| ||||||
| 在 《金融心理學：驅動股市的真正力量》（The Psychology of Finance）一書中，作者拉斯．特維德（Lars Tvede）以一則智慧格言為起點，帶出「知己知彼」的重要。在投資市場，研究人類行為及市場心理變化，許多時較考量股票本身所擁有之基本因素更關鍵，起 碼對股價短期波動的力量，提供了不少線索。正如我們研究大孖沙行為背後的動機，例如在路人皆見不停增持的背後，是否真心想大家前仆後繼爭相同坐一條船，當 你上船的時候，這條船又真的肯開行，然後在你未預知的渡頭稍事休息，你隨時上落無任歡迎。只是，你並不知道這條船原來停過幾站之後，船長原來又想再由起點 從頭再載客登船，一廂情願的你只見到有頭有面嗰一位一直在船上，卻沒有留意原本坐在船上者已陸續上了岸。終於你上前一看，你所認識的他，原來只是其中一個 投影，而諗番轉頭，事實上他未曾親自邀請過你登上這條船時，有否懷疑自己是否真的想得太多了？ 大孖沙增持僅短期刺激 近期市場 上真的屢屢出現二仔底死跟指標，但選擇死跟之前，應先判別自己個底有無人家咁厚，就好似07年、08年跟四叔及近期彤叔的例子，還有我們看到的是路人皆見 的一面，全部披露在人前的景象究竟又是不是全部呢？究竟跟四叔買現貨者，有否考慮到對方有否同時以期指做對冲，就算無做對冲，輸光成個組合的後果都可能只 係唔開心一陣，而二仔底就一個唔覺意有咩差池可能慘到要瞓街。而跟彤叔作指標者，人家增持的背後是想引你還是真的想益你，你到底搞清楚未？因此唔好當有名 有姓有頭有面嘅就一定會係你嘅福星，人家增持減持係事實，肯定對股價產生短期刺激，惟長期走勢還得視乎公司造化與市況，少一樣都唔掂。就好似早前有公司又 改名轉型，但係根據同一間公司以往嘅紀錄，路人皆見佢未成功過，寫完文章到結尾都只係擺明希望佢今次得啦，竟然被視為一種推介，究竟是求冧巴若渴已到了飢 不擇食的地步，抑或是先入為主誤解原文本意？無人會認自己蠢，尤其係香港人，日後再在本文找到任何冧巴千祈千祈唔好跟，費事煩。胡孟青 | ||||||
| ||||||
| 三 色台轉播MJ追思會，其間畫面中斷，抵俾人投訴，但係有自命係MJ粉絲嘅物體，竟然只係睇見人家眼裏的刺，卻看不見自己眼裏的牙籤。在網上侮辱他人，好似 唔使負責任，因為好難將呢類人繩之於法，但係亦唔可以濫用自由。三色中文台深夜直播MJ追思會，邀請資深音樂人商台DJ黃志淙做嘉賓，佢講番好多關於MJ 嘅點滴。黃志淙係香港少數見證整個80年代樂壇嘅重量級音樂文化人，對西方音樂極之熟悉，曾經係唱片公司高層，唔識佢就真係唔好話畀人知你識音樂，仲要扮 係MJ粉絲。有觀眾認佢唔出，就上網留言質疑無綫找來「一位毫無知名度的主持人」主持節目，明顯係自暴其短。呢件事反映好多人睇得「知名度」好重，但知名 度點可以同有冇料混為一談？反而三色台派出嚟傍住黃志淙嘅前落選港姐及另一位娛樂新聞台主播，就真係唔知邊位嘞，口口聲聲話好鍾意MJ嘅音樂，但MJ最紅 嘅時候，怕且佢哋仲係BB，完全跟黃志淙答唔到嘴，嘥晒個節目嘅原意都算，仲要笑笑口，與氣氛格格不入，對MJ有欠尊重，簡直可悲！ 只睇表面難識好貨 低 調唔等於冇料，唔識嘢亂咁吠妄自尊大專搞對抗刻意刁難，先至係膚淺無知兼愚昧，呢種文化已由議會蔓延至社會。既然咁唔妥三色台點解唔轉台，反正同一晚七台 聯播，唔睇電視，仲有收音機，梁兆輝、李志剛兩位名DJ亦各自同時主持電台節目，在大氣中參與追思。假如仍然係要做百彈齋主，冇人會阻止你，只係胡亂話人 唔專業，原來自己先至係既無知又有眼不識泰山嗰一件，就貽笑大方。