ZKIZ Archives


名筆可傳世 左丁山


2011-6-26  AD




 

一班前輩嘅飯局,每兩星期舉行一次,最近一次在鏞記四樓舉行,L世伯上到去,經理連聲歡迎,原來經理已在鏞記打工四十幾年,四十年前已經為熟客L世伯服務,當然啦,L世伯曾為法資銀行首席華人代表,誰人不給面子三分。

人 齊嘞,賓架G拿出六月十二日星期日之蘋果日報副刊俾我地睇,仲以為佢講左丁山o忝,誰知不然,賓架G施施然話:「大才子董橋講古董文物,呢日講到我地老友 地產C以一百萬元買一枝筆,唔該睇吓!」得一份報紙,點睇呢?於是請侍應影印六份分嚟睇,但縮成A4紙,字體太細,好難睇得清楚,於是請在座嘅地產C講古 仔,地產C係大收藏家,私藏一批珍品曾透過「敏求精舍」借俾藝術館展出,行內人一致讚嘆。地產C話佢在荷李活道東風閣偶遇董社長,談起古玩就一見如故。某 年佢在日本東京日本橋一帶逛街,專睇古董,在某一老店見到一枝南宋漆器造嘅毛筆,收藏保存得極好,配上日本人特別為毛筆製造嘅木盒,非常鍾意,於是一口價 (一百萬港元)買下。貴唔貴啲呀?地產C話:「而今一隻古琴都拍賣至一億元,相比起嚟,一枝筆一百萬元,平咗o忝,可能已增值不少。」

地產C作風低調,走在街上無人識,最合佢意,普通人那知道他是隱形富豪?若非董先生品題,佢點會講佢枝筆?世伯L要求佢以高清攝影之,然後精美印刷,製成明信片,送俾我欣賞吓,眾人連聲叫好,希望不日收貨!

賓 架N遙想當年,往廣州參加春交會、秋交會,外國人羣相爭購玉石,佢因忙於工作及睇住啲下屬做嘢,根本冇時間周圍去睇玉石文物,o依家見到文物古玩咁值錢, 不禁嘆一聲:「走寶!」內地富豪識貨也好,附庸風雅也好,一窩蜂咁搶高晒古董字畫嘅價錢,蔚為奇觀。呢個現象在「做又三十六,唔做又三十六」嘅財富分佈極 平均年代(即係均貧),發夢都想唔到。打倒馬列史毛主義,中國人就有好日子過,真係要多謝鄧小平堅持改革開放,開門走資!

 


名筆 傳世 左丁 丁山
PermaLink: https://articles.zkiz.com/?id=25880


ZKIZ Archives @ 2019