ZKIZ Archives


說史130917傑弗遜傳(36) 閒情逸緻 掌門天地

http://www.tangsbookclub.com/2013/09/17/%E8%AA%AA%E5%8F%B2130917%E5%82%91%E5%BC%97%E9%81%9C%E5%82%B336-%E9%96%92%E6%83%85%E9%80%B8%E7%B7%BB/

說史130917
傑弗遜傳(36) 閒情逸緻
朝日執筆

〈美國簡史番外篇〉: 天才傑弗遜和他的對手們(十八)傑弗遜的退休生活 The Retirement of Jefferson

前文再續,書接上一回。上回講到,《禁運法案》對美國傳統產業造成極大衝擊,在國內惹起廣泛爭議。航運和商業的集中地新英格蘭是受害最深的地區,同時也是聯邦黨的老巢。聯邦黨認為傑弗遜和民主共和黨,因《禁運法案》已經大失民心,1808年大選是他們翻盤的好機會。就算是民主共和黨內部,也有部分人持相似的想法,他們覺得總統這次實在是一意孤行,擔心會因此而失去民眾的支持。

傑弗遜已決定不再參選總統,轉而支持他的好兄弟,現任國務卿,同樣來自維珍尼亞的 麥迪遜James Madison,競逐美國第四任總統。他對大選充滿信心,因為他相信美國人都明白和諒解他的決定。投票的選民比對上屆多了超過三分之一,反映民眾對這次選舉的熱情。然而,選舉的結果卻並沒有想像中般緊湊。與上屆一樣,各州選舉人票的總數是176票,但由於肯德基州有一名選舉人缺席投票,所以有效的選舉人票只有175張,勝選門檻是88張。

1808年感恩節後的第二個星期三12月7日,選舉有結果了。不知道傑弗遜的想法是否正確,反正,麥迪遜是勝出了。聯邦黨雖然順利在新英格蘭勝出,但也僅此而已。麥迪遜囊括了另外的十二個州,獲得了122張選舉人票,而聯邦黨的平克尼只有47張。另外還有六名來自紐約的選舉人,把票投了本來被安排作麥迪遜副手的「紐約人」克林頓。
人民向民主共和黨再次投下了信心的一票,麥迪遜當選美國第四任總統。

總統選舉的結果已是塵埃落定,但各州的聯邦參眾議員選舉還在陸續進行。現任的議員覺得,他們並沒有傑弗遜和麥迪遜的魅力,要繼續獲得人民的支持,他們需要有所表現,尤其是在引起廣泛爭議的《禁運法案》問題上。國會希望能在傑弗遜離任前對「貿易禁運」作一個了結,因為麥迪遜在這個問題的態度上,顯然還要強硬一些。

1809年頭,國會用了兩個月的時間,通過了一項法案。法案取消了美國對外的所有貿易禁運,除了英、法兩國。這只是為了讓總統較易接受,因為只要海岸的封鎖解除,美國的貨船自然就可以自由駛往任何地方的港口—- 只要不被英法的軍艦捕獲的話。

傑弗遜本來覺得禁運應該繼續下去,不過他並沒有對法案行使總統的否決權。傑弗遜認為議會是人民意志的體現,行政部門應予以最大的尊重。整個美國歷史上,亦只有傑弗遜,當政八年卻連一次總統否決權也沒有使用過。***
3月1日法案生效,歷時十五個月的貿易禁運措施宣告結束。三日後,傑弗遜把整個國家的重擔交給麥迪遜,離開他居住了八年的白宮,歸隱田園了。終其一生,再沒有踏足過華盛頓特區,這一片讓他心力交瘁的土地了。

傑弗遜返回維珍尼亞州的夏洛特鎮Charlottesville,在建於其祖地上的 蒙地沙羅Monticello(意為小山丘)莊園,享受退休後的美好時光,弄孫為樂,1812年更榮升曾外祖父。 蒙地沙羅這個名字是傑弗遜自己改的,莊園也由傑弗遜親手設計和監造。
事實上,傑弗遜對建築的研究在當時享負盛名。他將英國「輝格派」之間非常流行的 帕拉第奧式Palladian 建築風格帶到美國,並削除其繁瑣,而保留了箇中重視希臘羅馬式「對稱和諧」價值的精粹。 維珍尼亞議會山莊也是出於傑弗遜的手筆,該建築以古羅馬式廟宇「方堂」Maison Carrée為原型。傑弗遜開啟的這種建築風格,被後世稱為「聯邦式建築」,對美國日後的建築影響深遠。

傑弗遜在「室內設計」及家居裝置方面也很有創意,至今為人津津樂道。例如他親自動手為蒙地沙羅大宅的大門,加裝了「聯動對開式」的齒輪裝置,只要輕輕一推,兩扇大門就會同時打開,堪稱「自動門」的先驅;他製作了世上首張的「旋轉椅」;又在座地大鐘上加裝指針,自動指示每天是星期幾;還有方便僕人從樓下廚房送餐到樓上書房的「小型升降機」,更有世界首創的「便攜式書寫桌套裝」—-可摺疊的小型書桌,打開裏面,筆、墨、紙、刀、封蠟、圖章等文具一應俱全。這樣「走到那裏寫到那裏」的小書桌,開「流通辦公室」之先,簡直就是「筆記本型電腦」的鼻祖。

今天蒙地沙羅大宅中傑弗遜的工作室內,還可以看到一張傑弗遜親自設計和製造的「過底枱」—當時還沒有發明「過底紙」。由於有這張設計精妙的書桌,幾乎所有給別人的書信,傑弗遜自己都會有一份存底—只有和妻子之間的通信除外。
傑弗遜的愛妻 瑪莎Martha Wayles Skelton在1782年病故後,他把與妻子的通信全部燒毁。*** 傑弗遜終身未再續弦,這在當時並不常見。
除此以外,傑弗遜還製作很多其他便利的小工具和裝置,每一樣在他的手稿中,都有詳細的設計圖和說明,他對自己的這些「成就」似乎也頗為滿意。

音樂是傑弗遜自小的愛好,他特別酷愛提琴,而他的小提琴造詣在當時也頗有名氣。蒙地沙羅Monticello除了可以解作「小山丘」外,還可以解作「提琴山」。雖然傑弗遜在1786年曾因為「把妹」弄傷了手腕,以至從此不能再演奏高難度的樂曲,但他對音樂的熱情從未減退。 在給朋友的信中,傑弗遜曾抱怨自從投身政壇後,俗務纏身,以致未能夠保持著年青時的習慣—每天練習三小時提琴。傑弗遜退休後,「提琴山」每天都會飄送出悠揚樂韻。

雖然傑弗遜嘗有名言曰:「勿逞口腹之欲,淺嚐即止並非讓人沮喪的原因!」不過,他本人對美食絕不抗拒。在擔任駐法大使期間,他已經對歐洲各種不同風格的美食,表現出極大的興趣。當華盛頓總統把他召回美國當國務卿時,傑弗遜除了攜同多年來費心搜羅的大量食譜外,還特別聘請了一位法國名廚同回美國。在傑弗遜留下的手稿中,我們會發現不少他對各種食品的「研究心得」—包括「呍呢嗱雪糕」的製法(據說傑弗遜正是首個讓「呍呢嗱雪糕」登陸美洲大陸的人)、焗「梳芙厘」鬆軟的秘訣,甚至還有「製通心粉機」的設計圖。

能夠成為傑弗遜晚宴的座上客,是當時不少政界老饕的美好願望。雖然傑弗遜有時會因為公務繁忙,而隨便用點簡餐便算。不過,對於款待客人,他卻是非常慷慨和用心,有時甚至會親自到廚房打點。通心粉、血腸、法式豬腳、兔肉和鴿肉等新奇美食,還有 馬卡龍餅Macaroon、水果撻、炸薯條(這就是薯條叫做「French Fries」的原因。),以及經典法式甜品「白蘭地火燄蜜桃Peach Flambé」,都由傑弗遜的食譜和他的法國廚師,呈現在蒙地沙羅大宅飯廳的餐桌之中。傑弗遜的家廚,成了當時美國政界人士心目中的「美食聖殿」。

