ZKIZ Archives


90後情侶賣無骨雞翼包

2016-07-07  NM

一班朋友的聚會中,總有一個是雞翼控,但每每考慮到「噒骨」的狼狽樣子,少不免令人有點卻步。好包由今年分別23及24歲的情侶Vincent和Kay開設,Kay笑說自己很喜歡吃雞翼,為了吃得方便又優雅,他倆創出無骨雞翼包。今年6月初,他們更在元朗開店,除了賣無骨雞翼包外,還將素食及日式料理的元素融入意大利包之中,在優閒的日常中添一點新意。

我哋最好賣係香蒜椒鹽雞翼包、蜂蜜雞翼包、秘製慢煮豬腩肉包同焦糖洋蔥大啡菇包,平時晏晝都幾多學生同街坊嚟食!」每個包售價由$32至$42不等,Vincent一身大廚功架,負責食物製作,Kay則負責宣傳及行政,2人打理小店時甚有默契。

歐遊回港賣包

13年,2人經朋友介紹認識,隨後更成為情侶。「大家各有自己嘅工作,好難夾到時間見面。Vincent鍾意煮嘢食,我可以處理行政事務,於是萌起創業念頭,想開一間食店。」15年,他們齊齊辭職,先去旅行放鬆心情,Vincent表示:「去到瑞士、法國,見到有賣意式包嘅食店,香港好似唔太出名,但食就好方便,覺得幾適合喺香港賣。」回港後,在朋友的幫忙下,他們與堅尼地城一間小店合作,「佢喺前鋪賣啤酒,我哋喺後面賣包,晚市就做私房菜。可以一齊分擔租金,又可試下水溫。」至於為甚麼會想到用無骨雞翼包當主打,Kay笑說:「我好鍾意食雞翼,同埋覺得雞翼係每個家庭都鍾意食嘅餸,但好多人覺得有骨好麻煩,所以唔會見有人用雞翼做包嘅餡料。我哋考慮過呢個問題,就決定拆骨,等大家食得方便又開心。」

自己焗包

Vincent表示雞翼拆骨技巧不算太難,熟能生巧,多多練習便可;反而是焗意大利包比較花時間,「搵過幾間供應商都覺得唔夾,一係太硬一係太多氣泡,口感問題。於是打算連包都由自己焗,我試咗3個月先成功,因為意式包水分多,又要等發酵,分量、時間同造型都好難控制,試過太硬、太扁。」15年10月,好包正式營業,但反應未如理想,Kay說:「鋪頭位置人流唔夠,好靠網上宣傳,冇咩街客,於是想轉鋪。」今年年頭,他們徹出堅尼地城,物色更適合他們的鋪位及改善經營方式。「我哋都住喺元朗,所以揀近自己社區嘅鋪,熟悉啲。」

迎合不同客人口味

另外,有了一次開鋪經驗,令他們考慮更多因素,Vincent表示:「今次由我哋兩個撐起間鋪,餐牌要迎合唔同人嘅需求,要諗多啲款式嘅包。例如大啡菇包,適合素食人士同埋想食少啲嘅女士;吉列豬扒平時都見多人食,所以試下夾埋落包;慢煮豬腩肉,坊間用慢煮已經唔多,我仲用咗香草、香茅同八角去調味,都幾新鮮;仲有,我鍾意食青咖喱,所以試埋整青咖喱包,估唔到又幾多人鍾意食!」好包位於元朗西菁街,鄰近市中心,所以人流不錯,Kay說:「我哋睇過附近仲有好多中學,都幾多學生客,晏晝過嚟食個包做lunch啱啱好。客人比以前多咗4至5倍,同埋我哋用open kitchen方式,大家睇住我哋整,吸引多啲人過嚟。」

客人等到黑面

好包於6月開張,Kay表示因店沒有一個室內的等候位置,及包即叫即製,每個需時10分鐘,故天氣熱時,客人等得太久便會黑面,「都有睇過客人臉色,惟有安慰下佢哋,但要笑住講,語氣唔可以太強硬。」Vincent試過最極限是一天內造150個包,「有時會聽客人意見去改善,有次話啲豬腩肉唔夠腍,我就諗方法整到易入口啲。」為了解決太熱問題,除了賣包賣飯外,他們還賣凍飲,「我哋放多兩部大風扇喺門口,希望遲啲涼啲會有改善。」Vincent和Kay是飲食業的新手,所以會花多點時間了解元朗區人的飲食習慣,以日後開設餐廳為目標。

Claire Nelson(客人):我哋上網喺「食在元朗」facebook群組,見到好多人介紹呢個包,話好軟好好食,所以嚟試。我哋覺得無骨雞翼真係食得幾方便,我最鍾意香蒜椒鹽雞翼包,好香口!

開業成本

租金:$ 30,000器材:$350,000裝修:$200,000總投資:$580,000

每月收支(6月)

預計營業額:$150,000人工:$30,000(1位員工,老闆2位)入貨及雜費:$50,000租金:$30,000預計盈利:$40,000

facebook@Couple & The Bao 好包

撰文:霍芷晴攝影:劉宇軒

90 情侶 賣無 無骨 骨雞 雞翼 翼包
PermaLink: https://articles.zkiz.com/?id=204050

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019