【2017娛圈十大預言】甘比大劉70%添丁 最後處女黨苟芸慧85%結婚
1 :
GS(14)@2017-01-02 01:05:49一年容易，每到年尾又係埋單結尾、同娛樂新聞計數嘅時候。本住總結過去，關注現在，放眼未來嘅精神，不求神、不問卜，唔搵風水命理師批注，只憑專業判斷客觀分析，配以一廂情願嘅主觀願望，我哋大膽預測來年有可能發生喺娛樂名人圈嘅十大新聞。(機會率以%表示)1.甘比大劉添丁(70%)甘比（陳凱韻）由劉鑾雄助手到拍拖，08年為大劉誕下女兒劉秀樺（Josephine），12年誕下細仔仲學。到今年12月兩人終於簽紙結婚，跟大劉曾經患難的甘比終於有劉太的名份。名正言順的甘比在趁住雞年，幫65歲仍然有心有力嘅大劉生多隻雞仔，沖喜一下。2.最後處女黨苟芸慧結婚(85%)岑麗香趕係今年年尾新娘，喺加拿大下嫁強強，王君韾都排晒期註冊，計計下大台嘅處女黨李亞男、鍾嘉欣、王君馨、岑麗香、苟芸慧，就得返苟姑娘未嫁。不過隨住佢同陸漢洋戀情浮面，仲一齊去日本旅行食拉麵，相信33歲嘅苟姑娘明年好有機會閃婚。3.王菲香港演唱會(70%)王菲前日(30日）喺上海舉行只此一場名為《幻樂一場》嘅演唱會，最貴飛賣到過萬人仔，聽聞貴飛個炒價去到成10萬人仔都有人接貨。大陸開演唱會，香港好多人都向隅，為咗照顧愛郎霆鋒嘅出身地香港，所以毅然喺機場亞博開一場只招待港人演唱會都有啲可能。4.《亂世備忘》奪金像獎(75%)今年香港電影金像獎最令人難忘振奮，係喺爾冬陞宣佈備受內地打壓嘅電影《十年》，獲頒金像獎最佳電影。今年有一部紀錄傘運嘅紀錄片《亂世備忘》報名，要再贏最佳電影稍有難度，我哋預言陳梓桓會贏新晉導演獎，到時佢嘅名字又會喺大陸得獎名單中被消失。5.Kary再度有喜(85%)吳雨霏（Kary）同老公「網球王子」洪立熙舊年7月結婚，Brian好鍾意小朋友，成日幫人湊仔。所以婚後佢哋都積極造人，不幸嘅Kary喺今年3月小產。好在兩公婆好快走出陰霾，調理好身體後嘅Kary同老公重新出發，預言佢哋明年再度成功造人。6.Stephy方力申復合(60%)鄧麗欣（Stephy）同方力申多次傳出婚訊，《狼來了》故事到今年3月出現反高潮，兩人透過公司發聲明宣佈分手。事後兩人出席唔同活動時，提起對方都潸然落淚，證明大家仲有對方。估計佢哋有機會喺17年復合，同時仲會宣佈埋結婚，有情人終成眷屬。7.首部港片破億《寒戰III》(30%)由陸劍青同歐樂民聯合導演嘅電影《寒戰II》以接近6,700萬成為今年香港華語片冠軍，較第一部《寒戰》的4,289萬大升超過5成票房。加上兩位導演在合作《寒戰III》後分開發展，加上幕後大佬登場，所以《寒戰III》假如趕及明年上映，極有可能成為本港首部破億華語片。8.甄子丹憑星戰奪奧斯卡(20%)荷李活巨製《俠盜一號：星球大戰外傳》（Rogue One：A Star Wars Story）入面首次有華人甄子丹主演，佢喺戲入面演嘅盲眼僧侶智刃嚴，睿智與武功兼備，一個打十個白兵的葉問式身手令人大開眼界，完全無負「宇宙最強」的稱號，不難為佢贏出奧斯卡最佳男配角獎。9.亞視永恆邱達昌(75%)已故亞視主席邱德根嘅仔邱達昌，成立公司申請免費電視牌照。其實早在亞視未執笠之前，佢已經傾過收購亞視，可惜最後都唔能夠成事。