📖 ZKIZ Archives

官義岱 給力 拆拿 習近平談愛國

1 : GS(14)@2013-05-11 15:55:47

http://www.metrohk.com.hk/index.php?cmd=detail&id=210777&search=1
國家主席習近平喺3月19日接受外國傳媒訪問時表示，「中國人是講愛國主義的，同時也是具有國際視野和國際胸懷的。」佢咁嘅提法，十分耐人尋味。一方面，習總睇到大家對狹隘愛國主義嘅批評，但另一方面，佢又唔想一棍打死愛國主義。官義岱要同讀者介紹一吓嘅係，習近平對愛國主義嘅講法，同國際主流似乎有啲唔同。「愛國主義」一般係同「世界主義」對立，所以，主張最終要消滅國家，建立共產國際嘅馬克思，亦唔多贊成愛國主義。就連國父孫中山，都唔係好贊成亂用愛國主義。佢話過：「為何非『愛』國不可、非認同不可？」英國著名文人約翰遜亦曾講過：「愛國是惡棍最後的避難所。」佢嘅意思係話，所謂愛國主義，係政客操弄政治嘅工具。而且呢啲行為無助民主嘅發展，因為社會嘅精力都會虛耗於愛國嘅爭論之中。
PermaLink: https://articles.zkiz.com/?id=282819

官義岱 給力 拆拿 領導嘅艱苦歲月

1 : GS(14)@2013-05-20 13:42:54

http://www.metrohk.com.hk/index.php?cmd=detail&id=211308&search=1

舊年年底中共十八大產生咗中共新一屆中央領導，其中31.7%嘅中央委員、28%嘅中央政治局委員都做過「知識青年」，喺1960年代響應過毛澤東「上山下鄉」，7位政治局常委中，有4人都係「上山下鄉」嘅「知青」出身。無論係中共中央總書記習近平，定係剛出爐嘅國務院總理李克強，官方報導都著重提到佢哋喺農村「插隊」嘅基層歷練。點解呢啲「基層歷練」咁重要呢？因為呢啲經歷，反映佢哋係「有擔當」嘅人，冇逃避到捱苦嘅日子咁解喎。內地官場文化其實有種諗法，認為捱過苦嘅人可靠啲。講近啲，習近平上場後提倡要慳儉節約，又或者李克強話「公費吃喝」要減少，唔多唔少係受到「上山下鄉」嘅經驗影響。其實做得中央領導層，仲有一個不成文嘅條件，就係喺「文化大革命」時期唔可以做「造反派」，當年毛澤東為咗奪權，號召「造反派」搞到天下大亂，連國家主席劉少奇，副總理鄧小平都畀「造反派」鬥到七彩。已經落台嘅薄熙來，當年就係「造反派」，所以佢就算唔畀人拉，都未必上到位。









官義岱
PermaLink: https://articles.zkiz.com/?id=282899

官義岱 給力 拆拿 竊鉤者誅 竊國者侯

1 : GS(14)@2013-05-22 14:35:37

http://www.metrohk.com.hk/index.php?cmd=detail&id=211493&search=1

細看內地新聞，其實有唔少都好搞笑。最近有兩單新聞，表面睇冇乜關係，其實係同一件事。話說山西國營焦煤集團董事長白培中家中失竊，兩個賊仔，一個姓羅，一個姓李，分別被判死緩同無期徒刑。呢單嘢好似冇乜特別，但最離奇係，白董事長屋企竟然有現金數千萬畀兩個賊仔偷，佢份人工都冇咁多錢，肯定係偷公家啲錢先至有咁多；結果輿論譁然，山西省紀委喺壓力下也做嚇表面功夫應酬嚇大家，最終決定「給予白培中留黨察看一年處分」 。譁，賊仔偷幾千萬就判無期徒刑，但貪官貪咗幾千萬就判「留黨察看一年處分」 。呢個世界就係咁唔公平，大家覺得好笑之餘，其實都幾無奈！









