【馮仁昭四圍超】麥明詩服侍林作踢波
1 :
GS(14)@2016-05-24 10:26:46【遞水飲】■前日陽光普照，見男友踢到身水身汗，麥明詩即做廿四孝女友遞水畀佢。
麥明詩早前喺無綫節目度成日將「劍橋」同「十優」掛喺嘴邊，結果俾網民幫佢起朵叫「堅離地詩」，而佢最近以新丁待遇幫無綫拍劇，成日要留喺內地，前日趁有假期即刻爭取時間陪住男友林作，就連男友同成班男人去踢波都照跟，仲唔介意做阿四，幫男友同佢啲波友買埋水。
【好細心】■難得女友唔怕曬黑陪踢波，林作有機會便走到麥明詩身邊傾偈。
【睇泳衣】■麥明詩睇完男友踢波，即到銅鑼灣shopping。
【食茶記】■未知係咪經常被指「堅離地」，麥明詩決定同男友玩平民食茶餐廳。
揀一件頭泳衣
前日下晝4點鐘左右，麥明詩坐男友林作車去九龍仔足球場後，即全程靠邊站，後來索性搽蚊怕膏趴喺草地睇書，完場後先同男友過二人世界，仲好貼地咁去九龍城食茶餐廳，又去銅鑼灣行樓上舖。馮仁昭噚日打電話畀林作，佢話：「噚日其實都幾曬，都驚佢（麥明詩）曬親，不過佢平時冇乜做運動，有機會畀佢接觸吓大自然都係好嘅。」馮仁昭笑佢哋慳家，一份常餐兩份食，仲去街檔睇手機殼，林作即乘機幫女友澄清咁話：「佢好鍾意食茶餐廳㗎，喺街邊買手機殼，因為嗰度多款嘛！」問佢係咪好保守，所以麥明詩揀泳衣只揀一件頭，佢就笑住話：「我唔介意佢着三點式喎，咁好嘅嘢、靚嘅嘢，梗係要攞出嚟分享啦！」撰文：馮仁昭
來源:
http://hk.apple.nextmedia.com/entertainment/art/20160524/19624430
【馮仁昭四圍超】林心如恨嫁 傳明年做霍太
1 :
GS(14)@2016-05-24 10:44:33■林心如被閨中老友爆最快明年底結婚。資料圖片
霍建華同趙麗穎舊年演出嘅劇集《花千骨》喺內地好受歡迎，令佢兩個爆紅，好多電影同劇集都搵佢哋拍，但日前霍建華突然自爆同林心如拍拖，令內地好多粉絲心碎。低調嘅佢唔輕易公開戀情，咁多年佢雖然緋聞多籮籮，但只認過戀陳喬恩，而家佢肯主動公佈同林心如一齊，應該認定對方係結婚對象。今年40歲嘅心如當然心急嫁人，聽佢啲閨中老友講：「心如唔細啦！佢同小霍咁難得走番埋一齊，佢哋已經私下傾過婚事，不過今年應該結唔成，兩個人都排滿工作，最快都要明年下半年先做得完，要結都要明年底先有期啦！」不過噚日有記者問過心如會唔會閃婚，佢就話唔會，仲想享受吓拍拖樂趣。
■日前霍建華突然公佈同林心如拍拖。資料圖片
世界係好奇妙，2011年心如學做製片人，搵霍建華合作拍劇集《傾世皇妃》，但小霍因冇檔期推咗，後來搵其他演員時又出咗大問題，心如因頂唔住壓力，打電話俾小霍訴苦，忍唔住爆喊，嚇到對方不斷安慰佢，後來還答應演出，令心如好感激。心如受訪時曾被問過呢件事：「我請他（霍建華）真是三顧茅廬，差點給他跪下了。」如今佢哋拍緊拖，相信叫男友拍戲，唔使下跪同爆喊啩！撰文：馮仁昭
來源:
http://hk.apple.nextmedia.com/entertainment/art/20160523/19623428
Next Page