ZKIZ Archives


狂揸「689」文富穩:係不倒翁


2013-11-21  NM
 
 

 

「689」,人人得而誅之,但竟然有人好鍾意。原來前新田鄉委會主席文富穩,有鋪「儲689」癮;講嘅,係車牌。文富穩手頭有八架「689」,根據運輸署記錄,佢由九五年開始儲,每個牌只係用幾千蚊買返嚟。原來早年有人同文富穩講,689呢三隻數字,反轉來睇,都仲係689,是為好意頭也!他向小宗解釋:「689有『不倒翁』嘅意思,係我嘅靚冧把嚟o架!」仔仔更為他找來一個有「689」數字的電話號碼。

文富穩係鄉議局主席劉皇發嘅馬仔,但早兩年參選鄉委會墮馬,區議會的當然議席不保,唯有「告老歸田」。滿頭白髮的他閒時只在屋外淋花,更會去農場掘蕃薯,而佢嘅愛駒保時捷,掛上有「富」諧音嘅「FU689」車牌,停泊在鄉議局停車場內。會唔會都想「F」「U」689?文富穩竟然力排眾議,話自己與投票給梁振英的選委心有靈犀,仲話:「我車牌689,CY得票又係689!我相信都係不倒翁!我撐689。」「不倒翁」之言若屬實,是為如雷轟頂嘅噩耗!小宗相信天有眼,無咁靈嘅!

行會才子超人

入得行會非才俊莫屬,起碼過去式是如此。故此行會中人,左右開弓,中英文都寫得者絕不為怪;但中英文撩得到定期見報者,絕無僅有。葉劉無疑有個報紙地盤,除咗議論特區大事,更教埋人英文。但係定工個個禮拜中英文見報之行會成員,睇怕只得陳智思一人而已。佢喺《南早》、《虎報》、《am730》同《經濟》都有專欄,睇勻全香港嘅寫字界,連陶才子都冇咁把炮,服未?陳議員係暹羅華僑、去花旗讀番書,佢寫得又托得英文,冇柏林之至。佢識講中文,亦唔奇;識睇,都有可能;但勁到個個禮拜寫報紙專欄,則肯定道行非淺也。環顧行會,一個禮拜寫四個中英文專欄,似乎只得佢呢個才子而已。除咗寫專欄,佢仲有家族生意、係公職王,再加埋參與行會決策,若非超人,點頂得順呀?更何況佢屋企連家務助理都冇,食完飯,洗碗不假手於人;寫嘢唔會用槍手啩?

壹計就明盈利不等於現金流

本欄找來有二十多年經驗的資深會計師林智遠及鄔碩晉,每期踢爆一間上市公司的會計陷阱,股民入市前睇清睇楚,一計就明。

近期玖龍紙業(2689)的股價走勢不錯,由5元半左右一直升至近7元。此股上市後,因營運規模龐大,一直備受市場注視。截至今年6月底的全年業績,營業額升5.8%至287.4億(人民幣,下同),稅後盈利升9.9%至15.6億,不過不失。最吸引是,全年派息由7仙升至10仙,增幅超過4成。玖紙在年報內透露:「現已邁入穩健及持續發展階段,近年產能擴充和合理佈局的優勢,將逐步顯現,而資本開支將可見明顯下調。」數據真的是這樣嗎?若留意玖紙的營運現金流,看法便會改變。其營運現金流是淨流出17億,與盈利背馳,是非常不理想的營運狀況。現金流流出主因是應收票據大幅攀升,由12億上升至35億。無疑玖紙以更改貿易條款來爭取更多業務,但同時這對營運現金流造成沉重壓力。錄得的盈利,不是正現金流,是很大的瑕疵,投資者不容忽視。另外,若翻看玖紙2010年度的業績,179億元的營業額,帶來21億的稅後盈利。3年後的今天,營業額多了超過100億,稅後盈利卻反而少了6億。從這大格局看,玖紙的產能優勢並不明顯。(鄔碩晉)

妻子女伴送別容永道

殿堂級會計師容永道,月初因病辭世,享年八十六歲,上週六在堅尼地道佑寧堂舉行追思會。容永道一手創立嘅會計師行,先後與羅兵咸、安達信合併,名為羅兵咸永道,名字凸顯容的重要地位。該行近年更躋身全球四大,但至為哄動的,是他逝世前兩個月,再娶已分開三十年的前妻鄺美玲,「重修舊好」。當日,容太乘坐先夫十號車牌、寓意十全十美的坐駕到場,神情哀傷,出入由親友攙扶。她致送的花牌寫上「You will always be in my memory」,悼念亡夫。至於留在容永道身邊數十年,不離不棄的女伴藍思敏,亦有現身。兩人分別出現,唔知有無打招呼。容永道曾言商場內無知心友,但不少商界猛人亦有到場,如愛徒方正、客仔馮國經、師弟周亦卿,因賽馬而認識的陳祖澤更上台致悼辭,而首富李嘉誠亦送上花牌,小宗祝願這名會計巨人一路好走。

689 文富 富穩 係不 不倒 倒翁
PermaLink: https://articles.zkiz.com/?id=82446

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019