我Q你答問會：人人問克勤 係咪怪獸家長？
1 :
GS(14)@2015-06-15 00:52:31■克勤被祖兒問到跟老婆盧淑儀的第一次接吻，超尷尬口啞啞。攝影：仇志德場地：尚品薈
每個男人都有一個特殊癖好，本報在銅鑼灣街頭找來12位讀者，希望發掘人夫李克勤的秘密，有讀者一語道破克勤對「儀」字情有獨鍾；大家又對克勤的私生活特別有興趣，問題圍繞「喺屋企有冇做家務？」、「係咪怪獸家長？」，連自認懷春少女的容祖兒都插嘴問：「同盧淑儀第一次接吻地方喺邊？」看看克勤如何見招拆招！採訪：皓騫、魏嘉琳
容祖兒
1.容祖兒：我都係懷春少女，好想知李克勤同盧淑儀第一次接吻地方喺邊？
克勤：錫過咁多次，點記得呀，哈哈哈！
2.余小朋友：你會唔會打小朋友？你係咪怪獸家長呀？
克勤：我會打手板、屁股囉，我覺得有時需要畀小朋友知道，乜嘢係嚴重懲罰，當然我打完佢之後痛過佢；家長真係唔鍾意做怪獸，只係教育制度係怪獸，邊個父母唔想喺屋企蹺埋手，小朋友冇咁多功課，唔使帶你去咁多課外活動，唔使煩呢樣嗰樣，我有一個小朋友喺國際學校讀書，功課唔係咁繁忙，暫時唔係怪獸。
余小朋友
■克勤唔想做怪獸家長，但覺得必要時仍要使用打手板等懲罰。
林小姐
3.林小姐：點解近年唔拍戲嘅？
克勤：冇時間囉，要湊仔囉，冇遇啱好嘅劇本囉，唱歌事務太繁忙囉。
黃小姐
4.黃小姐：你平時喺屋企會唔會做家務？
克勤：家務呢啲嘢，梗唔係男人做啦，男人負責嘅家務係出去搵錢，跟住請個人返嚟做。
5.黎小姐：你同譚詠麟、祖兒開演唱會，感覺有乜唔同？
克勤：一個男人一個女人，一個食得多一個食得少，哈哈哈，自己諗到都好笑，但唔敢講，今次盡量希望接納多啲新idea，同祖兒思想上好似open啲，話時話我同校長嗰個大隻佬已經好open去到底線，而家睇到都有啲驚！
黎小姐
■09年左麟右李的爆肌造型，已經是克勤的底線。
何先生
6.何先生：你係咪特別鍾意「儀」字，老婆叫盧淑儀，拍檔叫容祖兒？
克勤：咦！係喎，點解呢？關淑怡、葉劉淑儀都有個「儀」字，係咪八字問題呢？所以話每個男人梗有啲癖好，我諗呢個係。
老先生
7.老先生：收過最鍾意嘅禮物係乜？邊個送？
克勤：而家梗係細路仔畫嘅卡，父親節、生日嗰啲小勞作，我諗十幾廿年後睇返冇得頂，雖然啲字又串錯，大細草睇唔清楚，但係一件好sweet sweet嘅嘢。
黃小姐
8.黃小姐：有冇逼囝囝聽你啲歌？佢鍾意邊首㗎？
克勤：梗係有啦，但佢鍾意One Direction多啲，覺得嗰啲歌有深度，我啲歌對佢嚟講深得滯唔明，不過都識唱晒大部份我啲歌，最近佢有新歡，鍾意校長寫嗰隻，話淺白容易接受易入口，有品味！
林先生
9.林先生：同祖兒開演唱會，個騷應該叫乜嘢名呢？
克勤：實不相瞞，我哋度咗3,762個名，中英乜文都有，實在太多人唔同意見，所以暫定為「容祖兒李克勤演唱會」。
10.曾小姐：邊首歌人哋唱到，你聽到覺得好尷尬？
克勤：《舊歡如夢》囉，每次演唱會冇擺落去，啲人就喺台下嗌上嚟，我覺得有啲尷尬，唱唔係好介意，跳呢……通常都會叫歌迷上嚟玩溝淡吓，但今次同祖兒開騷，發現有個人比我更尷尬，有機會問吓佢啦。
曾小姐
■《舊歡如夢》騎呢舞步街知巷聞，克勤耍手擰頭不敢重溫。
明哥
11.明哥：藝人之中邊個最好波呢？
克勤：大家一定會答譚詠麟，因為佢係明星足球隊精神領袖，每場波都入幾球，總之最好波係譚詠麟啦，係，我覺得大家都係要咁答嘅。
劉小姐
12.劉小姐：《紅日》除咗你，覺得邊個唱得最好聽？
克勤：聽過一個由西藏嚟嘅歌迷，用唔鹹唔淡廣東話唱，佢嘅誠意令我覺得好好聽，唔識廣東話嘅人將《紅日》唱晒出嚟，係我聽過最好聽版本。
謝先生
13.謝先生：Hacken呢個英文名點嚟㗎？如果唔叫Hacken，你想叫乜呢？
克勤：我諗係老竇改，我估佢覺得市面上好一般，所以構思一個，拼番英文出嚟。如果唔叫克勤，真係唔知叫乜。
來源:
http://hk.apple.nextmedia.com/entertainment/art/20150614/19183478