ZKIZ Archives


從金融之花到肥師奶 胡孟青

2008-11-06  NextMagazine


一場金融海嘯,打得全球經濟人仰馬翻,無數股民損手爛腳,但股評人胡孟青未有好言安慰,繼續對股民嘲諷作風,偏偏又有一班想聽真心說話的觀眾捧場。

由證券行分析員轉職做獨立股評人,鏡頭前的胡孟青除了身形暴脹外,基本上和以往一樣,仍然是那個會把散戶罵得狗血淋頭,把行家嘲諷得無地自容的小辣椒。但實際上,她少了一半薪水,多了一個兒子,每晚收工便趕回家湊仔。一代金融之花,今天洗盡鉛華,甘願當一個做足廿四小時的肥師奶。6:30am

我不美但我做功課

每逢開市日,胡孟青便 一早起床:「六點幾就要起身,睇番前晚美股嘅消息同新聞,然後落街買報紙。」她認為開咪講股,不能憑空亂吹,必須有真材實料,所以每天必定睇多份報紙,再 上網做足資料搜集才開始工作,「一日唔做功課就拍檔知,一星期唔做功課就行家知,一個月唔做功課就全世界都知!而家有啲人覺得做節目,個樣靚重要啲嘛, 哼,如果真係咁,我呢啲無得做啦!」

今天,她自嘲不美,但原來出道之初,她曾被喻為第一代金融之花。不過,近兩年生了小孩後,沒有修身,身 形暴脹,她笑言:「我第一次上電視做節目前,曾經專登搵健身教練幫我減肥,減咗十幾磅,但生咗仔之後,連健身都無去。」不過電視台並未有因她肥了,便不找 她做節目,有線甚至幫她在Facebook搞了個青姐Fan Club,會員有近九百人。

她認為有麝自然香,不用自己四圍哀求爭取,因此對 一些為求上鏡,信口開河的股評人,非常不以為然:「有啲人周圍搵傳媒高層,話自己期貨、股票、窩輪、外匯咩都識,只要有得講就得,我覺得唔使咁囉!」她認 為懂什麼便講什麼,不要沒有立場:「人哋打嚟問三元八角買咗隻股票,你叫人三元六角止蝕,四蚊止賺,等於冇講。」

除了工作認真,講真話是她另一賣點,「以前有觀眾打電話嚟問我買高寶綠色好唔好,我心諗呢隻股票嘅大股東,接連批股,但批股價一次比一次低,好奇怪,你見思捷批股係咪咁吖?咪叫個觀眾唔好買囉。結果第二日,我俾五份報紙圍插,原來人哋搭緊棚谷股價,點知俾我拆咗。」

胡孟青小資料(42歲)

92年:英國列斯特大學經濟學士

99年:香港城市大學財務碩士

93-00年:任職中銀集團,位至保險及投資部主管

00-04年:高信集團副總經理、高信證券交易董事

04-05年:滙豐金融服務副總裁

05年至今:獨立股評人

10:00am

獨立自由人

十時正,她會在新城財經台主持開市直擊,由於現時沒有公司包袱,胡孟青變得更中肯,說話更為大膽。不少電台及電視台因其獨立身份而找她講股,所以儘管是自由身,每天仍要工作八、九小時。

她 預科畢業後,十九歲便在廣東省銀行做文員,兩年後才到英國念經濟,返港後在中銀保險及高信證券工作,其間經常要返內地看上市公司廠房。○四年,當時三十八 歲的她懷孕了,卻不幸流產,「六個星期都仲有心跳,但八個星期就無咗,我會諗係咪佗住個肚都周圍走去做嘢,搞到個胎無咗。」一直笑口常開、聲大大的她,突 然眼神暗了,聲線也沉了。

她後來轉職滙豐,儘管不用再奔波勞碌,但要孭數及服侍客人,覺得壓力不輕,「當時我哋有啲組員好積極,想搵多啲錢,又話要搞韓股又話要搞夜晚期貨,錢係重要,但我覺得生活好唔平衡。」加上她當時再度懷孕,為免重蹈覆轍,索性辭職養胎。

離開滙豐後,胡孟青轉為獨立股評人,每天的工作時間和打份正職差不多,但她卻認為輕鬆了不少,「唔使孭quota,有咩辛苦呀!每日仲可以準時收工返屋企湊仔。」不過,代價是比以往少了一半薪水,「金錢誠可貴,但自由價更高呀!」

12:00nn

一餐飯見盡行家醜態

在電台收工後,便是午餐及寫稿時間,她一星期要為報紙及雜誌寫五、六篇稿。為了可隨時隨地寫稿,胡孟青總會帶着手提電腦;沒有約人的話,她會外賣午餐回家邊寫稿邊吃飯。但作為股評人,少不免要參加財經飯局或晚宴,不少更令她印象難忘:「建滔化工周年晚宴,人哋主席喺台上面講緊嘢,某四個股評人居然喺台下鋤D,但兩邊分別係公司高層同合作夥伴喎!」

她越講越勞氣:「成枱人居然會dead airo架,有啲就兩三個細聲講大聲笑,有啲就淨係識食,平時喺鏡頭面前就也文也武,但個個見到上市公司高層都啞o架!成日都得我同另外一、兩個會問問題o架咋!」

除了飯局外,她有時亦要回內地看上市公司廠房,與行家朝夕相對,「飯後節目通常都會去夜場,幾乎個個都攬女。」由於部分廠房在較為雜亂的地區,胡孟青不敢離開大隊自行返酒店,所以一介女流亦要落場搵小姐,「大陸好衰o架,你唔叫,佢就一排一排咁走出嚟,直到你叫為止。」女人叫小姐幹嗎?「傾偈囉!訪問小姐生平囉!」

她天性火爆,即使是行家,只要看不過眼亦照樣批評,但卻不是人人欣賞她的快人快語。

四個月前,股評人鄧聲興被本刊揭發搞婚外情,記者問她知道嗎,她着記者到國金走一圈便知情,結果被行內某長輩責怪多事,此後她學精了,即使再批評行家,也不會指名道姓。

4:00pm

鬧你是為你好

儘管被行家批評,但觀眾對胡孟青有話直說的態度卻非常受落,所以打電話上她節目問意見的人有多無少。

下午四時,胡孟青到有線位於港交所的直播室主持節目,並設有電話發問環節,但不少查詢卻令她大動肝火,「個市係咁插水,都唔識死,仲有好多散戶打嚟話想搏反彈,有啲直頭打電話嚟問應該買邊隻?幾多錢買?咩位放?咩位止蝕?」胡孟青於是答佢:「咁使唔使我話埋俾你聽幾點食飯?點o趙?點吞呀?」事實上,胡孟青今年甚少入貨,九成資產都是現金。

她說話又倔又硬,從來不怕得失觀眾,「一樣米養百樣人,我唔理得咁多人點諗,講心嗰句啫!」

由於節目受歡迎,所以有些上市公司會派人不斷致電來問股價,目的是增加曝光率,她不怕自己評語不當,最怕「有啲阿伯阿婆,以為電視有講嗰隻號碼就係好。」

為杜絕幫人造勢,「所有打嚟嘅電話都不會直接聽,一定係打返轉頭。」

不過,就算是小辣椒,也有些公司是避之則吉,「某啲集團避得就避啦,有啲股票,明知自己一提就把幾火,咪唔講囉,我無幾對手幾對腳。」若有人問到的話:「我唔批評佢,亦都唔評論佢。我成日都話,我仔細老公唔嫩呀!」