官義岱
PermaLink: https://articles.zkiz.com/?id=282934

官義岱 給力 拆拿 樹倒猢猻散

1 : GS(14)@2013-06-25 01:17:08

http://www.metrohk.com.hk/index.php?cmd=detail&id=214049&search=1

喺大陸做官，跟啱個老細係最緊要嘅。跟得啱，你就一直官運亨通；跟錯咗，自然冇乜運行。好似最近，有位叫郭永祥嘅高官「因嚴重違紀」接受緊「組織調查」。郭永祥現任四川省文聯主席，好似冇乜嘢，但各位讀者有所不知：呢位郭先生，長期追隨前中央政治局常委周永康。佢曾跟住周永康出任中國石油天然氣總公司副總經理、黨組副書記同埋研究室副主任；喺周永康未高升做中央政治局常委，仲喺四川做緊省委書記時，郭永祥就係四川嘅省委秘書長、辦公廳主任。換句話講，佢就係周永康喺四川隻「頭馬」囉！郭永祥後嚟無端端做咗四川文聯主席，由石油界跳去「統領」四川文藝界，好多四川文化人都「媽媽聲」。佢呢次畀人查，唔多唔少都令人覺得周系都「冇乜運行」；總之，就係有啲「樹倒猢猻散」嘅feel囉！






官義岱
PermaLink: https://articles.zkiz.com/?id=283146

官義岱 給力 拆拿 鹹濕官員「好事齊來」

1 : GS(14)@2013-06-25 01:17:20

http://www.metrohk.com.hk/index.php?cmd=detail&id=213917&search=1

大陸啲鹹濕官員近日真係「好事齊來」！首先係原鐵道部長劉志軍受審，控方認定「性賄賂不入罪」，以後高官搞女人再利用職權搞「利益輸送」，全部冇法律控告嘅依據！呢單嘢未高興完，又有原重慶市北碚區區委書記雷政富真人示範乜嘢叫「金蟬脫殼」。雷政富話喎，佢同性愛視頻女主角趙紅霞係「戀愛關係」；佢咁講法，直情係將「性賄賂」呢味嘢「昇華」到另一層次。從此，佢哋全部都同啲後生女搞埋晒啲「戀愛關係」！出咗呢啲新聞，最高興嘅，梗係啱啱被揭同電視台女主播紀英男搞「戀愛關係」嘅國家檔案局政策法規司副司長范悅啦！雖則紀英男公布咗范悅當日嘅「求婚」片段，但呢條片只係證明咗佢「談戀愛」咋喎。如果官義岱係中紀委書記王岐山，依家肯定嬲到想殺人！






官義岱
PermaLink: https://articles.zkiz.com/?id=283147

官義岱 給力 拆拿 認真你便輸

1 : GS(14)@2013-07-11 01:14:32

http://www.metrohk.com.hk/index.php?cmd=detail&id=215072&search=1

中美兩國嘅網絡安全工作組周二首次開會，但大家唔好誤會，呢次開會唔單止冇提到呢期最紅嘅「斯諾登事件」（斯諾登爆響口，話美國都有用黑客攻擊中國），仲擱置咗黑客議程，大家轉談知識產權喎！其實件事好簡單啫，如果大家真係想停止黑客攻擊，咁咪坐低「四四六六」拆掂佢囉。依家大家避談呢個最關鍵嘅問題，說明美國根本只係想藉住所謂嘅「網絡安全對話」抽中國水，但美國自己如今「衰咗」，而中美兩國都冇諗過要停止黑客攻擊，所以咪索性唔傾囉！至於中國方面，原本可能諗住喺會上攞啲美國黑客證據出嚟反駁美國，點知如今斯諾登間接幫埋手，於是慳番！政治嘅嘢，其實都係得啖笑啫；認真？你便輸了！