但證明佢對老父當年嘅亞視念念不忘，所謂念念不忘必有迴響，假如佢獲發牌，大有可能將亞視借屍還魂，延續亞視不死。10.余詠珊失勢(90%)前有線嘅余詠珊入咗去無綫擔任高層負責綜藝娛樂，深得「殼王」陳國強欣賞嘅佢，連帶一班余黨好似洪永城、黃翠如同陸浩明都受惠，一劇接一劇拍攝。不過隨住余詠珊多次孭鑊，最經典喺12年一人一票選港姐電腦死機成為國際笑話，加上今年無綫發盈警，溢利大跌超過5成，有機成為祭旗嘅對象而失勢。
來源:
http://hk.apple.nextmedia.com/entertainment/art/20170101/19883395
丘竣霆重返娛圈當歌手
1 :
GS(14)@2017-01-06 02:07:48■丘竣霆回流香港做歌手，小圖為他做童星時的樣貌。
童星出身的丘竣霆（Shelton）重返娛樂圈，13年前於無綫劇集《一屋兩家三姓人》扮演四少，16歲去澳洲讀書，現年24歲的他返港發展出新歌《虛構情歌》，日前他接受本報訪問說：「人哋見到我出嚟，以為我係新人，慢慢先find out我係童星。」
Shelton參演第一套劇《一屋兩家三姓人》，已是13年前的事。
Shelton初時回港工作也吃過不少苦頭，但為了理想，也要堅持下去。
在澳洲發展雖然理想，但Shelton還是覺得香港最好。
在澳洲讀書期間，Shelton開班教外國人跳街舞，他說：「夜晚落酒吧玩，我飲到high high哋行出去跳，好多外國人好buy。」雖然在澳洲發展理想，但因文化差異，加上掛住家人，Shelton決定回港搏殺，由於歌手收入唔穩定，他跟家人合資開眼鏡店：「我希望靠自己，除非真係好唔掂啦！」採訪：倩宜、吉吉攝影：馮峰、Neo
24歲的Shelton，現在身份是樂壇新人。
Shelton與家人合資眼鏡店，開拓其他收入來源。
來源:
http://hk.apple.nextmedia.com/entertainment/art/20170105/19886481
張沅薇退出娛圈做知客顏國樑轉行教太極
1 :
GS(14)@2017-01-18 22:21:22進軍娛樂圈後，等於一輩子也要待在呢個圈子嗎？別傻吧，世事變幻莫測，很多藝人早已淡出幕前，轉行了。曾擔任無綫兒童節目《閃電傳真機》主持的張沅薇，當年與音樂人王雙駿拍拖，誕下兒子後，就淡出娛樂圈。後來兩人分手，她要獨力照顧兒子，現於粵菜館當知客養家。90年代女星鄭艷麗，由無綫清純小花，變做性感三級片女星。兩年前，當年她42歲，被雜誌影到於快餐店打工。資深演員顏國樑，拍完《美麗高解像》後，便淡出娛圈，轉行教太極，他還有一間售賣貓糧和狗糧的小店，當老闆賺錢。
來源:
http://hk.apple.nextmedia.com/entertainment/art/20170118/19900277
老婆胞妹外甥都做娛圈曾江全家都係星
1 :
