18年前打波先嚟落雨四眼仔32歲Eric操爆肌做教練
1 :
GS(14)@2016-11-14 01:13:122016-11-10 NM
「打波先嚟落雨，唔通連個天都唔鍾意我？」這個社會福利署洗腦宣傳片播足十幾年，令人印象深刻！片中個四眼仔Eric（鄭仲軒），原來已經32歲，今年三月做埋人老公，同拍拖四年的女友結婚。當年瘦削四眼仔，如今是個任職健身教練的爆肌男，還會不時參加不同的健美先生選舉，堅大隻佬！播到今時今日
十八年前，Eric為政府拍了首個處男廣告，沒想過這條宣傳片可以播到今時今日。「拍嘅時候我十四歲。都幾尷尬，每年都會播，會考放榜前實播！當時係阿媽同我講，話有個人搵我拍廣告，嗰時僆仔冇錢，想搵零用，咁咪去囉。」三千多元的酬勞，亦是Eric至今唯一的廣告。
好勝心強
不過，當年瘦弱的四眼男，如今已變成令人難以想像的爆肌男。「由細到大都鍾意做運動，乜都玩！我唔係高大型，比較奀瘦，對做運動亦有好大障礙，所以想自己大隻啲。」瘦仔階段的Eric，體重只得百二磅。「我個人好勝心強，習慣咗做gym後，就keep住健身，而家體重都升到一百六十幾磅。（今年係咪結埋婚？）係呀！我同女友拍咗拖四年，今年三月二十四日結婚。」
澳洲學拳
未當健身教練前，Eric做過很多不同類型的工作，但冇一份做得長，三十歲前，他去了澳洲一轉working holiday。「喺嗰邊用咗年半學拳同做運動，返到香港真係想做同運動有關嘅工作，所以就入咗呢行。」據了解，公司VO2對Eric十分器重，還以他作為icon。「公司對我好好，不過屋企人、朋友同公司都認為我而家咁嘅身形啱啱好，唔使再谷大隻啲。九月我參加咗HK WFF PRO搞嘅健美先生選舉，拎咗個獎，下一個目標係十二月嘅Mr. Olympia。」Eric說。
撰文、攝影、攝錄：娛樂組