📖 ZKIZ Archives

中環在線--秋官效應新觀點：越悲越跌

1 : GS(14)@2012-06-15 00:39:15

http://hk.apple.nextmedia.com/financeestate/art/20120614/16424411

一年多度嘅秋官效應聲討大會又嚟料，由1992年《大時代》玩咗廿年，發展到今日，鄭少秋任何拍劇相關行動都被視為跌市元凶，大家覺得厭咗未？未！因為里昂又出咗份報告，話今次效應可以令恒指跌到17650點，即係跌多1376點咁多，小型股災呀！信唔信好先？
點解無啦啦會出報告？事緣交銀羅家聰之前喺《信報》寫咗篇文，話有啲秋官效應分析係出術（ academic dishonest），里昂覺得題目有爭議性，所以就出報告再分析。唔使擔心，寫報告嘅兩位分析員，睇名計應該係港男，唔係鬼佬談港劇。
利好 TVB股價

咁里昂點講呢？佢就話今次唔係淨係計秋官啲劇出街後恒指表現係點，新分析方法直頭幫秋官喺劇入面角色設立嘅「悲情指數」，以「大時代式」冚包散為最悲：負10分。結果發現角色下場越悲哀，個市就越大鑊，而佢哋估計今次《心戰》都有負7分咁悲，估計個市會跌近7%，喺17650見底，直至套劇6月29號播完，三個月後就反彈7%。
報告又話秋官效應對 TVB（511）股價利好，播放期間平均升一成，到月尾57蚊！華華再睇真啲，報告喺談及《信報》文章嗰段旁邊引述高登討論區名言──認真便輸了（ You will lose if you take it too seriously），寫成8頁紙為咗玩一吓曲線，唔通投行入面有人想「出櫃」，認係高登仔？

---

中環在線：狂賀秋官拜拜

1 : GS(14)@2012-07-03 22:55:49

http://hk.apple.nextmedia.com/financeestate/art/20120703/16479943
你話華華迷信都係咁話，秋官套《心戰》上星期五晚終於播大結局，日頭港股就好似預祝定先咁，收市無啦啦爆升416點，美股當晚彈277點，呢個月仲要係「七翻身」，你話秋官效應靈唔靈吖？
開講有話「五窮六絕七翻身」，秋官套劇好揀唔揀，係要「五窮六絕」期間播，佢5月16號現身記者會宣傳《心戰》當日，成班股民畀佢嚇到腳軟，恒指單日大跌六百幾點，之後個市依然散散哋，六四當日更加跌落接近萬八點！
好彩，今次秋官效應靈得嚟短命，里昂估個市要跌到17650點更加冇發生到，7.1前中央係咁送禮，雖然大家都問「咁都算送禮？」但總算有消息出吓，加上歐債危機舒緩咗，個市就升番。
埋單計數，《心戰》播出嗰個幾月，恒指升490點，但期間個市好似過山車咁，為免心臟壓力負荷過重，下次秋官再有劇出都係避開先。

---

41萬人深宵煲《大時代》秋官追睇：神劇唔過時

1 : GS(14)@2015-04-22 22:30:20

■丁蟹與四個兒子雖壞事做盡，但感情深厚。資料圖片



【狂煲大時代】1992年出品的神級經典劇《大時代》，23年後重現電視螢幕上，沒有半點「老土、塵味」，反而掀起一股煲劇潮！昨日凌晨播映首集，丁蟹掟仔落街一幕震撼驚心，吸引逾41萬人深宵追看，不少網友在討論區及facebook瘋狂洗版，大讚當年29歲的藍潔瑛好索！身為靈魂人物的「丁蟹」鄭少秋和「方進新」劉松仁昨齊推《大時代》好睇，讚神劇不會過時，值得回味。


無綫由昨日凌晨開始重播23年前由韋家輝監製的經典劇《大時代》，雖然不知道「丁蟹效應」能發揮多少威力影響股市，但該劇以倒敍法說故事，一開始丁蟹因輸股票要與四子「攬死」，逐一掟蟹落樓的場面極其震撼，令收視高開6.4點，逾41萬觀眾收看，平均則為5.6點，約36萬觀眾收看，比起上周《衝》結局篇平均5點收視還要高，成今年深宵收視之冠。



