徊。翻查過去廿年Yen走勢，100附近範圍長期都係Yen重要支持或阻力水平（100Yen折算港幣，即係每百日圓兌7.75港元左右）。每次美元兌日Yen上升到或下跌到100附近位置，都需要一段時間先能夠升穿或跌穿該關口，今次亦唔例外。筆者唔敢預測Yen之後會點走，始終有美國大選呢項重要變數左右滙市。市場普遍預計，特朗普上場會導致美元走強，但另一方面，倘若佢贏出大選，又會觸發市場避險情緒升溫，繼而推升圓滙。兩項因素此消彼長下，Yen大選前後會點郁法真係話唔埋。政治因素難講，但貨幣政策因素就好易估，筆者認為貨幣政策今年內唔會影響到Yen走勢。首先，日央行上周先啱啱調整完貨幣政策框架，按照以往做法，日央行出招後一、兩個月都唔會再出手住，所以日央行暫時唔會左右到Yen大走勢；其次，美國今年內加息一次嘅預期，早已反映喺Yen滙率上，故即使千呼萬喚嘅12月加息真正來臨，相信亦無法推動Yen兌美元顯著轉弱。睇遠啲出年又點？聯儲局官員估計出年全年總共會加兩次息，市場亦大概反映咗呢項預期。換言之，除非之後美國經濟數據超勁，導致市場預期美國出年有機會加多過兩次息，否則單單係美國加息呢項因素，中期相信無法成為Yen轉弱嘅催化劑。中期而言，筆者傾向認為美元強勢已見尾聲，日央行嘅寬鬆招數亦大致耗盡，Yen轉強並推動美元兌日Yen跌穿100關，其實只係時間早晚嘅問題，所以要去日本旅行嘅，建議都係盡早兌定啲Yen穩陣啲。
El.
http://fb.com/moneywalkerhk本欄逢周三刊出




來源: http://hk.apple.nextmedia.com/financeestate/art/20160928/19783908

---

太古廣場：仲去百年唱Yen咁儍豬？

1 : GS(14)@2016-12-07 07:56:29

講啲唔啱大圍channel嘅嘢，就叫掃興。難得今日阿姐今日去咗小圈子協會lunch，成team人即刻傾一陣早走去邊度食個長飯，但最識食嗰個Connie竟然話佢唔去。「我一陣要去百年唱錢呀，下個星期去九州」。有無發現好多人都係咁，捨得畀幾千蚊買機票酒店去日本，但就要慳埋嗰幾個價位，排足成個lunch time去慳幾舊水。次次有人講去邊唱Yen最平，我都笑而不語。「幾百蚊可以食餐好啦！抵喎！」媽咪級秘書搭嗲。Well，先唔好講幾百蚊喺日本可以食得有幾好，為咗嗰一餐去後樓梯企足半個鐘，講緊如果你咁好彩打到電話訂cash咋喎，打唔通分分鐘排足成個鐘都無得你唱。見到Connie唔知點算咁嘅樣，又係成日去日本嘅Daniel話：「而家銀行啲rate都好好㗎喇，你有無中銀戶口呀？你無我幫你唱吖！」我即刻碌大隻眼望住Daniel，唔係好奇呢個次次去親都係秋葉原嘅宅男點解都會咁熟架步，而係吃驚佢終於踏出第一步進攻Connie。「……家姐！」我吃驚到Connie係咁叫我都聽唔到。「你上次去東京咪話唔使錢訂酒店嘅？我啲friend問你點樣訂㗎，佢哋話酒店訂咗好貴呀今次」。「你12月去梗係貴啦……不過你咁鍾意唱cash，都無免費酒店住㗎喇」。個個露出「關咩事呀」嘅表情望住我，而我只想快啲去食lunch：「我就唔鍾意帶錢嘅，食飯買嘢，甚至去七仔買mask嗰千幾Yen都碌卡儲分。而家唔係張張卡都儲miles㗎喇，知你哋鍾意搭廉航吖嘛，碌完卡變咗可以直接儲分換機票或者酒店，外幣仲要儲得快啲㖭。咁你話，排隊唱錢慳嗰幾百蚊抵啲，定係幾晚酒店唔使錢抵啲？」我見媽咪級秘書想開口，都估到佢想講乜㗎喇，梗係唔俾機會佢搭嗲。「就算銀行賺你滙率，都賺唔到你住幾晚酒店嗰幾千蚊咁多啦。仲有方便呢？日日帶住幾十萬cash你估真係唔驚呀？一個唔覺意跌咗銀包，你慳幾多千都無晒啦」。講到口水乾，最後Connie都係無同我哋食lunch，因為佢返咗屋企攞住址證明去申請張卡去日本碌；我呢？就梗係食完lunch爭住碌卡啦，碌港紙都儲到分㗎。講係咁講，日本好多地方都仲係要用cash嘅。傳統食店同魚巿場唔在講，坐交通工具用嘅IC Card（日本八達通）大部份增值機都仲係要用現金增值。要去郵局買名信片，甚至寄戰利品返香港，都只係收cash。到時大吉利是唔夠cash用，都可以去7-11或者郵局嘅ATM提款，只有呢兩個地方先可以用海外提款卡，當然記得出發前要喺香港ATM啟用左「海外提款功能」先啦。關家姐
http://www.fb.com/kwangajei本欄逢周三刊出