GS(14)@2017-01-21 03:36:49家陣興講星二代，星爸星媽星仔星女，全部都有根可尋，不過，於1960年代加入演藝圈嘅曾江，演藝經歷約半世紀，除咗佢本身係星，佢身邊嘅原來都係星，今次真係星，全部都係星。太太焦姣曾江現任太太焦姣，於1961年考入台灣中影演員訓練班，演藝經歷同曾江差唔多，近年少喺幕前出現，比較近期嘅有台劇《流星花園2》同電影《竊聽風雲2》等。而曾江嘅前兩任妻子，藍娣同鄧拱璧，前者係五六十年代嘅香港電影明星，後者則係專欄作家及著名模特兒，都係名人。女兒曾慕雪香港舞台劇演員曾慕雪，係曾江同第二任太太鄧拱璧所生嘅女兒，佢係香港演藝學院戲劇學院（榮譽）學士，主修表演，佢曾經參演過《羅密歐與朱麗葉》劇目，並於2005年加入PIP劇場，佢數年前接受周刊訪問時，坦言抗拒借父母之名發展，亦絕少提及自己係曾江個女，但佢強調自己同曾江關係良好。胞妹林翠已故港星林翠（原名曾懿貞），係曾江嘅胞妹，林翠於1953年考入由導演黃卓漢領導的自由影業，曾拍攝《四千金》、《游龍戲鳳》同《豆腐西施》等名作。外甥女王馨平林翠之女、即歌手王馨平係曾江嘅外甥女，雖然王馨平近日淡出幕前，但佢同舅父曾江關係良好，仲有一齊食飯見面。外甥陳山河林翠同男星秦劍（原名陳健）之間育有一子陳山河，亦即王馨平同母異父嘅哥哥，同樣係曾江外甥，不過陳山河星途不及母親或妹妹，星途浮沉，喺1997年淡出娛樂圈。其實再數多一層，王馨平個爹哋（即曾江個妹夫）係港台武打明星王羽；而曾慕雪個後父（即鄧拱璧丈夫）係粵劇名伶阮兆輝，個family tree再散開都仲係星……
來源:
http://hk.apple.nextmedia.com/entertainment/art/20170120/19903262
韓娛圈貧富懸殊驚人九成藝人月收入不足4千
1 :
GS(14)@2017-01-21 03:36:50o依家韓流依然喺亞洲各地吹得好勁，韓星喺「限韓令」未爆出前，喺內地搵人仔搵到手軟，雖然「限韓令」令佢哋斷晒搵人仔嘅路，但外界都以為佢哋賺錢勁過唔少地方嘅藝人，不過呢啲都只係表面風光。根據韓國國稅廳日前公佈，去年有逾萬五名演員申報收入，當中平均年收入為6,800萬韓圜(約45萬港元)，而喺娛圈中約佔1%嘅最Top演員，佢哋嘅收入就佔咗所有收入總和嘅差不多一半，當中1%嘅演員平均年收入達19億5千5百萬韓圜(約1,290萬港元)，呢班一線巨星佔154人，佢哋已佔總和收入45.7%比率。而有1,542名演員嘅平均年收入有3億6千7百萬韓圜(約246萬港元)，餘下嘅近九成演員年收入不到1,000萬韓圜(約67,000港元)，有啲每個月收入僅得58萬韓圜(約3,886港元)，貧富懸殊情況真係令人嚇一跳。至於申報收入嘅歌手同模特兒，佢哋嘅收入差距都好大，當中有4,587名歌手進行申報，最Top嘅1%歌手平均年收入有31億8百萬韓圜(約2,051萬港元)，佔全部歌手收入嘅45%。而其他10%歌手，平均收入有6億4百萬韓圜(約398萬港元)，餘下嘅近九成歌手收入只得800萬韓圜(約52,800港元)。模特兒情況更惡劣，當中有申報收入嘅8,291名模特兒中，1%模特兒收入達4億4千萬韓圜(約290萬港元)，佔模特兒界總收入嘅47.6%，而90%嘅模特兒欠搵銀能力，平均收入僅得200萬韓圜(約13,200港元)，月收入不到16萬韓圜(約1,056港元)。
來源:
http://hk.apple.nextmedia.com/entertainment/art/20170120/19903264
