ZKIZ Archives


寰宇太子女林芷瑩 單親後遺

2014-03-20  NM
 
 

 

身為上市公司寰宇國際太子女的林芷瑩,沒有過著富二代嬌生慣養的生活,大學時做過炸雞、咖啡店的兼職。畢業於加拿大UBC(卑詩大學),主修會計學的她,現職羅兵咸永道會計師事務所審計員,如打工仔般愛坐港鐵返工,穿的是數百元的服裝,她卻樂在其中。父母林小明和趙雪英,兩人的名字近年因為離婚官司和緋聞,鬧得不快而經常見報,作為女兒表面上不痛不癢沒有受影響,問她與爹哋的關係?她直言:「無聯絡。」但與媽咪的感情卻因父母離異變得更好,退一步想,算不算意外收穫?燒壞腦

今年廿四歲的林芷瑩(Phoebe),父母創立寰宇國際,但對電影這行業,她坦言沒想過接班,「睇戲我就有興趣。」以前試過在公司當暑期工,因為人人皆知她是太子女,沒什麼學懂,唯一走入剪片室學剪片。在加拿大讀書時,她在餐廳做兼職,不論炸雞定沖咖啡的工作,她唔介意由低做起,「我幾enjoy在starbucks打工,幾好生活體驗。」唔想靠父母,前年她大學畢業回港,正積極備戰考試,成為執業會計師,問她是否對數字特別有興趣,她說:「自己讀書都OK,細個時去到超級市場自然會睇價錢格價,又唔俾細佬買嘢,依家大個咗,對物質無乜要求,手袋、衫太貴好唔抵,著得幾多次。」節儉是美德,但唯一最貴的東西,是她現居的二萬呎獨立屋,「媽咪曾經想賣咗間屋,但我同細佬都唔想,最後都無賣到。」父母因為工作,兩姊弟交由姨媽照顧,自小她與細年半的弟弟林京蔚感情最要好,談起一家四口的生活點滴,Phoebe坦言印象唔多,「可能我發燒燒壞咗個腦,真係無乜印象,同表哥表妹一齊大,一齊學游水,大家感情好好。」言談間她想起細佬因為畏高,有次一家人去海洋公園玩越礦飛車的畫面,她說:「媽咪夾住細佬去玩,玩完之後細佬邊喊邊鬧『邊有咁嘅父母,嚇死我。』嗰時佢只係一個小學生。」其實一家人的開心畫面,仍有記憶。

曱甴與強媽

對父母的感情她坦言淡如水,直至○五年父母鬧離婚才有點分別,「對我來講唔算太大影響,反正平時跟daddy都唔close,都無乜幾何見,至於媽咪除了陪佢都無嘢可以做到。」父母要離婚甚至鬧上法庭,作為女兒她亦不想見到,尤其前幾年鬧得最不快時,她正要往加拿大升大學,「嗰時成日同細佬通電話,只能夠靠佢睇住媽咪。」有得有失,這段非常時期反而令三母子感情大躍進,而Phoebe副修心理學,是否想幫媽咪排難解憂?「我又未有咁叻,不過同媽咪傾多咗。」至於跟爸爸關係是否成了陌路人,甚至仇人,「初初無咁反感,之後太多官司,愈來愈反感。」現在呢?「無聯絡。」可惜嗎?「都唔可惜,最緊要媽咪開心。」說起媽咪,Phoebe形容她是一個比男人更強的女人,無論工作或在家,媽咪都能撐得住,甚至——捉曱甴,「我好怕曱甴,以前住康樂園時,有一次在泳池旁見到有成百隻曱甴,我驚到走番入去,媽咪就在外邊打,嗰刻覺得佢好似超人。」

憧憬結婚

父母的婚姻最後不歡而散,Phoebe坦言無陰影,「我之前得閒,在鄭明明學校修咗個wedding planner,我仲想幫人或者幫自己搞,(媽咪呢?)媽咪話佢唔會再婚。」Phoebe自言好開通,不介意媽咪找第二春,正與媽咪拍拖的王國耀醫生,跟她和弟弟相處融洽,難得是這位uncle跟她談得來,去年她見工成功後,等了一年才正式上班,在uncle鼓勵下她周遊列國旅行兼學嘢。訪問當日,Phoebe拍拖半年的男朋友Alex亦陪伴在側,見二人甜到漏,問他們可有計劃結婚?男的哈哈大笑,Phoebe就甜笑話:「結婚係好神聖,不過無咁快,我打算廿九歲先結婚,唔係讀咁多年書咪嘥咗?我想事業上有點成就先。」

 
寰宇 太子 女林 林芷 芷瑩 單親 後遺
PermaLink: https://articles.zkiz.com/?id=93714

似彭羚唱得 英皇東亞打主意 林海峰禁17歲索女林泳入行

1 : GS(14)@2017-02-12 15:40:21

2017-02-02 NM
屋企一屋女人的林海峰,老婆彭羚雖然已屆47歲,但保養得宜,依然見得人,五年前破例為Wyman作品展演出,好評如潮,惹來不少演唱會主辦商拍門,掟錢誘復出,但林狗一句唔俾!彭羚立即投降,棄船唔唱,繼續做煮飯婆日日湊女。眨吓眼,大女林泳已經17歲,生得又索又高。去年中,她跟媽咪去睇騷,即被英皇、東亞睇中,要簽林泳入行,但同彭羚下場一樣,都過唔到專制老豆嗰關,唔好發夢!搵林珊珊幫口