【掟仔震撼】■第一集已有丁蟹掟仔落樓，令收視高開6.4點。電視圖片

【網民讚索】■當年29歲的藍潔瑛扮演年僅19歲的學生妹，既清純又好索。電視圖片

【冇打字幕】■有網民改圖惡搞，投訴無綫：「點解第一集會冇字幕㗎」。惡搞圖片


■丁蟹（右）和方進新由細識到大，但最後進新被丁蟹打死。資料圖片

劉松仁讚永恒不衰

劉青雲飾演的方展博和丁蟹確實魅力難擋，秋官亦有捧自己場睇重播，昨日在電話中說：「自己都驚，成套劇鋪排得好好。呢套係一套神劇，首要功勞都係韋家輝啦，每個角色都有追看性。」不過，秋官直言曾疑慮接演丁蟹角色：「20幾年前，翻睇仍然咁好睇，因為節奏感好強，完全唔覺得係舊嘢，而家未必可以拍得咁好。當年韋家輝搵我時都有疑慮，因為我一直以來演大俠，擔心做得好就好，做得唔好就會破壞形象，搞到兩頭唔到岸。不過韋家輝之前做過《誓不低頭》編審，已做出好材料，能夠帶動觀眾情緒，令我有信心接拍《大時代》。」最後被丁蟹打死的「方進新」劉松仁也慶幸有份參演，昨透過短訊說：「經典之作是永恒不衰，值得回味！有幸能在那個年代參與這經典之作。」劉松仁昨晚現身九展出席活動，問到《大時代》重播有否捧場？他說：「冇，瞓咗，唔記得呢回事。今早收到風話收視OK。」網上瘋傳他在劇中求老闆不要炒魷的片段，被網友勁讚演技好，松哥說：「嗰段OK，自己第一次睇都喊，我都覺得幾好，主要係劇本、製作、對手都好，劇本好可以帶你入戲，拍攝時好開心。」劉青雲昨透過助手回覆：「知道有6點收視好開心，但因為今日開早班，噚晚睇唔到，基本上冇乜翻睇亦冇上網睇，知道咁受歡迎好開心。」飾演丁蟹兒子丁益蟹的陶大宇昨出席活動時說：「已經唔係第一次重播，但每次重播外間都反應好大。」對周一股市急瀉，大宇說：「呢個效應真係幾邪！」


■陶大宇讚《大時代》是神劇，每次重播都好大迴響。攝影：王連連

藍潔瑛索爆學生妹

不少網民一邊追睇，一邊在香港討論區「推到完場」，單是兩個貼文已累計逾10萬人觀看，亦好多人建議在黃金時段播放，更多人驚嘆藍潔瑛當年好索且演技出色，當時29歲演19歲學生妹夠清純，難怪曾被封「靚絕五台山」。不過亦有人投訴聽不清藍潔瑛部份對白，重播居然冇字幕！問無綫會否加回字幕，發言人回覆：「短期內唔會。」劇中除老戲骨劉江、曾江、江毅被讚，而女神級索女「慳妹」周慧敏、「龍紀文」郭藹明、「方婷」李麗珍等亦屬看點，周慧敏昨說：「呢部劇係我演戲工作上一個大轉捩點，但首播以後冇再完整睇過，慳妹經歷變糢糊，昨晚特意再睇。」採訪：嵐山、皓騫





來源: http://hk.apple.nextmedia.com/entertainment/art/20150422/19120802

---

與秋官齊聲否認不和劉松仁談爭女：最正畀晒佢

1 : GS(14)@2015-04-28 02:12:02

■劉松仁昨晚與阿姐出席活動時，笑稱自己未夠班同秋官爭女。


於無綫深宵時段重播的《大時代》，劇中一班老戲骨演技個個爐火純青，尤其是主角「丁蟹」鄭少秋和「方進新」劉松仁，令全城瘋狂緬懷「那些年」劇集有幾精采。不過人紅自然是非多，昨日有報道竟翻開40年前的舊賬，指秋官和松哥由77年《陸小鳳之決戰前夕》開始由戲內鬥到戲外，並為爭拍檔汪明荃暗地生積怨。



