富事通：黨即是擋
1 :
GS(14)@2012-08-17 10:33:29http://www.sharpdaily.hk/article ... 3%E6%98%AF%E6%93%8B
民Ｘ聯主席譚某人：
我寫呢封公開信，唔係因為你唔贊成我哋提出改革「強迫金」董事局嘅方案。
事實上，好多參選人回覆話唔贊成，我哋都尊重佢哋。自由社會，你有權支持任何立場，亦有權反對任何立場。
但係，可以出來參選，對強迫金立場，左閃右避，成何體統？唔好話我唔畀你哋有選擇。份問卷有一個選擇，畀你話「暫時未能承諾」，更加畀機會你去解釋點解，咁樣都唔表態，民Ｘ聯當廣大打工仔死㗎？
諷刺係，民Ｘ聯有候選人，抱著貓貓狗狗，就話要為動物權益發聲。發聲？吠呀？打工仔個個月被剝削，你哋就當睇唔到？既然為咗選票，你哋班政治演員扮狗吠都應該心甘情願，點解唔可以為選民表態呀？
我又唔係話要廢除強迫金！只係要迫金局董事局要代表打工仔啫，民Ｘ聯又唔支持，又唔反對，就連唔表態都唔敢講，算乜嘢意思呀？
如果強迫金要繼續存在，點解唔需要加強問責呢？唔通又等政府委任你哋班活死人入去，任由官商勾搭繼續落去呀？今日要你哋表態都咁難，憑乜嘢要我信你去監管迫金局？
我一定要同選民講清楚，香港有個與打工仔為敵嘅政黨呀！我唔信有鐵票，就可以當選民係死嘅！
李兆富
富事通：蘋果與臉書
1 :
GS(14)@2012-08-20 11:25:58http://www.sharpdaily.hk/article ... 7%E8%87%89%E6%9B%B8
蘋果同臉書（fb），呢兩間公司嘅產品，我日日都有用；甚至應該話，冇咗蘋果，我仍然有好多替代品，雖然點都會差少少，之不過，如果冇咗臉書，真係暫時完全搵唔到替代品。
蘋果市值，上星期已經升穿咗6000億美金，而臉書嘅股價就跌破咗20美元，累積輸咗IPO價一半有多。
蘋果呢個品牌，你會見到一街都係佢嘅產品，真係抵佢係世界上最有價值嘅公司。
不過，上週五去數碼通（315）4G簡介會，大家講到傳說中嘅iPhone 5，共識就係，新機出得太慢。我亦覺得，過去幾個月三星個勢咁強，原因係蘋果不進則退。
據說，iPhone 5乃係喬布斯生前兩大概念之一，即係話，蘋果下半年，食粥食飯，睇呢一鋪。
fb捉到鹿唔識脫角
蘋果另一驚天大計劃，就係TV。蘋果前前總裁Sculley之前睇死，蘋果一定打唔入呢個市場，因為微軟同Sony都試過失敗。不過，千祈唔好忘記，蘋果當年搞iPod同iTunes，都有人話唱片公司一定唔會就範，結果一地都係眼鏡碎。
事實上，蘋果對付版權持有人，係有一套功夫。如果Apple TV有突破，蘋果就一次過控制所有人、幾乎所有眼球嘅注意力，贏盡全世界。
講到眼球，其實臉書呢個平台，都搶咗好多眼球。但諗唔到點搵錢，可惜、可惜。
李兆富
富事通：電訊收租概念股
1 :
GS(14)@2012-08-21 15:05:07呢條友叫人自殺
http://www.sharpdaily.hk/article ... 2%E5%BF%B5%E8%82%A1
上星期五，數碼通（315）為將會推出嘅4G服務，搞咗一次小型簡介會。不過，簡介會入面大家無所不談，反而關於4G嘅事，唔係講得最多。
「我覺得你哋做電訊，好似收租，攞咗個頻率之後，就可以一直收錢。」我話。「點同呀！使用量就不斷增加，我哋都要投入資源，但係月費又不斷下跌。今次推出4G，我哋都冇加價啦！如果你用地產做比喻，最緊要嘅係Location。大氣電波，亦唔係條條都一樣，有啲頻道，係比起其他嘅更好用。」數碼通管理層，一直都好堅持呢個講法。
「不過，話說回頭，我又用地產做比喻，你哋由3G上4G，雖然話要投入新資本，不過就好似突然間增加地積比率，都有著數喎！如果收租地產公司，可以咁樣增加地積比率，仲唔發到好似豬頭咁？」我問。「你鋪話法吖！咁用戶嘅要求越來越多，我哋又冇得加價。技術進步，最終都係益咗消費者。我哋，真係得個做字。」數碼通管理層講嘅，亦係事實。
