米歇爾希拉莉首同台拉票
1 :
GS(14)@2016-10-29 13:20:14民主黨總統候選人希拉莉前天在北卡羅來納州首次跟第一夫人米歇爾同台拉票，兩人互送高帽，將八年前大選針鋒相對的過去拋諸腦後。「很高興有最棒的第一夫人在場」、「認真的，誰能比米歇爾更啟發人心？」希拉莉前天在開場白中對自己的拉票重炮手讚不絕口；米歇爾亦連番示好，指「希拉莉是我老友」，又用「我的女孩（my girl）」稱呼希拉莉，台上氣氛親切融洽，台下逾萬名支持者亦興奮雀躍。
「比奧巴馬克林頓好」
北卡州是搖擺州分，擁15張選舉人票，八年前大選奧巴馬贏得此州、四年後卻敗北，目前希拉莉在此州的支持度僅僅領先特朗普兩個百分點。米歇爾致辭時，提醒選民應該選一位秉持正確態度的人做領袖，形容希拉莉是歷來準備最充足的總統候選人，「比奧巴馬好、亦較克林頓好，由第一日開始已準備做三軍總司令」。米歇爾知道「有人談論第一夫人如此活躍競選是前所未見，而這樣為曾經打對台的前第一夫人背書更是新奇」，但皆因「今屆亦是一場前所未見的大選」，強調她與希拉莉理念與想法上惺惺相惜所以走在一起，並推銷希拉莉的公共服務、女性權益及育兒政策政綱。米歇爾過往已多次穿州過省在希拉莉競選活動上發言，被視為希拉莉的最強代言人，但兩人同台現身今次尚算首次。英國《衞報》
來源:
http://hk.apple.nextmedia.com/international/art/20161029/19815778
尾場騷三代同台賣溫情子華撐中基場 合唱狂走音
1 :
GS(14)@2017-02-02 02:34:08【大放笑彈】■男神黃子華前晚踩入紅館，為鄭中基個唱任嘉賓，即場上演棟篤笑。
鄭中基一連四場「PLAY IT AGAIN世界巡迴」演唱會，前晚圓滿結束。闊別紅館十年的鄭中基今次碌盡人情卡，繼大年初二請來分手十八年的舊愛楊千嬅上台合唱，尾場嘉賓亦好有睇頭，除有索爆天后陳慧琳，男神黃子華亦於安哥時現身，尖叫聲震爆紅館。子華上台後即時開talk，之後跟鄭中基合唱《風的季節》，可惜全首歌錯key，走音走到尾。最溫情是鄭家三代同台，鄭中基更在台上啜爆愛妻余思敏。
鄭中基闊別紅館十年，今年成功爭取到紅館農曆年檔期，由年三十晚唱到年初三，場場爆滿。嘉賓陣容亦好鼎盛，除杜汶澤、薛凱琪、LMF、吳君如、林敏驄、梁詠琪及舊愛楊千嬅，前晚尾場嘉賓亦具睇頭，有天后陳慧琳及男神黃子華。男神子華駕到，除了上演棟篤笑，還跟鄭中基合唱一曲《風的季節》，唱歌前他自爆試過在張國榮面前唱歌，唱完被電影監製問他可否有一句不走音，全場觀眾即拍掌大笑。子華又叫鄭中基要忍讓他，因他多數會走音，鄭中基雖安慰他指「冇咁嘅事」，但子華開口即錯key，結果走音走到尾。
【深情咀嘴】■鄭中基和老婆余思敏在台上深情擁吻。
【仔女上台】■鄭中基囡囡晚晚都有到紅館，前晚與爺爺及弟弟一齊上台。
台上咀老婆
子華在台上大放笑彈，笑鄭中基食過牛歡喜還能唱情歌，又說：「我一向對唱歌嘅人有個好大好奇心，點解成日唱歌就走埋去握手『掗』時間？我自己從來未試過，好想去試吓。我想做一個實驗，我?家同你握，你嗰邊啲人係咪覺得好討厭？握到極咪握廿個，呢個仲唔握嘅㖭，花晒時間喺呢一邊，你後面嗰啲覺得討唔討厭呀呢個行為？但係新年要做㗎，有利是㗎嘛，但點解Kelly有，我就冇？」要數前晚最溫馨場面，是鄭中基三代同台，鄭中基囡囡Emma及囝囝Evan都有上台，Emma唱賀年歌，鄭東漢就抱孫仔Evan錫鄭中基一啖。鄭中基老婆余思敏於安哥前上台，兩公婆在台上情深一吻，余思敏罕有開腔：「大家好！我好緊張呀！我好耐冇揸住支咪喺大家面前講嘢，好多謝大家咁支持佢。」她指老公鍾意唱歌，要面對好大壓力：「我可以做到嘅嘢好少，只能夠喺佢後面畀佢最強大嘅後盾同支持，等佢可以冇任何後顧之憂，做佢鍾意同需做嘅嘢。」鄭中基聽罷即哽咽說：「導演你咁樣想搞喊我，係冇好結果㗎！」