呢個世界就係因為咁多人只懂睇表面，以為表面好人內裏亦係君子，以為表面好股內裏亦如 一，其實冇料到，有料嘅反而就冇人識貨，唔係股海裏面點解仲會有咁多滄海遺珠呢？好似中核國際（2302）呢隻股，好早已經寫緊，不過唔郁就冇人理啫，翻 咗一番先至有人關心，正宗後知後覺！股市係鱷魚潭，超過八成係人為，兩成才是上市企業本身造化。唔少金玉其外敗絮其中嘅細價股及莊家，借消息扮內幕一傳十 十傳百，市場參與者少啲定力或多點貪念都會中招，唔講邊隻，返屋企望下床下底同埋股票行個倉底有幾多已經變咗牆紙嘅股票，就一清二楚。胡孟青 | ||||||
| ||||||
| 近 期大大小小公司排隊上市，有啲棚尾拉箱嘅味道，加上每天輪住有內房股及二三線股大開抽水機，此情此景，唔需要等到資金流走嘅數據曝光，都應該先行鳴金收 兵！呢幾日連熱炒嘅細價股都跌到一仆一碌，就更加要步步為營，小股民要學識保護自己，睇唔通就索性沽之哉。近年成功蛻變之變色龍股份，比例上10隻之中都 有1隻，通常隻隻吹晒上去，小股民好難睇得清楚邊隻係人邊隻係鬼，因此好鍾意搵盲公竹。早前有隻新時代（166），散仔以為跟彤叔冇甩碌，點知雖然見佢現 兜兜幾百萬幾百萬股咁買，之不過後面原大股東就幾千萬幾千萬股咁走。懂得捉股民心理，係上市公司股價醜女大翻身嘅基本條件之一。改咗名唔夠兩年、前身金豐 21嘅中國金融租賃（2312），近期又再大換班兼有大動作。首次認識此股係因為龔耀輝之前入過去做CEO。此君出過書教人識別上市公司易容術，肯出任高 職，好易畀投資者一個印象，就係佢替呢間公司做咗盡職審查，只可惜呢位CEO只係做咗唔夠一年，對呢間公司嘅質地好難有咩啟示性。 狂發CB任意攤薄 不 過諗深一層，呢類金融租賃企業絕大部份都係銀行之子公司，因為金融租賃呢門生意極為資本密集，少啲實力都好難成功。用得呢類服務嘅主要係航空公司，其次係 車隊或者船隊，以前者為例，大部份航空公司就算買得起新飛機，都因為每年折舊蠶食利潤而唔會食起晒成組機隊，即使錢多如國泰航空（293），手上一半機隊 都係租番嚟，咁係邊個買起架飛機呢？當然就係呢類金融租賃銀行一手包辦，私人公司少啲背景實力都好難入行。呢間公司本身市值才五千萬左右，最近忽然配售3 年期可換股票據（CB），而CB嘅規模竟達4125萬，幾近公司市值的8成，而換股價更只是2.75港仙，相當於現價折讓8成3！試想想，資金用途已經唔 再係本業，而係證券投資及一般營運，唔通借錢炒股？究竟上市公司有否諗過，睇好你間公司將來可以透過本業食大茶飯嘅小股東，突然變成苦主嘅感受？此事只係 冰山一角，市場上還有不少類似例子。由毫子股跌到升仙，再大折讓大比例供股嘅細價股，就算將來由供股價升番上去都一定冇散戶份，皆因高難度大動作嘅目的， 就係要自己玩晒。胡孟青 | ||||||
| ||||||
| 近 期上市新股中，首日表現最耀目者當數琥珀能源（090），股份掛牌首日破多個紀錄，被稱為三冠王甚至四冠王。當然，股價經過一輪炒供求，往後表現還看基本 因素如何造化，然而新股能否一炮而紅，仍端視背後保薦人的市場地位。琥珀能源雖然集資額唔夠兩億元，保薦人亦一手包辦，然而上市保薦人的名字卻予大家非常 陌生感覺。原來呢間派杰亞洲，本身唔只係一間老牌投行，更加係百年老店。一場金融海嘯淘盡多少如雷曼兄弟及通用汽車等百年老店。派杰（Piper Jaffray）呢間美資投行在紐約證券交易所上市（股票代號：PJC），竟然可以經歷多個股災而不衰，今年首季淨收入8390萬美元。呢間百年投行創立 於1895年，前身係票據經紀，今天已發展為多元化投資銀行，主攻資本市場、企業融資、機構投資者及證券研究範圍，定位係中型股市場。