7:00pm

收工湊仔家庭最大

提起家人,硬朗的女強人也多了點笑意,七時正,胡孟青準時收工回家湊仔。她的丈夫是IT人,夫婦都要工作,但家中不請工人,兩歲大的兒子由婆婆照顧,至於家務,「老公做囉!」

每晚回到家中,老公負責煮飯餵飽一家,「我要湊仔吖唔煮得o架,佢成隻黐頭芒咁,去到邊都黐住o架!」打掃同樣由老公包辦,「超級市場有個角落係專賣清潔用品嘅,我老公特別鍾意行,對咩清潔劑有咩功效,好有研究。」胡孟青與丈夫一起十四年了,她經常在外跑來跑去,老公則在家中打遊戲機、睇碟、聽歌,她笑言:「佢有佢嘅生活,我有我嘅忙碌。」

最近換了新屋,亦是她的主意。原來她自細是家裡大家姐,下有三個弟妹,「爸爸媽媽又出去做嘢,所以我係屋企嘅總指揮,連睇咩電視劇都係我決定。」

但面對兩歲大的兒子,她也要放低指揮棒,萬事以子為先,如新屋便是為了讓兒子多點地方玩耍而買的,滑溜的牆,「俾個仔用架車車爛咗啦。」無奈的語氣滿布寵溺之情。以前的胡孟青事業大過天,現在,問她人生中什麼最重要,「梗係屋企重要啲啦!」
金融 之花 花到 到肥 肥師 師奶 胡孟 孟青
PermaLink: https://articles.zkiz.com/?id=3136

胡孟青的眼淚 林夕


2009-03-13  AppleDaily





 

股評人為一隻股票一時的價位而流淚,記憶中那是從未發生過的事,不值得放在頭條,而且,那畫面在YouTube的點擊率該比「肥媽大鬧國泰」更高才合理。那些以撒賴為手段爭取不合理權益的醜態,見慣亦平常。一個股評人在鏡頭面前忍不住失態,才是「新」聞。

胡 孟青哭滙豐在U盤競價低至33元,片段給上載後,不少網民的意見都是揶揄的多,甚麼:一定滿手滙豐,輸到哭了,活該。孫柏文幫她拍了一段可稱為「我為甚麼 流淚」的自白:不為甚麼,是替股民不值。在這個眼淚也成為化妝品的時代,不知道還有多少人相信,一個評股的會為股民的利害而動了真情。

不過,我不打算花一元整去查她本人有否持有滙豐,我相信這位股壇辣妹,那幾cc的淚是出於對股民的悲憫、對滙控高層決策的悲憤、對大戶舞高弄低吃掉散戶最後一筆安家費的不忿,對大笨象股價牽繫大局後遺深遠的憂戚。

滙 豐宣佈供股及公佈業績時,胡孟青在一片28元供得過的噪音中,早已用一貫辣得人掃興的口吻堅定提出:別供。比起很多分析員,在滙豐股價乍見三字頭後急改口 風,辣妹更顯得大無畏,對她曾服務過的機構早着先鞭地出鞭,難怪與大行關係搞得不太好。喜歡看她跟股民答問,也因為她經常為犯上一切投資大忌的愚癡觀眾動 了真格,直斥其非不留情面,而自己則上心得七情上面。記得在07年市況進入非理性階段時,有人問「首都機場」13元要不要追,胡小姐報以冷笑:13元?就 是這樣提醒了我,是時候得些好意須回手了。

滙豐給了我們一個老掉大牙的教訓:別與股票談戀愛。胡孟青的眼淚,讓我看到一個有血有肉,對股海癡民有感情,講金也講心的分析員。



胡孟 孟青 青的 眼淚 林夕
PermaLink: https://articles.zkiz.com/?id=6608

青心直說:寫在瘟疫蔓延時 胡孟青


2009-05-04  AppleDaily





 

欄 目叫得做青心直說,就係真人唔講假話,正如身邊友儕間際遇及投資市場中耳聞目睹怪現象之感想啟發,統統係題材。好似打麻雀咁,食頭糊跟住衰收尾,幾唔老 利,投資亦言,寧願一出鞘就損手爛腳輸到瞓低,當頭棒喝反而會幫助新手吸取教訓反思己過,幾多人變成病態賭徒都係因為初初埋去賭枱一出手就贏大錢,以為自 己擁有特異功能,當心作法自斃,有無聽過「牙斬斬死得慘」。

股神至愛嘅吉列刀片,其創辦人King C. Gillette從小就被鼓勵甚麼事都自己動手親力親為,從而更容易掌握及弄清楚事物運行軌迹,根基打得好係成功嘅一半;現代社會流行即食文化造成慣性依 賴,唔係話力有不逮時仍勉強死撐,事事假手於人或將投資前途押注於他人身上,就算你想搵方法為自己嘅投資負責,市場上大部份可供手到拿來的投資法則、甚麼 市場效率、股票內在值凡此種種,經歷一場金融海嘯,均飽受冲擊,幾許金科玉律已被視為導人升仙甚至令投資這回事變得更高深莫測的把戲,或者淪為課堂上理 論,揭開面紗,原來都是中間人搵錢工具。

整色整水反彈屆水尾

都係全球一體化惹的禍,金融海嘯避唔切,都應該小心保重身體免再 中招,越墮落越快樂,唔等於自己要跟風去淪落,荷媽金句「耳聽三分假、眼看未為真」,上上之策係每朝早啲起身刨報紙,齊炒作對象玩即市,順便睇清楚呢個 「人造牛市」點收科。當食晏時再次出現隔籬張枱講股票,原來近期好多股民有賭未為輸再次落叠,呢次將會有好多人走唔甩,因為連本來走甩嘅都按捺不住再自投 羅網。雖然股民懶用腦,睇見周圍鄰近地區爆大鑊,你估自己又會好安樂咩,香港係一塊福地,小心健康,多多保重!五窮六絕七翻身,應該唔難過渡,咁樣睇已經 算係好樂觀。情緒主導的股票市場,自亂陣腳章法大亂比比皆是,有些時候打亂章都可以盲拳打死老師傅,周圍充斥一知半解嘅羊群又如何,勝者為王呀!長假期前 大家就不約而同打起台灣牌,群情洶湧追捧當炒題材和概念係近期現象。總之啲產業如果係掂嘅就唔需要官方出手振興,個市曉得自動波就唔使整色整水搞題材啦! 反彈已屆水尾喇!胡孟青
 



青心 直說 寫在 瘟疫 蔓延 胡孟 孟青
PermaLink: https://articles.zkiz.com/?id=7674

青心直說:先上刀山後落油鑊 胡孟青

2009-05-05  AppleDaily





 

沐 浴於新一輪泡沫中的股蟻,對陰晴不定的經濟數據或許仍存戒心,可惜萬五萬六不消兩三下手勢裂口再裂口,根本唔畀你跟,假如你如我般保守,於上周已安排把手 持股票基金趁此輪反彈抽離股市轉為定存,充其量睇淡唔做淡。我早前日日講幾次,暗示畀做淡者隨時俾大戶睇穿你係二仔底,唔夠兩個回合你已經唔揪得兼被挾 瓜,只因大戶數晒街外啲「飛」,索性唔使睇其他因素都知道對着幹有着數,牌面越多散戶買定熊證嚟守,大戶就越容易舞高弄低予取予攜好淡通殺,舞高係想引你 做淡,弄低係想你自覺企啱邊飄飄然繼續淡,反正挑高早前因持現金水平過高被迫低吸之正股已贏到開巷,現時策略借報告造勢派貨兼越派越高,順手再儲淡倉,尤 其5月份17隻藍籌除淨足以拖低恒指188點,收埋息睇怕到時再無得賴。反過來在眾人看淡之時仍誓要去入刀山之勇士,當中有人仍後悔沽得太早,打游擊識閃 係最能夠保留實力嘅方法,嘗試抽走本金保留貨底分注食糊,亦不失積極,起碼升市有份贏,千祈唔好以為贏過下就當正自己擁有特異功能,時勢造英雄咋!

