ZKIZ Archives


黎姿老公掃California Fitness夜冷貨

2017-02-12  BN

卓珈控股(8358)上週搶晒鏡,焦點都落在由藝人進身為上市公司主席兼CEO的黎姿身上,其實她背後的男人——老公馬廷強默默支持,卓珈七成半的股份由兩公婆齊齊持有之餘,卓珈上市後可能仲有後着。

馬廷強行動不便,有空都喜歡到健身中心做吓拉筋;近日搵埋商界友好向加州健身(California Fitness)的臨時清盤人,購入加州健身嘅資產,包括健身器材,意味去年七月執笠嘅California有機會復活,前老闆P.K.王就話:「我都有聽聞,但細節就唔清楚。」其實所謂有形資產如健身器材折舊唔少,而且加州健身收過千幾宗投訴,個「朵」都麻麻哋,商譽呢個無形資產更難叫價,所以馬廷強都唔係花好多錢,當執「夜冷貨」咁啫,不過執靚佢再唧入上市公司可能又變銀紙喎,所以話兩公婆,一人計短,二人計長。

林鄭兄弟手足情深

林鄭宣布參選特首,特別提到最喜歡做社會福利署署長一職,因為可以體驗關愛共融思想,奶媽味道甚濃,其實林鄭的阿哥同細佬也學得林鄭咁,危難之時有一份守望相助嘅精神。話說○五年,林鄭兄長鄭宏光破產,那時林鄭父母鄭阿毛和林鳳蘭持有的鰂魚涌南豐新邨單位在九九年已賣掉,呢位林兄落難之時,就報住林鄭細佬鄭孝光持有的南豐新邨另一個單位,足見兄弟之間手足情深!

中環寸嘴潮廳自廢武功

祖籍潮州嘅岳少呢幾年又搞China Tang、Kowloon Tang,喺皇九入面以前間食廣東菜Island Tang(港島廳),舊年底裝修小執過,變身做Chiu Tang(潮廳),唔知係潮人嘅潮,定潮州菜嘅廳,即管踩吓場。入到呢間潮廳,原來嘅酒吧位變咗滷水檔,仲吊咗隻大肥鵝喺度,入潮州菜館踩場一定係整碗潮州翅啷啷口,咁就知佢有幾高級,吖,原來呢度碗翅貴上環「尚興」幾廿蚊咋,啲翅針又粗啲,計埋地點裝修,咁都算抵食喎。潮廳個老總叫我唔好寫,話老細怕食翅啲環保人士唔鍾意,唔敢promote,唓,呢啲叫做一時唔偷雞做保長;潮州菜最出名就係凍蟹同埋招牌翅,呢啲正式係又痕又怕痛,顧住做唔夠數交唔到業績上唔到市呀!計我話,咩食家都假,偷食就最滋味嘅!不過呢間潮廳都係自廢武功,本來賺錢風水酒吧位變咗滷水檔,做高級食肆唔promote酒死梗,賣一支酒頂十碗八碗翅啦!嗰日寒寒哋,開番支「滴滴金」d'Yquem配吓點心,驅吓寒氣,令我憶起廿幾三十年前,初初返香港識羅兆輝,我不嬲都係英國style,雪茄送Port Wine,羅兆輝教路叫靚女點着支蘸過白蘭地嘅雪茄,咁就賜「滴滴金」俾啲女飲,唔知岳少識唔識呢?

楊國佳工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

御用建築師分級數

西九故宮有「御用建築師」嚴迅奇,香港發展商亦有,揀建築師通常講夾唔夾,例如長實地產近年多用凌顯文建築師,皆因其妻吳佳慶是長實地產董事,亦是李澤鉅的大學同窗;而新地御用建築師為呂元祥建築師樓,話晒係郭炳江親家,不過講到大孖沙興建自家嘅地標,其「御用建築師」級數又唔同,通常起用洋人建築師樓,與設計大型屋苑講求用盡地積比率有別!如長江中心起用Leo A Daly和Cesar Pelli,國金二期亦找Cesar Pelli及嚴迅奇,胡應湘最親力親為,合和中心正是出自其手筆!

黎姿 老公 California Fitness 冷貨
PermaLink: https://articles.zkiz.com/?id=235063


ZKIZ Archives @ 2019