【娛圈賢內助】彭羚為家庭棄事業
1 :
GS(14)@2017-05-19 05:43:44一位成功男士背後都有一位賢內助，多位圈中男星都有一位好老婆主理家事。
彭羚
天后級歌手，98年在事業如日中天時，與林海峰結婚，之後彭羚全面退出樂壇，專心相夫教兩女。
朱麗倩
08年與劉德華秘婚，12年誕下女兒。早前華仔墮馬受傷，朱麗倩陪伴在側照顧家庭及女兒，令華仔安心養傷。
郭藹明
港姐冠軍出身兼擁碩士學位，98年嫁給劉青雲，婚後淡出娛圈，專心做青雲的財政大臣。
關詠荷
曾奪無綫視后，03年跟張家輝結婚，育有一女，大部份時間都專心照顧家庭，做家輝的賢內助。
來源:
http://hk.apple.nextmedia.com/entertainment/art/20170519/20025858
【點原諒你77次？】被柏豪爆係娛圈XX 阿Sa揮掌打面：你去死啦！
1 :
GS(14)@2017-06-10 13:46:50兩位主角勁有默契，連牛仔外套都襯埋。
下個禮拜上映嘅《原諒他77次》，由蔡卓妍（阿Sa）同周柏豪飾演一對成日嗌交嘅情侶，估唔到兩位主角由戲內嗌到戲外，訪問期間柏豪講咗一句說話，就令阿Sa又揮掌又打面，仲加多句：「你去死啦！」究竟柏豪講咩呢？記者：吉吉 攝影：陳順禎 攝錄：馮峰、Neo
蔡卓妍（阿Sa）話《原諒他77次》係一部畀情侶反思探討嘅電影。
周柏豪現實生活中，一定要搵尊重長輩嘅另一半。
柏豪、阿Sa相識唔夠一年，今次更係首度合作。
哦，原來柏豪大爆阿Sa係娛圈富婆，由以前嘅小富婆變成現時嘅中富婆，仲有少少暗笑阿Sa年紀。柏豪話：「我唔信你對數字比較差，娛樂圈小富婆，而家唔係小啦，中中地添啦。中係講緊你個資產，唔係年紀，婆先係一個年紀呀！」唔知阿Sa被講中咗定冇柏豪咁好氣，惟有反吓白眼再笑笑口回敬一掌：「你去死啦！」講到電影《原諒他77次》，阿Sa話今次唔係嗰啲韓式好浪漫嘅公主王子戀愛史，又唔係講有病、失憶、你呃我我呃你嗰類，而係一段好真實嘅愛情關係。「呢個係好寫實嘅故事，男女一齊咗十年，有咩問題要面對，有咩大大小小磨擦咁樣，會令大家反思探討嘅。」
柏豪點寫自己優點缺點，阿Sa似乎好緊張想知喎！
兩位都係天蠍座，齊認情緒變化好大。
笑晒口咁，證明大家互讚都收貨啦！
坊間有傳阿Sa係呢部戲嘅幕後策劃，又話佢有份編劇又盛，佢自己親自解畫：「出面都吹到我真係實在太犀利囉，我真係冇做咁多嘢，我淨係收到李敏（堅編劇）個劇本，咁我搵我老細去投資囉。只不過搵咗幾個friends Yumiko、阿嬌，我有問過容祖兒，但係佢唔得閒。除咗講新戲，阿Sa、柏豪仲分享咗自己喺現實中拍拖嘅習慣同擇偶條件。阿Sa話：「我會記住第一次拖手，第一次錫錫嗰啲日子囉。同埋睇完戲，我會留住戲飛，去完旅行boarding pass我都會留住，但一分手就即刻扔晒佢。」柏豪就話：「有一樣我係好確實嘅，如果個女仔唔尊重我屋企人，係根本唔會喺埋一齊，因為我好愛我屋企人。」最後，真正相識唔夠一年嘅阿Sa同柏豪，互數對方三大優點缺點，想知佢哋點形容對方，睇片啦！周柏豪髮型：Cliff Chan@ hair corner/ Assisted by Alson Tam化妝：Vinci Tsang蔡卓妍髮型：Sing