滙控供股豪畀大戶

個 市出現流感症狀高燒久久不退遲早出事,尤其當明日黃花滙控(005)亦焗升就知,可惜成交唔跟,藍籌及H股指數成份股成交金額與上周四長假期前不見得有大 突破,如非尾市15分鐘衝刺,以股價升幅有部份股份成交出現明顯萎縮,單是滙控成交股數已由前一天67球降至54球,即將調整市值比重回15%更注定短期 無運行。16200/16300點熊仔陣亡處,正好相當於4000張期指,看來當連唔夠資格升嘅股票都行埋,都已經差不多了。講開滙控,假如大家認為應抓 緊機會在宣佈供股前就買入博供股,話你知短短唔夠一星期就可以跌四成嘅股票,o依家事後孔明,震你唔走你就係英雄,見到33蚊直至未供完股之前,前面嗰手 應該都仲係喊住揸,成單交易擺明豪畀大戶,順理成章畀些少分包銷佣金就可以借人頭一用,搞到成個場好似供股就係身份象徵。睇曹Sir最新一期《信報月刊》 對滙控前景的評論文章,更同意滙控實在無福消受今次升市,猶如難以駕馭太複雜的業務模式,經此一役,希望她明白自己並非花旗,股東之最愛本來自她的原始核 心價值,反璞歸真休養生息未為晚也。胡孟青
 



青心 直說 先上 刀山 後落 落油 油鑊 胡孟 孟青
PermaLink: https://articles.zkiz.com/?id=7859

青心直說:損人不利己最大浪費 胡孟青



2009-05-06  AppleDaily



 

「香 港明天更好基金」與傳媒茶敍,席間記者難得能夠跟前前前財爺松松傾上幾句,不過當記者問佢o依家究竟係牛市定係熊市時,佢竟然答道:「等過咗之後話畀你 知!」至於經濟見底未,佢就話要睇政策到唔到位,搞到小記差點笑爆嘴,因為呢類答案擺到明好HEA。一個咁簡單而複雜嘅問題點會難倒佢!呢個世界唔係人人 肯take side,擺明車馬唔介意做馬後炮,吹咩!佢對香港發債及人民幣債更加唔肯講意見,不在其位不謀其政,好似已退下火線嘅前總理朱鎔基及前副總理吳儀咁樣, 退休之後都唔會再走出嚟對國家政策說三道四,是之為識時務,否則話退唔退死而不僵,好容易被質疑有心擾亂金融市場秩序。問到松松會否覺得國家投資 Blackstone黑石私募基金,損手跌咗6成罪過罪過?佢竟然肯表態話當然覺得好難過。當然國家主權基金有必要分散投資,阿爺出閘脫腳,算係小小苦楚 等於激勵,跌過才會更加小心睇路,有無人見過未跌過就識得行嘅BB仔?

害群之馬濫用自由

前聯儲局主席格林斯潘早前在國會聽證 會上,承認自己沒有能力預見是次百年一遇的金融危機,反映手中擁有大量數據及市場經驗者如格老,都唔可以成為先知。格老今時偶有評論美國政策,雖無當年在 位時一言興市一言喪市之力,看官亦不必以專打落水狗心態鞭撻,擺明要褫奪人家頭上戴足18年之光環。始終嗰句:人誰無過。九一一事件後格老壓低息口拯救經 濟,當時肯定做對;後來造成另一個因Easy Money產生的更大泡沫,就變成了錯;以為私營機構會懂得自律,少啲監管,以免窒礙營商環境,曾經也是對;無奈卻有害群之馬濫用自由;原來自由也犯錯! 有些人天天匿名口誅筆伐,慣性踐踏他人抬高自己,只凸顯個人思想之狹隘,浪費時間研究他人今天的對明天的錯。在窒人睇錯前,請先反問自己係咪次次啱晒先! 倒不如為眼前一大堆經濟問題提出討論空間與解決方法,發揮言論自由的核心價值,方為有益有建設性。看見人家眼裏的刺,也要留意自己眼裏也有一支牙籤。胡孟 青



青心 直說 損人 利己 最大 浪費 胡孟 孟青
PermaLink: https://articles.zkiz.com/?id=7862

社保基金之炒家本色 胡孟青

2009-05-07  AppleDaily





A CAFE 逢周二、四刊出游資充裕,投資者明顯按捺不住,港股在一片疑似牛市氣氛下,出現恐慌性買貨,信不信由你,且看會否真係再出現2007年底「升到你唔信」之 象,信專家倒不如信市場,資金氾濫,褲頭勒得太緊,有時都想放鬆一下,手持資金觀望得太久,亦難免會手痕。

投資者近期普遍開始忙於在市場 中,找多點證明,代表市況出現轉機的訊號,態度明顯由早前找藉口按兵不動,到今天的找藉口出擊。近期熱錢極速流入,未必單純認為,港股具防疫能力,只是歐 美地區更危險,加上附送上海開立「國際版」,讓港股回歸上市,以及港幣很快與人民幣1兌1的空穴來風傳聞,資金似層層聞風而至,只是熱錢的熱情幾時冷卻, 還看官方幾時對有關傳言作出回應。還記得在2007年11月初,若非溫爺爺自境外發功,煞停班直通車,睇怕投資泡沫唔知幾時才肯爆。

有說以動態市盈率衡量,經濟增長下行,配合股份全流通因素,令內地A股不再享有如2007年時所獲70倍市盈率的高估值,上證指數現時的2,500點,已儼然等如當年的5,000點,現時相當於25倍市盈率已屬高估,預示隨時有調整。

股 民眼中的「國家隊」級數投資者,肯定是社保基金,該基金如何部署,一向成為可靠指標,只因佢哋有如insider。一向講求防範風險及保持資金安全性的全 國社保基金,雖然亦逃不出2008年的熊市,惟其表現仍優於內地股市全年65.4%之跌幅,基金去年底資產投資收益率為負6.79%,資產總值為 5,623.7億元(人民幣,下同)。自2001年成立以來,雖然自2003年6月才開展股票投資,基金資產於8年之間,仍增長7倍,年均投資收益率 8.98%,起碼已經跑贏我們的外匯基金。

今年首季社保基金的持倉水平已達75%,相當於股份指數仍在6,000點時的持股水平,持股數量 雖較去年同期下降9.25%,即與去年第四季比較(環比),卻出現8.69%的增長。該基金在首季持有181家上市公司流通市值共151億元的股份,較去 年第四季的155家共102億元,環比顯著增長48%。在181家持股中,所持股份足以成為前十大流通股股東的上市公司中,竟然有108家屬於首次公布進 入十大股東之列。

