N 年前，當無線電視仲未係 CCTVB 嘅時候，有個節目叫《第一桶金的故事》。當時我年紀細，冇興趣聽白手興家創業賺過百萬嘅古仔，所以冇睇。
到家下，就快三張嘢， CCTVB 製作《我要做老闆》節目，擺到明抄 BBC "Dragon Dan"，要參加者去 sell 橋，畀評判審犯咁審。分別只係，英國節目製作認真，做評判嘅都係天使投資者，真金白銀同你入股湊大你間 start-up，而香港嗰個，其實請財經演員上去講兩句都得，得啖笑。
咁又當然，《我要做老闆》再水皮，都唔夠《搵個好男人》來得多鳩餘。即係，搵班「女神」輪流上去，由「翠如 BB 」到「細細粒」逐個參加者評頭品足，然後畀幾個心心就話你知有冇機會發展。發展？女明星要搵食，駛唔駛大庭廣眾考察打分？呢個節目物化男性或者隱性歧視女演員無本事 (?!) 搵真愛，文藝青年休班文字督察好應該追殺到底啦，係咪先？
講遠咗。 So99y。
其實第一桶金呢個概念，真係唔知邊度嚟。一百萬港紙，喺十幾年前或者夠買三分之二個美孚新邨單位，今時今日，連三分一個沙田第一城細單位都未必買到。當年搵到一球可能好值得威威，家下，夠結婚都未必夠畀首期上車。
但點都好，創業得到一百萬，總係值得景仰嘅。喂，係創，唔係抄，唔好同我講《神抄之塔》嗰個古仔。我佩服夠膽喺香港地創業嘅人，因為香港人對 comfort zone 依賴性好強，由以前讀醫讀 Law 讀 engine ，到家下讀 global business cross over law / account / politics / medic (?!) / engine (?!?!) 然後殊途同歸入銀行做 trainee，呢條康莊大道，平坦亦平庸，保你三餐溫飽，組織小康之家，係咁多。至於要到幾多歲先搵到一百萬？無謂諗喇。
本來，香港早幾年仲有多兩、三條路畀人行，炒炒賣賣，股票好住宅商舖車位好，打個乞嚏就隨時係股神，炒樓摸貨樓換樓隨時搵得多過你老豆老母成世人收入加埋再乘二。無啦，家下樓市死寂 (差在未死直)，股市亦無復當年勇，想靠財股殺出一條血路，都幾難。
不過如果你問我，我始終覺得，諗到條好橋創業、度到個 business model 持之以恆，先係最難能可貴。炒賣嘅嘢，可以係好眼光，可以係符碌。尤其是，當一切來得太容易，瞬間變富豪嘅時候，人嘅心理可以變得唔平衡，一步登天之後點樣企穩馬步更上一層樓？登高見博係好，但太快嘅話好易變咗博見高登。
創業同炒賣，同樣係賺取第一桶金嘅手段，但創業似認真談戀愛然後奉獻第一次，而炒賣致富，比較似老蘭夜蒲一夜情，瞓醒一覺之後如何自處，係一個好問題。
但係喺 2014 年嘅香港，搵盆水 (或者屙篤尿) 照下自己個樣，自問係咪真係咁把炮可以「可持續發展」「把握機遇」「將核心產業」「做大做闊做強」？要跟貼今時今日啲飄移龍門去玩呢個遊戲，即使有王維基嘅魄力加黎智英嘅諗頭，都未必好得過有馮煒光嘅識時務。輸唔起、過唔到自己過關或者怕落地獄嘅話，倒不如都係疊埋心水乖乖地打份工。
瞓啦柒頭。