ZKIZ Archives


鋪王鄧成波「碌卡」救東海

2014-05-08  NM  
 

 

由已故「廚神」鍾錦創辦、曾有名人飯堂之譽的東海‧海都酒家(下稱東海),突然易手,新主竟是人稱波叔的「鋪王」鄧成波。

擁有十一間分店的東海,自鍾錦去世後,由徒弟楊克鳴等人打理,名氣生意都大不如前。由股東變回打工仔的楊克鳴承認,今次波叔「打救咗六百二十個(員工)家庭。」

八十歲的波叔,馳騁物業界半個世紀,身家以百億計。是次以白武士身份買下東海全部股權,只因當年曾在東海吃過記憶中「最好吃的一餐飯」。七十年代已涉足酒樓生意的波叔,封這行為「最難做嘅行業」,正好以此鍛鍊兩位八十後兒子,而揸弗的正是最得寵的五子鄧耀昇。「我一毫子都唔使攞出嚟,銀行個個都爭住俾(信用)額我哋,即係『拉卡』(碌卡),簽個字,第日先找數。」擺明錢多的波叔,豪言要重振東海之名,兒子鄧耀昇一語道破:「我哋目標係要收復(失地),追落後!」

訪問主角原是東海‧海都新任行政總裁鄧耀昇(Stan),即波叔第五子,時間是本週一中午,在金鐘中信大廈海都酒家。其間與銀行家在另一貴賓房午膳的波叔,為撐兒子,「過房」探訪,即時取代兒子成為「主角」。

自言對飲食「好奄尖」的波叔,近期幾乎日日在東海食飯,這天他就當著記者面前,捉住出品部總監陳偉雄道﹕「尋日介紹我哋食個蔥油鴨,話(質感)好似鹽水鴨咁(腍),吃落真係好香,可惜我戴假牙(咬唔到),但太腍後生仔又唔啱,或者嗰度調校嚇。」再追問﹕「啲鴨仔幾重﹖」「一斤多。」波叔即鬼馬道﹕「咁應該好嫩,可能係我啲牙嘅問題。」

打救過氣富豪飯堂

問到何以睇中東海,波叔即代言人上身:「全香港我認為呢度啲嘢最靚,喺第二度食唔番。」他指很多年前,首次到東海食飯是恆生銀行的職員請客,一餐晚飯盛惠五千大元,菜式美味,至今難忘。身旁的兒子鄧耀昇插口指還有一個重要原因,就是名字改得好,波叔即哈哈笑道﹕「真係改得好,福如東海,即係東海好有福!」東海旗下有八間東海酒家,三間走高檔路線的海都酒家,內地有一間分店,位於東莞。早年已認識「廚神」鍾錦的波叔,近年透過銀行界朋友認識繼承鍾錦衣鉢﹑成為東海代言人的楊克鳴等人。去年底,波叔得知東海有意放盤,透過中銀賓架搭路,傾談入股事宜,更連三十多年來一直持股收息的鍾錦家人亦聯絡上,最終於今年二月買下全數股份。市傳賣盤金額以億元計,波叔三緘其口,僅笑笑口指大家有誠意,作價是象徵性數字,「我講老實說話啦,我哋一毫子都唔使攞出嚟,銀行現在個個都爭住俾(信用)額我哋,即係『拉卡』(碌卡),拉咗卡,簽咗個字,第日先找數,咁我哋啲物業每年升值一個巴仙都已經夠找。」以波叔手揸逾百億物業推算,買盤價應逾一億元。波叔說得輕鬆,由股東變回打工仔的楊克鳴就坦言:「係波叔挽救咗東海‧海都,打救咗六百二十個(員工)家庭。」面對租金及食材價格上升等壓力,近年酒樓生意難做,熟悉商舖市場的波叔透露﹕「而家大型商場注重零售,最近就有兩間酒樓被收回舖位,突然無咗旗艦店,真係好傷,唔係俾唔起租,係人哋唔肯租俾你。好像奧海城嘅聯邦大酒樓,因為大業主要擴大商場而被收鋪,東海好彩喺另一邊,唔黐住商場先無事。」

Ling姐:只有鍾錦一個老闆!

