點起廣東歌：敬那些唱過的廣東歌明哥拒絕忘本
1 :
GS(14)@2016-03-14 01:44:02香港的母語是廣東話，每個香港歌手都唱過廣東歌，現在卻要努力為廣東歌掙扎求存！唱了30年歌的黃耀明，希望大家擺個心出來做好歌曲，7、80年代未有內地市場，那時都夠養活自己，明哥疑惑是否現代人變得貪心？賺100元嫌少，要賺1,000元才夠飽！他為唱過的歌驕傲：「我覺得廣東歌唔會失禮大家！」撰文：余燕儀黃耀明，這名字由以前代表達明一派、香港歌手，到現在象徵着撐香港、撐學運、撐民主，關心社會的明哥更關心香港樂壇關心廣東歌，他日前接受本報記者專訪說：「無論廣東歌市場比國語係細幾多，我覺得都要繼續唱，音樂能唔能夠打動人心唔在於語言，在於你做得有幾好，我有信心其實唱廣東話係可以好好。我唱咗30年歌，大部份都係廣東歌，我為做過嘅嘢幾驕傲，我覺得廣東歌唔會失禮大家，我會繼續做，唔代表我唔會唱其他語言，好似國語、英文都係唱，但我唔會放棄廣東話囉。」
■明哥下個月的演唱會，將有大量麗的和亞視經典金曲。
改變屈就自己最悲
越來越多歌手北望賺人仔，間接忽略了香港市場，令廣東歌樂壇變得悲哀，明哥卻說：「其實本來唔悲哀，去大市場賺錢其實好開心，悲哀係我哋要改變自己、屈就自己，令自己唔可以表達想講嘅嘢！我唔覺得去賺人仔嘅同時，係要忘記香港市場，喺文明社會去其他市場做係好正常事，不過而家形勢扭曲，要妥協好多改變好多迎合另一個市場，我唔想話好悲哀，做流行音樂好多時要就市場調整，但係你只可以就咁多（舉起拇指及食指），唔可以就咁多（張開雙手），如果乜都要改變晒，嗰個唔係我嚟，我可以調整，但唔可以完全冇咗自己。」
攞個心去做好音樂
明哥認為要撐起廣東歌，就要擺個心出來做：「唔可以話市場細，就唔擺心做好音樂，7、80年代其實都冇大陸市場，我哋都係咁用心做好香港市場，嗰時收入都夠養活自己，係咪我哋變得太貪心呢？即係賺100蚊唔夠，要賺夠1,000蚊先夠飽呢？其實嗰時賺100蚊都可以食到飯，嗰時都係靠香港市場，不如諗番我哋嗰時係點做音樂。」問明哥還有聽廣東歌嗎？他說：「我聽㗎，當然自己係一個偏心嘅人，因為我係聽西方流行音樂大，仍然覺得喺西方流行音樂得到最多樂趣同養份，但我都支持中文歌支持廣東歌，未必每一張都聽，但而家有串流服務，你會聽得更多。」問到近兩年最鍾意的廣東歌？明哥有點尷尬，笑說：「諗吓先，死！呢兩年都係關心社會嘅事，比較少關心音樂，突然諗起林海峰同容祖兒首歌幾好呀，唔記得咗叫乜名（編按：《黃昏點唱機》）；仲有RubberBand有啲歌幾好，我舊年搞咗個組織文藝復興，資助咗幾個女仔出唱片，其中一個盧敏啲歌好好聽，佢有首歌《初夏》好好，當然喺雨傘運動時，《撐起雨傘》一定記得呢首歌，因為佢記錄咗香港重要時刻。」
■容祖兒和林海峰的《黃昏點唱機》，獲明哥讚賞。
■明哥關心時事少聽音樂，但仍對RubberBand給予肯定。資料圖片
■獨立女歌手盧敏（中）的《初夏》，明哥認為是必聽之作。資料圖片
堅決反對推普滅粵
廣東歌要撐，廣東話更加要撐，明哥堅決反對推普滅粵：「我當然覺得絕對不能接受，呢個係消滅文化嘅手段，如果一個國家嘅官方語言係普通話唔緊要，但我哋呢個地方九成人口都係講廣東話，點解你夾硬要改變呢？我覺得香港一定唔可以改變，咁樣係會自己毀滅自己文化，而粵語係一個好長久嘅文化，一個有智慧嘅政府，應該要包容民族嘅多元性，而唔係毀滅少數民族同文化，我覺得呢個係冇智慧嘅政府。」化妝：Hubei Har髮型：Ivan Lee of Headquarters服裝：Sacai、Boss
來源:
http://hk.apple.nextmedia.com/entertainment/art/20160313/19527280
那些年我當主播的日子 林燕玲
1 :
GS(14)@2016-08-03 02:12:142016-07-27 EW
每朝起牀，開電視看《香港早晨》，或許已成為不少打工仔的例行習慣，女主播亦自然成為節目的一大賣點。