「投資者最關心，都係你哋條數啫。我仲好記得DL話，銀行大把錢。你哋會點用先？會唔會將對手成間買起呢？你哋有個對手，頻道定位都幾靚喎。」我問。
「我哋派息幾好吖！」數碼通管理層呢個答案，明曬。電訊收租概念，幾好吖！
李兆富
富事通：蘋果想賺到盡
1 :
GS(14)@2012-08-22 16:48:13http://www.sharpdaily.hk/article ... A%E5%88%B0%E7%9B%A1
Google同蘋果，都係資訊科技界龍頭。兩間公司，亦難免有爭端。例如，即將推出iOS 6，蘋果將會放棄用Google地圖，改用自家出品。
蘋果自家製地圖，好多人都睇死。無他，Google地圖，用咗大量時間心機做內容，時至今日，材料多到已經成為一個有效嘅進入市場門檻。換言之，其他公司要追得上Google，就要先落重本從後趕上。當年Google搞地圖，可能都冇諗過，原來Location Search（地區搜尋）係科技界重要戰場。
最近，Google收購咗旅遊書公司Frommer's，加埋之前買落嘅餐廳評級機構Zagat，理論上，搜尋結果可以好深入，尤其地區搜尋。Google最大優勢，就係知道人搜尋乜野。o依家Google由幫人搵答案，去到編制內容。雖然有改變，但本質上都係吸引眼球，做廣告。搞搞嚇，竟然有啲似第一代科網潮嘅概念。
可能因為呢個原因，蘋果決定封殺Google地圖。不過，可以咩？Google做個地圖App，即時破解封殺。蘋果嘅手段，令人諗起好多年前微軟同自家瀏覽器，真係太陽之下無新事。
另外，iOS 6新推出嘅Passbook，幫消費者記住所有條碼登機證、優惠券同積分卡。
一睇就知，蘋果唸唸不忘一直無乜起色嘅iAd。有心賺盡，抵佢股價咁硬。
李兆富
富事通：殼市是怎樣煉成的？
1 :
GS(14)@2012-08-23 12:44:20開始唔知他講乜
http://www.sharpdaily.hk/article ... 9%E6%88%90%E7%9A%84
「新上市，如果公司盤數有問題，保薦人要坐監！」證監會最新諮詢，提出要新股上市保薦人，負上刑事責任。「應該啦！如果唔係，做乜嘢保薦人呀？你估錢易賺㗎？」多數股民，直覺都會咁諗。
坦白講，近來唔少新公司上市，首季即刻現形。證監要做嘢，我明。不過，條件反射式嘅監管，真係非常填鴨式教育標準答案。做嘢同做到嘢，始終有分別。如果散戶以為證監真心為市民，我會話：「好天真，好傻。」
大投行做保薦人，幾乎唔收費。無他。大行保薦人，真正賺錢係放數或坐盤。做保薦人都係為咗多啲嘢賣。至於中、小型行，雖然久不久都會有一單半單保薦人，當然，佢哋客人嘅規模，自然唔會大到去邊。所以，證監呢一招，即時效果就係將中、小型行趕盡殺絕。
「大行做曬，對小投資者，冇乜所謂啫！」可能，你都會咁諗。不過，香港對上市公司監管，其實你話嚴又得，唔嚴又得。大投行同埋國企，乜嘢豁免都有，但係真正有資金需要嘅公司，就冇得上市。係咪冇得玩？又唔係。上市冇得做，咪買殼囉。過去幾年，殼價不斷上升，原因係乜，大家心照。客觀結果，就係更加多已經上咗市嘅公司，不務正業，風險雖然大但有潛質嘅公司，小投資者又冇機，咁樣又係唔係好事呢？
李兆富
富事通：風月版之謎
1 :
GS(14)@2012-08-24 11:10:21http://www.sharpdaily.hk/article ... 8%E4%B9%8B%E8%AC%8E
任何媒體，最最最重要嘅成功要素，就係影響消費決定。當一份報紙上晝話一檔雲吞麵好食，中午就有人排隊；話邊隻面膜好用，幾個鐘頭內就斷市，呢份報紙嘅廣告部，根本唔需要去跑數，啲廣告稿都自動會湧埋來。
