ZKIZ Archives


Senior幾錢斤? 人在中環

http://manincentral.blogspot.hk/2013/07/senior.html
八掛公如我,自然會留意八掛新聞。昨日有關新聞小花淚灑直播室的新聞,我自然亦有留意。據報紙話,新聞小花之所以忍唔住喊,係因為俾另一個剛升了Senior的小花,以「上司」身份向佢出言施壓,新聞小花一時覺得委屈,忍唔住響直播途中,落淚人前。

事情既真相係咪真係好似報紙所講咁,怕且大家永遠無法證實(大概呢亭花邊新聞,亦唔值得去證實吧?),不過另一個小花既新title,即是加咗個「Senior」字頭響前面既呢個title,卻令我有一點點反省。

我公司裡面,不同既部門,唔同既職位,都有唔少同事既title前面,有個「Senior」字頭響度。又老實講,如果我唔問HR,我查實真係搞唔清,邊個同事係Senior,邊個又唔係。有Senior同冇Senior既同事,所做既嘢有冇分別?實際上我覺得其實冇,即使有,都係好微細既分別,甚至乎係一啲好abstract既區分而已。

咁既然工作上冇乜分別,咁做乜要加個Senior字頭俾同事?我得承認,大概係我心腸唔好吧。同事們響公司做得時間長,儘管年年有人工加,但日子耐咗,單單係加人工,已經滿足唔到佢地既心態。好聽一點講,同事們需要有career path,需要有晉升既「感覺」,先至會開開心心繼續留響你公司裡面工作。但係並唔係個個同事都有能力升上一啲同管理有關既職位,好似我呢亭心地唔好既老細,只好呃呃氹氹。要做到好似「有得升」,但實際上又「唔係升」既效果,最冇成本、最求其既做法,就係加個Senior字頭俾個同事,人工照加,但工作範圍依舊。

OK,我明白的。我間公司只係香港千千萬萬間蚊型企業之中既其中之一,人手架構同編制自不然係冇規冇矩冇system。人地堂堂香港「唯一」既電視台,管理層派得個title出去,大概唔會好似我咁低莊既。

女孩子多既地方,是非也總係少不免的。我雖明白,我派那個所謂Senior既title俾同事,係出於一個唔多正確既動機,但「Senior」呢個字,響留住同事既層面嚟講,其實幫過我唔少。咁講或者並唔係個個都認同,但係我同好多女同事相處過,所得出嚟既經驗係,「錢」當然係重要,但係最能夠打動女同事既,又往往唔係一個「錢」字咁簡單。女同事響公司做了一段日子之後,就會慢慢希望自己得到重視,亦會逐漸與身邊既同事比較。佢地希望得到多一點認同,同時亦會期望自己,比身邊既同事來得「重要」一點。人工當然要加,但效果有時還不及加個冇實際利益既title俾佢來得明顯。

最後我仲想講一個小感受。作為一班同事既老細,我之所以覺得「Senior」呢個字,其實係好冇料到既原因,係因為好多人第一次得到Senior乜乜既title之後,第一樣come up to their mind既事係:「我高級咗、權大咗,阿邊個邊個低級過我,我可以名正言順地點低級過我既人做嘢,哈哈哈。」但實情係,當你變得「高級」咗之後,你既責任同承擔,同樣係應該有所提升。當公司有爆鑊既時候,作為「高級」既你,係應該比果個被你認為係「低級」既同事,更勇敢地行出去撐住,去承擔。諷刺既係,好多自以為「高級」既員工,當遇到爆鑊既時候,卻認為「高級」帶俾佢既好處,係可以名正言順地老點個細既出去頂屎。

That's why 那個「Senior XX」既title,最終會成為咗呢類員工響career path上既終點站。

祝大家有個愉快既週末。