ZKIZ Archives


中環在線:劉央愛股俾標普插 李華華


2011-2-10  AD




 

有「中國女股神」之稱嘅西京投資管理主席劉央,有唔少粉絲,偏偏國際評級機構標準普爾就唔多畀面,喺新正頭大年初七「人日」,將佢隻愛股人和商業(1387)嘅評級展望,由「穩定」下調到「負面」。

人和評級展望降至負面

標普仲話人和嘅負債可能增加,兩年內現金流會由70億人仔,降到變負數咁大鑊,甚至質疑公司30%派息比率嘅政策可唔可以維持。

想當年女股神睇中人和,其中一個原因就係因為人和喺防空洞經營地下商場,呢個概念營運成本低,加上派息高,家陣標普一句彈埋嚟話「唔係」,唔知女股神咁樣俾人兜口兜面插,會唔會好無癮?

觸發呢次降前景嘅行動,應該係源於人和近日大嗱嗱拎咗26億人仔,收購無錫市一個購物中心股權嘅豪氣舉動。標普話,呢件事反映公司低成本發展嘅策略會改變,債務偏向激進,經營利潤有下降壓力。

股價爭氣逆市升0.75%

其實唔畀面又豈止標普一個,穆迪2月頭已經用銷售不穩,同客戶集中風險上升嘅理由,將人和評級由「Ba2」調低到「Ba3」。劉央愛股一個月內俾人插兩次,都咪話唔傷。

劉 央買股鍾意睇長線,人和08年上市以嚟,佢一直睇好,就算股價表現唔理想,佢都不離不棄,仲周不時派定心丸,甚至身體力行喺市場上增持,上個月底更加豪言 人和一年內可以去到3蚊。不過,人和噚日都算爭氣,個市跌超過300點,佢唔跌仲微升,收報1.34蚊,升咗0.75%。

李華華

LiWaWa@AppleDaily.com


中環 在線 劉央 央愛 愛股 股俾 俾標 標普 普插 華華
PermaLink: https://articles.zkiz.com/?id=22302


ZKIZ Archives @ 2019