■黃子華（左）與鄭中基合唱《風的季節》，結果全首唱錯key。
■鄭中基瞓身收譚詠麟的利是。
■譚詠麟和胡楓前晚穿上紅衣現身撐場。
■陳浩民與老婆拍拖到紅館睇騷。
鄭中基完騷後於慶功宴受訪，問他打算如何「還債」？他說：「冇呀，預咗㗎喇，總之同佢哋講有乜需要我一定幫手。」記者笑指子華唱歌走音，鄭中基說：「冇事喎！可能喺我ear mon聽佢把聲好細聲。」問為何找千嬅，卻不找前妻蔡卓妍（阿Sa）任嘉賓？他謂：「搵千嬅係因為佢翻唱咗《閉目入神》。」是否與阿Sa少聯絡？他承認很少，但指找千嬅做嘉賓有問過太太。採訪：黃曉妍攝影：陳慧安
來源:
http://hk.apple.nextmedia.com/entertainment/art/20170201/19913966
同台灣老公離婚黃心美撻着保釣烈士細仔陳安立
1 :
GS(14)@2017-06-26 03:22:542017-06-22 NM
馬國明女友港姐心穎BB（黃心穎），樣貌同身材都有番咁上下，就好多人都知，但原來他們黃氏四姊妹心美、心妙同心慧，個個都係靚女級人馬，真係一門四美。大家姐黃心美係viuTV台花，15年底同台灣老公離婚，一直未有新戀情，就連已經搵到筍盤馬國明的細妹黃心穎，都替家姐着急，聯同豹哥（單立文）安排相睇飯局，但有樣有身材的黃心美根本唔dry，同viuTV同門師弟、保釣烈士陳毓祥細仔Brian陳安立，已經秘戀兩個月，Brian更上埋心美位於油塘的Ocean One寓所，入屋見晒家長。鍾意高大男
三十五歲宅男女神黃心美（Scarlett），因為同台灣前夫Thomas分隔兩地，導致感情轉淡，一五年底正式離婚，結束四年多婚姻生活，回復單身的心美亦專心發展事業，對感情毫不心急，即使身邊不乏狂蜂浪蝶，追求者有專業人士亦有富二代，但心美都睇唔上眼，但原來她最近揀了比她細五年，高大靚仔的viuTV新寵Brian陳安立。二十九歲的陳安立原來大有來頭，父親是香港保釣烈士陳毓祥，母親劉舜卿是教育機構校監，父親的一班好友梁錦松、朱培慶、麥潤壽、曹貴子醫生更加係睇住Brian成長，而受父親經歷影響，Brian亦比同齡的年輕人思想成熟兼有責任感。講過鍾情高大猛男的心美，前夫Thomas已經高人一等，比她高出成個頭，所以六呎一吋的Brian，啱晒女神杯茶。
唔要贍養費
「Scarlett（黃心美）唔隱瞞，一早已經話明揀男友一定要高大靚仔，當年佢同前夫都係一見鍾情，但結婚之後，Scarlett留香港發展，工作愈嚟愈忙，同住喺台灣嘅老公見面時間愈嚟愈少，最後都要分開，但Scarlett好硬淨，佢由細到大都唔鍾意靠男人，所以離婚佢亦唔要贍養費！佢覺得自己賺錢自己使先有安全感！」黃心美友人說。由於與Brian同屬viuTV旗下，兩人去年開始經常孖住工作，日見夜見擦出愛火。「好多時收工，佢哋都一齊食飯，加上佢兩個都鍾意講英文，大家同聲同氣特別啱傾，最初佢哋都成日搵埋經理人掩護先約出街，但依家已經三人行變咗二人行！」知情者說。
一早入埋屋