秋官：20幾年前打死佢


一向鍾意講笑的秋官，昨日透過WhatsApp留言笑謂：「唔係結怨呀，係40年前打死咗佢呀！應該係20幾年前一拳打死咗佢！我同佢（松哥）冇乜嘢不和地方，係同西門吹雪不和之嘛，打到死為止。」松哥和阿姐昨日在九展出席宣傳，松哥與秋官口徑一致說：「唔係呀嘛？我邊有咁巴閉呀我，冇資格同佢結怨，佢唔係同我，葉孤城（秋官飾演）係同西門吹雪之嘛。」談到爭同阿姐合作，松哥謙讓說：「冇得爭，你話佢哋合作幾多部，我得三部，仲要幾十年先一部，最正最後生畀晒佢，邊有得爭。」他表示與秋官雖然少聯絡，問有沒有約食飯？他說﹕「少，我哋唔夠佢班。被翻炒舊聞？冇所謂，得啖笑，觀眾又知，你同我都知係亂寫。」



■有指鄭少秋（左）和劉松仁在現實中鬥足四十年。《大時代》劇照

■有傳劉松仁拍攝《陸小鳳》時，不滿秋官加入搶鏡。資料圖片



松哥坦認最喜歡丁蟹

松哥強調與秋官沒有不和，還期望再次合作，但就拒拍《大時代》電影版，他解釋：「我唔鍾意重拍嘢，除非另外一部。」他坦認《大時代》最喜歡丁蟹這個角色，但不會要求加戲份「遲啲死」：「我邊有咁小器，我咁大量，韋家輝搵我拍時已知（六集戲份）。成個戲我最鍾意丁蟹，寫得最突出最特別，由呢個人物帶起成個戲。」阿姐則說：「冇呀，問佢哋啦，我點知箒。」當年《大時代》編審曾謹昌昨亦在電話中否認：「大家一開始就知道大家戲份係點，如果松哥唔死，青雲條線又點走出嚟？」採訪：嵐山、魯吉





來源: http://hk.apple.nextmedia.com/entertainment/art/20150427/19126617

---

欣宜唔知秋官有五億

1 : GS(14)@2015-05-10 23:43:32

鄭欣宜和糖妹昨日在荃灣出席千人萬歲大笑瑜伽操，與逾千位長者齊創健力士世界紀錄。適逢今天是母親節，欣宜透露前晚在家翻閱媽媽沈殿霞的舊照：「我冇唔開心，因為日日都會掛住媽咪，已經約咗小學同學食飯，同佢媽咪慶祝母親節。」她表示媽媽曾說過開心要面對，不開心亦要面對，因此會開心過每天。至於爸爸鄭少秋自爆有五億身家，欣宜聞言謂：「嘩！咁多？我冇諗過，自己唔識計數，不過我有睇《大時代》，我仲鍾意咗丁孝蟹，佢好型。」至於忙於籌備新碟的糖妹，希望有時間可以帶父母去旅行。採訪：盧妹攝影：陳慧安





來源: http://hk.apple.nextmedia.com/entertainment/art/20150510/19142003

---

接老竇棒搵銀　欣宜預告錫錫秋官

1 : GS(14)@2015-06-15 08:45:28

鄭欣宜接父親鄭少秋（秋官）棒，為保健食品擔任代言人，昨日更於清水灣片廠拍攝新一輯廣告。欣宜得悉成為該品牌代言人後，即時將消息告知父親：「因為廣告入面要跳舞，所以我將排舞片send咗佢睇，佢都話睇咗好多次。」問到可會想超越父親的舊廣告？欣宜笑謂：「冇諗過要超越，只係想年輕一代都接受呢啲保健食品。爸爸嗰個廣告old school啲，而我哋呢個就新潮啲，首歌會用番，但就會重新編過曲。」


