ZKIZ Archives


勿當奴 左丁山


2011-6-9  AD




 

最近寫新加坡, 引來讀者來郵,讀者Clare話:「左丁山今天的專欄寫金沙賭場,有兩個錯誤:一、新加坡公民及永久居民入賭場,要交一百坡元,不是一百五十坡元。二、金 沙的空中花園!(連泳池)是俾遊客上去的,遊人俾十坡元即可上去觀光,仲可以行去泳池睇人游水,只是不可落水而已。」

多謝Clare指正, 左丁山之前所言,乃根據導遊所講,抱歉未有查證。讀者G就話,新加坡馬會於Ritz Carlton宴會當晚,佢亦有在場,可惜未曾碰頭。嗰晚宴會,新加坡馬會安排嘅節目有鋼管舞(雞尾酒時間)及吊絲帶舞,雖然舞蹈藝員不敢以肉感衣着示 人,但已令現場氣氛高漲。香港人客捉住馬會主席施文信問:「今年香港國際賽夜宴,會唔會有咁嘅表演?」施文信話:「咁多人監管住,提都唔好提!」仲以為香 港比新加坡開放o忝,原來我地有好多心魔未除,香港啲道德重整派勢力幾大o架!

讀者D話佢在新加坡工作過,得到嘅印象就係只有香港人羨慕新 加坡,其實當地金融界人士都唔知幾鍾意香港。梗係啦,新加坡監管當局好似隻貓,當金融界係老鼠吖嘛!當地銀行家被有關官員在電話大罵者,大有人在,香港金 管局就斯文好多,除非在特殊事件上─回歸之前,有外資銀行阿頭講及聯繫匯率應否廢除,就立即被召往港督府,差啲就要被餵食無情雞。

今日特區 政府就冇晒威風咯,處於捱打狀態,譬如僭建,你估係今日先至有?呢日左丁山出席一個畢業禮,學校對面係四五層高嘅政府人員合作社住屋,已有幾十年樓齡,除 咗一層有原來露台外,其他全部已經封晒,是否僭建,有排查。以前強勢港英點解唔嚴打僭建,今日弱勢特區政府就要篤爆黃蜂竇?實在難以理解。曾特首在麥當勞 道64號嘅物業要拆僭建,唔通呢幢大廈其他人唔駛拆?若然如此,屋宇署對當奴先生好唔公道,如果所有疑似僭建一齊拆,由山頂開始,夠晒熱鬧咯。當奴曾先生 不知有意還是無意,在麥當勞道64號置業,於是網民幽佢一默:勿當奴,悼六四!相信佢幾難笑得出!


勿當 當奴 左丁 丁山
PermaLink: https://articles.zkiz.com/?id=25608


ZKIZ Archives @ 2019