來源: http://hk.apple.nextmedia.com/financeestate/art/20161207/19857072

---

日圓試7算又升過！唱Yen要快定係要忍？

1 : GS(14)@2017-02-08 22:11:22

日圓滙價近期轉強，昨早曾見6.9510的去年12月以來高位，較1月初低位6.5算回升6%！如果錯失之前6.6算低位，再喺日圓突破6.8算、確認升勢重拾之際，錯失埋良機，去到目前6.93算，究竟點好？橫豎都差不多7算心理關口，不妨博7算有阻力回落，然後才唱錢，因為7算上升阻力不小。7算阻力有幾大？第一，整數位本來係重大心理關口；第二，呢個位亦係2016年1月至5月嘅密集阻力區及支持區，反映日圓好友往往喺升至7算就停一停、諗一諗，正所謂「有糊唔食、罪大惡極」，總有日圓好友於7算左右選擇獲利，因此博日圓上7算然後《蘋果日報》即時新聞大字標題嗌咪時，隨時會出現回吐，到時睇回吐到乜嘢位先唱yen亦未遲。




來源: http://hk.apple.nextmedia.com/financeestate/art/20170208/19921699

---

【港女大件事】Yen升穿7.1算　幾時唱最抵？

1 : GS(14)@2017-04-14 10:34:16

日本賞櫻季節，仲有北海道未開花，要部署去日本亦可以7月大減價時出發掃平貨。不過，平貨未必有得你掃了，皆因日圓滙價上升，今早已突破7.1算，平yen一去不返。由年初6.6算升至目前7.14水平，升幅已達8%。截至本港晚上7時，日圓滙價徘徊五個月低位，報109.06，跌0.03%；每百日圓兌港元則見7.1294，升0.02%。今早美元兌日圓報108.84，繼昨日跌0.5%，今早再跌近0.2%，110關口已明顯跌破。每百日圓兌港元則見7.1405，為近5個月新高。根據每百日圓兌港元走勢顯示，3月底至4月初期間，日圓曾於7算徘徊，但近兩日「爆邊」，日圓已明顯進入升勢。呢個moment換唔換定啲yen好？由於日圓強勢已確認，相信較佳情況已經係回落至7算支持位畀你換，但所謂較佳情況亦有能慳2%左右，但日圓強起上嚟，暫時睇唔到目標價，7.5？7.8？難以估計。如果為可能慳到的2%，而有機會捱更貴、更貴嘅yen，似乎不值博，所以依圖直說，建議閣下早唱早享受。




來源: http://hk.apple.nextmedia.com/financeestate/art/20170414/19990112

---

【多謝耶倫】美加息令Yen兩日跌2%　兌10萬Yen慳3碗拉麵

1 : GS(14)@2017-06-18 22:04:54

美國加息關遊日咩事？答案係唱yen又平返少少，以唱10萬yen計，兩日最多平2%，大拿拿140港紙！隨時可以食多3碗拉麵當宵夜！受美國加息、以及年底前縮表帶動，美元轉強，此消彼長下，日圓適逢轉弱，連跌兩日，每百日圓兌港元由前日高位7.15急回至7.01，日本央行今日亦一如預期維持貨幣政策不變，於傍晚7時15分，每百日圓兌港元最新報7.0064。美元兌日圓報111.33。繼美國聯儲局後，日央行今日議息，並宣佈維持貨幣政策不變、與及維持10年期日債收益率目標為零附近。



