財演與財茄 順叔
1 :
GS(14)@2012-07-05 22:48:06http://caijingcarefree.blogspot.hk/p/blog-page.html
香港近年，多左「財經演員」呢個新辭，變相將金融圈打滾搵食之人，分成有料冇料兩堆，淨識講阿媽係女人，長散戶盲目跟風者，冇料，謂之財演。
順叔打開電視，聽到有人講「唔升穿22000就可能下試21500」，一樣會噴飯，不過幾十年前唔係一街財演，咪又成堆散戶撲去買香港天線？ 所以財演呢個標籤，最大作用，可能係令好似順叔呢類財經茄喱啡，即時升呢，同你講，女人未必係阿媽，又搵到兩餐。
吹水叻，未必一定搵到食，但係金融界最搵錢果班，絕大部分，都有吹水出神入化嘅奇技，攞住間在火星賣飯盒既公司，敲50個老細門，被49個踢翻出嚟，只要有一個覺得有得諗，過左海就係神仙。
講穿左，金融界邊個唔係演員，不過講緊場大戲賣乜，做俾邊個睇。套戲唔掂，最多令好似順嫂的師奶，唔見幾餐茶錢；令人以為財星到有料到、唔係做戲果班，可能累到全人類輸身家兼財富大轉移。
最好例子，莫過於十年前，有人吹水吹到董伯伯相信，矽谷成功因為有矽，所以香港加數碼實掂，再吹到全香港都相信，數碼加盈科，動力十足，咁就變成香港金融史上最慘痛集體回憶
唔係天才演員，又點會可以說服到千千萬萬投資者，買CDO呀「I Kill You Later」呀呢啲冇乜可能明白的結構投資產品、連自己都呃埋？2008年，雷曼兄弟爆煲前幾日，條主席David Fuld仲大大聲話：「Our firm is strong today！」
財星、財演、財茄，真真假假，有人食大茶飯，有人搵兩餐，財經茄哩啡呢台戲，打正旗號吹水唔抹咀，炳人唔使本，希望大家鐘意睇。