社保基金首季增持或首次買入共126隻股票,投資堅過好多自以為是炒家,起碼勁過嗰班啱啱炒燶外匯及衍生合約、未學行先學 走嘅上市公司,炒得精叻原來唔需要搞到好複雜;社保基金今年首季投資收益率達34.54%,跑贏上證指數首季之30.28%升幅,足以反映其積極性及指標 作用。

然而,要從其投資方向找贏家秘笈跟住追,似乎又未必係人都啱,皆因機械裝備、電子信息、石油化工、批發零售、房產開發、電力供應、交通運輸、鋼鐵產業共八大範疇,統統成為其囊中物,好難照單執藥。



社保 基金 炒家 本色 胡孟 孟青
PermaLink: https://articles.zkiz.com/?id=7863

青心直說:股票市場「泡沫之夏」 胡孟青


2009-05-07  AppleDaily





 

內 地超人氣女作家明曉溪之言情小說《泡沫之夏》,最近在台灣被改編成同名偶像劇,卡士有大S和黃曉明,相信有機會重演十年前《流星花園》熱潮,因為故事包裝 正中八十年代後年輕人心態,推銷術就係讀心術。在投資市場實戰中,對心態的掌握較基本數據或技術分析更派用場。睇過去用Hindsight;睇未來,一位 讀心理學出身的朋友就對時下投資者情緒與決策行為關係作出細緻分析:人始終係群體動物,難以不受友儕影響,行為取捨未必絕對會按是非黑白對錯模式,例如你 的另一半認為唔應該在露台加裝圍欄,原因係會影響美觀、阻礙視線,甚至干擾手機接收,最關鍵原因係成幢樓都冇人做,說來有點刻意砌詞為反對而反對。但係你 見到個個月都有大人因為抹窗跌落街,更何況好奇嘅小朋友,為保護家人,當然係據理力爭。連日常生活小事一樁亦有大爭議,更何況錢銀大事。係唔係人做你先 做,人哋唔做你就唔可以做呢?人人都行嘅路是否等同唔係黑路?同期多個網站調查反映看好看淡之比例約為3.8比6.2,現實係睇淡嘅人仍佔多數,睇好嘅人 仍係少數,究竟邊個啱邊個錯?

寧錯失勿冒進

大家不妨睇實趙丹陽(行走缸湖唔知邊個係趙丹陽,好打極都有限),呢位「赤子之心 中國成長基金」經理、有「中國私募基金教父」之稱,舊年因為以211萬美元天價,成功中標與股神畢菲特到紐約的Smith &Wollensky 扒房食一餐慈善午宴,由原來極低調突然爆紅。佢被質疑為何不把錢捐給四川,可能佢係內地人,最明白捐錢都係蹝料,最終好可能落入貪官之手。趙丹陽最經典一 役係2008年1月初因為覺得股市沒有機會,於上證指數仍處於5400點時毅然解散旗下基金,到今年2月底重新募集,3月18日才正式成立,到現時未見大 動作。他的金句之一是強調「寧可錯失,不可冒進」,且看他何時「抄底」!大家睇下呢支盲公竹又幫唔幫到手!資金有氾濫成災之勢,另一個更大的泡沫似在形 成,最緊要係好了瘡疤不要忘了痛。胡孟青



青心 直說 股票 市場 泡沫 之夏 胡孟 孟青
PermaLink: https://articles.zkiz.com/?id=7876

青心直說:從國策中抽絲剝繭 胡孟青


2009-05-08  AppleDaily





 

近 日街頭巷尾再現談股論市熱潮,無他,游資氾濫,股樓齊鳴,人人高呼Buy China。當然亦有盲目跟風見股價郁個身先至郁,不過要識靈活走位,又要捱得住震倉,不然好難贏得多,太貼市又死,唔貼市又死。眼見熊仔天天被一網成 擒,好似俾人睇住劏咁,實錢玩吓,無傷大雅,瞓身借孖展就無謂。好多資深行家都見過唔少炒友贏完一鋪又一鋪,然後一個浪冚埋嚟一Q清袋,尤其在期貨市場, 呢幾年見過好多案例,唔少仲係身邊朋友,共通點係個個有錢賺時把口仲話會收手割禾青,但轉個頭便忘掉對自己的承諾,不知不覺把股市變成賭枱磨爛席,每日唔 賭唔舒服。每一個浪都有如一場淘汰賽,資金再洗牌。基於資訊不對稱,手上有餘錢考慮錢搵錢增值而又不想做盲俠者,均已懂得些少基本功,根本不需要盲目鋌而 走險,始終我們的優勢就是貼近國家。中國今年首季GDP增長仍達6.1%,美國同樣係6.1%,只不過就係負數,因此唔應該奇怪點解有咁多錢衝入香港,奇 就奇在點解要唔問價掃貨啫。

留意中國食品陽光能源

既然未至於淪落至唔理好醜,就要數數手上有幾多印花,可以在不同題材與概念 之間取捨換獎金獎品。例如由去年底至今,資金一直跟隨國策走,個別行業板塊只要出現中央擴大投資振興,市場人士就會集齊訊息,再於相關股份演繹,儼然一本 炒股秘笈。大家從投資增長明顯加快之領域出發,應該還有可供發掘的漏網之魚。今年首季高於全國水平的產業包括農業、水利、交通運輸、教育、衞生、環保6個 領域,增長均超過30%,高於全社會固定資產投資的同比增長28.8%,五一之前國務院才公佈了8項農業振興措施,穩定農產品價格,預期供應減少,小麥連 升3日、原糖逼近28年高位、玉米、大豆價格亦上升,糧油再漲上去,當心成為07年翻版。中國食品(506)龍頭銷售商總滙,股價已出現一浪高於一浪;此 外,有不具名國家能源部權威人士透露,新能源產業振興規劃草案亦已初訂,預期總投資額將達2萬億元,風電與太陽能最受惠,本地首選當然是第二大單晶硅錠生 產商陽光能源(757),上升潛力不容忽視。胡孟青
 



青心 直說 國策 抽絲 剝繭 胡孟 孟青
PermaLink: https://articles.zkiz.com/?id=7882

青心直說:嚴重超買提防炒車 胡孟青

2009-05-11 AppleDaily





 

自 CEPA直至中央加料送大禮,打開金融界最渴望更上一層樓的領域,首先,港資銀行只須在廣東省開設一家分行,便可以在省內其他城市開設異地支行,不過最重 要挑戰,係銀行吸收存款後點樣回收貸款,睇見早排好多香港銀行借畀設廠於內地啲中小企廠家,一收到風話間廠隨時摺埋,已經兼程趕至,點知去到已經見到大陸 銀行啲人坐晒響度,仲問你點解咁遲。至於港資券商可以進入省內開設合資諮詢顧問業務,可以觸發上市券商股喪炒一浸,不過要提醒一句,短炒還可以,最緊要走 得快。呢幾年最受惠CEPA者莫過於零售業,證券業一向睇天開飯,個市升就唔使等CEPA都自然受惠。港股ETF變相翻版港股直通車,未及引入內地,已見 管理費較高的QDII率先發圍,4月份平均淨值增長達8.96%,港股ETF上市滬深未見得會很快有時間表,內地居民急不及待趁勢找機會,暫時惟有先透過 QDII,然而部份重倉港股的QDII或港股ETF表現如何,還看經濟復蘇步伐是否如預期,暫時展望仍甚悲觀。