傑弗遜固然「識食」,但相比之下,他對美酒也許更有心得,而且酒癮很大,每頓飯幾乎是無酒不歡,是當時的知名「品酒家」。 傑弗遜在蒙地沙羅建造了一個十七呎長、十五呎闊、十呎高的酒窖,收藏了大量紅酒、白酒和烈性佳釀。在駐任法國之時,他已經常藉公幹之便,周游法國以致全歐各地的知名產酒區,搜羅各式佳釀托運回鄉。在返回美國後,他曾在蒙地沙羅嘗試種植從歐洲帶回來的葡萄種,並希望能夠培育出屬於美國本土的優種葡萄。非常可惜的是,這些葡萄由於對美洲本土的原生疾病和害蟲,都沒有足夠的抵抗力,下場是無一倖免。傑弗遜品嚐自己手植手釀美酒的夢想,最終沒有成功。為此,他唯有繼續消費來自歐洲的進口佳釀,還有為數不多的本土產品。傑弗遜與意大利移民 馬西Philip Mazzei的交情非常好,而後者是美國第一個經營釀酒葡萄莊園的商人。有歷史學家指出,嗜酒甚至酗酒,似乎是傑弗遜晚年經濟困頓的其中一個重要原因。

由於受到祖父和父親從小的薰陶,傑弗遜對考古學和博物學也有極為濃厚的興趣。早於1784年,他已在一塊屬於自己的土地上,嘗試對一個印第安人墓葬進行考古研究。傑弗遜並沒有採用當時流行的做法,進行大面積發掘以便從遺址中盡量搜尋出所有古物;而是僅在墓穴開鑿了一個供出入的小口,然後進入墓內考察,並留心記錄墓穴的結構和物品的相對位置。這種相當「現代」的考古手法,甚至令美國部分「國粹派」考古學者,追認他為「美國現代考古學之父」。
傑弗遜退休後,亦繼續保持著這方面的興趣。今天,各位到蒙地沙羅莊園參觀,可以看到大宅的房間內,陳列著傑弗遜收藏的各式「原住民」器物,還有劉易斯和克拉克從西部為他帶回來的各種化石。

傑弗遜雖然享受著愉快的退休生活,但卻沒有完全把國事置諸腦後。當然,傑弗遜對麥迪遜擔任總統的能力是絕對信任的。不過,他並不會拒絕與麥迪遜保持通信,一同討論時政。只是,直接涉足政壇卻是傑弗遜所極力避免的。當1812年英美戰爭爆發時,麥迪遜曾力邀傑弗遜仿先總統華盛頓故事,出山擔任國務卿,主持國政。傑弗遜為此費盡心力為麥迪遜出謀劃策,但卻立場鮮明地堅拒再次擔當任何公職。

除了發展廣泛的興趣外,會見不同的客人,也是傑弗退休後每天的「重要工作」。他也一直保持著與不同的朋友通信。傑弗遜和他們討論學術、政治、科學和教育。其中教育是傑弗遜最重視的課題,他認為只有明辨是非的公民,才能建設出理想的國度。為此,在傑弗遜生命最後的時光中,幾乎把所有的時間和精力,都投放到維珍尼亞的教育事業上—-他一手建設了著名的「維珍尼亞大學」。

嚴格來說,這並不是傑弗遜首次參與「高等學府」的建設。早於1802年,作為總統的傑弗遜已簽署法案,宣佈在紐約北郊哈德遜河西岸,成立「美國軍事學院The United States Military Academy」,也就是著名的「西點軍校」。*** 不過,無論這所學校後來培育出多少將帥之才和大企業的CEO,也顯然並非傑弗遜心目中培養完美人格的「理想學府」。

傑弗遜認為,每個人的天賦和學習能力都不盡相同。大體上可分為「勞力者」和「勞心者」兩類,兩類人都應該接受識字和算術等基礎教育,之後,「勞力者」可以學習耕種、鍛鐵等手藝,而「勞心者」則學習科學、醫學和法學。
這種說法在現代難免會被左翼份子斥為「精英主義」—這個詞在現代無疑帶著貶意。不過,若把目光放回當時,就會發現傑弗遜的想法其實已是相當「進步」。因為他強調了一個至關重要的論點──每一個人都有接受教育的權利!

傑弗遜堅信:
“If a Nation expects to be ignorant and free in a state of civilization, it expects what never was and never will be….If we are to guard against ignorance and remain free, it is the responsibility of every American to be informed.”
「如果一個國家期望建立一個同時兼具無知和自由的公民社會,那麼這種期望從來不曾,也永遠不會實現……若我們要抗拒無知並捍衛自由,「了解」就應該是每一個美國人的責任。」

而要具備「了解」的能力,就得接受教育!
根據傑弗遜1800年一封給朋友的信,他構思成立一所大學,已想了幾十年。故此,當他知道夏洛特鎮的鄉紳們,打算在蒙地沙羅附近建一所學校,立即自動請纓參與其中。士紳們同意,校舍設計和課程的制訂,都交由傑弗遜一手包辦。傑弗遜幾十年的夙願和構想,終於得到實踐的機會。

傑弗遜忘情地投入校舍與課程的規劃和建設之中。除了自掏腰包投放資金和積極向外募捐外,他更每天都會到工地視察進度和監工,有時甚至會親自動手參與工程。在大學校園的建築工地上,工人每天上午都會看到,一個髮色金赤,身裁修長(六呎二吋半,在當時算是相當高),衣著不修邊幅的長者,騎馬甚至徒步來到工地現場。

這都是傑弗遜一貫的風格。在1801年會見英國大使時,他曾因衣著過於隨便,並與對方握手而非鞠躬,令對方深感冒犯,甚至出言侮辱,間接促成傑弗遜在華盛頓建立策劃中心,以應對這次外交危機,這被認為是「白宮幕僚」的前身。至於不坐馬車,則主要是因為傑弗遜覺得太貴,他一向不喜歡奢侈的排場。

傑弗遜認為只有每天到現場視察,才能確保工程按圖則進行,遇到實際困難時也能對圖則作出及時的修正。即使哪天病了不能外出,傑弗遜也要走到窗前,用望遠鏡遠眺工地才會安心。
傑弗遜出錢出力的熱情令所有籌劃者、捐款者和建設者非常感動,所有人都會同意,這所「夏洛特鎮大學」是屬於傑弗遜的,也只有他才配作這所學校的創辦人!

說史 130917 傑弗遜 傑弗 36 閒情 情逸 逸緻 掌門 天地
PermaLink: https://articles.zkiz.com/?id=75474

李家仁 - 小明遊深圳 (都市閒情 20110824)

1 : GS(14)@2011-12-12 21:55:24

今日睇廣告先知有...
2 : GS(14)@2011-12-12 21:55:50

one more version
3 : 龍生(798)@2011-12-13 00:09:08

唉, 眼冤, 不知所謂

我只會聽小明上溫州
4 : wilsonchui(9055)@2011-12-14 19:48:10

幾時出埋小明上東莞?
5 : idsdown(1658)@2011-12-15 20:16:45

呢期小明好鬼紅咁喎
6 : stanly9988(17906)@2011-12-15 22:18:10

4樓提及
幾時出埋小明上東莞?


一早有啦,你地唔地~
7 : GS(14)@2011-12-15 22:29:59

6樓提及
4樓提及
幾時出埋小明上東莞?


一早有啦,你地唔地~


http://realforum.zkiz.com/thread.php?tid=16982
人地在東莞都算有頭有面,點會無先

小明刷牙都有,死未
8 : 龍生(798)@2011-12-16 02:50:15

上東莞沖涼我就真係服啦....

但我相信唔會lor...

