唯有虐隨身 韋家雄
1 :
GS(14)@2017-06-26 02:54:582017-06-14 EW
「如是因，如是果，昨日因結成今日果，任何力量都改變唔到……」韋家雄哥哥韋家輝於○三年拍《大隻佬》時，片中劉德華跟自己的惡念如是說。
凡塵世事千絲萬縷，因與果，都是源自那一念天堂、一念地獄。韋家雄自己也很相信這套，尤其是廿年前父親離世時，更讓他體會至深。「我爸爸喺我十歲時，拋妻棄子，有咗另一頭住家，佢嗰陣時係塑膠廠老闆。到佢入醫院臨終前，佢要揸的士搵食，因為糖尿病，盲咗又鋸咗對腳，好痛苦！嗰陣我同我阿哥去探佢時，已經完全唔認得佢。」那個時候，他正因為《真情》「大力」一角，人氣急升；韋家輝亦早已是著名編劇。「如果我爸爸當年唔係拋妻棄子，我哋幾個兄弟姊妹同阿媽就唔會咁窮，我就唔會咁早出嚟做嘢，唔會識到帶我入行做打燈、攝影嘅朋友，亦都唔會去考亞視藝訓班；我哥哥就唔會去停車場做賣飛、送汽水，唔會夜晚無聊打開報紙，見到編劇訓練班招生，走咗去做編劇，然後就唔會有《新紮師兄》、《義不容情》同《大時代》！
「正如我爸爸當年唔係咁絕情，唔肯畀阿叔（韋建邦）喺工廠做啤工，我阿叔之後就唔會搞《龍虎豹》呢本書，所有歷史都會改寫晒！」因為失去過，所以學懂甚麼叫珍惜；因為貧窮過，所以明白甚麼叫謙卑；更因為親眼見證過報應和因果，所以，快將五十二歲的韋家雄很清楚當下應該要做個怎麼樣的人——這一切，同樣源自那一念。
何謂凍？
近日一個非牟利創作計劃《夢者舞台DStage》，找來了韋家雄的人生經歷作為藍本，拍攝微電影。事實上，他的成長或是演藝歷程，的確夠晒「人生如戲」。「如果畀我揀拍我邊段人生，我會揀我嘅童年時代。」他的父親是塑膠廠老闆，一家六口原住華富邨，有私家車出入，但在他十歲時，父親卻跟另一個女人遠走高飛，頭也不回，家庭經濟直插谷底，貧窮得在他讀小六、十一歲時，已開始要當非法童工，每朝上學前到酒樓賣點心幫補家計。
「嗰陣朝朝早凌晨三點，我就要由（紅磡）山谷邨行半個鐘去土瓜灣酒樓返工。屋企窮到，冬天我有件絨校褸着已經好好，但件褸開胸嘅，行去酒樓嗰半個鐘，真係抵唔到凍，如果好彩嘅，一落樓喺街執到啲報紙，我就會搓軟佢塞入衫裏面，真係保到暖㗎！」母親要獨力撫養四兄弟姊妹，生活逼人，教仔女只能靠打和鬧。「十七、八歲時，我都係瞓緊地下，冇牀；有時寧願夜晚去公園瞓長櫈，都唔想返屋企，冬天嗰陣，我都係執啲報紙捲住自己保暖。所以，你問我知唔知點做好凍嘅戲，點謂之『凍』，我可以話你聽，我真係知！」點認啫？
雖然生活清貧，猶幸四兄弟姊妹長大後，也各自找到了出路，哥哥韋家輝成為了編劇；妹妹韋家華則投身了電視幕後工作；而韋家雄自己，則於八九年修讀亞視藝員訓練班入行，當了好幾年閒角，才於九四年獲其時任亞視監製的戚其義賞識，讓他在《戲王之王》中，跟呂頌賢和江華齊齊孭重飛。
「後來阿戚（戚其義）去咗ＴＶＢ，有次喺超級市場撞到，佢就引薦咗我入去。」兩年後，高層曾勵珍找他加入《真情》，飾演「大力」，令他正式入屋。而就在這時，他收到了父親那個情婦的電話。「佢話我哋知，阿爸入咗醫院，叫我哋去睇佢。我同阿哥去到醫院，先知佢因為糖尿病，盲咗一段時間，對腳已經截咗肢。