1931年正值大蕭 條時期，公司人棄我取收購遭金融危機淹沒的Hopwood & Company，1971年上市，在納斯達克交易所掛牌之初代號為PIPR；及至1997年被U.S. Bancorp以現金7.3億美元收購，2003年再分拆出來獨立上市，並於2006年將經紀業務以5.1億美元賣給UBS。 百年老店歷盡風霜 派 杰近年積極尋找收購機會，包括2007年收購Fiduciary Asset Management（FAMCO）的資產管理業務，同年再出手東來收購本地一家名為金榜融資（Goldbond Capital）的投行。金榜融資係高寶明在2003年自立門戶後成立，高氏當年曾是百富勤第一代要員，剛卸任上市委員會委員。金榜成立的目標，是要在大 量內地中資企業來港上市的活動中分一杯羮，與PJC公司東來的目標一致。PJC早於2003年已在上海開設分公司，其後帶領不少於20家中國內地企業到美 國招股集資。今次在香港打響頭炮的琥珀能源，上市編號90，剛好是百富勤投資當年的上市編號，不知道究竟是情意結還是真的如此巧合？從PJC經歷114年 而能夠屹立不倒，其生存之道絕對值得研究。正所謂不進則退，一家公司能夠從每次危機中生存下來，應是在於懂得認清形勢，視客戶為生意夥伴，呢啲正係金融服 務成功的關鍵和企業價值所在，只是有多少企業真正視其客戶為夥伴？金融市場視股東如水魚卻多的是。胡孟青 | ||||||
| ||||||
| 唔 好聽到今年犯太歲嘅美國財長蓋特納話經濟好快復蘇，大家就信以為真，就業、消費與樓市之間互為影響之威力實不容掉以輕心。市場對天后級分析師 Meredith Whitney嘅信心，就明顯大過啲財金官員，佢打個報告唱好高盛，同時唱好美銀和摩通，就唱起晒環球股市，成個市場有如聞雞起舞，呢啲就叫做夠 Power。呢位天后被《紐約郵報》選為紐約市50位最有權力女性之一，又被《福布斯》雜誌選為最佳選股之分析員。唔少人將佢同90年代唱好股市、在科網 年代紅透半邊天嘅高盛策略師科恩（Abby Joseph Cohen）相提並論，但係此一時彼一時，科恩在08年頭話標普500指數會見1600點，當時該指數企於1400點，對大好友來講，呢個位似乎唔難達 到，然而當時大形勢正走下坡，敗象處處，結果唔只跌穿1600點，指數仲要於11月跌見741點，自此以後，都唔見佢再走出嚟扮先知。 大市反彈唔使太開心 好 多時股評人或者大行分析員估個市睇幾多幾多，只係被記者嘅標準問題迫埋牆角，只好提供「有斷估無痛苦」嘅答案而已，投資者應以獨立思考衡量論點背後理據是 否充份。當然每次被迫扮先知。都屬於可怕經歷，皆因估中就算有人讚亦唔見得有咩咁值得高興（尤其係估個市跌嘅時候，因為只有升市才多人贏錢），估錯時卻予 滋事分子有可乘之機。本周至今兩個交易日，均見大戶在低成交中上下其手，周一睇淡周二又可以睇好，o依家只有貼住報價機炒即市，先至有機會贏錢（只係有機 會而已），假如冇時間睇住個倉又要迫自己玩，咁就惟有祝你好運。咪見恒指差百零點又掂住萬八就好高興，等上破兩萬先至興奮都未遲。個市已經有點體力不支， 期指前日開市同你隊落萬七邊，昨午開市又挾上萬八樓上，反映有人要在低成交中靠玩爆邊食大茶飯，呢啲咁嘅環境，如果仲要玩牛熊證，隨時死得好無辜，尤其近 日唔少投機者成為獨眼龍，只見高槓桿吸引而無視收回價太近之風險。市場上有「托派」，在現貨市場先托住重磅股，再在期指市場做定手腳儲齊淡倉，待時機成熟 即壓低個市，到平完淡倉後，佢哋又變身「狂派」反手掃上，然後將手中現貨狂派予追風一族。唔甘心被大戶予取予攜的話，真係要睇清楚先至好出動。胡孟青 | ||||||