期待高登巴打有新搞作
李家 小明 深圳 都市 閒情 20110824
PermaLink: https://articles.zkiz.com/?id=276854

收市閒情:神級禱文:求主攔阻大鱷

1 : GS(14)@2016-02-03 14:42:34

■以勒基金facebook圖片








「主能夠,主能夠,我知祂能夠,我知救主能帶領我經過一切。」近日人仔大跌,或者令到香港有部份基督徒內心不平安,香港有一個聲稱非牟利基督徒組織「以勒基金」,呢幾日就為全球貨幣政策禱告,仲喺fb post埋禱文,單睇標題,絕對霸氣外露:「求主掌管全球貨幣政策」!超勁!唔通以後美國加唔加息、中國放唔放水,都唔好問耶倫、唔好問人行,應該要搵耶穌?禱文全文可以話係非常精彩,完全睇得出呢位弟兄姊妹對大鱷狙擊人民幣係幾咁咬牙切齒,對沽空股票市場炒家係幾咁恨之入骨!禱文講到明,希望全能嘅上主可以「攔阻國際大鱷對亞洲貨幣的狙擊,驅逐一切對亞洲貨幣的虎視眈眈。」仲希望主能夠「勒令國際大鱷從原路轉回」,即係點?係咪有日突然有個先知,行過去同索羅斯講:「主不要你沽空人民幣,願你行公義,好憐憫,作光作鹽。」然後索羅斯就講一句:「主,我知錯了,阿門。」然後乖乖退出市場,然後洗心革面,拎錢去炒高人仔跟手做埋牧師宣揚基督救市嘅愛?禱告又求主可以「監察股票市場上的沽空情況」,咁又即係點?即係每一日你揭開聖經,就會多一頁「沽空報告披露報表」,不如順手加個「聖經版披露易」出埋通告呀,邊個大股東押股就冇得上天堂!睇到呢度,真係好難唔聯想到,呢個基金應該係重倉人仔同股票,禱告形容,現時係「末世」投資市場!喂!馬太福音24章36節講到明,冇人知道幾時係「末世」:「但那日子,那時辰,沒有人知道,連天上的使者也不知道,子也不知道,惟獨父知道。」所以有理由相信,呢個「末世」,可能係講緊弟兄姊妹個銀包。不要怕,「主是幫助我們的,我們必不懼怕;人能把我們怎樣呢?」係囉,索羅斯最多都係令你啲人仔貶值,只要祈禱後買人仔跌,就冇事了。最後,求主賜予弟兄姊妹智慧,阿門。大家一齊念:「一個僕人不能事奉兩個主,不是惡這個愛那個,就是重這個輕那個。你們不能又事奉神,又事奉瑪門。」馬太福音6章24節。「瑪門」係咩?即係錢。千頌C
http://fb.com/winbigwok本欄逢周三刊出





來源: http://hk.apple.nextmedia.com/financeestate/art/20160203/19476509
收市 閒情 神級 禱文 求主 攔阻 大鱷
PermaLink: https://articles.zkiz.com/?id=295133

開市閒情:勾結外國勢力!強國人走資《絕密秘笈》流出

1 : GS(14)@2016-02-18 23:31:15

到底咩係「真愛」呢?上網見到一句嘢,就係「Love is not about how much you say I LOVE you, but how much you prove that it's true」,英文講到懶浪漫咁,最準確嘅翻譯,應該係「咪得個講啦,行動證明please!」話說,最近中國為防經濟爆煲,不斷收緊資本管制,將資金鎖國防走資。咁樣中國人辛辛苦苦賺(貪?呃?偷?搶?邊個字眼,你自己話事啦)返來嘅血汗錢,真係隨時唔見一大截。於是,中國人抱「一方有難八方失聯」嘅精神,竟然俾佢哋諗到條世紀絕橋走.資.去!就係學「老頑童」周伯通玩左右互搏!話說有中國公司,要求一間美國律師樓,幫佢開一間美國公司。然後呢,間新成立嘅美國公司,就會走去告間中國公司違約,要求賠錢。咁即係個律師同時代表兩間公司打官司,左手告右手?媽呀,好亂呀。正所謂,「公司要贏,單官司就一定要輸」!中國公司向律師提出要求,話官司不能夠庭外和解了事,係一定一定一定要打輸,原因好簡單,因為打輸官司件事會真啲,咁樣公司就可以更輕易將350萬美金,於3個月內輕輕的走了,不帶走一點雲彩。至於點解呢單野會流出,因為個律師將佢同客戶嘅對話打咗喺blog,而個律師當然冇接到單case。呢件事證明咗:一:果然道高一呎,魔高N丈!中國人真係天才,到底個腦裝乜嘢,先會諗到呢條咁屈機嘅橋?所以,走資方法無限種,只有你想唔到,沒有強國人做不到的。如果將呢種天賦去做正經嘢,人類應該可以進化到移民去火星。二:中國成日講愛國,如果係真愛,你就唔使嘢嘢限住晒做Control Freak啦。家陣佢出咁多招阻止你班友跟佬走,就係心底都知你班吓吓話愛國嘅中國人,都係「身體卻很誠實」。三:好衰唔衰你班友仔,走佬都未算,仲要走去「勾結外國勢力」夾計一齊走,咁即係明剃偉大神國眼眉,話畀人聽,「中國經濟靠唔住,搵外國佬就唔使輸」。你叫泱泱大國,顏面何存?最後結論係,希望所有愛黨愛國嘅香港司長、官員、民建聯嘅人才、屈女士呀等等等等,我知道你哋對黨嘅愛,唔係得個講字。「國家有難,匹夫有責」,快啲轉返晒啲錢做人仔運上大陸救國啦!It's the best time to show your love is true!加油呀!美國律師Dan Harris個Blog
http://bit.ly/1VlW9bI《華爾街日報》報道
http://on.wsj.com/1Q0GdeS千頌C@堆填區
http://fb.com/winbigwok





來源: http://hk.apple.nextmedia.com/financeestate/art/20160218/19495005
開市 閒情 勾結 外國 勢力 強國 走資 絕密 秘笈 流出
PermaLink: https://articles.zkiz.com/?id=296186

收市閒情:我與老婆要「分居」

1 : GS(14)@2016-03-05 01:10:46

(由真人真事改編)約一年前左右……「仲有半年就結婚喇,到而家講親買樓你都愛理不理,係咪想瞓街?」未婚妻阿怡又拎番呢個topic講,唔係我唔想買,係我買唔起。我知你實寸我,月入幾皮嘢都買唔起樓?錢係儲到啲呀,但結婚使走一大截,之後咪玩完囉。本來拎積蓄去做首期都掹掹緊,而家唔見咗一截就唔夠喇。樓價就好似中環的士佬咁,佢係唔畀你上車就唔畀你上,就算你點追都冇用。連淘大隔籬個得寶,實用300呎都冇,都要400幾萬,仲高竇過啲的士佬。所以話中國哲學家真係冇得頂!莊子喺《庖丁解牛》講過:「以有涯隨無涯,殆已。」幾千年前嘅莊子,竟然令我明白,死捱爛捱追無頂嘅樓價,死硬!所以幾時先係買樓時機?等樓價跳崖就係買樓時機!望住阿怡嬲豬嘅表情,我正想發表呢個偉論,點知又俾佢搶閘:「我知買唔起住,一係租住先啦。」「但如果拎咗去交租,我哋仲點儲錢買樓?」佢應該真心嬲:「咁又唔得,咁又唔得,我哋結咗婚,分居喇!」
OK喎!我話:「唔係冇得諗!」「你癡咗線?」「你聽我講,叫你同我屋企人入粉嶺住,日頭港島返工,怕你辛苦,不如你結婚後住喺娘家先。我努力啲儲多陣錢,等樓價跌再買喇。」阿怡好火地問:「咁結嚟有咩用?」「有用!代表一個承諾。就好似一部連咗Wifi嘅電話,佢哋都唔係黐住,咪一樣上到網。」***憑我三寸不爛之舌,成功說服阿怡。而家我哋結咗婚半年,我住粉嶺,佢住將軍澳。好多人問我婚後生活有咩唔同,老老竇竇,唔係見到隻戒指,我都未必醒起我結咗婚。但真正嘅災難係,每次上外母屋企都好似上陣殺敵,江湖總會掀起腥風血雨,今日……「衰女,你做乜又轉台。」見到外母咁講,就算幾想開大個電視,用YouTube睇周浩鼎喊,都死死地轉番去TVB,不過事實係我睇咩台都唔重要,「講真,屋企又細,電視就得一部,阿怡就鍾意睇YouTube,我就要睇TVB,遲吓仲話多個台,你話點分呢?」冇錯,係一個局!我望一望外父,佢竟然起身行入房。阿怡就低頭,主動開聲:「放心啦,我哋有分數。」作為男人,世界末日都要面對:「外母,放心,樓價一跌我哋就買樓。」「唔係話逼你,不過你話樓價跌,而家咪跌緊,仲唔買?」我冇出聲,點知佢繼續:「你係咪借啲意唔一齊住,出去搞搞震?」你可以質疑我唔買樓嘅決定,但唔可以質疑我對阿怡嘅專一!「夠喇!你估我唔想有新婚生活,同阿怡一齊住咩,我好想呀!我真係有諗過租算,但租越嚟越貴!係呀,樓價係跌呀,得寶仲跌穿300萬呀,但我點敢買呀?同上年8月比跌足三成呀!反正都等,點解唔畀我等我一陣呀,等佢跳崖我就買!」我忍唔住爆了,我後悔我嘅EQ低,因阿怡哭了,佢好激動:「樓價升,你話儲錢,要分居!樓價跌,你又話要等。你到底係唔係唔想同我生活!」女人,之後梗係奪門而出。***鬧劇過後一年,我終於等到,樓價真係跳崖,成為得寶對面個德福業主。至於老婆呢?早就頂唔順,離開咗我,仲記得佢臨走時同我講:「連咗Wifi嘅電話,一離開咗間屋,就上唔到網,等如冇用。」望住屋企部電視,開住中產味好濃嘅Netflix,莊子句嘢應改為:「予有捱,予無捱,殆已。」捱到又好,捱唔到又好,總之你如果為層樓失去生活,等如,死咗。今日,我流咗一滴眼淚,係為咗香港人而流。千頌C
http://fb.com/winbigwok《趣BLOGBLOG》暫停一周