「我唔覺得嗰邊屋企對佢好好囉，佢本來係塑膠廠老闆，乜嘢環境先要去到揸的士搵食呢？我哋去咗兩、三次，係最後一次，佢要走，先第一次見到嗰啲所謂嘅細佬，後來佢哋想認番我哋做幾兄弟㗎，但點認啫？都冇感情！做朋友就得，唔通即刻喊晒嗌『細佬』咁咩？劇本都寫唔到出嚟，觀眾會鬧㗎！」要點戇？
因為「大力」一角，他認識了蝦叔關海山這個好老師。「佢教我要點樣處理一個角色，係佢令我對演戲開咗竅，令『大力』呢個人物立體化！」角色深入民心，為他建立了戇直的形象，此後幾乎所有劇集，角色性格都是戇直底。「大大話話，我都戇咗十年，一直都諗有冇第二個方法去戇，好彩之後好幾年，我啲角色先叫做多啲變化。」雖然演繹的角色不再單一，但亦有令他心灰意冷的時候。「好多年前拍過套戲，個角色之前殺人唔眨眼，跟住見到個護士受傷，又騰晒雞，其實係咪第二個角色嚟㗎？哈哈！同監製講，佢話：『呢場戲我度嘅，有乜問題呀？』我咪照做囉，仲有乜嘢好講呢？」直至年前拍《梟雄》，遇着了黃秋生，終於為他打了支強心針。「嗰半年，佢成日叫我放開啲去做，畀番啲信心自己，我咪盡情去做囉！有場戲，佢呢一秒先同我講緊笑，下一秒一roll機，我要同佢講一大堆對白，講佢恩人死咗，講咗兩句，已經見佢兩泡眼淚喺度！嘩！好大壓力！嗰堆對白係我㗎！一NG就死！
「秋生真係好犀利，總之一埋位，佢就係『喬傲天』，唔理對手係主角定臨記，佢都照畀戲你，呢啲咪影帝囉！」主也角？
一五年底，韋家雄終於憑《梟雄》這個「麥瀚林」角色，奪得「最佳男配角」獎。「之前提名過好多次，都係冇結果，嗰年攞到，真係要多謝秋生哥，係佢提得我多，令到啲人先留意多咗我。」查實，他確是稱得上是「綠葉王」，皆因他一直以來都在當配角。「好耐之前，我已經冇諗做主角呢樣嘢，如果人哋要畀你做主角，十幾廿年前都畀你做咗啦！
「對我嚟講，個個角色都係主角，分別只係你演一百場，我演十場咋嘛，都係演戲！畀你演一百場，都拿捏唔好個角色，咁都冇用㗎！但如果一個配角，二十集裏面只係出四場戲，但個角色拿捏得好，反而啲觀眾已經好記得！你睇吓《人民英雄》，金燕鈴只係出咗一、兩場戲，已經攞到『最佳女配角』，人哋講親都係話：『金燕鈴嗰套《人民英雄》呀！』」即使明知現今這個演藝圈只會捧靚仔、小鮮肉，但他卻依然樂觀。「我相信呢個圈係容納到任何人嘅，葉德嫻都做到《桃姐》，做到女主角啦，點解一定要係花旦先得呢？係咪？」踏實的人，總會活得比較自在。
向左走 向右走韋家雄坦言，他很着緊網民的口碑和評價，「真係好重要㗎，因為我冇辦法叫佢哋話我好定唔好㗎嘛！」在網絡世界中，他除了演技一直備受讚賞外，今年初，更因為一段他在港鐵車廂內，指摘偷拍少女阿叔的短片，而獲網民稱他為「真漢子」。「我見住個男人想對個女仔動粗，咪阻一阻佢囉，後尾先知原來佢偷影咗個女仔，想搶番部電話。都係咁啱得咁橋啫，可能當時好多人都想出手，只係我出得比較快啫。」甚得網民歡心，他謙稱實情是網民教曉了他很多，「好似個『J』字，成日見佢哋乜嘢『J』嚟『J』去，邊個好『J』，我後來問人先知，原來係成個人類繁殖過程！哈哈哈！仲有乜嘢『呢個韋家雄向左走向右走乜乜乜』，都係人哋話畀我知，『向左走向右走』原來係個粗口字嘅代碼，哈哈哈！啲網民真係好有創意！」一理通百理明，所以訪問這天，再教他網絡另一潮語：「單手打字」，他一聽就明白了，真係醒！
撰文☆周彩霞 攝影☆梁比利 設計☆美術組