| ||||||
| 港 股市場連續4個交易日出現驚慄1分鐘事件，先有期指於周一10:06急插至17050，再有周二期指於14:32喪挾上18075，跟手周三有標智滬深 300 ETF（2827）被小量買盤於收市前1分鐘由35元抽上53.75元，喪升5成，最新有昨日收市前一分鐘東方海外（316）無端端由35蚊樓上隊到落 21蚊，雖然電腦判收23元，仍慘跌近32%，簡直日日都嚇到O晒嘴。有冇想像過自己周一之前揸咗期指、周二反手沽咗、周三以為掹車邊臨尾跟人買 2827、再於昨早見航運股有勢唔覺意追入316兼走唔切，你嘅弱小心臟可能已被嚇至停頓幾次。最難得嘅係港交所（388）同證監好似冇事發生咁，雖說投 資者出得嚟行預咗要還，但如果發現自己個倉一日之內遊遍天堂與地獄，係因為有人趁市淡偷雞博懵，咁就勢係假！監管機構有責任提供一個公平而具透明度之交易 平台，讓所有勤力而有眼光嘅投資者可以正常地獲利（或失利），而非因市場形態被扭曲而無辜受損。 大市死唔斷氣有原因 市場近期 傳出唔少消息，話某隻細價股就嚟停牌配股，又話等賣殼，消息滿天飛，可是股價谷完一浸就水盡鵝飛。暑假雖然靜（唔少基金經理開始抖暑），但仲有好多炒股集 團，唔少仲係來自投行嘅前i-Banker，又或者係交易員，幾千蚊搵間小型會計師樓開番間BVI公司，專攻一隻股，利用場外交易運作，旨在唔使明刀明槍 上大利市機版面，你在明時佢在暗，隻股票喺後面私底下簽咗幾多場外認沽期權畀人，根本冇人知，只係知道好多時有細價股成功以溢價發行埋CB，博買家一方幫 手大炒一番。當然，要成功上演成台戲，貨源與銀両缺一不可。正因為有場外交易，最具啟示作用的交易與價位無法於股價走勢圖中反映，技術走勢頓失指標作用。 以上種種手法，純屬綜合場內人士資料及憑個人經驗臆測，事實近期唔少炒股集團周圍呼朋喚友以壯聲勢，務求在最短時間內搵最多嘅錢。大戶手花散唔切，個市仲 有排搞，間或有震倉，震多幾嘢後，發覺唔少貨仍在自己手上，就更加可以反過來炒上，此亦係個市點解死唔斷氣嘅原因。總結現時市況，基本因素欠奉，唔少原始 理性假設所證實有效之理論皆無用武之地，技術走勢亦被扭曲，唯一可以依賴嘅就只有「個人直覺」。胡孟青 | ||||||
| ||||||
| 一 個基金經理加上一個投行企業融資部門職員，會否為咗區區百多萬元，冒住斷送前途的風險。試想想，百多萬可能只是他們每年花紅的一部份，問題在於有學歷、有 人脈、有才華、有高薪厚祿，大把搵大錢條件，就係欠缺對法例尊重之智慧，腦裏只有錢沒有法，以為可以每次都好好彩，戰勝條例漏洞與灰色地帶。假如兩位分別 被判監嘅金融才俊真係第一單就中招，就好似男人第一次偷食就中咗AIDS，你信唔信佢吖？唯一解釋就係佢事前無做足防護措施，即係難以被追查之預付電話 卡，及用Gmail電郵而唔係用公司電郵。唔少老行尊甚至自己都曾經見過股壇中同類裏應外合、雙劍合璧事例，只係行事者手法高明，做到神不知鬼不覺，關鍵 係無人會因為分贓唔勻或者正義上腦而向監管機構報寸，街外錢齊齊搵，才未見東窗事發。走入銀行，唔少阿婆阿叔夠話邊隻邊隻股票就嚟做嘢啦，但當你問佢即係 間公司會做咩嘢，佢又答唔出喎。總之所謂內幕消息，根本就有如病毒人傳人，好似賽馬貼士咁無處不在，點解SFC只係捉得一單，就係因為成功打擊個案罕見， 所以但凡入到罪就肯定判得好重。 挾上要有成交配合 港股翻身，19200/19500點熊證最高街貨區遭殃，股民根本唔需要甚 麼內幕消息都識炒，大價股追落後，後發先至，股票市場係要跟紅頂白，好多內需股業績有幾好已經早在股價反映，指數要挾上一定要有成交繼續配合。