■秋官當年的廣告歌，早已唱到街知巷聞。互聯網圖片

父親節同老竇拍拖

早前秋官表示希望父親節收到女兒的吻，欣宜笑謂：「錫面珠咋？錫面珠冇所謂，我哋見親都會咁做。」欣宜透露已定好日子跟秋官慶祝父親節，並稱二人像約會一樣食飯行街看電戲，已是最好的父親節禮物。此外，提到早前擔任側田個唱嘉賓，對方更有意邀她擔任往後巡唱嘉賓，欣宜說：「搵我啦！其實我開頭都有啲擔心，因為要同佢跳啲較親密嘅舞，都驚佢啲fans會謀殺我，但見而家反應咁好，都好開心。」採訪、攝影：譚倩宜





來源: http://hk.apple.nextmedia.com/entertainment/art/20150613/19182421

---

欣宜約秋官撐枱腳

1 : GS(14)@2016-06-20 05:45:25

鄭欣宜、劉浩龍（師兄）、Super Girls、鍾舒漫及J.Arie等，昨日到九龍灣出席「香港流行音MV頒獎典禮2015第三季季選頒獎禮」欣宜自導自演歌曲《女神》MV網上熱爆又獲獎，她說：「今次咁大膽拍MV，入行8年，呢首歌係五台之冠，又有今次呢個MV獎，係人生第一次，好開心。」昨日父親節，欣宜表示未能與爸爸鄭少秋慶祝：「不過約咗補祝，諗住睇完戲再食飯，禮物就唔使，我哋一齊嘅時間最寶貴。」師兄憑《第三條跑道》奪MV獎，同樣有獎的女友容祖兒未能出席，師兄指女友在內地工作。問到祖兒上周四的生日，師兄表示只是普通慶祝。採訪、攝影：盧妹





來源: http://hk.apple.nextmedia.com/entertainment/art/20160620/19660912

---

譚新強﹕不願看秋官「大時代」 寧看楊冪「小時代」

1 : GS(14)@2016-09-13 07:53:28

【明報專訊】年初當絕大多數人還對新興市場，尤其香港特別悲觀時，我已察覺到資金流起了微妙的變化。由於成熟市場已升至很高的估值，美股盈利更開始下跌，所以資金悄悄地逐漸流入估值較低的新興市場。年中的Brexit提醒投資者關於歐洲的風險，更拖慢了美國加息的步伐，成為了令資金加速流入新興市場的催化劑。

年初預期今年恒指能翻正，重上22000點，在7月已應驗。後來我再把目標提升至23000點，在8月中又再達標，比我意料的快。在此之後，我一直抗拒把目標再提高至24000點或更高，勸喻各位「8焦急」（別焦急）。但藉着「險資」可經滬港通買股的「好消息」，上周五恒指終破24000點（但已留意到港股是唯一的升市），成交更超過1000億。有網友調侃地說，每月加1000點，年底不就真的升到我「被預測」的28000點？

市場憂債息回升多過加息

花無百日紅，上周五美股終於大跌2.5%，周一亞洲股市無一倖免，恒指更大跌800點。我認為今次調整有三大原因：

（1）很多傳媒都錯誤解讀對息口的憂慮，以為市場最擔心的是美國在9月加息。不少美聯儲官員確為加息放風，但ISM數據其實非常差，所以9月加息的概率升極都只有30%。

真正令市場憂慮的是多國的長債息口正在回升。美國10年債息從7月最低的1.32厘反彈至1.7厘，德國從-0.2厘回升至0.05厘，連日本都從-0.3厘升至0厘！

如我上周所說，若全球經濟能見到Reflation，其實是好事。但有人擔憂通脹升了，但若經濟還是不行，就反而變成滯脹。我覺得這是杞人憂天，先脫離通縮的威脅再說吧！

希拉里得肺炎 不可掉以輕心

長息反彈的速度太快，債價急跌，是更大的問題。全球最大的退休、互惠、對冲等基金都拿着很多長債，是一個非常crowded的交易。所以一下子跌得那麼快，VAR（value at risk）馬上爆倉，風控就逼着把股票都一齊拋售。今年Bridgewater正努力推銷Risk Parity Trade，鼓勵在投資組合上的債券部分加槓桿，用此來替代股票的部分風險。聽起來似是而非，backtesting可能證明有效，但能否抵受這次債息反彈是另一回事？