論國情內地人更熟

正 如有老行尊認為有關優惠屬「宣傳大於實際」,券商荷包受惠有限,明顯點出了政策背後關鍵,經紀業務是看真錢,點樣分紅亦係問題,試問諮詢顧問業務在通街都 係資訊嘅今天值得幾多錢!再者,許多港股走勢預測反而要先往北望取方向,個市炒到㷫烚烚,佢哋最需要似乎係內幕消息,國策國情對中資股充斥的大市影響舉足 輕重,講國情你唔夠佢哋熟,人家翻轉頭畀料你就差唔多!副總理王岐山在《金融時報》撰文話經濟應該係W形走勢而唔係V形,意味仲等緊另一隻腳,不過近期啲 「春苗論」在股市配合下明顯有市場,Green Shoots of Recovery?學大摩羅奇話齋,亞洲區出口佔GDP比重達45%,消費則佔50%,有形之手頂得一時怕且唔頂得一世!歐美消費信心上升係唔夠?要真正 居民消費翻生先至得,無就業,點頂?金管局任志剛總裁出口術為港股降溫,大家都知資金推高資產價格欠經濟因素支持,但係十五十六唔賭唔輸服,惟有於亂世中 隨波逐流。基於指數與多隻個股已出現嚴重超買訊號,小心駛得萬年船,贏啲就盡量先回收本錢。胡孟青



青心 直說 嚴重 超買 提防 炒車 胡孟 孟青
PermaLink: https://articles.zkiz.com/?id=7886

青心直說:是春筍還是蒲公英? 胡孟青

2009-05-12  AppleDaily






 

恒 指在250天線連續穿梭12個交易日後,再在線上站了23個交易日,始正式跌破該條重要的年線,其時是2008年5月23日,與今日剛好相距近一年,一年 一度燕歸來,再見250天線,係唔係應該咁老定?是次反彈市所倚仗者係資金,然而熱錢雖熱情,資金明顯有腳,不似會落地生根,有如蒲公英隨風起舞,有時蒲 公英種子會跟隨風的軌迹,四處落腳,長大後其實也只是野草。資金非盲流,卻遇上大風吹,只要金管局未停手注入資金,港滙仍維持貼近7.75水平頂點,拆息 依然勁低企,那麼不獨是外面游資,連本地游資亦同時會聞雞起舞。唔只任總,連卓百德都同樣話樓股皆欠經濟因素支持,大市還欠一隻腳,唔似係春筍。昨天的調 整,有如「反彈聯賽」剛剛打完上半場,好不容易乘機唞唞氣,過一陣再打埋下半場。自3月以來,在介乎12000點至16000點之間的每個1000點整 數,皆出現上升裂口,處處舊患(未補的上升裂口),真正長線第一注時機,應待鏟除後患始行定奪。

福田獲銀行放水

大市似等候最 後一位淡友轉軚投降才放心大跌,長線投資者宜謀定而後動,短線客則可於每個裂口等候機會,始終幾慘嘅跌市都有十大升幅股。今年餘下時間仍然繼續鎖定體育用 品、醫藥及新能源三大環節,工業股唔平唔買,危機有利汰弱留強,從銀行放款態度尋找生還者,福田實業(420)乘資金追落後之勢試闖250天線,據了解集 團剛落實一項為數4.5億元定期貸款,作為全球手執牛耳的圓筒針織面料生產商,縱使金融危機未過,連騰晒雞嘅銀行都肯貸款,等於盡職審查合格,買得。胡孟 青



青心 直說 春筍 還是 蒲公英 蒲公 胡孟 孟青
PermaLink: https://articles.zkiz.com/?id=7896

青心直說:「專家」與「專業」 胡孟青


2009-05-13  AppleDaily






 

國 際知名趨勢大師大前研一(Kenichi Ohmae)在其2005年著作《專業》(The Professionalism)內已提到,在這一個「專家」無用的時代,只有「專業」才是唯一生存之道。千萬不要把「專家」與「專業」混淆,「專家」係 指在各自領域中擁有專門知識與經驗的師傅級人馬,律師與醫生均屬於同一類別;而「專業」就係永遠善於應變及於變動中學習新技能,且勇於迎接挑戰。專業人才 敢於開發與創新思維,擁有知識和經驗之餘,還懂得自我提升與進化。粵港在打開金融領域合作上終於帶出新版圖,雖然短期利益欠奉,尤其對本地券商而言,反而 銀行界就非常歡迎。樂觀地向前看,難得中央畀塊廣東之地齊齊耕耘,收成如何還看大家如何努力,唔好話到單係靠中央打救,阿爺只係採取開放態度唔阻你哋發 達。在既得利益敏感嘅金融業問題上,粵港點解會忽然一拍即合,或多或少可能係因為上海2020金融規劃一錘定音,來勢洶洶,令深圳和香港危機感加深。

 

上 周深圳已提及要搞深港金融創新圈,香港在這個金融業多難之秋,正好借助廣東省致力產業轉型創造雙贏機會。官方已行前一步,業界應該發揮既有優勢,而非發其 春秋大夢,錯判形勢,腦發熱諗埋一邊,一陣間又話要搞碳排放,一陣間又話要做商品交易所,凡事若欠天時地利人和,只會事倍功半。香港唔係無人才,只不過最 叻嗰班,多數都走咗去搵快錢,鬥快搵夠退休,唔得閒幫你睇得咁長線,遑論仲要慢慢揼石仔,好境時真係搵鬼睬你,o依家逆境降臨,還望有識見之士顧全大局、 減少噪音、體現「專業」,香港才有希望,不會錯失良機。內地振興裝備製造產業規劃細則出台,令到昆明機床(300)及廣船(317)再有翻炒理由,留意呢 類政策受惠板塊。昆機昨日升6%,股價若守住3.50元,目標再戰4.80元;廣船若守住11元,目標睇12.50元。胡孟青
 



青心 直說 專家 專業 胡孟 孟青
PermaLink: https://articles.zkiz.com/?id=7899

青心直說:庫存數據的背後 胡孟青

2009-05-18  AppleDaily 





 

從 近期一些數據指標反映,企業由去年雷曼爆煲後一窩蜂去庫存到現時有迹象重建庫存,把4月份中國採購經理指數(PMI)連升5個月作為對照,更足以叫擁有資 金話事權人士把這樁「利好」訊息無限放大,還有一些較少被報道之內地企業家信心指數及從業人員指數,均同時出現轉跌為升,更加令市場對經濟復蘇信心十足。 然而,用電量才是預示工業生產的重要晴雨計,內地用電量數據繼去年12月份因進入冬季曾一度出現好轉後,3月中旬以後同比增速又再度出現下滑趨勢,每日平 均統一調度口徑全國發電量同比降幅更出現輕微擴大。在一片牛市重臨高唱入雲之下,若我們有幸能有機會接觸多些內行人士,必能掌握多一點事物的真貌,資訊經 過過濾,當可免因被市場聲音動搖而自亂陣腳。上周收到一位署名Raymond的來函,內容是對當前經濟形勢的分析,他仍相信這一輪強勁反彈有60%機會偏 向屬於熊市大反彈,所持看法之理據較坊間分析更深入,關鍵是他本身來自快遞空運界別,「針唔拮到肉唔知痛」,既然每個人都應該明白識一瓣叻唔晒,就更加要 謙卑地聆聽具建設性的意見,才可達到集思廣益。