一代新聞之花、前無綫主播林燕玲（Ruby），其綽號「小飛俠」被嗌到路人皆知，就算事過十多年，她依然擺脫不了主播形象。「 家仲有好多人覺得我係主播，係（新聞）小花， 家老花就有我份，哈哈！」
要脫下主播光環，惟有破釜沉舟。離開新聞界後，她做過財經節目主持，又從事過金融界，現則為麗新集團傳訊事務副總裁，力求轉型成功。「無論去到邊，我總會聽到好多批評，啲人會覺得一個前主播會識得啲咩吖，但我唔介意，人哋叫得我去做，就代表我有能力勝任。佢哋都信我，我又有咩好怕？」
經過那些年，林燕玲才有現時的視野和胸襟，身份大概已不成問題了吧！
愛上女主播
比起十多年前於電視上正經八百報道新聞，眼前的林燕玲多了一份親切感，惟獨一頭清爽短髮，始終沒變。「我啱啱入無綫嗰時有試過留長頭髮㗎，但真係唔好睇，千祈唔好睇番我長頭髮個樣！」
畢業於香港科技大學生物化學系的她，初出茅廬時乜都敢試，一畢業即到港龍航空面試做空姐，不夠一年，又轉到生物科技公司做商業發展工作，其後更踩過界，應徵做記者，結果一擊即中。
「嗰時我（做科技公司）個直屬上司好錫我，但佢要離職，我又唔想跟其他人，所以就同佢一齊離開。當時（〇三年沙士）好難搵工，我寄咗好幾份CV（求職信）出去，得TVB有回覆，因為當時銀河衛視（無綫收費電視前身）準備開台，要請好多人， 咁啱我個人好有正義感，鍾意儆惡懲奸，想做正義嘅化身；但我又怕死細膽，唔敢去做警察，覺得做記者可以為人民出聲， 所以就去試吓，算係無心插柳！」
受訓後，林燕玲被調到無綫翡翠台，與當時同期出道的趙海珠及羅若安等人，齊齊擔正做主播，出道不久，更被捧為新聞小花，破例報黃金時段的《六點半新聞報道》。
「做《六點半新聞報道》，比做《香港早晨》或《晚間新聞》係仲大嘅榮譽！當時我係一個新人，可以報黃金時段，簡直係夢寐以求嘅事。我一直覺得係最勁嘅前輩先有得做， 發夢都估唔到自己都有份，但好可惜我報咗兩日就無做咯！ 因為嗰時已經有第二份工（now財經台）搵我過去，雖然佢哋有挽留，但我都堅持辭職！」
唔止得個樣
同樣都要上電視，不過轉工後再也不是報新聞，而是講財經，還要作現場直播，對於毫無財經知識經驗的她來說，這個跳板未免跳得太遠。
「我由細到大都好怕醜，連講嘢都會面紅嗰隻，唔好話要我做主持講財經，我連股票都未買過，只係 妹一名。呢個挑戰真係好大，但人哋既然畀得機會我，我梗係捉住，佢哋都信我咯，我有咩好怕？」
網上不時會看到有女主播講錯說話，或偷食餅乾的蝦碌片段，林燕玲笑言自己有睇過，不過自己卻是「零蝦碌」。
「我個人好嚴謹， 去到主播枱係唔會帶手機同食嘢，加上嗰時我咁細個就去到咁高級嘅位（首席主播），做事要更加小心，唔想畀人話，所以好大壓力。」林燕玲甚至會上論壇看網友對她的評價，「我成日走去睇Forum（論壇），見到有好多網民都質疑我，話我得個樣，又唔係新聞或傳理出身，無料到！」
不過最難受的，莫過於是節目監製的當面批評。「當時唯一對我唔好嘅就係監製，佢好惡，直情會即時撳我耳仔（耳機）鬧我，咁我啱啱入去，真係咩都唔識，佢就會話點解我咩都唔識都可以坐到呢個位，累到其他人做嘢，聽到我都唔好意思，好唔開心，自己匿埋一邊喊。但隔咗好多年後，畀我輾轉知道佢有喺其他人面前讚我做嘢OK，呢個算係我做嘢最大嘅回報！」
近年新聞小花是非多多，先有黃紫盈被張文采恰，含淚報新聞的事件；後有林小珍與周嘉儀傳不和，講到是非，林燕玲就顯得略為避忌，「我怕啲人覺得我抽水！」她僅以個人經驗打圓場：「其實間間公司都係咁，人多自然是非多，實有呢啲嘢發生。我嘅處理方法係盡量少說話，如無必要唔好講太多私人嘢，可能啲人會覺得我好cool，不過咁未嘗唔係一個方法。」
私生活檢點
三年主播經驗，加上六年財經主持生涯，林燕玲認為已到達職涯樽頸位，於是把心一橫，決定轉行，一一年被渣打銀行挖角，擔任認股證銷售副董事，「金融業視野比新聞業廣闊好多，亦都高薪好多！」
以為做金融業夠吃香，會長做長有，怎料好景不常，去年她就第一次嘗到被炒魷滋味。
