三級導演刪情慾戲 齊昕淆底
1 :
GS(14)@2015-02-16 17:47:592015-02-12 NM
懶理狼、蝦反對，決定要Be yourself、做自己的特首女梁齊昕，人類已經阻止唔到佢想入娛樂圈做明星的決心，因為稍後齊昕將會同專監製三級片如《四度誘惑》、《人頭豆腐湯》等的導演劉俊輝合作，接拍有大膽床戲的新片《男極探射燈》（暫名），進軍大銀幕。雖然齊昕拍心口話已取得父母同意，但電影公司驚有人唔高興，決定改劇本減肉搏場面，避免秋後算賬。但齊昕仍然淆底，週二（十日）臨時甩底新片記者會。夥拍李逸朗
梁齊昕承認與父母價值觀差異太大，激到兩老幾乎心臟病，但愈壓迫、愈反抗的齊昕，一心只想入娛樂圈做明星，689老豆根本阻止唔到。由於身份特殊，齊昕今次袋六位數字酬勞，接拍愛情喜劇《男極探射燈》，電影中她飾演愛心社工，男主角是憑「哭腔傻女」人氣反彈的李逸朗，其他合作演員還有陳惠敏、曹查理、樓南光、黃光亮、苑瓊丹和林子善等，而演慣社團人物的陳惠敏，將飾演齊昕父親。可是她臨時缺席記招，拍唔拍得成仍是未知之數。
怕有手尾跟
對於片中有大膽情慾戲，齊昕並不抗拒，但電影公司愈諗愈淆底，為免日後有麻煩，決定刪減所有情慾場口。「齊昕鬼妹性格，覺得拍床戲冇所謂。不過電影公司驚有人唔開心，就算齊昕敢演，佢都唔敢拍！其實同齊昕傾合作佢係好爽快，但呢幾日佢同特首夫人去外地玩，未試好晒造型，搞到電影公司好緊張，加上佢以前試過『被失蹤』，呢幾日又close晒所有社交網站賬戶，就算佢話得到父母同意，電影公司都驚最後拍唔成。」知情人說。
李逸朗：一齊唱哭腔
在片中有幸飾演齊昕男友的李逸朗，原來一直不知女主角是誰。「電影公司話俾個驚喜我。（而家驚喜嗎？）好驚喜，好特別。（聽講刪好多肉搏戲喎！）唔知，劇本未出晒！（驚唔驚特首嬲？）我聽導演安排，其他控制唔到。」至於到時會否同齊昕合唱哭腔，李逸朗說：「到時感情到，係唔會避開唔唱。（合唱主題曲？）我都好想，如果你都想，我可以反映！」將與齊昕有不少對手戲的樓南光則說：「諗唔到齊昕真係拍戲，到時都會照顧佢。（部戲有肉搏場面係咪三級？）冇講過係三級片，不過睇卡士有曹查理，哈哈哈，起碼係二級半，齊昕天生食呢行飯，性格反叛，思想又創新，都幾另類，不過套戲三、四月先開。」而飾演齊昕父親的陳惠敏亦坦言非常期待：「佢都靚女，都有睇頭。」
變靚D
齊昕話過唔介意整容入行，事實上，她的確愈變愈靚，由扁鼻、pizza面，變成間尺鼻、瓜子面。