來源: http://hk.apple.nextmedia.com/financeestate/art/20160303/19513692
收市 閒情 我與 老婆 分居
PermaLink: https://articles.zkiz.com/?id=296677

收市閒情:有一種幸福是開美容院

1 : GS(14)@2016-03-09 16:24:05

有一種女仔,有啲男仔頭,又有啲儍氣,人人認為佢不修邊幅,唔化妝,唔戴con,着衫不求好索,但求冇錯,個頭仲經常有啲亂。好聽就叫率性,唔好聽就叫hea。呢種女仔,要你去做facial,以前嘅你,通常會答:「吓,唔使搞咁多嘢啦。」但踏入三字頭,唔知點解,突然發覺過去對美容院嘅抗拒,係因為自己太執着。終於,你的起心肝,登記美容院嘅免費facial。臨行入門口前,向自己千叮萬囑,「死都唔好俾佢說到買package!死都話自己冇帶錢!死都唔好簽卡」。雖然服務係免費,但入到去姐姐仍斟茶遞水,笑容免費供應。戲肉當然係facial嗰part,將一pat又一pat嘢揸上你塊面,個姐姐不斷講佢做緊邊個step。冷不防,姐姐就煞有介事咁講,「你塊面好乾呀,點解你平時唔敷mask呀,咁唔得㗎,你再唔理佢,遲啲塊面會好嚴重,阿囡」。「其實你一個星期做一次facial就好好多」,面隨砧板上,你冇得回應,「好過你之後出紋啦」,出紋,一句非常有殺傷力嘅字眼!係女人嘅大忌,因為「有紋有真相」,證明你係中女。好不容易,呢個唔知係洗面定洗腦嘅療程結束,隨之而來,係另一個洗腦療程開始。你被帶到去見客區,佢繼續踩你,「你唔好介意,你塊面真係點點點」,踩到你無地自容!跟住出場係一堆又一堆嘅package,「你買20次,都係$$$」、「分18個月,一個月都係$$,你買少件衫都唔止啦」、「一係咁,你買10次,分18個月,每月畀少一半」,將數砌完又砌,砌到你頭暈,你開始俾佢說到,然後乖乖地拎出信用卡。離開美容院嗰一刻,你開始懷疑頭先鬼上身。第一個星期,你好乖咁去book facial,第二個星期,你繼續book;到第三個星期,你真心唔覺得自己靚咗;到第四個星期,你覺得工作好忙好累或乜都好,總之唔想去了……一年後,package過期,你會嬲自己嘥晒啲錢,因為10次入面,只係去咗幾次。我今日話畀你聽,你畀美容院嚿錢,對你來講係買facial;但對美容院來講,佢其實係同你嘅「惰性」對賭。香港有幾間美容院上市,單係睇幾間條數清清楚楚嘅公司業績,你就發現,一年有超過4億錢,係啲女人買咗package唔去,你冇睇錯,係4億元!呢4億元係白畀美容公司!以將於星期五上市嘅醫思(2138),即係DR REBORN母公司為例,2014年有超過2億元套票,一年後冇用到過期!2014同2015年,因為套票過期而入賬嘅收入,佔總收入接近四成!至於修身堂(8200)上年過期套票收入貢獻,佔療程服務總收入46%;必瘦站(1830)情況一樣,佔超過兩成。所以,你話有邊個行業,可以幸福到,有人不斷樂此不疲地,雙手奉上真金白銀而又不求回報,除咗賭業,就係美容院。所以嚴格來講,白畀錢嘅你,係賭輸咗,輸咗俾你嘅「惰性」。千頌C
http://fb.com/winbigwok本欄逢周三刊出





來源: http://hk.apple.nextmedia.com/financeestate/art/20160309/19521371
收市 閒情 有一 一種 幸福 是開 美容院 美容
PermaLink: https://articles.zkiz.com/?id=297320

收市閒情:《香港01》又一個奇蹟

1 : GS(14)@2016-03-16 14:17:04

我係廣告界一個小薯,喺呢行撈咗咁多年,我諗《香港01》,係繼不死亞視之後,media界嘅一個奇蹟!上帝創造天地都要7日,但一份周報,竟然可以喺創刊號上架未滿一周,就創造兩個世界級「關公」災難!昨日起身碌facebook,見到《香港01》出post,講「毛記台慶」冠名費幾銀,真係當堂嚇一跳,然後我真係忽然小志上身,大喝一句:「出嚟啦!『關公』!」你可能會話,早前好多傳媒都報道咗呢單新聞啦!冇錯,但冇一間好似《香港01》咁冇品,竟然將毛記成份用去sell客嘅proposal,原汁原味掟上網登晒出嚟!人哋宣傳都未出,佢竟然將成個show個名搶先公開,連點sell客,都要俾你加多兩句嘴!老老實實,要拎份proposal,其實唔難,但大佬呀,你知唔知自己乜嘢身份?你係對家呀!拎對家商業機密大事宣揚,知唔知咩叫職業道德?除非你夠膽同我講,毛記個show名,對公眾知情權事關重大,大到會令「社會撕裂,大家都輸」,所以唔報唔得。冇錯,網媒競爭激烈,唔係你死就我亡。要上位,的確要有橋盡度,行頭變得快,要生存,幾時都係「是時候改變了」;但做人、做事操守呢樣基本原則,你一變,就係冇格!過咗條線,就係衰格。



求上位都要有操守

2006年有單新聞,話說可口可樂有個員工,偷咗公司文件加埋可樂未推出嘅飲品sample,然後寄信畀死敵百事,話有可口可樂機密資料可賣。不過,作為長期死敵嘅百事,唔單止冇落搭,反而通知可樂捉鬼,最後可樂聯同FBI成功揪出內鬼。知唔知事後百事點講?佢話,「Competition can sometimes be fierce,but also must be fair and legal」,呢啲叫乜嘢?叫君子!創刊號,印漏廣告logo(而我不知道有乜嘢可能會發生呢個錯),然後回書,已經奇情過將特首「I can fly one day」視為「Gag」;但更奇情的是,《香港01》老總就呢件事向員工發信,當然有提過咁係對客戶負責任嘅行為,fine,冇問題,但其中兩點係咁:「一個在目前非黃即藍的情緒化局面之下,01非蘋果、非大公/文匯的定位是兩面不討好,會招來各方帽子橫飛的攻擊,是意料中事,特別是今天的網絡文化」。「這張相應該是自己同事拍的,因為我認得是公司的枱」。我唔知我啲客點睇呢個media,但如果我係Cartier,一定開心到飛起,一個廣告,兩個版本,無限exposure!經一事,蔡一智,如果我有生之年,俾我遇到咁嘅離奇事,我會同平台講,「廣告印錯,大家都輸,是時候回書了」。千頌C
http://fb.com/winbigwok本欄逢周三刊出





來源: http://hk.apple.nextmedia.com/financeestate/art/20160316/19530946
收市 閒情 香港 01 一個 奇蹟
PermaLink: https://articles.zkiz.com/?id=298117

收市閒情:李小加慈悲過唐三藏

1 : GS(14)@2016-03-30 14:23:17

作為散戶,有時真係覺得李小加,好似唐三藏咁慈悲為懷!情況就好似悟空同唐三藏講:「師父,呢度有妖氣!」點知唐三藏唔單止不加防範,反而鬧悟空,「萬物皆有靈,何苦趕盡殺絕?」港交所(388)近年「妖氣沖天」,一隻二隻蜘蛛精、白骨精打橫行,一隻毅信(1246)合股再供股,仲要賤格到「2供11」,埋單供股成本條數好難計。近年港股變成殼股交易所是常識吧,啤殼潮啤出一隻隻老千股,近期李小加出席分析員會議,就因為「老千股」俾人質。你同李小加講,「小加,呢度有好強嘅妖氣,我哋唔好俾佢哋入屋。」佢就唐三藏上身,「悟空!佢哋好多都唔係妖股,我佛慈悲,全部放晒佢哋入嚟!」2015年殼股炒到癲,112間公司申請上市,得3間係港交所要求更多資料而延批,至於被拒上市嘅公司更加係「零」;睇埋2014年,同樣係「零」。比起2011年同2013年,有3間公司被拒上市,2012年上市申請只有63間,但港交所拒5間於門外。小加,難道近兩年港股老千全部金盤洗手,變得又pure又true,隻隻乾淨上得市?定係你哋唔做嘢?