空運轉海運但求便宜

美國工業庫存有回復上升之勢,國泰(293)更打從今個月 起削減部份航班及航線,分別調低客運及貨運運力8%及11%,單是4月份香港空運貨站處理17.48萬公噸貨物,按年跌22.5%;而今年4月香港貨櫃碼 頭單月貨櫃吞吐量,經過復活節海貿旺季後再露疲態,只有167.5萬個標準箱,按年跌20.2%,與3月份按月相比,卻微升3.1%,雖然仍穩守全球第3 大貨櫃港名次,卻未能扭轉劣勢。正如Raymond指出,他公司的一些大客已打算由空運轉為海運,因為產品需求下降,不用再快運至目的 地,Leadtime長了也不打緊,最緊要運費夠便宜,而美國方面因Total Leadtime長咗,總體庫存便要提高,因為要滿足這個Supply Chain Model的轉變,才會出現工廠使用率及庫存上升,並非因為經濟見底或因消費提高,而最重要者是美國工廠普遍用Forecasting為生產指標,遲啲當 地Inventory再嚟跌過,就真正可以被理解為需求確實無改善過甚至仍在下滑。胡孟青
 



青心 直說 庫存 數據 背後 胡孟 孟青
PermaLink: https://articles.zkiz.com/?id=8079

青心直說:從假工廠說起 胡孟青

2009-06-01  AppleDaily





 

「假 工廠」唔係指平常閱報所知近年已成為國際新聞、有手持學生簽證中國留學生近年在加拿大因開設製造假護照、假成績單、假畢業證書甚至假學生證、假工作證等等 而被捕嘅「製假工廠」,亦唔係內地製造假普洱、假可樂、假煙酒、名牌A貨甚至假鈔票嘅「製假工廠」,因為你在明佢在暗,呢啲廠從來唔會畀任何外人參觀,我 等族類只會有機會睇普普通通與港交所嗰堆冧把相關嘅工廠。早幾日落樓下買魚蛋粉,事頭就好單刀直入咁問咗一個尷尬問題,問究竟我時時話返大陸睇廠,究竟係 唔係真係識睇同埋睇得出人家掂唔掂?只可以掉轉頭問番佢,假如你自己開得口邀請別人進行家訪,斷估你都唔會完全唔執吓間屋就叫人入屋。佢即時畀咗一個佢同 鄉一間A股上市藥廠嘅例子,算得上係唔少內地民企嘅寫照,佢只係講咗一個呢間廠最大嘅漏洞,就係呢間藥廠嘅電錶,一個月前跟一個月後都無郁過,即係呢間廠 可以不費一度電就可以進行生產,但係股價就被炒上三十幾蚊人民幣一股,而呢個古仔已經變成佢地同鄉之間嘅笑話。

投資者唔信民企有因

我 只可以好肯定咁講一句,我哋睇過咁多間廠,根本就無人會畀個電錶我哋睇,亦都無試過睇完間廠一個月之後又有機會再睇多一次。由此可以證明,點解好多人今時 今日都唔相信內地民企,又真正唔係無的放矢。人家上市公司出晒車馬費包飲包食宿,試問你仲點敢問得咁盡,有廠家會刻意買定一大堆新機器,恭候銀行信貸分析 員、投行融資部負責人、分析員大駕光臨,證明佢哋借返嚟嘅錢真係有用在經營生產,之不過有無定單及經營現金流就唔係咁容易畀你知。亦曾經試過有上市公司包 晒成架飛機三日兩夜叫晒記者、券商高層、股評及分析員,浩浩蕩蕩殺上東北參加論壇,根本都唔知係自己被利用造勢還是內地一同參加嘅學者與行家被利用咗,總 之由頭到尾都無人逼你寫好佢,之不過去完呢個Trip都無人會寫衰佢,可能係出少句聲手下留情已經當幫忙。好似我敢冒住得罪成村人嘅風險講咁多畀你知呢種 就係行家眼中嘅「戇居」,兜口兜面信得你過而你又問得有誠意兼直接,彈兩句畀你知吓又無妨,當然亦有緣睇過好多好正嘅廠,容後再續談。胡孟青



青心 直說 從假 工廠 說起 胡孟 孟青
PermaLink: https://articles.zkiz.com/?id=8289

青心直說:庫存數據的背後 胡孟青

2009-05-18  AppleDaily





 

從 近期一些數據指標反映,企業由去年雷曼爆煲後一窩蜂去庫存到現時有迹象重建庫存,把4月份中國採購經理指數(PMI)連升5個月作為對照,更足以叫擁有資 金話事權人士把這樁「利好」訊息無限放大,還有一些較少被報道之內地企業家信心指數及從業人員指數,均同時出現轉跌為升,更加令市場對經濟復蘇信心十足。 然而,用電量才是預示工業生產的重要晴雨計,內地用電量數據繼去年12月份因進入冬季曾一度出現好轉後,3月中旬以後同比增速又再度出現下滑趨勢,每日平 均統一調度口徑全國發電量同比降幅更出現輕微擴大。在一片牛市重臨高唱入雲之下,若我們有幸能有機會接觸多些內行人士,必能掌握多一點事物的真貌,資訊經 過過濾,當可免因被市場聲音動搖而自亂陣腳。上周收到一位署名Raymond的來函,內容是對當前經濟形勢的分析,他仍相信這一輪強勁反彈有60%機會偏 向屬於熊市大反彈,所持看法之理據較坊間分析更深入,關鍵是他本身來自快遞空運界別,「針唔拮到肉唔知痛」,既然每個人都應該明白識一瓣叻唔晒,就更加要 謙卑地聆聽具建設性的意見,才可達到集思廣益。

空運轉海運但求便宜

美國工業庫存有回復上升之勢,國泰(293)更打從今個月 起削減部份航班及航線,分別調低客運及貨運運力8%及11%,單是4月份香港空運貨站處理17.48萬公噸貨物,按年跌22.5%;而今年4月香港貨櫃碼 頭單月貨櫃吞吐量,經過復活節海貿旺季後再露疲態,只有167.5萬個標準箱,按年跌20.2%,與3月份按月相比,卻微升3.1%,雖然仍穩守全球第3 大貨櫃港名次,卻未能扭轉劣勢。正如Raymond指出,他公司的一些大客已打算由空運轉為海運,因為產品需求下降,不用再快運至目的 地,Leadtime長了也不打緊,最緊要運費夠便宜,而美國方面因Total Leadtime長咗,總體庫存便要提高,因為要滿足這個Supply Chain Model的轉變,才會出現工廠使用率及庫存上升,並非因為經濟見底或因消費提高,而最重要者是美國工廠普遍用Forecasting為生產指標,遲啲當 地Inventory再嚟跌過,就真正可以被理解為需求確實無改善過甚至仍在下滑。胡孟青



青心 直說 庫存 數據 背後 胡孟 孟青
PermaLink: https://articles.zkiz.com/?id=8449

青心直說:復蘇指數的啟示 胡孟青


2009-05-19  AppleDaily





 