上週四（六月八日），黃心美與Brian在旺角出席完活動，同坐經理人車返回心美位於油塘的Ocean One寓所，落車時，Brian更好有風度幫女友開埋車門。兩人一同返上寓所，大約一小時後再度落樓，今次就帶埋心美的兩隻摩天使狗仔，似足一家四口到樓下拍拖！拖住狗拍拖的確幾浪漫，兩人行行吓更加突然同狗仔追逐係咁跑，兩人亦忍唔住笑到咔咔聲，相當sweet！其間兩人路過地產鋪，更加停低研究，本身已經有兩層樓喺手的黃心美，唔通咁快就想同Brian一齊築愛巢，更手指指似乎對其中一個樓盤好有興趣。
一門四美
一屋四美的黃氏姊妹花，四姊妹感情要好，可能同闖娛樂圈關係，心美同四妹心穎就特別投契，由於二妹心妙長居澳門，三妹心慧又是空姐關係經常四圍飛，心美心穎就經常孖公仔一齊去街。比家姐遲入行的黃心穎，就曾公開表示家姐傳授唔少做主持經驗給她，令她初次做主持亦無咁大壓力。畢業於英屬哥倫比亞大學的黃心美，操得一口流利英語及普通話，加上樣子甜美擅於執生，已成近期當紮主持，每月平均都有超過十個主持工作，收入不俗，難怪一三年能以一千二百萬買入現居的Ocean One物業連車位，去年再以四百二十萬，與細妹黃心穎一同購入加拿大一個住宅單位連車位。
計劃搬走
同家姐一樣有驚人潛力的黃心穎，上月亦斥資八百多萬買入啟德新盤天寰一個兩房單位升呢做業主。「依家心穎同兩個家姐一齊住喺油塘，雖然間屋有三間房，但同馬明拍拖之後，心穎都想有自己私人空間，拍拖都方便啲，所以收樓之後，都會搬出去住！」知情者說。除了在娛圈發展順利的心美心穎，已經嫁人的二妹黃心妙，老公是澳門銀行界富二代，即使已經是三個小朋友媽咪，身材一樣索爆，一四年黃心妙啱啱生完二女，因為撐洗米華老婆Heidi出席活動，剛坐完月的她穿著性感晚裝艷壓全場，至於三妹心慧，一樣是航空之花，身邊不乏追求者，男友亦揸開篷Audi經常接載心慧，果然個個咁搶手！
保釣烈士父親
年僅29歲的陳安立，其父親為21年前，香港保釣烈士陳毓祥，96年9月26日，保釣運動領袖陳毓祥，於釣魚島宣示中國主權，而不幸在海中被繩索纏住及被船隻撞傷頭部而遇溺身亡，遺下太太及一對年幼子女，而陳安立當年只得8歲。12年，陳安立參加nowTV舉辦的「CEO選拔賽」獲得兩獎而入行，曾主持now觀星台及芒果台，去年正式加入viuTV簽約成為藝人，並於劇集《三一如三》中飾演健身教練，大晒胸肌。陳安立亦實現父親生前遺願，自組了一隊籃球隊Hero。
四千金
心美心穎的父親黃沛霖行醫多年，95年舉家移民到加拿大，繼而回流返港，四位千金自小生活無憂。
黃心美Scarlett（大家姐）現年三十五歲的黃心美，於英屬哥倫比亞大學畢業，早年於溫哥華讀書，被發掘當電視節目主持，06年，回流返港簽約東亞做歌手，可惜被派到無綫任娛樂台主持，發展不順利；現時她在nowTV及viuTV主持節目，不時參與廣告拍攝，加上樣子甜美，被網民視為「宅男女神」；感情方面，11年與拍拖五年的台灣男友結婚，可惜二人經常分隔異地，15年離婚收場。
黃心妙Shelby（二家姐）34歲的黃心妙，09年嫁澳門商人，誕下兩子一女，並定居澳門，其丈夫龔偉鵬於澳門人脈甚廣，開設Ritz Entertainment Production，主辦演唱會、運動事業活動，黃心妙一直相夫教子，不時與丈夫現身ball場，過住闊太生活。
黃心慧Shirley（三家姐）現年31歲，為國泰空姐，Shirley一樣樣靚身材正，熱愛旅遊，卻不愛成為公眾人物，不時於網上大晒旅遊照。
黃心穎Jacqueline（孻女）年僅28歲，12年香港小姐亞軍入行，拍過不少電視劇，近年人氣急升，主持《學是學非》，又拍《東坡家事》、《與諜同謀》等電視劇，套套擔正女二，受無綫力捧。
撰文：娛樂組攝影：陳亦龍、李溢敏