懶理妖股充斥市場

港股唐三藏放晒啲牛鬼蛇神入屋,結果係點?今年有16隻新股上市,其中5隻配股上,其中4隻第一日就以倍計爆升(噚日正利(8318)就高圍飛價7倍!)有幾隻莊家食完就打回原形。另外IPO上市嘅,年年卡(3773)同融眾(3963)早已跌穿招股價,融眾更潛水近四成。兩隻股現在市值得幾億元,發生咩事?你懂的。妖精現形,你走去怪三藏小加,但佢竟同你講,「悟空,萬物性本善,上市後公司變壞,就唔係上市科的責任。再者,我哋放佢哋入屋時,係完全符合上市標準!」真係要拎塊照妖鏡出嚟!創徽國際(8335)原本係配股上市,上星期四掛牌,點知上市前兩日,港交所收到投訴所以要延遲上市。至於係咩投訴,打去港交所問,佢話要保密唔講得。話唔上就唔上?然後不了了之?收到風,話創徽原本book咗JW萬豪豪搞上市慶功宴,點知創徽前CFO向港交所告密,上市大計Hold住咗。咁係咪反映,如果唔係有人告密,港交所都唔知條數有問題?你仲同我講,港交所有做好把關工作?最可愛係,如果你炒老千股出事,小加會同你講,「不要碰他,你就不會受傷。」情況好似,你放晒啲殺人犯出獄,然後再有人遇害,你同佢講,「你唔出街,咪冇事囉。」另,小加話,反正都阻唔到老千股,不如開個門檻更低嘅「第三板」。一個人為搵錢,原來真係連基本邏輯都會失去。施主,回頭是岸呀!千頌C
http://fb.com/winbigwok本欄逢周三刊出





來源: http://hk.apple.nextmedia.com/financeestate/art/20160330/19549544
收市 閒情 李小 小加 慈悲 過唐 三藏
PermaLink: https://articles.zkiz.com/?id=298712

收市閒情:翠如BB股譜出勵志故事

1 : GS(14)@2016-04-13 16:59:57

聯旺(8217)上市,喺「翠如BB」加持下,單日乾挾14倍。事實上,新聞標題「黃翠如家族身家19億」背後,譜出一個又一個動人嘅勵志故事。話晒財經版,當然先講黃翠如……個爸爸,亦即係聯旺大股東之一、CEO黃永華。話說黃永華本來係小販,有幾年仲喺九龍灣街市賣魚。翠如BB都講過,自己細個住木屋,好窮,人生轉捩點睇怕都去到96年,當時黃翠如讀中四,翠如爸爸就毅然轉行,加入聯旺另一大股東黃智果嘅裝修公司做判頭,自此屋企環境就開始改善。往後嘅故事,就係翠如爸爸同黃智果夾份開公司,捱到今日上埋市!白手興家故事冇錯係好多,不過更勵志個位係,在於翠如爸爸轉行時,已經40歲!一個男人去到中年,仲有一家大細,毅然轉行係要有幾大嘅勇氣,仲要由零學起!翠如BB都話,佢爸爸有今時今日,係由手板被冰壞到腳板被地盤釘刺穿捱出來!呢份勇氣,係絕對令人敬佩!再講聯旺其中一個董事趙智宏。簡歷顯示,趙生04年中學畢業,07年做過幾年警察。去到12年又係毅然轉工,入咗聯旺做見習工程師,上年先升做正式工程師。去到兩個月前,至喺IVE讀完土木工程文憑。中學畢業,做到警察呢份薪高糧準嘅工,仲要當年香港社會冇咁多衝突,警察都算係優差,但佢放棄份工轉搞工程,之後仲做埋上市公司董事!所以,任何事只要肯學肯捱,就算只係中學畢業,都可以做到工程師!講埋翠如BB,03年加入有線電視做主播,大家都話佢個樣入屋。咩叫入屋?有電視台前輩講過,「入屋者,即係個樣靚靚哋,順眼得來啲師奶覺得佢唔會搶走你老公」,咁就叫入屋啦,That's why就算佢喺收費台,都Keep住有節目,喺收費台捱足十年,喺冇靠任何緋聞,亦冇傳過負面新聞下,終於捱出知名度,捱到做埋女主角,捱到識到個提起都會甜笑嘅男朋友蕭正楠,捱到成為「女神」!一個後生靚女,用十年青春喺娛樂圈打拼,呢份毅力反映到翠如BB有外在美之餘,亦有內在美。上面三個人嘅故事,聽完都覺得熱血,不過,現實係殘酷:原來就算紅褲子用雙手打天下,最後都要啤殼上市;而當你睇到趙生查實係大股東黃智果個女婿,人又不其然會灰咗;最遺憾嘅係,翠如BB個樣幾入屋都好,都係要過咗大台先真正入屋。一台獨大呢樣嘢,幾時先打破到?所以綜合而言,蕭正楠先係真正贏家!拍戲唔少但未算好紅,不過自從成為翠如BB的男友,已經令唔少男士大感葡萄;家陣翠如BB仲做埋上市公司千金,一眾男士聽到後,真係一陣陣酸味傳出嚟!咁樣,仲唔夠勵志?最灰嘅係,隻股炒起,但又有幾多人知間公司係做乜嘢?業績點樣?條數靚唔靚?假如你想講一句:「Who cares?」時,咁證明,港股係大輸家。千頌C本欄逢周三刊出
http://fb.com/winbigwok





來源: http://hk.apple.nextmedia.com/financeestate/art/20160413/19568458
收市 閒情 翠如 BB 股譜 譜出 出勵 勵誌 故事
PermaLink: https://articles.zkiz.com/?id=299180

收市閒情:霸氣見工真人真事

1 : GS(14)@2016-07-06 08:09:58

後生仔打工經驗淺,見工時唔識人情世故好正常,不過如果唔話俾佢哋知個問題,對佢哋唔公平,今次想講幾個真人真事:故事一:一間marketing公司請freshgrad,大學畢業,讀嗰科都幾難入。組頭阿怡就約咗個interviewee阿強上公司見個面。起初都正常,叫佢自我介紹又對答流利,唔錯。呢個時候,阿怡收到老細call,「唔好意思,老細電話要聽一聽」,收線後又講兩句,老細又打來,佢又行開聽。一返埋位,阿強就強了:「有冇搞錯,我哋關係係對等,你需要人,我需要工,你去聽電話,有冇尊重我!」故事二:今次阿怡醒咗,佢唔想浪費時間,所以決定傾咗電話先,再決定見唔見,唔好浪費時間。於是佢打畀阿杰:「你畢業都半年多,中間冇返其他工?」「有呀,返過ATV。」「咁你又唔寫落CV?」「唓!ATV寫嚟都廢事啦。」既然唔想畀人知,但人哋問你又講,應該讚你誠實嗎?故事三:阿怡又電話interview另一個人,叫阿琛,呢個人份CV都幾唔錯,寫文都幾好,佢問:「咁我點解要請你?」「因為我叻囉!」夠招積!「你點叻法?」「我見其他人都好蠢。」「即係你點叻法?」「我由細到大學嘢都好快上手,好似畫畫、跳舞、運動……」「你話自己學嘢叻,如果你好似某品牌咁遇到某情況,你會點處理?」「唓!咁講馬都唔會跑得快過隻馬,我話我叻我就一定識?」精彩!阿怡講一輪官腔嘢話等通知之類,呢位人兄又爆seed:「咁你家陣即係唔請我啦!」「有消息再通知你。」「我唔要等,我要你乾乾脆脆俾答覆我!」「有消息再通知你。」,然後阿琛cut線。即係咁,身邊識好多90後都好叻,好醒,轉數又快又貼地。不過,一樣米養百養人,偶爾遇到一兩個骨骼精嘅千古見工奇才,又覺得要分享畀大家,等大家多了解現今世界係幾百花齊放。千頌C
http://fb.com/winbigwok本欄逢周三刊出