但係唔好忘 記昨天股市成交777億元，不及上次6月12日見19161點時的789億元，基於大戶派貨越派越高道理，近期落後股將以6月頂部為反彈阻力試雙頂，早前 入市之蟹民又有機會被逐隻放生，執番條命就收細注碼唔好亂嚟，免得又被綁住。既然o依家係中期業績公佈前嘅真空期，大行報告講咩都得。總之你問我你隻甚麼 甚麼返唔返到家鄉，例牌答案係：你沽咗佢咪升囉！唔係話敷衍，而係世事往往就係咁，當一位散戶感到最絕望時，而市場波幅又跌至低谷，每每可能是否極泰來絕 處逢生嘅轉角時刻，好似早前提吓隻保利達（208），真係提吓都唔得o架，網上有太多狂派打手進行攻擊，o依家升番又唔見班友出嚟認衰，總之股票嘅嘢，唔 係升就係跌，放鬆啲啦香港人！胡孟青 | ||||||
2009-07-22 AppleDaily
| ||||||
| 呢 排電視台多咗好多Intern，連大摩都搵個15歲嘅暑期工寫咗個關於年輕人對互聯網及媒體消費口味之分析報告。噚日四叔任由一眾o靚記圍住問點睇港股， 佢擺明有備而來派紙仔天書，費事大家聽啲唔聽啲，佢話兩萬點樓上減持，而唔係睇淡，既然萬四萬五買咗貨，到價食吓糊都好應該，幾多人就係見好唔識收至搞到 自亂陣腳。只不過假如你前日朝早開市至11點幾，唔係開住收音機或者睇住有線電視嘅報價，就好容易錯過恒指昂然以萬九點開出，兼越升越有嘅場面，甚至唔知 隻熊證已危在旦夕，對淡友而言，前日正值危急存亡開市頭個幾鐘，竟然在毫無防備之下，兩個免費電視台甚至收費電視財經台，淨係show住上周五嘅價位同指 數，好似時光倒流咁，唔少股民觀眾睇到想掟爛電視，最抵死就係你心急如焚打去電視台投訴，佢都幫你唔到，皆因出錯嘅係路透社。 提早綵排速成過料 作 為一個專業嘅財經資訊頻道，無理由連一套危機處理機制都無，皆因實時報價系統隨時會機器失靈，無理由只依賴一個供應商報價，免費台慳得就慳難為無米炊都算 數，但財力雄厚嘅收費財經電視台，就必須對自己有更高要求。基於唔同報價系統供應商同一時間出現故障機會較低，兩個主持一定會用兩個報價系統，萬一有咩差 錯都唔會撻Q。即使撻Q，點執生都好講究技巧，主持與嘉賓隨時因應市況變化，將異動股甚至突然發威嘅板塊以最快時間通報觀眾聽眾，開緊市就要從指數與價位 替投資者搵賺錢機會，發揮資訊的價值，財經資訊頻道呢塊田由初時無人耕到耕開人人爭，點樣至搶到呢塊肥肉唔係得把口講，尤其呢行係食腦賣料，齋靠賣樣得個 Look扮Bloomberg只怕畫虎不成。最近從行家口中聽到個笑話，有收費財經台竟然要晚間股市節目嘅嘉賓提早入廠Rehearsal，唔好以為係電 視台認真，其實係主持唔夠料，惟有出此下策向嘉賓施展「吸星大法」，速成過料，有主持在準備時提出問題，問明嘉賓會點樣作答，誰知夜晚節目出街時，主持照 問問題，跟手將嘉賓嘅答案都搶住自己講埋，仲要加多句問番個嘉賓係唔係咁樣，真係少啲急才都接唔住。估唔到呢個世界竟然仲有咁匪夷所思嘅扮才女事件，與其 拾人牙慧，點解唔做好基本功呢？胡孟青 | ||||||
| ||||||
