ZKIZ Archives


86歲容永道再娶前妻


2013-10-10  NM
 
 

 

羅兵咸永道會計師樓創辦人、已屆八十六歲高齡的容永道,突然宣佈已於上月二十八日再婚。最驚喜係,「新娘子」竟然係前妻鄺美玲。二人於八二年離婚,時隔三十年,重結連理,非常浪漫,認真恭喜、恭喜。

容永道係會計界殿堂級人物,一手創立嘅容永道會計師樓同羅兵咸合併後,成為會計界嘅Big 4。事業一帆風順,但家庭運就麻麻。七三年,佢同妻子鄺美玲感情生變而協議分居,但因為女兒容蘇山同容維安年紀太細,所以拖拉到八二年先正式離婚。之後,容永道冇再結婚,同兩個女嘅關係都好疏遠,咁多年以嚟公開嘅女伴,只得同樣係做會計師嘅藍思敏。兩人喺高爾夫球場認識,容永道曾經出錢幫藍思敏嘅妹妹喺外國攻讀牙醫課程。○二年,容永道患上前列腺癌,幸經電療後復元。當年,他接受本刊訪問時感嘆話,人生到咗某個年紀,有藍思敏呢個女伴可以互相尊重同關懷,得閒打嚇高爾夫球不知幾安慰。當時,佢喺玫瑰新邨三千呎嘅大宅,掛滿佢同藍思敏嘅合照。問到會不會結婚,佢就直指藍思敏未夠資格做佢老婆,皆因未夠成熟、衝動任性咁話,但做佢個女就可以,仲話佢將來會改姓「容」添,有得分身家喎。去年,容永道再接受本刊專訪,提到藍思敏呢位女伴已返回加拿大,原來他已與前妻「重修舊好」。雖有波折,但鄺美玲,由頭到尾,都係容永道嘅唯一妻子。

Give me a break 貓看護

工人、鐘點,甚至嬰兒看護就聽唔少,貓咪看護(Cat Sitter)你又聽過未?原來有啲單身中產人士為工作奔馳,又成日要離港出trip,擔心冷落屋企隻寶貝貓,於是使錢請Cat Sitter上門餵食陪玩。呢個工作喺外國相當流行,而且漸漸打入香港。任職多年Cat Sitter嘅林樂建(Max)表示,每次上門嘅服務,包括添置食糧、清理糞便、檢查身體、梳毛及陪玩,其間仲會幫隻貓影相,即時send俾主人。每次服務為時約一小時,扣除車費後,收費約二百元。如果有特殊服務,如餵藥或植入皮下水,就要另外收費。客戶多為廿五至三十五歲、未有兒女的中產人士或年輕夫婦。住喺馬鞍山嘅英國短毛貓主人Tony,從加拿大回流,做貿易公司,每個月都有兩個禮拜要出trip,家中貓咪就由Max照顧,他笑指:「每個月要使兩千幾蚊o架,冇計啦,驚佢(貓)自己一個喺屋企悶嘛,同埋又可以收到佢近照,我都安心啲。」Max表示,試過有客連續出國三個月,要求他每日上門照顧小貓,一個月就要五千蚊。錢銀事小,最大考慮反而係要交低屋企鎖匙俾Cat Sitter,大家講個信字o架咋。

馬雲做埋公關繼續抗爭

阿里巴巴上市風波未平。小宗繼上星期日喺灣仔萬麗酒店,同著住街坊裝戴Cap帽嘅馬雲相遇後,上週四佢又喺銅鑼灣公司寫字樓內現身。不過,小宗收到風,佢上週五已離港。據知,喺中半山地利根德里買咗間豪宅嘅馬雲,今次來係見嚇老朋友,都已當正自己係半個香港人。小宗聽聞,馬雲好唔滿意以前幫阿里巴巴做公關嘅鬼佬主管。舊年搞私有化,已被指「完鬆」,股民怨聲載道。今次搞上市,又被批評搞破壞兼大貪,唔理係公司或馬雲形象都大插水。所以五月已唔再做主席嘅馬雲,先要頂上做大公關,親自來港解畫撲火。仲嗱嗱臨換馬,撬咗瑞信前分析員張永恒( Wallace)去做投資關係部( IR)阿頭。對於「攻港」機會,有阿里內部人士同小宗講,成功率少過百分之五,但就算得百分一嘅機會,馬雲都唔會放棄咁話。小宗都好想睇吓,馬雲嚟緊點樣出招力挽狂瀾。

86 歲容 永道 再娶 前妻
PermaLink: https://articles.zkiz.com/?id=76736

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019