來源: http://hk.apple.nextmedia.com/financeestate/art/20160706/19682766
收市 閒情 霸氣 見工 真人 真事
PermaLink: https://articles.zkiz.com/?id=302661

收市閒情:「低頭族2.0」之育成

1 : GS(14)@2016-07-13 05:09:39

任天堂新遊戲Pokémon GO,上架未夠一星期就成功育成「低頭族2.0」。以前低頭族玩手機之餘,行去邊都仲係自己話事呀,不過「低頭族2.0」就唔同,行去邊係由部電話帶住!「小智你睇!左邊有隻比卡超呀!」「喂!右邊!有隻傻鴨呀!」係!隻game好毒,你可以唔沉迷,但點都要玩,原因好簡單:(1)當一隻game能令任天堂隻殘股起死回生,4個交易日就已累升六成,市值增超過600億港紙。呢個升浪你已經賺唔到。喂!免費下載你都唔下載?蝕上加蝕!如果你係科技盲,但又鍾意炒股,你唔下載你點知咩係AR技術?Augmented Reality呀!keep住自己update新事物好重要,如果唔係今日手遊股大升,你都唔知咩事。(2)當年免提電話裝置一推出,突然覺得條街多咗好多癡線佬,「條友做乜無啦啦同自己講嘢」。後來先知係自己無知。家陣仲同人講bluetooth好先進,唔該自己走埋牆角反省,家陣講緊手機變精靈球!「嘩佢癡線架,無啦啦衝過去用手機影空氣!唔通有鬼。」唔想自己講埋啲咁失禮嘅嘢,唔該等隻game香港一出即刻去download。(3)香港未有得玩,已令全港女士不停講「好想玩呀!我又要捉比卡超!」呢個時候你瀟灑地同一眾少女講:「我,幫你裝。」然後全部女士喺你身邊圍住你講:「點解你裝到嘅!好叻呀!」贏到全世界啦!喺街頭上遇到一隻小精靈,然後一眾玩家都會衝過去,呢個叫咩時侯?叫愛情來的時候!男士一見到獵物……旁嘅女神,大好機會上前結識,仲有埋共同話題:「不如呢隻讓畀你啦。」「我送隻比卡超畀你呀!」世界仲唔係屬於你嘅!「有冇咁勁呀?」有!Pokémon GO美國Android下載量,上架兩日已超越Tinder。連交友App都過埋,證明隻game交友能力幾高!女玩家當然有,最勁係逼到男玩家都一定會玩,仲會好落力咁玩,單憑呢點,我肯肯定Pokémon GO錢途無可限量!



千頌C
http://www.fb.com/winbigwok本欄逢周三刊出





來源: http://hk.apple.nextmedia.com/financeestate/art/20160713/19692315
收市 閒情 低頭 2.0 育成
PermaLink: https://articles.zkiz.com/?id=303501

收市閒情:股海掙扎的鯉魚王

1 : GS(14)@2016-08-04 04:03:58

有一晚,我行去海邊,開個《Pokémon GO》,彈咗隻「鯉魚王」出嚟,望住佢啪吓啪吓,喺冇水嘅情況下好努力咁掙扎,我覺得我就係佢。如果你冇睇開《寵物小精靈》,一定會以為叫得做「王」,一定好勁。事實係,151隻寵物小精靈入面,鯉魚王堪稱最廢最廢嘅一隻。佢碌大對眼喺度跳吓跳吓咁,其實諗番,就好似平時對住報價機嘅我。上星期,見到隻德普科技(3823)星期四人踩人,星期五都死唔去,唔知邊度嚟嘅勇氣,突然覺得自己股神上身,0.192銀左右買咗啲。鯉魚王係一種連用爛魚竿都輕易捉到嘅廢物。德普科技莊家係比比鳥,咁我一定係佢眼中嘅鯉魚王,無啦啦自己跳上擂台,再使出唯一招式——掙扎。你眼望我望,佢心諗:「做咩啫你?」然後再你眼望我眼,食埋你。睇埋星期一收市價,就算全日反彈,我都未返家鄉。鯉魚王廢到一個點係,就算喺緩緩嘅流水中,都只可以隨波逐流。望番自己,我又何嚐唔係?Number降日日中,人炒乜我炒乜,高追中伏一條龍之事十常八九。不過,做鯉魚王有樣好,就係多同伴。只要去到海邊,無論係幾污漕嘅水,或者幾乾淨嘅池,你都會見到佢哋喺度拼命跳吓跳吓。正如落到股海,你理得佢係炒妖股定係炒基本因素,你都一定會見到好多同伴,同你一齊使出絕招——掙扎!你可能會話,鯉魚王進化之後,會變成超強嘅「鯉魚龍」!好勵志呀,我或者有朝一日都可以做方進新㖭!不過,玩《Pokémon GO》嘅你都知,要400粒糖先進化到,即係你要捉101條!鯉魚王始終都只係一條彈彈吓嘅鯉魚王;老散,終歸都係俾人劏嘅老散。我,又係我呀James。送首歌俾大家,係官方錄製嘅「I LOVE鯉魚王」,好洗腦,好慘。https://goo.gl/mL87o7千頌C
http://www.fb.com/winbigwok本欄逢周三刊出





來源: http://hk.apple.nextmedia.com/financeestate/art/20160803/19720198
收市 閒情 股海 掙紮 紮的 鯉魚
PermaLink: https://articles.zkiz.com/?id=304255

收市閒情:鏡頭後的公司主席

1 : GS(14)@2016-08-10 07:53:28

上市公司主席,呢個title就算唔打得,都睇得呀!That's why唔少大陸佬呢幾年,咁鍾意喺香港買隻殼,然後同鄉親父老叔伯兄弟講,「我是香港上市公司主席!」上市公司,一聽就知架勢。但上市公司主席咪又係人一個,好似隻萬亞(8173)大股東楊榮義咁,唔小心買多咗股去到要提全購水平,但佢又唔想做G.O.,相信最後會俾證監會罰。你可能諗,「係咪做緊古惑嘢扮無知?」錯!聽講佢係真心唔小心。上市公司主席喺鏡頭前面好似好型,鏡頭後?我唔直接答你,我用例子答你。有一個城中超級富二代,雖然唔靚仔,但如果港女睇埋佢副身家,一定覺得佢係吳彥祖級咁正。你見富二代四張幾,行出嚟會超級嚴肅?你試吓去佢office睇吓你就明。話說佢office有個大架,放晒佢啲珍藏。你以為佢嘅寶物,唔係古玩就係玉器?咁你就錯喇。呢位富二代童心未泯,成個架都係Winnie the Pooh公仔。最好笑係有次同事行過見到佢突然除咗條呔,以為有咩事啦,點知佢幫Winnie the Pooh打呔,然後佢竟然滿意地笑。所以話,一個人有錢到盡頭,要笑,其實都係只係對住隻Winnie the Pooh……啲人話,上市公司老闆上咗岸唔使做。呢個係一個大話!有個上市公司老闆,白手興家之餘,平時見街外人,講嘢好得體又有禮貌。話說呢位老闆到今日公司上晒岸,仍好積極落手落腳做。有一日開會,有同事做嘢唔啱佢心水,開會時佢突然唔出聲。正當大家以為佢發火,佢拎個銀包出嚟,「呢度200蚊。即刻坐的士,拎番個腦返嚟!」好啦,咁又好多人會話,「上市公司假假地都有名望,對員工唔會太差啦!」又錯!唔少上市公司老細都孤寒到一個點!話說有間公司開party。而party嘅嘢食實在太豐富,包括薯片、汽水,完。所以話,上市公司主席都係普通人。咁上面講嘅係邊間公司邊個人?儍嘅,我當然唔會話你知,自己估。千頌C
http://www.fb.com/winbigwok本欄逢周三刊出





來源: http://hk.apple.nextmedia.com/financeestate/art/20160810/19729771
收市 閒情 鏡頭 後的 公司 主席
PermaLink: https://articles.zkiz.com/?id=305229

【星運平平】主持《都市閒情》突暈倒送院

1 : GS(14)@2016-08-13 14:59:36

現年34歲的鍾沛枝是01年港姐亞軍,同屆的冠軍、季軍分別是楊思琦和朱凱婷,星運似乎都比她好。鍾沛枝在無綫大部份時間都是主持《都市閒情》,04年在直播期間,更突然暈倒送院,當時無綫資訊文科經理李瑜說:「佢身體一向比較孱弱,應該係女人病。」才令她難得「見報」。沛枝演過的劇集僅有《金牌冰人》、《天涯俠醫》、《酒店風雲》、《本草藥王》、《飛短留長父子兵》和《天幕下的戀人》,但都是三、四線角色,後來離開無綫轉行做地勤,其間又曾擔任公關及在網上拍片教美容(圖)。