| 長 期坐井觀天之輩，唔知家華同我嘅交情好到咩程度，查實當家華大哥起筆開始寫關於對我之睇法時，已即時致電報定案，皆因佢話呢行是非多，費事有朝一日有小人 出嚟挑撥離間。佢真係料事如神，果然有人枉作小人。有病應該睇醫生，天天指控人家陰謀論，係唔係本身已出現病態妄想被迫害症！只怪生意難做，人性容易顯 露。香港最可愛和寶貴的地方，係港人仍然擁有言論自由，本人唔介意正常善意嘅批評，尤其早前陸叔對本人在股評人行為方面過份上心之提點，亦樂意照單全收。 只是對於一些由匿名打手於網絡向異己放暗箭（受害者不只一人），到如今自本報討論區消失後弄得要如斯明刀明槍御駕親征，煞是可悲，唔通我又要以牙還牙將本 文標題大大隻字老作甚麼黃腳『魚立』病變。在百花齊放、有容乃大嘅香港地，雖然刁難與挑釁已變成另類社會文化，對這類人我幫佢唔到只能表達同情，本文亦不 打算再與之糾纏下去，皆因公道自在人心。 睇淡係唔想散戶太心雄 繼續論盡財經界時弊，刺激大家對股壇現象思考一番，仍然係本文 風格，反正無人能夠贏得全世界，最緊要講真話。真人騷唔係話你想做就有得做，傳媒有Air time都唔係你木口木面扮性格演員去就有。只要你朋友圈子夠闊，肯與成功嘅炒家交換情報，許多都不諱言股市其實係一個鱷魚潭，唔通連炒家之言都係陰謀 論？市場上一邊話自己輸咗人家嘅錢，一邊流幾滴鱷魚淚者唔係第一次見，輸咗唔攞大聲公去你間公司嘈，唔好以為人家被焗賭焗輸無仇報，幾年前有本地廠家以為 有高人指路，點知仲慘過自己落手落腳去炒而輸到同行家呻，只係大家厚道無周圍唱，咁得閒四圍『目及』住其他行家嘅一舉一動，還有時間去做分析嗎？我等一般 見識之士，許多時遇上高人亦會不恥下問索索料，只是每日寫稿已要花很大精神，亦有家人要兼顧，對方先撩者賤亦感無奈。部份人睇淡，係因為唔想普羅投資者被 勝利冲昏，掛住數銀紙而忘記眼前風險，而唔會黑心到唔想個市升。經濟實在如何，睇嚟緊下半年大型企業招聘情況應該無得拗。在此順道感謝書展支持者百忙中抽 時間前來，友儕亦唔需要對蜚短流長太上心，基於以德報怨，希望對方早日康復。胡孟青 | ||||||
2010-03-01 AD
| ||||||
| 全球汽車業一哥，豐田嘅油門問題有如雪球般越滾越大，事件一發不可收拾。豐田第四代掌門人豐田章男在美國被議員公審後，聲淚俱下見傳媒話好多謝咁多人支持佢，主要係擴張過快忽略咗質量問題，鄭重向公眾道歉。 呢次全球回收850萬部車，「日本製造」嘅質量保證同消費者信心跌落谷底，美國國會議員當然唔放過政治秀機會，有女議員就哭訴豐田可恥。 豐田呢間百年老店成就驕人，近幾年更成為汽車業界典範。一如本地老牌大銀行，豐田家族式管理一直獲得市場掌聲，創辦人豐田喜一郎嘅營商DNA代代相傳，創造一個又一個奇蹟。 有咁好嘅DNA，都係拜佢爺爺豐田佐吉所賜。話說19世紀末，當時佢仲係窮光蛋一個，跟阿爸學做木工，有日佢見到屋企啲女人，每日織布都要好辛苦咁用手動織布機，於是就鑽研點樣將佢自動化，結果又俾佢搞掂，當時未有電力供應，要用蒸氣機，但無阻佢嘅決心。 豐田事件引以為鑑 1926年，豐田佐吉創立豐田自動織布機工廠，即係豐田集團母公司，佢嘅獨門武器係當紡線一斷，織布機會自動停止運轉。就係靠呢種「防止錯誤」（Mistake-proofing）理念，豐田多年來一直跑贏同業，亦係佢賴以成功嘅核心價值。 不過去到第四代，豐田勇於從錯誤中學習嘅精神不再，取而代之係急功近利嘅「捽數」文化，部門間為求表現，不惜做假報告，以一個又一個嘅大話去圓謊，最終東窗事發引致火燒連環船。 富豪後代統領家族企業，無論個人定整體企業營運，壓力之大不足為外人道。一方面要背負前人「太叻」嘅包袱，想要青出於藍，好易心急走歪路；另一方面要改革大企業嘅百年陋習，一啲都唔易。唔怪得話「富不過三代」，呢句說話簡真係放諸四海皆準。 香港唔少家族式巨企正面臨類似豐田嘅換班樽頸，第三代又好、第四代都好，活生生嘅例子就喺眼前，出門口去Clubbing前請多留意呢單新聞，引以為戒。 胡孟青 | ||||||