美 國《財富雜誌》有個「復蘇指數」,從網站所見,有如汽車儀錶板上的駕駛速度顯示,一目了然。不過最重要的,還是了解其量度復蘇在望與否所根據之7大指標。 首先,在投資顧問公司TrimTabs的數據及資訊支援下,復蘇指數得以制訂。該指數以100為基數,以顯示美國經濟進入衰退前最後一個經濟仍然健康的季 度表現。該基數指標的起點正好落在2007年7月,當時正是美國次按危機一觸即發,標普準備降低次按相關債務評級之前的一刻。隨着次按爆煲第二周年即將來 臨,我們有必要檢視美國經濟所處的最新情況,從而為現時各方激烈爭議中之「春芽」與「枯草」兩個極端看法進行定位。現時復蘇指數處於69.01水平,反映 經濟仍然瀕臨衰退邊緣。7大指標之一的全美國單月斷供物業,在4月份達34萬2千多個,加州樓價已由高峯跌去近50%;2007年7月單日斷供水平為 1666宗,今年5月4日該數據最新水平仍達3064宗,反映情況雖較去年9月雷曼爆煲時單日超過6千宗有所改善,但依然嚴重。樓市斷供宗數必須在無政府 干預的情況下持續下降,才是樓市見底的領先指標。

復蘇仍遙遠股市難長升

此外,美國職位由2007年7月1.38億份一直以一 浪低於一浪運行,現時位於1.33億份水平。美國股市市值於2007年7月為21.25萬億美元,縱使自3月初9.32萬億美元回升,現時亦只有 12.88萬億美元,仍然失去近39%市值。銀行商業貸款於2008年雷曼爆煲後宣告見頂,見頂水平為1.6萬億美元,之後企業進行去槓桿化,現時該類貸 款約為1.52萬億美元,銀行貸款規模被視為經濟活動領先指標,一日未見企業恢復借貸以擴大資產負債表規模,難言復蘇。消費貸款在2007年7月為 7769億美元,之後有增無減,雖然數據於今年2月底9037億美元見頂,現時仍在8801億元,極可能在反映借貸因收入減少而上升。財政部由個人收入扣 除所得稅款的收入,自衰退前上升5.82%,一直轉壞至現時負5.2%。最後一個指標是CEO信心指數,由衰退前143水平急劇下降,現時只有16.1, 反映企業頭頭對自己公司未來現金流入仍欠信心,顯示股市反彈市難以持久。胡孟青



青心 直說 復蘇 指數 啟示 胡孟 孟青
PermaLink: https://articles.zkiz.com/?id=8451

青心直說:二線地產股升得有道理 胡孟青

2009-05-20  AppleDaily






 

市 場不斷為落後股搵題材,例如「上海」兩個字就係炒友天堂。炒到o依家,好多炒友開始唔明點解香港地產股唔係隻隻肯大郁,但係恒隆地產(101) 昨升6.1%、嘉華國際(173)升7.8%、嘉里(683)、保利達(208)升13%、華置(127)升6.8%,犀利過好多重磅股。無他,只因大牛 龜升晒上嚟,好多因素都已極速反映,退而求其次,氾濫嘅資金絕對唔介意冒多啲風險,搵一線尾二線頭甚至二線尾三線頭嘅分子,務求食住個勢,追多一點回報。 恒隆地產近年發展重心轉至內地,以集團上半年投資物業租金增長比較,香港增長9%,上海增長23%,上海佔整體租金收入41%,為集團半年貢獻7.03億 元收入,邊際利潤優於香港,位於上海市中心兩幢商用物業恒隆廣場及港滙廣場佔盡地利。

炒上海澳門概念

至於嘉華國際,同樣於淮 海中路擁有上海嘉華中心39.6%權益,出租率近百分百。同樣地,華置於徐滙區淮海中路亦擁有一座愛美高大廈收租。從以上幾家地產商於上海擁有之落腳點及 發展中項目可知,他們的積極程度不下於大地產商。除了主流內房股之外,上海含量較高的本地發展商亦絕非池中物。假如你不熟悉上海,對今年回歸10周年之澳 門可能會較有把握。澳門正準備改朝換代,中央送大禮絕不出奇。澳門主流概念不只賭業股,仲有地產股。澳門總面積只有27.5平方公里,保利達擁有1百萬平 方米土地儲備,而且大部份地盤毗鄰即將興建之港珠澳大橋,你話筍唔筍?有啲股票係升得有道理嘅,打開年報或者親身視察都唔難啫!胡孟青



青心 直說 二線 地產股 地產 升得 道理 胡孟 孟青
PermaLink: https://articles.zkiz.com/?id=8454

青心直說:香港版的量化寬鬆 胡孟青


2009-05-21  AppleDaily





 

將 於今年國慶日離任退休嘅金管局總裁任志剛,曾經好抗拒被戲稱為「任一招」,或者佢真係比較鍾意洋人畀佢嘅「YAMBO」稱呼,似十足金融界史泰龍,夠晒威 武。計我話,假如可以一招走天涯,又使咩咁多招,金庸小說《雪山飛狐》主角胡斐,佢阿爹就叫做胡一刀,一把單刀就可以成為絕世高手,幾型。講起當年亞洲金 融風暴,97年10月,月初恒生指數仲有15100點,28日當天就單日同你跌過1400點,低位仲見過8775,之後一直俾人將個市反覆沽落,到98年 8月低見6545,足足較97年8月嘅歷史高峯跌去61%。香港因為透明度太高,先至會俾索羅斯有機可乘,預先沽定期指,挾高拆息,睇死你地供樓負擔比率 去到9成以上,供到氣都咳,擺明要趁你病攞你命。佢以為香港真係積極不干預嘅小政府,佢勢估唔到港府以外滙基金作深水魚炮,炸散呢隻從來未輸過嘅大鱷。

全球招聘得啖笑

當 然,啱啱遇着剛剛,俄羅斯賴債炸死LTCM,搞到置身事外嘅美國要出手救亡,幫咗我哋唔少,外滙基金用咗32個月就回本,呢一場點都係世界金融史上經典一 役。今次金融海嘯,歐美不斷出招救市,仍然係紫一撻紅一撻,使咗嘅錢只係救到既得利益者。中央銀行出手買資產一啲都唔奇,新加坡淡馬錫幾十年前已經做緊, 當年港府入市效果,其實跟量化寬鬆冇咩分別,唔同嘅地方就係唔使印銀紙。聽聞當年打大鱷,係由許仕仁度橋、任志剛領軍、陳德霖操盤,而當年仲係財爺嘅曾特 首,就只係負責點頭決定去馬,同埋買定花生爆谷加紅酒睇戲。因此,雖然有人被戲稱為特首馬房中人,但佢點都係見過世面,未必冇資格接阿任總班。唔明點解有 啲儍瓜,竟然建議「全球招聘」金管局總裁,你唔理阿爺點諗,都要諗吓香港會唔會一個唔覺意搵到件無間道返嚟,就算佢係忠嘅,都可能要你幫佢惡補香港金融 史。從來冇聽過邊個國家嘅中央銀行行長,搞到要全球招聘,唔通香港真係冇人?抑或係怕咗立法會嘅噪音?胡孟青
 



青心 直說 香港版 香港 量化 寬鬆 胡孟 孟青
PermaLink: https://articles.zkiz.com/?id=8459

青心直說:寧願蝕息不焗賭 胡孟青


2009-05-22  AppleDaily





 

昨 天部份報章B1甚至A1頭條,皆大事報道10萬港元活期存款年息由10蚊減到1蚊,其實10蚊跟1蚊究竟有幾大分別,而分別又在那裏,似乎又唔係咁多人講 得出,淨係知道有酒樓做1蚊一隻雞,但係同時叫一碗白飯就要10蚊一碗。所以價值呢味嘢,答案未必人人一樣,在乎觀點與角度。大行高層(我嘅舊老闆)最清 楚呢期個市點解會升得咁凄厲,話到明主要係因為唔少對冲基金(Hedge Funds)數住傳統長線基金(Long Funds)手花,睇準Long Funds自舊年第4季雷曼爆煲觸發大量贖回潮之後,個倉清得八八九九,手上唔夠貨,今次擺到明係Hedge Funds 挾 Long Funds,因此資金湧入,焗佢哋追貨。不過,舊老闆都覺得股市升勢開始有啲過火,連李超人昨日都話股市已經升咗兩成幾,叫大家要小心,真係唔好當佢耳邊 風。不過超人亦話樓市長線會升,有錢畀首期不妨買樓擺兩三年,但係佢冇講幾多成首期,唔通係講緊十成?