來源: http://hk.apple.nextmedia.com/entertainment/art/20160813/19734339
星運 平平 主持 都市 閒情 暈倒 送院
PermaLink: https://articles.zkiz.com/?id=305661

收市閒情:深港通乃過期罐頭

1 : GS(14)@2016-08-17 07:57:01

昨日李克強一錘定音,落實開通深港通,正當不少戰友舉杯慶祝之時,我笑而不語。人最大嘅煩惱,就係記性太好。2014年4月11日,當日李克強堅定不移,決定滬港互聯互通。回首當日,李克強總理字字鏗鏘,「雙向開放」、「健康發展」,北水真正南下,山河壯麗。就喺呢一日之後,我決定跟住買張滬港車票,我仍記得我當時心中暗叫一句:「起飛啦!」結果恒指喺公佈後,第一日就跌市,如是者一個月內,跌足1,440點。秋刀魚會過期、罐頭會過期、連保鮮紙都會過期,但我想唔透,點解消息公佈一日就已經過期?不是說要一起健康發展嗎?李克強畀過期罐頭我,教我如何健康唔肚痾?於是我睇睇恒指圖,原來罐頭真的過期了,恒指於一個月前,已累升2,000點。世間最痛苦的事莫過於等待,港股一年後終於爆發。我當時只顧掃貨,港交所(388)、AH折讓股、券商股、內銀股,連可怕嘅殼股,我都不停掃,掃到得意忘形。甚至忘了一年前,我曾提醒自己,呢架叫滬港通嘅直通車係無brake,佢只可以一直咁開,一世只可以停一次,就係炒嗰陣。6月股災,大市炒了,李克強暴力救市,十隻有九隻A股炒埋一碟,結果當初口口聲聲的「雙向開放」,變成「單向獨沽」,港股慘成提款機。2016年8月16日,李克強再一次堅定不移「深化內地與香港金融合作」,要貫徹落實「發揮深港區位優勢」,特別強調「改革開放是當代中國最鮮明的特色」,我聽到就覺得恐怖,是合作有事就沽爆港股?發揮港提款機優勢?改你、革你然後開佢嘅放嗎?有燈就有人,我再睇恒指圖,恒指已突破九個月高位。過去一個月,恒指累升逾2,410點。李克強公佈深港通這天是鬼節,所以我會當他是鬼。我再也不會懷疑深港通是不是過期罐頭,因為,答案是肯定的。李克強再多一張深港車票,你說,我還願不願意跟你一起走?千頌C
http://www.fb.com/winbigwok本欄逢周三刊出




來源: http://hk.apple.nextmedia.com/financeestate/art/20160817/19739150
收市 閒情 深港 通乃 過期 罐頭
PermaLink: https://articles.zkiz.com/?id=306197

收市閒情:尋秦記之四叔天體盤

1 : GS(14)@2016-09-01 06:20:42

秦始皇帝,姓嬴,名政,時稱秦王政,畢生欲求長生不老。派人四處打探下,秦始皇帝早就修煉得道。今日的他,生於香港,惜時移易轉,再多的財富亦敵不過通脹。昔日一代帝王,英武銳氣;數千年後的今日,卻被小人困辱,打工捱騾仔,氣焰已消。對秦始皇帝來說,生活的小確幸,是數千年前的愛人阿房女一同得道,兩人生死相許。今日兩人為保持長生不老,必須覓出練功寶地,即係換樓;但前提是……要近北角返工。嬴政:阿房,此盤有何着數?聽聞單位奇細!阿房女:啟稟殿下,細就細啲,你今時唔同往日呀,將就吓啦。之但係你睇5樓啲單位,真係各有特色,絕對適合潛深修練。嬴政:願聞其詳。阿房女:啟稟殿下,先講E室,實用面積164方呎……嬴政:164呎?人住的嗎?阿房女:反正你千年道行,早已練成縮骨功,怕甚麼?最重要係,單位有540呎平台,比單位大2.3倍!冇瓦遮頭,餐風飲露,風味絕佳!嬴政:540呎!好!地方闊落,不單可以大量曬陳皮煉丹,曬多了更可拿出去賣,妙絕!阿房女:更重要係,平台打正對面就係明月大廈!單此一點,就說明此乃吸收「日月精華」的絕佳之地!嬴政:不過阿房,有平台,豈非會貴……我們現在國庫空虛……阿房女:放心,仲有選擇!C室唔單止細,廁所洗手盆仲要同廚房洗手盆共用,我哋長生不老之術再勁,亦會因為呢個充滿大腸桿菌嘅洗手盆而死,所以我會考慮埋A室或B室。嬴政:此兩單位看來不俗,平台50多呎,佔單位實用面積近三成,仍然可以曬陳皮!阿房女:殿下,你睇漏一個賣點啦!你睇吓個廁所加浴室!嬴政:何如?阿房……阿房(驚訝),此乃何事?阿房女:冇錯,喺正廁所隔籬,就可以開門出去平台。我哋食丹維生,如廁臭氣熏天在所難免,但此門一開,即時心曠神怡;廁所另一方嘅企缸旁邊同樣可以出工作平台!沖沖吓涼時要吹吹風,散一散悶氣,一流!嬴政:豈有此盤!竟然會有奇人異士,想到有人會沖涼時走出工作平台!妙絕妙絕!且慢,A室工作平台對面是樓,B室對面是商廈,朕豈非一不小心,就要裸露於人前,工作平台變「天體平台」?阿房女:殿下呀殿下,你唔記得咗,「欲練神功,必先自宮」嗎?反正都自宮了,冇相干啦。嬴政:你說的也是。對了,這個「天體盤」叫甚麼?阿房女:恒地(012)嘅尚譽,英文one Prestige。嬴政:Prestige,好名好名,絕對是「帝王級天體盤」。相信入住此盤後,我們修煉成精,指日可待。千頌C
http://www.fb.com/winbigwok代《趣BLOGBLOG》一周




來源: http://hk.apple.nextmedia.com/financeestate/art/20160901/19755816
收市 閒情 尋秦記 之四 四叔 天體
PermaLink: https://articles.zkiz.com/?id=306982

收市閒情:facebook打造鄺神

1 : GS(14)@2016-09-07 21:44:29

一個月前,我哋仲笑緊鄺俊宇寫鄺體,搞到「逗號很累」;但你又點會諗到一個月之後,鄺俊宇會成為今屆超區票王。其實,facebook(fb)係其中一個「造王者」。首先,十個有九個港女,都一定曾經喺fb like過鄺俊宇啲港女語錄。然後,十個有五個男仔,都會莫名其妙地俾女仔tag喺鄺神啲post。根據官方統計,截至今年8月8日,鄺俊宇嘅like數係16.79萬個。單以7月8日至8月8日一個月以來,獲粉絲對專頁嘅互動超過12萬次,係參選人中嘅「fb互動王」。鄺俊宇本身嘅知名度就係由fb度嚟。同樣,地區直選票王朱凱廸亦打入「互動最多十大參選人」之一,咁樣反映今時今日,要成為「票王」,一定要識玩fb。多得fb,令大家喺選舉宣傳期早段,已見到「鄺神」句宣傳口號:「讓世代改寫我們的時代。」然後大家雖然會笑一笑,問「到底,你,講緊咩呀?」但最少你知佢出選。然後一眾KOL又開始笑鄺體,令鄺體更加入屋。到真係選嗰日,大家都喺WhatsApp、Telegram知道雷動叫人投畀鄺俊宇,結果令唔少人都喺fb出post話「頂走鼎,投逗號」。一時間,fb只有逗號,見唔到句號。喺呢個moment,相信令好多人本來投唔落鄺神,最終喺羊群效應下投「逗號」神聖一票。



除咗鄺神外,仲有數據可以反映出,識玩fb對選情有正面影響。截至今年8月8日,地區個人專頁最多like嘅前十位參選人,以及一個月內十位最多interaction嘅參選人之中,同樣都有八位成功當選,至於剩番兩位唔能夠奪議席嘅,分別係同樣出戰港島嘅王維基同「四眼哥哥」鄭錦滿,兩人都係高票落敗。兩項數據同樣各只有一個參選人,係有中央選舉機器照住,分別係葉劉同周浩鼎。值得留意係周浩鼎雖然打入「互動最多十大」,但佢得到「嬲嬲」嘅數目,亦佔好重比例。至於周浩鼎最新fb like有1.65萬個,王國興fb like只有3,000個。雖然唔能夠話fb對兩人選情影響好大,但至少牌面上係,睇嚟fb like緊要過午餐肉。千頌C
http://www.fb.com/winbigwok本欄逢周三刊出