追隨東海‧海都創辦人鍾錦廿多年、由知客做起的譚綺玲(人稱Ling姐),離開東海四年多,如今是銅鑼灣名人飯堂「名廚」的老闆娘。她指早已收到風,知道東海賣盤,坦言多少有點遺憾、不捨:「咁多年心血,咁就賣咗俾第二個,真係好唔捨得。不過,總好過連個招牌都無咗。錦哥○八年離開(去世)後,東海就好似條船無咗船長,龍頭人物都唔喺度,所有叻人都走曬,連我唔叻嘅都出嚟創業。」鍾錦掌舵的年代,東海是行內的少林寺,人才輩出,鴻星、金龍船的老闆都是鍾錦的徒弟。Ling姐慨嘆:「一山點能夠藏咁多隻虎;以前錦哥好闊綽,每年大年初三,都豪花幾十萬喺會展同員工開party,又大派利是。自從錦哥病咗嗰年開始就取消咗,氣氛唔同曬。」

名人飯堂唔易做

以精緻粵菜聞名的東海,曾是香港首屈一指的「名人飯堂」,國家前領導人朱鎔基、榮毅仁都是座上客。Ling姐回憶道:「以前東海嘅老闆個個都係『巨星』,每個人帶幾個朋友嚟就已經滿座,好似徐董事(即證券界老行尊,「順隆三劍俠」之一的徐國炯),他是海派上海人,識好多名流、紳士、政府官。」對於沒有鍾錦的東海,Ling姐直言:「打工唔同做老闆,廚師睇曬成盤生意,佢哋唔精,就好似讀書都分科啦,近期有客講,東海食飯做到五折。」對於新老闆要重振東海之名,Ling姐認為唔係易事:「營商環境唔同咗,選擇多咗,要打造『名人飯堂』唔係容易嘅事,尤其曾經有過、無咗,要再做番,更加難。」

鍛鍊孻子接班

現年八十歲的波叔,思路清晰,為人爽快健談,記者未及發問,已自我剖白:「講真嗰句,靠酒樓賺錢真係好困難,係俾佢兩兄弟學嚇嘢,落嚟學嚇營運,學得到做酒樓,就做乜都得o架啦,係最困難嘅一行。」對於「酒樓」,波叔並非「門外漢」,四十多年前,已曾經營酒樓生意,「由七○年做到七九年,當時一籠蝦餃賣八毫子。」他指為是次買盤,事前還認真地做了深入研究,「香港第一間上市的酒樓,叫『夏香』(後來先後改名東方紅地產、國際德祥,現為金匡企業),喺海運商場,之後一路落,酒樓都較難上市,不過我哋唔係要上市,係研究嚇。」現時,波叔亦是鴻星酒家股東之一,持股百分之二點六。「今次都有同鴻星打招呼,不過多年來我唔參與決策,係業主身份多,而且佢哋(鴻星行政總廚周權忠與楊克鳴)都係師兄弟,錦哥(鍾錦)以前都係鴻星大股東。」

收復追落後

易主後的東海‧海都,原有管理層均「有得留低」,尤其作為酒樓靈魂的廚房部,繼續以楊克鳴為首,他留任董事,掌管採購物流;跟隨他三十年的大廚陳偉雄亦出任董事兼出品部總監;新官上任的行政總裁鄧耀昇負責財務,宣傳推廣則由其兄長鄧耀邦負責。得到父親力撐的鄧耀昇,開口埋口以「老闆」稱呼父親,他指目前其中一個目標,就是要為海都重拾「富豪飯堂」之名。他表示,鍾錦打骰時,是「一言堂」,公司由樓面、廚房到公關,行動一致。但自鍾去世後,東海即陣腳大亂,管理層意見與行動都不如以往一致,鄧耀昇指﹕「好像去新場開分店,有同事會諗係咪想試新嘢呢﹖但又唔夠其他行家放膽去試。」因此,他第一步做的,就是重整架構,並陸續從同行中挖角,壯大團隊。兒子主內,波叔則變身「大公關」,頻頻邀請富豪朋友、銀行家等,於海都飯聚,鄧耀昇笑稱此舉是「收復(失地)。」波叔插口道:「有個富豪,年幾無嚟,而家一個月起碼嚟一次家庭聚餐,一訂就兩、三圍。」鄧耀昇補充:「呢位富豪係家族主理人,話一家人最緊要坐埋一齊食飯,即係老一輩講嘅圓枱文化,老闆(父親)都有呢種情意結。」

