淺水灣開畫廊朱晨麗搭上張玉珊百億舊愛
1 :
GS(14)@2016-11-14 01:09:402016-11-10 NM
月薪萬五，卻有本事住月租十五萬服務式住宅的朱晨麗，一度被指獲老闆殼王陳國強賞識，其實真命另有其人。據了解，早在兩年前朱晨麗與張玉珊的百億舊愛、電子大王劉紀明秘密拍拖；雖然二人關係剛告一段落，但畢竟曾經富貴，可以享受優質生活的她，在淺水灣開畫廊，每幅畫售價百幾萬起跳，財來有方。由一個蘇州來港住劏房的窮港姐，搖身一變成為畫廊老闆，非一般的勵志！男友低調見光死
被誤傳獲殼王垂青，廿八歲朱晨麗亦無法開口申辯，只因真命天子習慣低調，要睇男友頭的她惟有硬食。同電子大王劉紀明拍拖兩年，在富豪圈子並非秘密，男友不時帶朱晨麗出席富豪聚會，由於她乖巧口密，亦獲男友家人接納。四十一歲的劉紀明家族做電子產品發迹，坐擁不少工廈，在舂坎角亦有多間獨立屋；除了幫家族打理生意，劉紀明亦是億利達集團主席。後生多金，鑽石級筍盤。
多女埋身幾度離合
「Jimmy（劉紀明）好低調，同張玉珊、姚子羚拍拖嗰段時間佢都係唔鍾意女朋友喺外面提佢，所以姚子羚同佢更加係見光死；同張玉珊一度去到談婚論嫁地步，但Jimmy拖吓拖吓，最後冇下文。「至於朱晨麗好就得佢，但拍拖兩年，兩個都分過幾次手。之前朱晨麗俾人話同李逸朗，因為嗰時佢同Jimmy分咗手，但之後又喺番一齊。」知情者說。甘心做隱形女友，可惜富豪男友條件好多女埋身，朱晨麗最終拑唔實，數月前，二人又再次分手。
名畫過百萬起跳
富貴光環消失，但用了兩年時間收集脈絡，朱晨麗仍得到一班名媛支持，最近她跟幾個闊太合資，在淺水灣開高檔畫廊，基本如岳敏君畫作，最平百幾萬起跳，顧客非富則貴。「Jimmy教咗朱晨麗好多有關投資嘅學問，所以帶挈佢賺唔少。一四年，佢用七百萬買咗將軍澳The Parkside兩房單位，第二年已經可以一炮過俾晒錢。其實同Jimmy一齊最賺到嘅係人脈，有機會黐吓啲有錢太搞生意，藝術品海鮮價不斷升值，只要有門路，長做長有。」知情者說。
黐阿太謀後路
雖然朱晨麗在大台拍劇機會不少，但大多是做「女二」，加上被陳凱琳、蔡思貝、麥明詩等後來居上，朱晨麗決定將眼光放遠，積極為自己謀後路，對畫廊生意，非常着緊。上月尾，朱晨麗去完緋聞男友黃子恆的時裝店開幕，和邵氏大型記招後，便跟幾位闊太拍檔去淺水灣打點新鋪。只見她在場指指點點，跟拍檔商量畫作的擺放位置，甚有老闆娘風範。睇完鋪，一行人到利園食晚飯，之後由友人的司機送返天晉寓所。冇咗富豪男友，仍然有一班有錢太呵住，朱晨麗繼續富貴！
張玉珊、姚子羚箍唔住
現年41歲的電子大王劉紀明，是城中低調的鑽石筍盤，08年曾與張玉珊傳出婚訊，此外，他同大台姐仔姚子羚亦傳過緋聞。劉紀明父親是億利達集團創辦人劉永齡，以生產Olympia打字機及室內無線電話起家。子承父業，劉紀明現為該集團主席，又是上海市政協港澳委員。坐擁百億身家的劉氏家族持有40多間公司（非上市公司）包括億利達機械集團，在內地多個省市設有幾十萬平方呎的生產基地；家族在港擁多個億萬物業，大部分集中舂坎角一帶及白建時道的幾萬呎獨立屋，至於劉紀明自住的四萬呎大宅亦位於舂坎角，現市值約八億。10年，其家族曾以3.2億沽出觀塘工廈。身家幾代都食唔晒！劉紀明近年開始活躍教育公益，今年與深大合作建立「深圳大學劉紀明數學中心」，培育國家人才。
高登女神
朱晨麗是高登女神，裙下臣更加絡繹不絕。不過，緋聞男似兵多過似男友，真命天子，收得好密實。
黃子恆16年7月，無綫二打六黃子恆被爆出與仍未離婚的裕美相戀，搞到滿城風雨，但轉頭黃子恆已轉向，被發現與朱晨麗打完羽毛球，再撐枱腳三小時。女方否認戀情，只以「好兄弟」形容雙方關係。
李逸朗15年4月，李逸朗（Don）與朱晨麗被拍到前後腳入場睇戲，更攬住返男方寶林邨屋企，之後Don落樓外賣老麥，兩粒鐘後，朱晨麗才獨自離開打的回家。當時朱晨麗未有承認戀情，聲稱二人是「閨密」。