[email protected]化妝：Natalie
[email protected]場地提供：柏寧酒店
來源:
http://hk.apple.nextmedia.com/entertainment/art/20170610/20050939
港姐17歲佳麗恨入娛圈邱晴被爆曾性感參賽好成熟
1 :
GS(14)@2017-08-04 06:11:00一年一度嘅《香港小姐競選》將會喺今年9月舉行，唔知係咪o依家有太多唔同類型嘅選美，所以聲勢都唔及以前，有時候好多活動仲喺無聲無息間完成，之不過話晒呢個都係入娛樂圈嘅捷徑，仲有好多發明星夢嘅女仔參加。但係o依家睇選美最吸引人嘅地方，唔係講緊邊個最靚、邊個身材最好，反而係一啲嚟自身邊朋友嘅報料，一時又話呢個整過容，一時又話邊個喺夜店工作。用CY術語就係：黑 材 料。喺今屆港姐之中，只得17歲邱晴（Mandy）喺宣傳短片裏面，曾經講過自己由細到大都希望參加港姐，所以當佢符合資格之後，第一時間去咗報名參加，結果順利入圍。咁啱得咁橋，《蘋果》日前收到報料，有讀者話，原來出身於公屋嘅Mandy，一直都好恨入娛樂圈，佢喺舊年曾經參加過一個由酒商贊助嘅選美，同場仲有仙樂都同伍淑怡做嘉賓。翻查番啲資料，嗰陣Mandy嘅打扮都好成熟，着住三點式bra top同超短牛仔褲上陣，一啲都唔似仲未成年。反而o依家候選港姐個樣比較後生，學生味勁濃，身形明顯亦收身咗少少，本身仲係今屆DSE考生嘅Mandy，喺社交平台亦都貼咗唔少讀書時期嘅相片，嗰陣佢似乎係活躍份子，參加咗唔少課外活動，真係好難像到佢會參加呢類比賽。
來源:
http://hk.apple.nextmedia.com/entertainment/art/20170803/20110546
背「香港電影之父」孫女之名闖娛圈黎姿感壓力
1 :
GS(14)@2017-08-04 06:11:56黎姿（現名馬黎珈而）出身於演藝世家，眾所周知，佢爺爺係「香港電影之父」黎民偉，資深女演員黎宣係佢姑姐，而黎姿嘅伯父黎鏗及當姑媽黎灼灼亦係圈中人，甚至黎姿嘅兩位嫲嫲——黎民偉嘅元配嚴姍姍及平妻林楚楚都係女演員，其中嚴姍姍更係中國首位女演員。不過，黎姿從未同於1953年離世嘅爺爺見過面，只係喺家人口中得知過爺爺啲威水史，佢喺04年接受《蘋果》訪問時，提及過自14歲入行開始，被稱為「電影之父孫女」，但佢覺得自己入行多年嚟，演技從未被提及，做得新聞人物嘅，通常都係因為是非同緋聞，所以佢覺得自己好醜，亦覺得自己好大壓力同內疚。好在，黎姿上個月帶住3個寶貝女遊北京時，有日走去參觀位於北京朝陽區中國電影博物館，佢仲喺嗰度同爺爺「相遇」，令到黎姿不禁覺得：「心中有點點激動。」黎姿當日喺微博貼出與爺爺個銅像嘅合照，仲順便回顧咗少少爺爺嘅威水史，包括黎民偉曾經喺上海開電影廠，又捧紅咗著名女演員阮玲玉，仲有為過孫中山先生拍紀錄片等，佢仲話對於自己喺電影界未有好作品，覺得唔好意思，但會視爺爺為「好好學習的榜樣」。
來源:
http://hk.apple.nextmedia.com/entertainment/art/20170803/20110547
Next Page