來源: http://hk.apple.nextmedia.com/financeestate/art/20160907/19762552
收市 閒情 facebook 打造 鄺神
PermaLink: https://articles.zkiz.com/?id=307950

收市閒情:四叔的HCollection

1 : GS(14)@2016-09-29 08:03:12

如果講香港創意產業,四叔李兆基簡直係當代先軀!恒基地產(012)旗下新盤圖則,一次又一次衝擊市民大眾對「家」的認知。近期恒地四個最觸目新盤圖則,包括:「M巾盤」大角嘴利奧坊.曉岸、「天體盤」北角尚譽、「不能坐的馬桶」何文田加多利軒,仲有「599呎四房」長沙灣南昌一號,全部嘅話題性絕對一流!你覺得呢四個盤好冇人性?其實四個盤同屬恒地「The H Collection」系統樓盤,顧名思義啦OK?個盤行咩路線,由個「H」字已有迹可尋。話說,恒地話The H Collection物業風格,「均走高檔精品路線」,仲奉行五個「H理念」。根據恒地網頁簡介,單睇字面,其實呢四個盤都做足呢五個H有突!
Heart:恒地話要「用心打造」,「憑一顆心,建構令你喜出望外的品味生活,是我們的堅持」。品味嘅嘢,你識條鐵咩?將「M巾」形嘅設計套落去圖則,真係要非常用心劏客,先可以諗到點樣一層劏22伙。「每一構思,都用心追求美學與功能並重,諦造簡約而完善、優雅而舒適的品味空間」。恒地呢一段形容,睇多次,別有一番風味。
Hallmark、Handcrafted:喺恒地「名師美學」概念下,The H Collection物業講求「對美的執着追求,是引領生活昇華的階梯」。南昌一號600呎都冇,都可以間到四間房出嚟,傳說仲要有一個係套廁,真係冇巧奪天工嘅技術,都一定唔會搞得掂。所謂simple is beautiful,喺簡約主義之下,乜嘢都open、乜嘢都冇就最靚啦,舊時有open kitchen,今日有加多利軒open toilet,大家可以更open更坦蕩咁面對屋企人,同屋企人關係踏上昇華的階梯。四叔,用心良苦。
Harmony:「和諧,是理想生活的重要元素……恒地置地融合城市與大自然」。除咗open toilet外,尚譽廁所、浴室都有門直出露台或工作平台,沖沖吓涼又可以出去吸新鮮空氣,天人合一,與大自然完美結合,感受大自然同人類和諧。
Hospitality:殷誠禮待。咁嘅奇則香港人都衝去買,唔禮待你就真係天怒人怨啦!睇住咁嘅則,再望番廣告嘅description,對「無恥便無敵」又有多一點體會。千頌C
http://www.fb.com/winbigwok代《趣BLOGBLOG》一周




來源: http://hk.apple.nextmedia.com/financeestate/art/20160929/19784928
收市 閒情 四叔 叔的 HCollection
PermaLink: https://articles.zkiz.com/?id=310534

收市閒情:傑青揭露真實香港

1 : GS(14)@2016-10-12 07:51:14

黃仰芳拎「傑青」,以為自己好傑出,於是衝出嚟同大家分享「兩年供斷樓方程式(經傳媒查證後實為兩年半)」,(聲稱)10年睇唔超過5套戲同concert、(聲稱)從來唔會同同事吹水或hea時間。你話佢唔配做傑青?我話佢直頭代表到香港現時核心價值!現時人人呻上唔到車,證明只要你上到車,已經係超人!畀錢個仔上車就已升格做慈父;黃仰芳俾人叫「傑青」,又有幾出奇?黃仰芳冇家底冇父幹,靠自己買到樓,兩年半供斷會,都算係叻女。係,佢係做傳銷,不過你睇吓以前拎過傑青嘅人,2006年傑青之一係何猷龍,超級「富二代」,每日開賭做莊家,對社會嘅最大貢獻?為賭徒提供精神食糧?根本黃仰芳拎傑青,係反映香港主流核心價值係,不問過程、只睇結果。你又會話,佢03年接受訪問時,講「金錢不代表一切」、「work-life balance才是最重要」;今時今日講嘅買樓方程式又係另一套。呢方面又反映佢喺「如何做世界女」方面有傑出成就,好明顯佢今次分享買樓心得,係知呢類topic最易做soundbite,證明佢係有準備。佢可能講大話,咁又點?梁振英、朱培慶都拎過傑青啦!當然,拎過傑青嘅仲有好多實至名歸嘅人,好似83年得主羅文、89年程介南、94年羅冠蘭、95年陳文敏、96年李麗珊、之後仲有梁美芬、葛珮帆、成龍……你仲未明「香港十大傑出青年選舉」最核心本質係咩?選舉由國際青年商會香港總會搞,簡單講就係小圈子選舉,就好似TVB搞個圍內嘅選美,個名前面加「香港」兩隻字,大家就以為「香港小姐」真係代表香港。根本做唔做到「傑出青年」,在乎嘅唔係你對社會有幾大貢獻,而係有冇人提名(所以佢有肥胡)。Sorry, this is Hong Kong。所以,特首選舉,認真便輸了。千頌C
http://www.fb.com/winbigwok本欄逢周三刊出




來源: http://hk.apple.nextmedia.com/financeestate/art/20161012/19797850
收市 閒情 傑青 揭露 真實 香港
PermaLink: https://articles.zkiz.com/?id=311648

收市閒情:唔好做搭升降機自私精

1 : GS(14)@2016-10-19 05:23:07

以下係「可能我個人比較挑剔系列」,本人好唔鍾意一種人,就係「搭升降機自私精」。一堆人等升降機,第一個人衝入去,然後行到最入,耷低頭,睇手機;第二個,一樣,行到最入發吽哣;第三個呢,行埋一個角搣手指倒刺;到第四個,一入升降機,即俾升降機門夾。好彩嘅,頭三個入升降機嘅人,總會有一個幫你㩒番開升降機門;唔好彩嘅,你就以身擋開道門。俾升降機門夾到最多都係少少痛,但如果第一個、第二個、就算係第三個入升降機嘅人,肯犧牲少少,放棄睇手機、發吽哣、搣倒刺嘅機會做一陣揸升降機人,第四個人根本唔會俾升降機門夾到。香港離地嘅人好多,事不關己,眼尾唔望。康橋之家前院長張健華,再次打甩性侵智障女院友官司,仲人渣到要討回訟費,之後仲辯稱「自己先係受害者」。留意番,張健華已係第二次被揭犯案!早於2002年,已涉嫌非禮兩名智障院友,之後用食物安撫,令事主口供前後矛盾,所以法庭裁定罪名不成立。到今次,再次甩身。有一樣,我唔明,兩單案相隔十幾年,中間張健華仲有做過啲咩嘢,咁大間護理中心,會真係冇人知?冇人留意?定係冇人敢講?如果早啲有入升降機嘅人,可能係康橋之家嘅員工、前員工、知情嘅人,唔好發吽哣,唔理唔望自己企埋一角,早啲出聲,或者2014年呢單案嘅受害人就唔會出事。香港人已經面對好多嘅唔合理,樓市嘅唔合理,3,600蚊租個床位;價值觀嘅唔合理,以為29歲買到樓就真係得到全世界;政治嘅唔合理,三權分立早已被人狠狠踐踏;如果連人格都冇埋,我唔知香港仲可以有咩留低。根據《禮運大同篇》,「大同」係指:「大道之行也,天下為公,選賢與能,講信修睦,故人不獨親其親,不獨子其子,使老有所終,壯有所用,幼有所長,鰥寡孤獨廢疾者皆有所養;男有分,女有歸,貨惡其棄於地也不必藏於己,力惡其不出於身也不必為己,是故謀閉而不興,盜竊亂賊而不作,故外戶而不閉,是謂大同」。大同係一個烏托邦,但香港,好似離呢兩個字越來越遠。千頌C
http://www.fb.com/winbigwok本欄逢周三刊出




來源: http://hk.apple.nextmedia.com/financeestate/art/20161019/19805089
收市 閒情 唔好 好做 做搭 升降機 升降 自私
PermaLink: https://articles.zkiz.com/?id=312651

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019