升得過火小心小心

資金 周圍搵出路,不過大家都應該留意到,港股市況無甚睇頭之餘,雖然都叫做有啲異動板塊,但國策受惠股炒得越嚟越短癮,小心小心。不過,有大行報告鳴鑼響道嘅 或者可以炒多幾日,大家睇吓被大行連環大合唱嘅「東風螺」升到幾癲,唔知嘅仲以為佢啲車加多咗對翼。有人好似今日睇到新聞先至意識到紅簿仔息低,猛問有咩 買。費事佢又做點心,只係回應式話畀佢知,假如租金唔大跌的話,有幾隻本地上市嘅房地產信託基金可以揀,視乎佢喜歡邊個嘅物業組合,個人較喜歡越秀房託 (405)。不過加多句,如果係炒炒貢賭番鋪就最好過主,人哋一年都係派兩次息,費事有人自己冇運輸錢就改姓賴;將來如果夾硬要賴,就賴滙豐減存款息迫你 入市好嘞!胡孟青



青心 直說 寧願 蝕息 息不 不焗 焗賭 胡孟 孟青
PermaLink: https://articles.zkiz.com/?id=8463

青心直說:大行報告真係咁靈? 胡孟青

2009-05-26  AppleDaily






 

大 行報告錦上添花與落井下石嘅威力,大家唔難耳聞目睹,問題係呢條咁十拿九穩嘅財路係點樣鋪成,就係用散戶血汗錢層層堆砌而成。本來大行報告內容分析理據及 財務模型,例如DDM、DCF及WACC等等,係重要盈利預測工具,初入行寫分析報告,真係當佢係寶,睇番十幾年前嘅大行報告,明顯有份量兼正經好多,當 年嘅分析員睇每一間公司唔只實地考察,仲會加入好多行業分析比較數據。今天大部份人睇報告,只側重於目標價,題目少有以往語帶雙關之幽默感,多數單刀直 入,例如「大美人」新鮮滾熱辣嘅地產股報告,題目就話明新地(016)係「地產發展股嘅Prada」,既然題目一點就明,睇埋印於當眼處之目標價97蚊, 你就會有如條件反射般死跟。部份大行嘅研究報告,寫到明只供內部參考,冇理由咁快就唱通街,但係越話保密,就越顯得資料矜貴。

搭順風車要識落車

近 年最奇怪現象就係市場出現先知式預言股價報告,基本分析內容與理據輕描淡寫甚至欠奉,唔知係唔係趕住攞生意,唔得閒堆砌。投行打開門做生意,最緊要係班客 肯俾你牽住鼻子走。班客知道自己報告睇先,明知市場短期表現講情緒而非理性,明知大部份呢類報告會快速自動流落街頭,甚至被媒體廣泛報道,製造市場情緒指 標,即係話自己作為大行客戶,每每捷足先登,後面有人護航,自然會跟住報告買。至於散戶,當你見到幾家主要大行不約而同調升內銀股、內房股或本地地產股、 收租股目標價後,股價如有神助,你話情緒會唔會不被影響?於是報告就產生「自我完成」現象。究竟分析員係唔係真睇好樓市是另外一回事,大家都係做番場大龍 鳳啫,將來你唔識落車輸番出去,都唔可以怪佢哋,皆因願者上釣,冇人迫你跟佢買。可能下個星期佢哋又不約而同睇淡同一個板塊,大家都係睇住資金做嘢,搭得 順風車,真係冇數得計,唔怪得連分析員都懶得去計,整個確信買入、沽出,或者搞吓評級升降,搞掂就出街。胡孟青
 



青心 直說 大行 報告 真係 係咁 咁靈 胡孟 孟青
PermaLink: https://articles.zkiz.com/?id=8473

青心直說:一賺二虧七平 胡孟青

2009-05-27 AppleDaily





 

上 證指數已經從1664低位反彈過千點,升幅達60%,行情火熱,不過,聽聞內地廣大散戶似乎唔覺自己有好大得益。內地有網上調查顯示,近7成投資者表示自 己跑輸指數,雖然亦有近4成投資者能賺取蠅頭小利,獲利率最多達60%,而獲利超過1倍嘅投資者只有約10%。最奇怪嘅係,個市都叫做勁彈過,竟然仲有 30%投資者話自己輸突,當中更有10%話輸到嘔。內地市場亦有所謂「一賺二虧七平」,即係賺錢只係一成人,兩成輸錢,七成平手。多數投資者低位唔敢買, 怕低處未算低,而且早前個個睇淡,自己好難唔受影響,甚至在低位先至壯士斷臂。反彈過程中天天都覺得係頂,偏偏每日嘅頂都變成明日嘅底,宏觀條件明顯要你 看淡後市,結果過早沽出或者根本無膽再入市。要做波動市賺大錢嘅1成人,真係唔懶得。身處資金市、政策市,先抽出一箭雙鵰食盡兩條水嘅股票,總較大海撈針 穩陣,反正任你有幾多時間,都好難跟得晒千幾隻本地股票,唔收窄範圍,盞累自己冇覺好瞓。

炒股唔使高IQ

有人會問炒股票需唔 需要好高IQ,話你知,早前在巴郡一年一度嘅股東大會裏面,股神畢菲特就畀咗一個錦囊佢嘅小股東,話「投資並不只是關於個人智商嘅遊戲」,佢仲話,「假如 你智商超過150,就請你先將其中嘅30賣畀別人。你並不需要過高智商,因為過高智商有時反而會害咗你」。唔知呢啲係咪叫做聰明反被聰明誤。其實投資最重 要係先睇清楚同埋確定風險,然後才睇有幾多可能出現嘅回報。好多投資者唔理風險上咗車,跟住就問可以有幾多回報,縱非錯判形勢,亦係搞錯次序。高風險應享 高回報,但並不擔保唔會total loss。本來唔想冒險,甘願低回報,結果可能收穫更豐,但一樣有可能total loss,因為所謂嘅「低風險」,只係你自己話嘅。又睇唔通又要身痕,鎖定目標小注買嘢傍吓身,升又有份,跌又唔使輸瓜,關鍵在控制注碼。例如話畀你知o 依家買樓收租最多收5厘,而買二三線寫字樓收租閒閒哋都有6至7厘,你會點計點揀點取捨?買磚頭好還是買磚頭股好,抑或買入專注做商舖寫字樓代理嗰一隻 好?唔講係邊隻,反正只此一家,自己搵到就搵啦!胡孟青



青心 直說 一賺 賺二 二虧 虧七 七平 胡孟 孟青
PermaLink: https://articles.zkiz.com/?id=8477

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019