當年同王菲Sammi不相上下的彭羚,○○年誕下大女林泳後,便逐步封咪,全職相夫教女。轉眼林泳就滿17歲,已經高過媽咪,婷婷玉立兼有一張省鏡明星臉。

去年中,林海峰舉行「是但噏」,尾場妻女到齊捧場,見到當時剛將長髮剪到膊頭的林泳,唱片公司包括英皇同東亞都流晒口水,紛紛向林狗埋手,要簽林泳入行。

「女大十八變,林泳真係愈大愈靚,嗰次出嚟就即刻俾英皇同東亞啲人睇中,追住問阿Jan(林海峰)想唔想個女入行,但阿Jan一嚟已經落晒閘,當時都有人搵埋林珊珊想佢幫口,但珊珊知細佬性格,叫大家諗都唔使諗!」知情者說。

帶兩女會戰友

專制林狗禁入行,似媽咪唱得的林泳,繼續學校生活。早個月,全職湊女的彭羚就陪住兩個女林泳林清,同到數碼港公園玩。下午五時多,彭羚先放低兩個女去公園,自己再去泊車。當日彭羚約埋昔日唱片公司的戰友敍舊,友人還帶了兩隻poodle狗狗一齊到,林泳林清開心到癲,不停同狗狗追來追去。兩女初長成,彭羚望住兩個女,笑得十分滿足。細女林清大部分時間黐住媽咪,玩完一陣,就會返番彭羚身邊,甚至伏在媽咪大髀詐嬌。

得父母真傳

至於keep住及肩微曲髮的林泳,近一年再標高,十七歲已經高過媽咪大半個頭,牛仔褲衞衣打扮青春逼人,兩年前箍咗牙的她,輪廓清秀,雖然未至於索爆,但相當討人喜歡,難怪咁多行內人打佢主意。十七歲精力充沛,林泳追住狗狗氹氹轉,玩得勁開心,彭羚主動攞起手機,拍低女兒開心表情。林泳得父母真傳,唱歌好聽,讀書亦叻,是學校高材生。「阿Jan原本想個女繼續讀女拔,但Cass(彭羚)唔想個女讀書太大壓力,兩年前安排林泳轉咗去漢基讀國際學校,遲啲就會送個女去英國繼續讀書。不過林泳好鍾意唱歌,亦似足媽咪咁唱得!」玩了差不多一小時,彭羚起身執嘢準備離開;兩姊妹意猶未盡,一人拖一隻狗,繼續喪跑。至於同舊同事邊行邊傾的彭羚,雖然退隱多年,但同昔日幾位並肩作戰的唱片公司同事,一直保持聯絡,十分念舊。

似姊妹冇代溝

同友人say bye後,三母女攬住一齊行去攞車,其間經過麥記,兩個女先去買薯條,彭羚在外等,之後一同返回南灣寓所。「Cass好錫兩個女,每日都一定湊女返學放學,同大女更加好似姊妹咁,兩母女行街會拖住手,因為彭羚同兩個女一齊成長,所以佢哋冇代溝,林泳咁大個女,但有乜心事都會同媽咪講!」退居家庭十幾年的彭羚,一二年因為黃偉文,破例復出唱,即引來製作公司打主意,利誘復出開騷,甚至出到百五萬一場,但老公一句唔俾,彭羚即刻唔唱。老婆言聽計從,林海峰去年在演出中公開多謝彭羚,表示當年在TVB化妝間,第一眼見到她,就知道呢個就係嘞!又聲言有彭羚才有他,冧到老婆在台下喊爆。咪睇細細粒林海峰是但噏,骨子裡是大男人主義者,對妻女採取保護政策。老公話晒事,但結婚多年,兩公婆仲係好恩愛,不時撇低兩個女二人世界,早前,林狗同老婆去淺水灣拍拖食雪糕,發現鏡頭後,即由左邊企到右邊,試圖用身體遮擋鏡頭免素顏彭羚上鏡。有林海峰把關,落閘放狗,想打佢屋企啲女人主意,難!

搶手星二代

圈中不少星二代都遺傳父母優質基因,天生一副明星相,冇得輸。

譚曉風

譚詠麟與紅顏知己Wendy的獨生子譚曉風,高大靚仔,是牛津拔尖高材生外,更能文能武,一直有不少唱片公司向佢招手。

苗彤

二十五歲的苗彤(Pheobe),身材高『身兆』又愛曬得一身古銅膚色,盡得苗僑偉和戚美珍遺傳的她,不時於IG大晒噴血泳衣照,更多次傳被邀參選港姐,是最索星二代之一。

Nikkie & Chloe

梁家輝與江嘉年一對索爆孖女Nikkie(梁穎晨)和細孖Chloe(梁靜禧)樣靚身材正,非常吸睛,大受網民關注,孖女雖有意闖娛樂圈,但老豆梁家輝卻極力阻止。

撰文、攝影、攝錄:娛樂組
似彭 彭羚 羚唱 唱得 英皇 東亞 打主意 林海峰 林海 17 歲索 索女 女林 林泳 泳入 入行
PermaLink: https://articles.zkiz.com/?id=326599

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019