上週更新 (19 Jan - 25 Jan) PARTIPRAL - ROAD TO FINANCIAL FREEDOM
http://partipral-hk.blogspot.hk/2014/01/19-jan-25-jan.html組合單位值: 112.57
組合週回報: -2.18% (2014年回報: +6.80%)
現金水平: 28% (前週: 2%)
澳門股上週出現重要調整, 而週五股王騰訊亦跟隨倒下. 正如之前留言所講, 若然今轉中細價股炒作浪潮真的由澳門股及騰訊所帶起, 兩者見頂, 或許亦是今轉狂潮的轉捩點. 早前跟紅頂白勇字行頭無所謂, 但千萬唔好頭昏眼熱以為自己買果堆股真係好好景, 講到底, 所謂環保, 彩票, 物流, 手遊等等, 可能純粹只係受資金帶動而起舞. 呢堆所謂強股累積升幅甚巨, 贏家一路買上黎感覺良好當然唔介意大注疊上去, 但依家明顯已見短期頂部, 只會愈來愈多人唔介意賺少D TAKE左PROFIT先, 上週會是一個頗關鍵的轉角位, 增持現金是最理想做法.
基於以上想法, 上週組合亦作出相應操作. 依家係鬥快止賺既時候, 自已已經將甚麼DYNAM JAPAN(6889), 中芯國際(981), 金保利新能源(686), 金蝶(268), 富智康(2038), 舜宇(2382), 匯彩(1180)等等全部剪掉, 主要係呢抽野圍起都贏幾多, 當然唔介意沽哂出街; 而嘉裡物流(636), 金山(3888), 珠船(560), 深國(152)等則算是自己幾鍾意既股票, 唔捨得全數撤退, 但可以減持的部份都已經減左.
呢幾個月二, 三線股其實炒得好勁, 所以回起上黎仲有人肯接. 如光大(257), 御泰(555)等, 上週四指數跌得最急一段仍有力反攻. 但正因如此, 反而更值得恐慌 - 依一刻才衝入場既人肯定叻極有限, 炒到水尾先搖旗大叫GOGOGO, 分分鐘又儲多堆蟹貨, 日後回升阻力更加大. 無辦法估計今轉調整會去到幾深, 但澳門股一日未喘穩, 二, 三線股肯定無運行.
不能完全捨棄港股, 由於歐美復甦會是今年頗明確的投資主題, 自己會比較鍾意出口股如德昌(179)及創科(669), 希望稍後會吸引到資金停泊. 中海油服(2883)亦是另一隻自己信念較強的股票, 今年公司會繼續好景, 執著於配股後貨入強手的概念, 止蝕位近, 算是值搏. 已經接近半年無參與期權買賣, 今次都頂唔順要買返一堆澳門股及騰訊PUT, 抹左月中高位, 兩者對比數月前仍然累積甚大升幅. 當係頂住個倉又好, 搏調整未完又好, 兩者皆屬最佳做淡對象. 預左輸哂, 點挾都唔怕.
星期二才贏緊11%, 轉個頭已經嘔返5個出去. 上星期是做錯太多決定, 搏中資股反彈更是錯到離譜. 炒股票大忌係被勝利沖昏頭腦, 如上週提到, 現今市況逆轉的速度往往比想像中更快, 形勢不就, 轉打防守會是比較明智的做法.