ZKIZ Archives


股市樓市多羊太 左丁山

2010-05-10  AD





 

昨日講及地產W 對現時之樓花銷售方式,甚有火氣,好贊成九招十二式與市建局八招地監局二十五條。本地賣樓方法獨特,有文化原因,香港人喜歡炒樓買樓,對買樓太過緊張嘞, 所以容易入局。啲聰明人士利用此點心理,推動賣樓氣氛,特區政府為咗保護「投資者」,限制吓賣樓花招,當然係好事,但你想唔做股市樓市嘅「羊生羊太」,自 己最緊要保持頭腦冷靜,唔好同人搶。冇錢買樓就唔會被人拉去睇樓,有錢買樓就使乜自己行入個局,被人擺佈呀?總唔信內地人可以將所有香港新樓掃清,令香港 人買唔到。

之所以講話唔好做「羊生羊太」,乃有感而發。某日中午聽香港電台報告新聞之後,有聽眾打電話問股票嘅環節,有一位師奶似乎驚惶失 措咁問股壇名嘴:「我以五十元買入X Y Z,今日跌到二十六蚊,發生乜事呀,幾時先至可以返家鄉?」名嘴答:「唔使驚,X Y Z除淨兼派紅股,一送一,你有開一手,o依家變咗兩手,隻股上午收市價二十六元,你有賺o忝。」買股只識冧巴,連一送一紅股除淨都唔知,竟然以為自己蝕到 喊,一啲師奶投資者的確令人啼笑皆非,唔怪得證監會要猛咁宣傳投資者教育,啲股壇名嘴每日在三個電台答問,表面上係指點迷津,其實亦係做緊投資者教育嘅工 作。

 

股市有羊師奶,樓市何嘗不然,地監局可以考慮吓,除咗放蛇調查新樓盤開售情況之外,是否可以仿效證監會設立投資者教育 一環,教吓啲樓市羊生羊太如何買樓,第一個要請來香港開講座嘅人會係自稱:「人民最想揍的第三人」任志強。呢位任生係內地北京華遠集團董事長,最近發表樓 產評論,大言不慚咁講:(一)中國人太有錢,房子太便宜;(二)公布開發商成本等於讓男人公布老婆的三圍數據;(三)買不起房為甚麼不回農村(即買唔起樓 就返鄉吓啦!);(四)房地產就該是暴利行業。呢位任先生講得咁白,來香港講地產投資,必定轟動,想買樓炒樓嘅香港人聽吓佢講或有當頭棒喝之用,有心人應 該快啲請任生來港演講,鄭汝樺局長制唔制呀?



股市 樓市 多羊 羊太 左丁 丁山
PermaLink: https://articles.zkiz.com/?id=15557


ZKIZ Archives @ 2019