官義岱
PermaLink: https://articles.zkiz.com/?id=283270

官義岱 給力 拆拿 風水輪流轉

1 : GS(14)@2013-07-17 01:11:58

http://www.metrohk.com.hk/index.php?cmd=detail&id=215471&search=1

官義岱尋日講過，習一哥大學同班同學陳希做咗「人事總管」，佢呢個「中共中央組織部常務副部長」嘅位，本來係胡錦濤嫡系女將沈躍躍坐開。依家「習系」陳希嚟到，「胡系」沈躍躍就夠鐘，要起身讓座。有咁啱得咁「橋」，沈躍躍係接替「江澤民系」嘅陳至立，做咗全國婦聯主席。呢一番人事調動，亦可以話係中國官場人事嘅縮影，即係「習接胡班，胡接江班」，長江後浪推前浪。講開又講，全國婦聯主席呢個位，係「副國級」，做咗呢個位，等於「步入咗黨和國家領導人」嘅行列，絕對係「升呢」。官場小道消息話，呢個位本來係內定由全國婦聯副主席宋秀岩排上嚟，但臨尾由於沈躍躍「後台硬」，最終跑贏咗個馬鼻喎！









官義岱
PermaLink: https://articles.zkiz.com/?id=283384

官義岱 給力 拆拿 高層拗手瓜

1 : GS(14)@2013-07-19 01:33:09

http://www.metrohk.com.hk/index.php?cmd=detail&id=215685&search=1

新華社旗下《經濟觀察報》首席記者王文志實名舉報華潤董事長宋林，話佢幾年前用高價買咗個山西嘅爛礦，嘥咗阿公幾十億咁話喎！呢單嘢認真爆：原來華潤方面一早收到風話有記者爆集團大鑊，而中宣部之前已經落咗「柯打」，話唔畀傳媒報道咁話，點知過咗幾日，王文志索性喺微博爆大鑊，因為中紀委書記王岐山之前話過，「微博所有料都要查！」王文志又話，仲有好多猛料未爆，佢仲猛咁落鞋油，話對王岐山好有信心咁話；事實上，中紀委已經證實「接獲舉報，正在追查」！呢單嘢背後，似乎真係有好多人喺度拗緊手瓜！




官義岱
PermaLink: https://articles.zkiz.com/?id=283530

官義岱 給力 拆拿 死咗冇人知

1 : GS(14)@2013-07-19 01:33:41

http://www.metrohk.com.hk/index.php?cmd=detail&id=215614&search=1

湖南商人曾成傑被控非法集資，近日突然注射死刑，連佢屋企人都唔知，法律界譁然。呢單嘢愈鬧愈大，有人懷疑曾成傑想「爆大鑊」，供其他人出嚟，所以有人要「拿拿臨」整死佢喎。其實呢類都係「陰謀論」，如果當局唔係做嘢咁亂籠，一定唔會有咁多人信。講開又講，大陸社會，你屋企人死咗唔知，原來一啲都唔奇。官義岱就諗起，連國家主席劉少奇都係畀人秘密火化，佢屋企人要3年後先知佢死咗。佢單嘢認真慘情：1969年11月12日，劉少奇喺開封逝世，次日凌晨畀人當做「烈性傳染病人」，進行秘密火化。有人冒充劉少奇個囝囝「劉源」填寫咗「火葬申請單」上記錄：死者姓名：劉衛黃；死亡原因：病死；死者職業：無業。1972年，劉源寫信畀黨中央， 先知父親去世！









官義岱
PermaLink: https://articles.zkiz.com/?id=283531

官義岱 給力 拆拿 「死囚開關」遊戲

1 : GS(14)@2013-07-23 00:44:52

http://www.metrohk.com.hk/index.php?cmd=detail&id=215852&search=1

最近有媒體話喎，美國仔斯諾登做「金手指」，篤爆美國政府監控網絡同利用黑客攻擊外國，但佢仍能保住條命仔，真係要歸功於佢嘅「死囚開關」(Deadman’s Switch)遊戲，即係話佢一旦遭遇不測，第三者將會立即公開數千份機密文件。所以美國政府都唔敢去到咁盡，唔敢做瓜斯諾登咁話喎。其實呢，呢招咁嘅嘢，喺中國都有得出賣啦！好似曾任山東臨沂市某個前高官咁，有網民話佢「罪惡纍纍、血案滿身」，但佢都冇事，點解？皆因佢有位太座喺加拿大。佢太太公開話：「誰敢動他（佢老公）一毫毛，我就公開所有省級官員的貪腐證據！」哈！呢啲就叫做「恐怖平衡」喇！






官義岱
PermaLink: https://articles.zkiz.com/?id=283572
Next Page
ZKIZ Archives @ 2019