鋪王十年兩風浪

近年鮮有出席公開場合的波叔,今次現身與記者侃侃而談,還主動提及上一次接受本刊專訪,正好是十年前,慨嘆:「○四年仲話要退休,一係去澳洲,一係返鄉下(廣東南海)。十年人事幾番新,都幾感慨。」年幼喪父,由母親撫養長大的波叔,只讀到小學畢業。十六歲學師做電燈,後轉做光管。六十年代在長發街開舖,做霓虹光管,賺到第一桶金。後來生意走下坡,才轉攻地產,開設成功地產,沾手車行及開設愛視美眼鏡。九六、九七年,波叔為谷公司上市,瘋狂掃貨。一場金融風暴,不但令上市大計泡湯,更因舖位淪為負資產,差點沒頂。○四年,波叔因欠下銀行四十億元,要賤價沽貨套現還錢,包括他至愛的旺角電腦中心。如今東山再起,對於上市,波叔說得斬釘截鐵:「百分之一百唔會!我哋要上嘅話,隨便一個商場都可以上到,而家賣一個商場都十幾億元,好多上市公司仔都係值幾個億。」當年捱過事業低谷,身體卻出狀況,有傳患上胃癌,多年來深居簡出。戰勝病魔的波叔,雖然瘦了兩圈,但精神抖擻。六三年開始堅持游冬泳打下的底子沒白費,現時說話仍中氣十足,轉數亦非常快,記性超好,尤其對物業資產,更是如數家珍:「我個腦不停諗嘢,一無嘢做就悶,我叫啲鋪做靚女,每日都想睇,買唔買都睇o架。」

結婚婚宴一條龍

波叔育有五名兒子,最得寵是年僅二十八歲的五子鄧耀昇,經常帶在身邊,親自教導。一一年,鄧耀昇已獲父親打本,在旺角父親持有的物業,開設婚禮統籌公司「拉斐特」。他接受本刊訪問時,講明是要學習「腳踏實地做生意」。當年,行家「奇妙恩典」突然結業,未正式開業的拉斐特,免費為受影響的準新人籌辦婚禮,大收宣傳之效。現時,拉斐特會場內的駐場廚房,屬鴻星旗下。如今擁有自家酒樓,與婚禮統籌可產生協同效應,做到一條龍服務。鄧耀昇笑說﹕「雖然未必個個客都啱,但作為姊妹公司,一定有宣傳效應。」另一如意算盤就同老本行有關。近年仍活躍於物業市場﹑手持數以百億物業的波叔斷言,將來商場難以預留大樓面予酒樓使用,所以東海以後擴充及發展都會轉用鄧氏旗下物業,「二千呎以下嘅鋪,會做精品點心,大嘅鋪就以婚宴為主打。」波叔講起東海未來發展便雙眼發光﹕「劉鑾雄好益我哋,賣咗荃灣樂悠居商場俾我,樓上有三萬幾呎,地下有萬八呎,扶手梯可以落到門口,希望做到第一間婚宴場,仲有兩層停車場。我哋現在的策略,一定要有停車場作配套,方便客人。」講到兩個兒子,他即慈父上身﹕「新買嘅物業好多都會放手俾佢哋搞,佢兩兄弟同一個阿媽嘛,拍住上啱o架啦。」

鋪王 王鄧 鄧成 成波 碌卡 東海
PermaLink: https://articles.zkiz.com/?id=98546

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019