📖 ZKIZ Archives

金融發展局成立，據宣佈嘅職能範圍，堂而皇之，有五大項，看似是代表香港銀行、證券經紀、基金管理、私募基金、商品期貨嘅各主要市場參與者嘅高層之組織，委員來頭甚猛，主席查史美倫更係經驗豐富嘅證券行政鐵娘子，現在係香港上海匯豐銀行董事，行政會議成員，直情係精英中之精英，由佢領軍，深慶得人，誰曰不宜。
不過呢，巧婦難為無米炊，呢個來勢洶洶嘅金發局竟然會係一間無人無錢無權嘅法人有限公司，初期向政府借人運作，長遠要自給自足，查太雖然有料啫，但叫佢點樣開口向金融界募捐呀？外資機構一定唔會捐（跨國公司好難向股東交代，亦怕此例一開，其他國家地區伸手問要捐款），本地公司冇錢捐，匯豐渣打俾人打心口，捐得幾多呀，到頭來，可能係全部中資金融機構為支持梁振英而捐款，你話政治上幾難睇呢。
香港過往四十二年（由1970年計起），銀行金融業不斷膨脹，成為本港經濟支柱之一，晉身為世界金融中心，與紐約倫敦齊名，中間有冇一個金融發展局出謀獻策？有無財政司郭伯偉、夏鼎基、翟克誠、麥高樂、曾蔭權嘅精心策劃，並由港督推動？答案係冇，一切全靠香港制度靈活，政府唔阻頭阻勢，配以極低稅率及廢除利息稅配合之故。金融從業員係世界上最識搵錢搵快錢嘅人士，有錢搵，有生意做，唔駛政府指指點點，亦唔駛成班日日互相競爭搶生意嘅人士坐埋一齊做腦震盪。
今年年初，左丁山問過賓架L：「有冇向政府及特首候選人表達金融發展意見？」賓架L當時講過，佢地業者有向當局反映三大要點：（一）搞好空氣，不要污染；（二）搞好國際學校，等外來人士（expats）子女可以讀書；（三）增加大單位豪宅供應、甲級寫字樓供應、平抑租金，其他就唔係咁緊要咯。但係呢三件事至今政府冇法子做得到，全部輸畀新加坡幾條街，試問金融發展局可唔可以做得到，滿足國際金融業要求，繼續在港營業，唔好搬去新加坡呢？其實若非香港有中國生意可做，新加坡一早贏曬啦，金發局空有一批猛人，大可空議論一番。若由金發局建議清潔空氣、增加豪宅與甲級商廈及擴大國際學校，咁黃錦星、張炳良、吳克儉做啲乜？

政府預算案有一新意，就係設立獎學金基金，每年選二十人到海外知名學府讀書，學成必須回港做教師。做教師？冇錯，在哈佛耶魯牛津劍橋等等名校畢業後，返嚟做教師，否則回水，要償還獎學金。香港尖子學生高考文憑試狀元等等皆好攻讀環球商業、醫科、法律，全與教師無關，究竟有冇人得到呢個獎學金後到牛劍讀書學教書有關科目（如修讀英語教育和幼兒教育課程），難講到極。而且返嚟之後，係唔係保證有「教師職位」？到官校教，津校教還是直資學校？亦係未知數。讀完牛劍，返嚟還要一紙教育文憑噃，否則難以在中學晉升，唔係咁容易食呢行飯㗎。
根據政府御用消息專欄透露，曾司長理財意念與特首唔多夾，要林鄭「義助」，調和分歧。呢個專欄在預算案宣佈前，又講過梁先生力推金融發展局，但曾司長不熱心合作，結果「金發局」本想向金管局、證監會要錢要人，全吃檸檬，不得要領，梁曾關係之熱度，可想而知。
左丁山睇完御用消息專欄，好奇心起，周圍搵人求證，起初冇人敢講，直到左丁山向佢地講：「喂，報紙寫咗出嚟咯噃。」先至有人士肯間接承認，「金發局」係問過金管局要錢要人，金管局一口拒絕，再向證監會打主意，證監會急急開會商討，詳細研究法律條文，就以「於法無據」為理由，拒絕向「金發局」輸送款項。
至於「要人」，「金發局」要推動組織、起步，在在需人，問金管局與證監會要求借調總監級（Director）人馬過檔，但呢類人物係高級管理人，在原位還有繼續晉升希望與前景，一旦走咗去所謂「金發局」，兩三年後返回原來機構，做乜好？容乜易升級機會已經「蘇州過後冇艇搭」，而且自己個位已經俾昔日下屬做咗，自己攞唔返？呢啲事情在1990年代初移民潮發生時，見過唔知幾多次啦，大把人坐完移民監返嚟，要做昔日下屬嘅下屬呀！高管人才全部眉精眼企，邊度肯自願舉手做志願軍借調去「金發局」噃！結果是金發局現時無人無錢，無權無勢，唯有靠財庫局頂硬上，在後面撐住啦！