ZKIZ Archives


新式貧富差距 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20131225/18565286

聖誕日,祝各位讀者聖誕快樂,身體健康,家宅和諧,與人為善。聖誕之前,矽谷大富豪,fb創辦人兼大股東Zuckerberg向一個慈善組織Silicon Valley Community Foundation捐出一千八百萬股fb嘅股票,以星期一收市價每股57.77美元計,總值十億三千九百八十六萬美元,接近80.5億港紙,呢筆捐款咪話唔犀利,實在大手筆。在十二月二十日,fb宣佈會發售舊股及新股共七千萬股,每股作價55.05美元,總值三十八億五千三百五十萬美元,其中有四千一百三十五萬股係舊股,由創辦人Zuckerberg出售,即係話大老闆會得到二十二億七千六百三十餘萬美元,主要係用來繳交行使認股權而衍生出嚟嘅個人所得稅,其餘用作捐款,睇怕真係落袋嘅(以佢嘅收入及財富標準嚟睇)恐怕所剩無幾。問題係fb股價在2012年5月上市後,迅速跌破上市價38美元,低見17元左右,現反彈至高位,市場是否願意在股價接近52周高位時接貨啫。
呢個「矽谷社區基金會」設於山景市(Mountain View)即Google總部所在地,行善不限於矽谷區內,例如颱風海燕摧殘菲律賓,該機構亦發功捐款援助菲律賓災民,不過矽谷富豪多,有錢打工仔周街都係,籌募善款比較容易,故此聲勢日大。
聖誕前沽售舊股做大善事,全世界都拍掌讚好。諷刺嘅係矽谷科技公司發大達之餘,創辦人及眾多有幸僱員,憑認股權發曬達,在矽谷周圍買大屋租靚屋,推高曬屋價與租金,啲非科技公司嘅基層打工仔就受到欺壓咯,三藩市嘅蘋果公司辦公樓被人包圍示威,奧克蘭市嘅Google員工穿梭巴士俾人破壞,指責「你們享用免費膳食,我們在你製造的昂貴世界掙扎求存!」眼紅症之禍患,莫過於此,問過三藩市豪宅區居住嘅一位老友,佢話當地有嚴格租金管制,貫徹咗幾十年,市內冇租客願意搬屋,佢間豪宅公寓係租嘅,月租只不過千幾美元,但新樓呢,一房單位,月租接近三千美元,啲年輕人根本租唔起,而矽谷僱員大把水,乜租都可以負擔,因此引起其他市民不滿,此乃現代科技與財技合流炮製出嚟嘅貧富懸殊,即使大老闆捐錢也無法解決!

PermaLink: https://articles.zkiz.com/?id=87284

Next Page

ZKIZ Archives @ 2019