ZKIZ Archives


跟風變 Sucker 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120602/16389797
Facebook創辦人 Mark Zuckerberg(譯名朱克伯格,非常之大陸行貨)與微軟創辦人蓋茨有三個共通點,第一點係出身富裕家庭,自小生活無憂,鍾意做乜就做乜,第二點就係入咗哈佛之後,輟學創業,第三點就係同是千億富豪。朱克伯格入哈佛前就讀嘅中學叫做 Phillips Exeter Academy,在數學、天文物理學,與古典學成績優異,申請入大學時,在申請表寫明自己除英文外,能閱讀及書寫法文、希伯來文、拉丁文及古希臘文,兼且係學校劍擊隊隊長,對荷馬史詩 The lliad背誦如流。海峽兩岸三地嘅家長,若想逼子女入哈佛,不妨以朱克伯格作為一個學術與文化基準,比較吓自己子女是否這般材料。香港將設立文化局,新局長不妨與新教育局長商量吓,香港學校點樣可以培養出一位如此厲害嘅「通識學生」,人地唔駛必修甚麼通識科嘅喎。
當然唔係位位哈佛生都咁巴閉,左丁山工作多年,就見過一啲普通又普通嘅哈佛畢業生,點都諗唔通佢地點樣可以混入哈佛,及如何在哈佛畢業。呢日有幸碰到一位標青人士顧問N,佢有三個哈佛學位,認真唔講得笑,佢話最近與一羣校友討論,哈佛人之中,究竟係畢業生好嘢,還是輟學生巴閉,大家各有意見,但論到銀紙財富,兩位輟學生蓋茨與朱克伯格嘅現時財富,就多過晒其他畢業生!不過咁,左丁山話朱克伯格仲未可以下定論, fb上市鬧出風波,聲譽受損,崇拜 Zuckerberg而跟風買入 fb股票嘅,隨時變咗係 sucker(笨蛋), fb他日變成雅虎咁就唔值得恭喜啦。
講講吓,顧問N透露一件趣事,佢話:「計中學與哈佛,我都係朱克伯格嘅師兄。前排中學搞 reunion(重聚),請朱克伯格回校演講,學生視佢為大英雄,夾道拍掌歡迎,但校方對朱克伯格有啲不滿!」甚麼不滿,佢唔肯講,左丁山好奇心起,周圍八下,卒之又搵到一位朋友(佢嘅仔亦係 Phillips Exeter Academy校友)問吓,原來當日朱克伯格穿着對拖鞋返母校,校方恐怕佢樹立不良榜樣,教壞學生喎!咁貴族嘅學校有好多規矩㗎嗎!
PermaLink: https://articles.zkiz.com/?id=34044

Next Page

ZKIZ Archives @ 2019