ZKIZ Archives


【馮仁昭四圍超】20年冇唱廣東歌譚耀文推戲再執咪

1 : GS(14)@2017-02-03 03:10:36

譚耀文係第7屆新秀歌唱大賽金獎得主,但已經有20年冇唱廣東歌,最近為4月演出嘅《風雲5D音樂劇》再唱廣東歌《慾望面前》,日前佢喺中環接受專訪坦言:「呢個真係慾望,自己鍾意嘅唱歌同做戲擺埋一齊,覺得好親切。」咁多年冇唱有冇擔心唱功?佢笑話:「冇喎,有少少輕敵㖭。」阿譚為咗呢部音樂劇,推咗一部電影同一部內地劇,佢話:「20年先唱一次,梗係值得。」



■早前譚耀文(右三)同成班演員一齊宣傳《風雲5D音樂劇》。

■譚耀文(中)係第7屆新秀歌唱大賽冠軍,銀獎係何國星,而鄭秀文就得銅獎。

■認為做咁多年賺到最珍貴係家人嘅譚耀文,一有空檔就陪老婆同囝囝。資料圖片


「有白手興家感覺」

十多年前轉戰內地拍劇,捱咗咁多年嘅阿譚表示:「呢行好得意,今年係咁,明年可能唔係咁,冇永遠肯定感覺畀你,尤其我呢啲自由身,冇大公司支持。咁多年我賺到最珍貴嘅係家人,有幸福家庭,有白手興家感覺,太太照顧屋企好偉大,令我好放心工作。」喺內地有冇受過引誘?阿譚坦言:「自己有穩定感情冇諗呢啲嘢,其實我係一個幾悶嘅人,唔會風花雪月,做好工作一定有回報。」問到有乜嘢實質回報?阿譚笑笑口話:「唔係好多,咪就係住緊嗰層樓,都有三、四個商廈舖位投資,做咗30年嘢有啲揸拿,?家樓價癲到太離譜,我冇買樓好耐,諗到啲人冇樓住好慘。」鍾意香港定內地嘅生活?佢話:「香港因為媽咪喺度,仲有好多責任,一定係香港,工作就全世界都得,不過呢排唔敢拍古裝怕甩頭髮,已經冇乜喇,再冇埋就大鑊。」撰文:馮仁昭




來源: http://hk.apple.nextmedia.com/entertainment/art/20170202/19914932
馮仁 仁昭 四圍 20 年冇 冇唱 廣東 歌譚 譚耀 耀文 文推 推戲 戲再 再執 執咪
PermaLink: https://articles.zkiz.com/?id=325145


ZKIZ Archives @ 2019