ZKIZ Archives


拆建合署西座 左丁山


2011-1-1  AD




 

呢日冇約人食 飯,本想打電話到翠華叫外賣,但諗起中午外賣最低消費係一百蚊,兼且要一個小時起碼先至送得到嚟,不如出街食飯啦。去邊度好?諗起一味交會費,好少去幫襯 嘅FCC,於是一個人行上去,坐在保留畀會員專用嘅club table,一個午餐有周打魚湯、燒豬髀,加甜品朱古力摩士、o架啡或茶,盛惠九十八元,幾唔錯吖。在此一坐,立即見到熟人,律師L行埋嚟打招呼,佢話自 己經常在FCC吃飯,幾個月前攞番律師牌照之後,重操故業,至於將來打唔打廉署官司,佢話世事難料,一切聽上天安排啦,總之既來之、則安之。律師L歷盡艱 辛,從地獄走回人間,現在仍然似足一條硬漢子,唔怪得佢啲老友話佢EQ第一。

律師L拜拜之後,又見到老牌記者M與同事S,記者M專做官府、立法會新聞,起碼有二十年,每次用英文發問,啲高官見到佢就頭痛。既然每日在亞厘畢道,立法會走動,FCC最啱佢出入啦,佢兩位二話不說,就坐在左丁山旁邊,打開話匣子,講吓英超波經,一樂也。

好 快食完午飯,行出門口,諗吓冇理由咁快就行返寫字樓嘅啫,於是特登沿着下亞厘畢道行去,經政府總部轉花園道入聖約翰教堂,過終審法院,沿斜路落番雪廠街入 皇后大道中,呢條路又幾好行噃,夠清靜,有大樹遮蔭,有教堂之寧靜,過咗政府合署西座,先至回歸繁囂地段,醒覺人在中環。馬艦政府總部拚命趕工,政府山兩 年內一定騰空,政府計劃保留東翼、中座,將西座拆掉,供興建商廈之用。呢個計劃唔錯吖,既可保留政府山之精粹,又可增加中環寫字樓供應。政府合署西翼外形 普通過普通,似長形火柴盒,係戰後急就章建築物,拆掉不足惜。橫掂中環十分缺乏甲級寫字樓,租金不斷飛升,帶動啲乙級丙級商廈亦加租,令左丁山呢啲個體戶 中小企,苦不堪言。雪廠街係中環中心地段,合署西翼位於此,唔改建成甲級商廈,直情係嘥料。至於商廈地底是否要有停車場、商場,此乃技術問題啫,大家可以 再傾。


拆建 合署 西座 左丁 丁山
PermaLink: https://articles.zkiz.com/?id=20799

拆建西翼 左丁山

2011-11-19  AD

十一月十四日,林奮強到 FCC出席午餐會演講,宣揚「黃金五十」,呢個題目佢已經講咗兩個半月,對記者傳媒、對大學生講過好幾次,又透過中大 EMBA論壇上香港電台,更到屯門、荃灣、葵青、灣仔等地舉行 town hall meeting(在社區會堂進行),面對千幾兩千名街坊講述香港未來發展之道,得到相當正面嘅迴響。不少街坊,由十幾二十歲至七、八十歲嘅聽眾都贊同林奮 強嘅講法。既然如此,當日 FCC宴會廳竟然坐滿人,連露台都擺埋餐枱,的確令左丁山感到意外。
林奮強兩個月來到處大聲疾呼,要求政府盡快正視香 港發展機遇,多建甲級寫字樓以及商場,以免需求大大超越供應,逼到租金不斷上升,損害香港競爭力,大大不利青年人( 80後、 90後)嘅就業機會,政府要加快建設硬件,好似九○至九七嗰八年一樣,香港下一代先至能夠搭上發展列車。最令林奮強氣憤嘅,就係政府竟然保留中環街市,浪 費珍貴土地,兼且遲遲唔拆政府山西翼以興建甲級商廈商場。按林奮強估計,香港未來三四年,需要兩座新 ICC,先至可以應付不斷湧入香港嘅外資,大陸資寫字樓嘅需求。
中環街市不能動,已成定局,好彩林鄭月娥局長還算有 guts,抵住一啲壓力,在十一月十五日宣佈拆建政府西翼嘅計劃,稍為令人失望嘅,就係不建商場,相信置地公司與皇后大道中嘅地舖業主會好高興,在今時今日環境下,好難得隴望蜀,算吧啦。
中 環新商廈嚴重短缺,租金不斷上揚,趕走不少本地公司,新落成嘅陸海通大廈呎租叫價八十元,前龍子行呎租叫價六十元,仲話要揀客㖭,租務經紀話:「陸海通, 以金融公司為優先租戶,其他行業要等等,你地不如搬去觀塘啦!」聽見就唔爽,有組織話唔相信政府之言,拆建西翼不是主流民意真係攞嚟講,唔通聽佢地甚麼關 注組織就是主流民意?中環人要求有新寫字樓,就係市儈向錢看?呢啲人多受公民黨同路人影響,希望佢地唔好又搵人搞司法覆核!

拆建 建西 西翼 左丁 丁山
PermaLink: https://articles.zkiz.com/?id=29358


ZKIZ Archives @ 2019