ZKIZ Archives


【專題籽】趁青春衝一次 大學畢業執紙皮

1 : GS(14)@2016-01-22 01:51:50

「拾易紙長」創辦人黃恩凱(左)和胡煒豪以每個約2元向拾荒長者收購紙箱。



【專題籽:易零壹綠】大學生走去執紙皮?玩吓咋?捱到瘦,腰骨痛,為乜先?為弱勢為環保,也為一盤未幫到佢哋畀家用的生意。兩個剛畢業的少年成立環保社企「拾易紙長」,以高於市價向老人家收購簇新紙箱,讓紙箱有第二生命,同時幫助被社會遺忘的拾荒長者。冇人做,我哋做,以自己的方式燃燒青春,撐!


記得有一天,我在等過馬路,幾張雜誌紙從拾紙皮婆婆的手推車吹到馬路去,她竟然衝出去撿,車煞遲一秒,人就沒了,我幾乎嗌到整個九龍都聽到。那些能讓風吹走的輕飄飄紙張,她看得比生命還重,畫面太揪心。要為呢個社會喊,會令太平洋水位上移。「拾易紙長」於去年11月正式運作,23歲的創辦人之一黃恩凱說:「以前30幾度坐喺冷氣巴入面,見到街上啲婆婆推住紙皮,覺得佢哋好辛苦,但唔試過做,根本唔知有幾辛苦。」以往隔窗觀望,同情心隨巴士駛開漸減。唔搬唔知紙皮重,壯男捱得多都傷氣力,更何況是佝僂老人。現在一公斤紙張回收價只有5至6毫,即係話老人家穿街過巷撿來百公斤紙皮,才賺得50至60元,捱足一日都未必有半百。而且廢紙供應過剩,紙價可能繼續下跌,拾荒者生計越來越朝不保夕。「拾易紙長」沒去劫富,但會濟貧,算是拾荒長者的半個「羅賓漢」。一個本來裝雞蛋、狀態良好的長身矮紙箱,二人出價每個2元幫長者買,如果把它當廢紙賣,最多只得6毫。而且他們主動去找婆婆收,免卻他們把紙皮左推右推。



他們把可循環再用的紙箱,賣給區內願意用二手紙箱的商戶,並徒步20分鐘親自送貨。

單靠買賣紙皮箱毛利甚低,長遠要開源,他們正吸納客戶在紙箱上賣廣告。

長者拾到的紙皮箱,當中有八至九成都可重用。



太熱情嚇親婆婆 「惟有不斷打招呼」

紙箱公平貿易理念,源自另一創辦人、25歲的胡煒豪年前搬宿舍的經歷。「想買箱,發現搬運公司或ikea都賣成20蚊個,好貴,見屋企樓下的執紙皮婆婆有堆箱,就用五蚊一個嘅價錢買咗幾個,啲箱好新淨,根本可以循環再用。」用得點解要嘥?這嶄新經營模式現在於西環發芽,參茸海味、藥材、茶葉店都是他們的客戶。店舖平日要花約9元才買到一個新箱拆貨,用高質二手紙箱只需2.5至6元,視乎大小及訂購量而定,支持環保,也降低了成本。拾易指長這盤生意其實一舉三得。兩個年輕人在街上堆叠紙皮、推車運送,違和感達100。很多婆婆都被這兩名後生仔的熱情,嚇到個心離一離。「惟有不斷同佢哋打招呼,到佢哋認到我哋個樣,就會肯理我哋。」做社企當然唔預賺大錢,但一百幾十的交易,未計支出,平均每月只有約一萬元營業額,暫時未有利潤,莫講話畀家用,食餐飯都冇咗,點撐落去?胡煒豪說:「長遠希望能在環保紙箱上為客戶賣廣告,或用收集回來的紙箱作展板或舞台背景用,擴大收入來源。」創業要有心,守業就要食腦。他們暫時找到一家迷你倉長期用他們的紙箱,算是個好開始。如果沒一點成績,要得到父母支持﹐談何容易。「我爸一開始用『執垃圾』形容我哋。覺得我哋讀完大學點解要咁做,後來慢慢向佢解釋全盤計劃,佢先唔反對。」他們慶幸無家庭負擔,可以趁青春衝一次。



最近也有家庭用戶會向他們購買紙箱。

有迷你倉免費租倉,支持他們,也採用他們的環保紙箱。



店名:拾易紙長
facebook專頁:TheSecondBox



記者:葉青霞攝影:劉永發編輯:李寶筠美術:吳子豪





來源: http://hk.apple.nextmedia.com/su ... t/20160121/19459664
專題 青春 衝一 一次 大學 畢業 執紙 紙皮
PermaLink: https://articles.zkiz.com/?id=294755


ZKIZ Archives @ 2019