97年主權移交至今，香港前進還是倒退？「蘋果」與你細數廿載風雨。【回歸二十年】專頁：http://hksar20.appledaily.com.hk




來源: http://hk.apple.nextmedia.com/financeestate/art/20170617/20059107

---

Yen跌穿7算　又係時候飛日本

1 : GS(14)@2017-06-22 07:40:42

美元強勢，資金從日圓流走，美元兌日圓連升兩日，重上111水平，最新報111.73；每百日圓兌港元亦終於跌穿7算，由7.04跌至最新6.98，兌10萬YEN平咗一碗拉麵價錢。日股今早亦上升，日經平均指數高開240點，報20,301點。恒生投資服務首席分析員溫灼培建議現時無須急於買入日圓，他分析指:「聯儲局雖然暗示了年內還有一次加息機會，並提及將儘快縮減買債規模。但最快仍需要等到九月才商議縮減買債的政策，因此暫未有重大誘因使日圓匯價大跌。」溫灼培認為可留意於每百日圓兌港幣6.8水平時才買入。



97年主權移交至今，香港前進還是倒退？「蘋果」與你細數廿載風雨。【回歸二十年】專頁：http://hksar20.appledaily.com.hk




來源: http://hk.apple.nextmedia.com/financeestate/art/20170621/20063546

---

新春遊日捱貴Yen日圓兌港元逼7.3　創逾一年新高

1 : GS(14)@2018-02-20 21:11:23

■日圓創15個月新高，新春長假遊日本的港人需捱貴Yen。資料圖片

【本報訊】日圓升值，港人農曆新年長假外遊「捱貴Yen」!美元兌日圓昨日見107水平，每百日圓兌港元邁向7.3算，創15個月高位。有本地找換店店主指，昨日兌換日圓客戶數量較平日高兩倍，每筆找換金額約3萬至8萬港元。記者：伍詠雯　劉美儀


日圓過去兩日急升，昨突破108關口，曾見107.42兌每美元，為去年9月初以來最強，單日升逾1%。每百日圓兌港元觸及7.2807，創15個月最高，較去年3月9日低位6.7546，升值逾7%。


找換店：兌日圓客戶多兩倍

截至昨晚約9時，美匯指數失守90關，報89.837，跌0.41%。美元轉弱，推動日圓和其他貨幣升值。自今年1月中，圓匯反覆轉強，企穩7算樓上水平。由今年初至今，日圓匯價升值4.68%，升幅為主要貨幣之首，瑞士法郎今年內亦升逾4%。同屬港人熱門旅遊目的地泰國，泰銖年內亦累升逾3%。日圓持續轉強，有分析指跟日本央行行長黑田東彥連任有關，黑田將繼續維持超寬鬆貨幣政策，日央行或需要依靠委任新副行長，收緊貨幣政策，跟隨各國主要央行加息步伐，有機會令日圓受壓。另外，外電指日本監管機構計劃今年春季落實外匯交易槓桿由25:1降至10:1。深水埗找換店老闆王偉霖表示，兌換日圓現鈔的客人數量較平日多兩倍，昨日客戶對日圓升值沒有感到特別緊張，「佢哋（客人）起初覺得好緊張，覺得啲Yen好貴，慢慢麻木咗。後來，啲人覺得連7算都好抵。然後，7.1算升到7.2算，又覺得7.1算好抵喇。家陣嚟到7.2算邊緣，快升到7.3算。喺7.2算換到日圓，可以話賺到嘞。」王偉霖續指農曆新年假期，為家人外出旅遊旺季，兌換金額平均由3萬至8萬港元（約41萬日圓至110萬日圓）。另外，對日本近年興起流動支付與信用卡推出遊日購物優惠，王偉霖表示未感到威脅找換店生意，認為找換店匯率較信用卡公司更優惠。

市民：與10算高位相比不太貴

早前往日本旅行的市民趙先生表示，當時兌換價為7.1算，整個旅程花費約80,000日圓。對於現時日圓升至7.2算，他認為與日圓高位10算時相比，「都唔係好貴」。趙先生續指，主要是在銀行兌換日圓，曾經在6.5算時兌換了很多日圓。市民梁小姐表示，暫時未有遊日打算，故影響不太大。她認為升幅不是太大，但如果要前往日本旅行的話「都會慳少少」，例如是選擇較便宜的酒店，或視乎需要去購物。



來源: https://hk.finance.appledaily.co ... e/20180214/20305207

---