李晉強12年1月，24歲的應屆港姐朱晨麗與港男李晉強暗撻三個月，二人坐港鐵拍拖挨到實斷正，事敗後即彈開各行各路，戀情維持半年告終。
撰文、攝影、攝錄：娛樂組
捐錢開社區飯堂張玉珊日派2,400個飯盒
1 :
GS(14)@2017-02-12 15:26:362017-01-19 NM
由藝員變身上市公司主席，將青春投放在修身事業上的張玉珊，時至今日，手持過億物業，近年她放慢工作步伐，用更多時間做公益。上週六（14/1），張玉珊主力贊助的社區飯堂開幕，每日可派發超過2400個飯盒給老人家；十年前開始做義工的她終於達成兒時夢想。「細細個已經希望自己退休之後可以主力去做慈善，其實我好多朋友都係咁諗，好似靚靚咁，依家有機會做到就做，呢啲都係我哋嘅福氣！」張玉珊說。明星好友撐場
二十八歲將修身堂成功上市的張玉珊，曾經是最年輕CEO，○五年，她成立「張玉珊慈善基金」，十多年來，捐錢為內地貧民山區起水窖，興建母嬰平安醫療站，最近更在香港開設社區飯堂。位於黃大仙區的社區飯堂上週六（十四日）正式開幕，一班圈中好友包括呂良偉、楊小娟、孫明揚夫婦、蔡一智、王敏德等專程到場支持，現場所見，張玉珊不停向在場賓客推廣廚餘環保概念，又解釋飯堂廚房的運作模式，如何幫有需要的老人家出力等等。「其實我喺香港唔同嘅屋邨做咗好多年義工，呢個屋邨比較多獨居老人，生活環境亦比較差，加上大部分長者都行動不便，但呢度嘅環境，買餸唔係咁方便，啲老人家想整一餐俾自己食都有啲困難。「我試過上樓做家訪，見佢哋屋企積埋好多雜物、罐頭，成日有一餐冇一餐，好彩嘅就有啲好心嘅隔籬鄰舍幫佢哋買餸，所以我一直想搞個社區飯堂，照顧到呢類老人家日常三餐！」張玉珊說。
推廣到其他社會
社區飯堂開幕後，現時每日可派發超過二千四百個飯盒給有需要的長者，要應付這個需求的話，亦需要大量人手，所以除了基本運作的員工，亦要有其他義工團體幫忙。「以前有考慮過做一架餐車，日頭去啲經濟環境好嘅屋邨收集廚餘，再分類配搭煮過，但後來研究過咁樣做有好多問題係解決唔到，咁啱今次有呢個機會，俾我做到一個社區廚房，可以幫到老人家。」社區飯堂同時亦會推動環保，到各區街市收集物資，亦鼓勵大家捐出新鮮食物，再加私人補貼，未計人手支出，單是每日做二千幾個飯盒，開支已經接近五萬元，因此，張玉珊不時落力向身邊好友推介，希望有更多人捐款，可以將社區廚房推廣到更多屋邨。「希望呢個廚餘環保概念，加埋服務老人家計劃，可以做完一個社區再一個社區，一直延續到有需要嘅屋邨，希望大家支持我哋，繼續做落去！」
跳出舊有框架
做了修身堂上市公司主席十三年，張玉珊雖然決定放慢工作步伐，不過，她揚言不會離開美容圈。「做咗十幾年嘢，唔想生活只得工作，希望做多啲有意義嘅事，同學多啲其他嘢！所以要停一停，先可以跳出舊有嘅框框，諗吓將來嘅方向！不過，我唔會放棄做咗咁多年嘅美容事業。」
當欣宜係女
○一年退出幕前，張玉珊創造自己的修身王國，旗下名人代言人不計其數，更成功將當年只有十五歲但重二百三十磅的鄭欣宜變成女神。雖然欣宜已經放棄翻脹，但能一度為有高血壓、高膽固醇的她重拾健康，不負當年肥姐所託，也是張玉珊一個無法忘記的體驗。「依家我見到阿女（欣宜）過得開心健康，又有活力，我已經好開心！」張玉珊說。
25歲引退
被星探發掘，十五歲入行的張玉珊，歌影視瓣瓣做齊，其後加入TVB，拍過《新上海灘》、《花木蘭》及《妙手仁心》等劇集。二十五歲，張玉珊退出娛樂圈轉戰商界，並創辦「修身堂」；03年，公司在香港聯交所上市，近年更在內地拓展至過百間加盟店。多年來，「修身堂」成功例子多的是，最經典是為230磅的欣宜成功踢走100磅肥膏。愛向難度挑戰的張玉珊，最近幫苟芸慧減肥，將170磅重的「肥苟」，成功變「靚苟」。
撰文、攝影、攝錄：娛樂組