「 嚿年年頭有消息話會炒人（結束衍生工具部）時，我仲定過抬油出嚟（同傳媒）講，我哋嗰team唔會有事，因為我嗰team喺窩輪業界排行Top 3， 點知到十月第二波炒人時就出事。雖然我事前都已經估到啲，但都接受唔到，唔想發生嘅嘢發生咗， 好odd（驚奇）， 我完全無搵定後路，亦都好難再搵番同行嚟做，只可以見步行步！」
有實力又點會愁無後路？去年十二月，她便加入麗新集團當傳訊部副總裁，經常於公開場合亮相，間中更會上娛樂版，成為傳媒追訪對象。
「以前做記者已經會被人追訪，我好抗拒、好唔慣， 第一次被人追訪，我直頭喊咗出嚟，唔明點解狗仔隊要去跟一個記者，我又唔係明星，所以公司都會特別提醒我哋，私生活同個人形象要檢點啲。
「到我出嚟做金融，有次有個記者無啦啦走嚟問我羅生係咪我上司？ 我公司有三個羅生，其中一個的確係我上司，我無諗咁多，就答係，之後就見到有新聞話我同上司（羅志輝）傳緋聞，仲偷影埋我哋返工同食飯啲借位相，我同上司都得啖笑，可能已經習慣咗。反而 家我成日出嚟（event），啲記者對我無興趣添！」
不過當我正想追問她感情生活狀況時，警覺性高的她即時落閘：「感情事我唔答喇！」依然夠謹慎！
鄭紹康（Francis） 著名公關公司「天機」ＣＥＯ，每年主理超過二百個中港項目，有「天下第一關」之稱。在公身兼專欄作家、經理人；在私為不少名人、名二代閨密。藉本刊專欄「紹看風雲」，揭開名二代、名三代不為人知的一面。
文字處理 蔡安儀 攝影 何國豪 設計 林文俊
【2016回顧】那些年的潮流雜誌回憶《YES!》《壹本便利》你睇過邊本？
1 :
GS(14)@2016-12-31 01:10:19潮流雜誌《東TOUCH》實體書即將停刊，往後只做網上內容。
潮流雜誌《東TOUCH》今個星期出實體書最後一冊，之後就會停刊，只做網上內容。近年實體潮流雜誌逐漸消失，我們就問過兩位潮人， DJ Donald及少爺占，分享他們的潮流雜誌回憶。少爺占曾創立自家設計時裝品牌，一直有留意潮流的他表示，基本上本地所有潮流雜誌都有看過，而每期都會買的則是《東TOUCH》及《Milk》，「依家都仲會睇潮流雜誌，由其是去旅行，在日本經過書屋都一定會入去睇」。Donald指自己細細個開始已經睇唔少《YES!》等潮流雜誌，長大後求知慾旺盛，《壹本便利》、《東TOUCH》、《Amoeba》、《Magpaper》等等都會看，「嗰陣數過，一星期至少會買三本去睇，好似未睇過就唔知世界發生咩事咁」，「因為有太多潮流雜誌，所以嗰陣香港個個都係潮流戰士」。
Donald提到的《Magpaper》，又叫《新誌向》，是90年代由新報副刊獨立出來的雜誌，深受歡迎。當日創刊號封面，是由林海鋒拿著當時日本最新最潮的黑膠播放車仔機，十分前衛。不過雜誌在99年已經停刊，現在甚少人提及。另一本經典潮流雜誌《Amoeba》，是由《號外》雜誌出身、被稱為香港時裝教母的黎堅惠主理。潮人黃偉文曾說過，在黎堅惠離開後，「香港時裝媒體式微，至今沒有復甦過。」黎堅惠的《Amoeba》，藝術味濃、有格調，在90年代確實影響了不少年輕人，不過很可惜在02年已經停刊。曾經香港的潮流雜誌風靡一時，但現在網上世界漸漸取代，只要有電話在手，甚麼資訊都可找到看到。那些年曾出現過的《Me!》、《YES!》、《Fashion& Beauty》、《CosmoGIRL!》、《AMY》等等，你還會不會記得？記者：李珮禎
《Magpaper》，左上角為創刊號。（網上圖片）
經典潮流雜誌《Amoeba》。（網上圖片）
潮人黃偉文（左）曾說過，在黎堅惠離開後，「香港時裝媒體式微，至今沒有復甦過。」（資料圖片）
《Me!》，2016年5月停刊。（資料圖片）
《YES!》，2014年8月停刊。（資料圖片）
《Fashion and Beauty》，2015年7月停刊。（資料圖片）
《CosmoGIRL!》，2014年8月停刊。（資料圖片）
來源:
http://hk.apple.nextmedia.com/su ... t/20161230/19881029