廢木手作藝術 重新體驗生活
1 :
GS(14)@2016-07-05 02:41:192016-06-30 NM
究竟生活是甚麼一回事？擁有金錢名利、物質享受便是生活的全部？今年29歲的Wan Ho，本來在澳門賭場任職市場推廣部門，生活非常安穩，上司更給予晉升機會，不過因為工作非常困身，導致他迷失了方向，為了找回生活的意義，毅然辭去工作，伙拍同樣放棄本身工作的朋友，開辦了「土丘」這個地方，給自己以及前來的客人回歸自然，重新體會真正的生活。
以一座村屋、一個花園所組成的「土丘」，位於上水華山村，與梧桐河一河之隔，遠離了充斥水貨客的上水鬧市，每逢週末都會舉辦一天的木工或陶瓷藝術工作坊，參加者更可以享受由本地材料炮製的「粗食」，體驗自給自足的生活。Wan Ho說：「呢度除咗係一個生活體驗外，亦希望以藝術工作坊宣揚社區保育，感受一下重金錢唔係生活嘅全部。」前年，Wan Ho任職澳門賭場，主要負責賭場宣傳工作，因為工作時間長而重複，令到生活非常乏味，剛巧他認識了一位電影廣告平面設計老闆，大家一拍即合。Wan Ho：「我每日公式化返工返到悶，所以每日都會諗生活究竟係乜嘢一回事。而我朋友就仲得意，廿年前入行做電影廣告平面設計，負責本土電影由頭到尾嘅平面設計同攝影，即使公司業務唔錯，但佢話本土電影開始息微，合拍片成為主導，就算有生意，都覺得生活失去人生意義，加上佢生活都好混亂，又煙又酒，忙到一星期都返唔到屋企一次，直到身體、情緒開始頂唔順，先開始諗其實工作為咗錢之外，仲為咗啲乜呢？14年、佢結束公司，同我一齊尋找新嘅生活方向。」
由朋友教班開始
離職後，Wan Ho未有具體方向，後來跟朋友學耕種，再經朋友介紹下，14年租下「土丘」現址，但Wan Ho直言當時還未開始運作「土丘」，「當時只係想入去過吓寧靜生活同做吓藝術教育，不過自己乜都唔識，咪畀朋友喺度教吓陶瓷，之後經朋友介紹，認識埋教木工嘅導師同志同道合嘅伙伴，就成為而家呢個規模嘅『土丘』啦！」Wan Ho跟一眾「土丘」的導師伙伴，都祟尚自給自足的理念，所以木工及陶瓷藝工作坊的材料，都是來自附近一帶。Wan Ho表示，最初陶瓷班的泥土材料是來自附近泥坑，可惜後來發現取土有可能做成生態破壞，所以最近減少開班，現在則主打木工班，「我哋用嘅材料希望以最友善嘅方式得到，上年我哋發現咗附近有廢木場，用嚟棄置市區開發所砍落嚟嘅樹木，收集一定數量後就會送去堆田區，所以我哋利用人哋棄置嘅資源去活化。」
工作坊包3餐
上木凳班的學員，經導師指導，由切割到最尾上油，需要分兩次完成，Wan Ho說：「造木凳花最長時間，要燒又要上油，一日搞唔晒，但又唔想咁趕，所以會分兩星期進行，兩堂收費$1,400，如果整餐具只需1日，收費$800，包早餐、午餐及下午茶。」採訪當日的木凳班，便有8名學員參加，Wan Ho表示，3個月前在facebook開post，兩個星期已有十多人報名，「我哋冇話幾多人先成團，最少試過3、4位，最多18人都有，今次因為落雨延期先少咗人。參加客人都幾得意，有啲係崇尚文青生活、有啲嚟取保育經，亦有啲係被迫陪朋友嚟玩。不過無論想上workshop又好，被迫嚟都好，大家一到食嘢時間就好雀躍，令我考慮擴充食呢個部分搞吓餐廳。」
找平衡唔賺盡
現時「土丘」每星期只開一日工作坊，每月營業額平均為$30,000，除去大本營租金及雜費後，盈利只有約$20,000，再與導師分拆，雖然只要開多幾日工作坊、經營餐廳業務便可提升收入，但Wan Ho不想為賺盡，而破壞了「土丘」一帶的平衡。「我哋平時要落田，又要去砍柴，附近乜都冇，好多嘢都要自己一手一腳做，都好忙！嚟緊就算開餐廳，都唔會日日開，我哋反而想造多啲木工，用廢木造吓餐具、擺設賣街，有收入之餘，亦可以減輕浪費，再用錢去帶動一個生活嘅完整，即係去補償生活所造成嘅破壞。」
廢木變身靚凳速睇
當日負責導師是范師傅，他熱愛藝術，指導學員非常細心，究竟一塊廢木如何煉成一張靚凳？就由范師傅講解及示範。
粗菜食啲乜？
當日記者都有品嘗過「土丘」午飯，全素食菜色用上本地食材，米更用上台灣池上米，健康又好味！
開業成本
器材：$50,000裝修：$10,000租金：$22,000（2個月按金）
總投資：約$82,000
每月收支
營業額：約$37,000租金：$11,000雜費：$5,000
盈利：約$21,000（導師分拆）
facebook@土丘
撰文：黃德禹攝影：劉宇軒