（2）美國民主黨總統候選人希拉里的健康問題成為市場焦點。數周前我已討論過她和特朗普因為精神或身體健康而退選的可能性。過去只有Fox等極右派媒體用健康不良來攻擊希拉里。但這次希拉里在「911」十五周年活動提前離開及明顯暈倒，所有主流媒體都有大肆報道。希拉里陣營後來解釋是感染了肺炎，已在服用抗生素。聽來輕描淡寫，但上了年紀68歲的人得了肺炎，可大可小，入ICU都不為過！

華爾街是非常支持希拉里的，市場亦無疑是較喜歡她的（除醫療行業外）。所以如選情有變，亦可能加大市場調整的壓力。

不識丁蟹 不宜妄提「大時代」

（3）最近新興市場，包括香港都有點過熱。周末跟很多朋友聊天，連一般較審慎的朋友都認為港股已進入parabolic階段，可以不管外圍，繼續狂升。另外又聽到三手消息，話說四叔都仍覺新鴻基地產（0016）「抵買」云云。

最令我不安的是上星期有些傳媒朋友竟然問我「大時代」是否已重臨！這些朋友可能和張華峰議員一樣，不認識丁蟹，更不知道「秋官效應」，但我一聽就毛骨悚然！

長遠一點，我對港股仍然樂觀。上周聽說國務院開始考慮消費稅改革，如結果是大幅減稅，變成真正的「供給側」改革，到時我必將提升恒指目標價！最理想的是細水長流，資金慢慢地從內地和歐、美流進本港。我寧願看楊冪主演的「小時代」！

中環資產投資行政總裁

[譚新強 中環新譚]


來源: http://www.mpfinance.com/fin/dai ... 4083&issue=20160913

---

秋官評愛女88分：跳舞好難得

1 : GS(14)@2016-10-24 06:12:15

■秋官完騷後即入後台給欣宜送抱抱，父女情深。



欣宜前晚在九展開騷，她全晚落力又唱又跳，爹哋鄭少秋（秋官）更帶了她的兩名同父異母妹妹詠恩及詠曦來撐場。秋官完騷即帶着兩女入後台，秋官給愛女欣宜送抱抱。秋官大讚欣宜演出精采，他昨日在電話中說：「我畀佢88分，進步好多，可以handle到整個場面。」問為何扣去12分？秋官認真說：「唔係扣分，係仲有進步嘅餘地。」他表示欣賞欣宜勁歌熱舞：「佢跳舞真係好難得，邊跳邊身水身汗，佢控制得好好，兩個妹妹都話佢唱得好。」欣宜在演唱會中重提當年跪地求男友一幕，秋官說：「聽到好心痛，我都係噚晚第一次聽到，梗係唔舒服、唔開心，佢未同我講過，等佢得閒，我再同佢了解吓，呢個女好堅強同努力。」採訪：陳杰




來源: http://hk.apple.nextmedia.com/entertainment/art/20161024/19810068

---

秋官為欣宜情事難過

1 : GS(14)@2016-10-27 06:02:45

鄭少秋和尤聲普昨日在演藝學院獲頒發榮譽院士，陳寶珠、梅雪詩和何超瓊等觀禮。秋官笑謂自己以前學戲沒多讀書，沒想過會穿上這袍，稍後與家人食飯慶祝。



■梅雪詩（左）及陳寶珠支持好友，到場觀禮。

日前女兒鄭欣宜開個唱，秋官給予88分。欣宜在個唱上透露感情生活，曾跪求男友復合，秋官說：「聽到好唔開心，通常女都會同媽咪講感情事，冇畀我打開話題，而且情侶相處好多學問。」採訪、攝影：王連連




來源: http://hk.apple.nextmedia.com/entertainment/art/20161027/19813016

---