風月版完成歷史任務，好多人都叫我估嚇點解。「自己睇沙膽老總篇手記好過啦！」我話。不過，作為《壹傳媒》舊生會會員，我都覺得，呢個決定，其實都幾正確。畢竟，成人娛樂服務，係一經驗產品（Experience Good），要好到肉咁講服務有幾好，報紙始終有限制，就算傳奇如肥龍、骨精強，都及唔上網評論咁入骨。與其到喉唔到肺，不如唔做好過。
「不過，好多叔叔伯伯唔識上網喎。」有人又話。
傻啦。成人娛樂客戶群年輕化，呢個現象大家冇理由唔知。網絡作家向西村上春樹包膠名著《東莞的森林》，連電影都就快上映。成人娛樂消費資訊，報紙真係冇得鬥。
以前，報紙定位，大小通吃冇問題，反正份份都係賣$6。不過，免費報令報紙銷量下跌，傳統報紙，唯一出路就係走高檔高消費。
《蘋果日報》，其實一路以來都係中環中產報，只要把握到香港呢群人嘅脈搏，走呢條路，絕對冇問題。至於《爽報》，定位梗係MK（旺角）啦！
李兆富
富事通：三星蠢人扮叻
1 :
GS(14)@2012-08-27 12:00:34http://www.sharpdaily.hk/article ... A%E6%89%AE%E5%8F%BB
三星對蘋果呢場專利權官司，陪審員裁定，蘋果七項專利有效，三星六項侵權，三星要向蘋果賠十億美元，暫時係史上最大宗專利侵權賠償。
至於三星指蘋果五項侵權，全部輸曬，蘋果一毫子都唔使賠。估計，三星會上訴到底。
喬布斯生前，引述過畢加索名言：Good Artists Copy, Great Ones Steal（高手識得抄，神級就會偷）。好多人都話，蘋果好多概念，其實都唔係原創，今次人家抄蘋果，又走去告人，冇原則又唔道德。
抄又好，偷又好，重點係有冇將概念層次昇華。藝術家就算擺明車馬抄同偷，都應該畀人見到當中心思。點睇都好，三星唔係藝術家，除咗抄，真係心思欠奉。所以無論最終結果點判，三星肯定係輸家。客觀事實話畀大家知，蘋果唔出招，三星就無以為繼。
掉番轉頭講，有時候，原創者有概念，但未必識得將概念變成家傳戶曉嘅現象；又或者，原創者執行力不足，人家可以靠多快好省打贏場仗。輸，係技不如人。偏偏蘋果，又有執行力，連影響市場觀念嘅能力都強過人，三星去偷蘋果，係蠢人扮叻。
唔好忘記，三星電子最大客戶，就係蘋果。話說回頭，蘋果心目中嘅對手係Google。三星，由頭到尾都只不過係配角、磨心。
李兆富
富事通：直選港姐之死機真相
1 :
GS(14)@2012-08-28 14:35:31http://www.sharpdaily.hk/article ... F%E7%9C%9F%E7%9B%B8
對星期日晚負責直選港姐嗰位仁兄，我深表同情。我諗，我屬於少數。
有人話：「死機，梗係因為TVB用微軟嘅Windows Azure啦﹗」對唔住，呢個唔係理由。任何工具，用得唔妥當，都會炒粉。直選港姐呢類嘢，響雲端嘅世界，屬濕濕碎。如果真係因為微軟舊雲嘅基建不足，所以處理唔到呢次直選港姐，一係電視廣播（511）好勁，一係微軟有嚴重危機。常識推斷，問題應該出在程式，並非微軟嘅基建。
又有程式人話：「用得微軟，梗低手。做足測試，點會出事。」當然，無人想整套嘢出來炒粉畀人睇。不過，各位程式人，自己有冇炒過粉？肯定有。炒粉前，又有無做足測試？肯定有。測試，好多時變咗例行公事；明知唔會炒粉，就不斷試，會炒粉嘅位，噢，之前無諗過。
以我多年經驗，今次直選港姐嘅炒粉事件，起因應該係有高層話：「今次要高度重視，一定要肯定選舉唔可以畀人操控，每個人只可以投一票。」之後，程式人用盡心機時間，淨係諗點樣防止畀人屈機，但係基本嘢，就統統拋諸腦後；投票程式，越搞越似一棵聖誕樹，個個都忘記咗，原意係要做支火箭上太空。結果發射當日，升空嘅，就係一棵自行解體嘅聖誕樹。
李兆富
2 :
肥B(18468)@2012-08-28 21:10:38即係佢都覺得係自LOOP LOOP死左啦...
3 :
GS(14)@2012-08-28 23:42:25我想知壇主意見
富事通：思歪明益發展商
1 :
GS(14)@2012-08-31 10:53:25http://www.sharpdaily.hk/article ... C%E5%B1%95%E5%95%86
噚日，朝早有消息話思歪特首會推出港人港地，搞到地產股全線冇運行。
原來，港人港地講嚇就算，真正重點都係前朝留落嘅置安心同居屋貨尾。有朋友話，思歪搵野來搞，都係想開學前分散下大家嘅注意力，唔好畀份份報紙都係學生絕食。咁又係，學生絕食呢個題目，向來都係新中國政治大忌。
講返思歪所謂嘅樓市措施。有人話，連房委會攞180個單位出來咁大把，都要講一餐，一睇就知技窮。不過，我就留意到兩樣嘢：
一，房委會工廈轉住宅，以思歪夠膽死嘅脾性，應該話：「我聽到市民訴求，所以決定拆鬼曬房委會工廈，變成50層高嘅公屋。邊個反對，就係高樓價幫兇！」但係，思歪竟然話，考慮到地區人士想保留H型歷史回憶，所以保留工廈原結構及外貌。咁怕事嘅思維，睇來係公務員手筆。似乎，思歪終於學識同個制度妥協。
二，加快審批預售樓花，發展商真係拍爛手掌。我一早都話咗，思歪嘅階級敵人，並唔係地產；佢成世人都係靠地產開飯，下意識點都會做啲嘢去幫發展商。可以加快預售，貨如輪轉，我係發展商嘅話，見到外圍咁差，都會想快啲套現。呢個思歪特首，認真唔話得。
至於港人港地，慢慢研究啦，到時都不知人間幾何。
李兆富
富事通：伯南克都想QE？
1 :
GS(14)@2012-09-03 10:03:55http://www.sharpdaily.hk/article/fin/20120903/129506
「一定有QE3。」自從伯南克喺Jackson Hole央行年會講咗幾句，越來越多投機者，主觀願望想今年係2010年翻版，一次QE，就夠炒起任何資產價格。
究竟伯南克講過乜？
「必要時會出手。」好多人攞住呢句，就覺得伯南克暗示將會出手。不過，反過來諗，佢點都唔會話：「我打死都唔會再QE。」畢竟，未來嘅事，實在冇必要講到咁死。既然係自己主場，伯南克點都要為自己講嘢；而我聽到最重要嘅訊息就係：「一直以來，聯儲局嘅非常政策，都做得正確。」不過，又話分兩頭，如果伯南克唔係覺得外邊有人唔認同聯儲局嘅所作所為，佢又有冇必要為自己嘅決定辯護呢？
再諗深一層，既然伯南克都心知肚明聯儲局非常行動具爭議性，要再進一步見到QE3，就點都要有個共識。
過去幾個月，聯儲局公開市場委員會成員，經常試水溫，睇公眾究竟會唔會接受用「增長唔夠快」呢個理由，去容許更多非常行動。可惜，我主觀覺得，反應實在一般。
相反，如果有真正危機，聯儲局做乜都冇人會反對。事實上，再早幾個月，聯儲局都有試過講，密切注意歐洲情況。點知，歐洲死死嚇又好似死唔去。如是者，聯儲局一路都搵唔到個充分理由再玩鋪勁。
李兆富
Next Page